جۇڭگو ازاماتتارىنىڭ قازاقستانعا العاشقى توپتىق ساياحاتتاۋ ۇيىرمەسى جولعا شىقتى

2016.08.08 14:38   كەلۋ قاينارى : حالىق تورابى

　　حالىق تورابى، 8 – تامىز، بەيجيڭ. ءتاڭىرتاۋ تورابىنىڭ حابارلاۋىنشا، جۇڭگو ازاماتتارىنىڭ قازاقستانعا العاشقى توپتىق ساياحاتتاۋ ۇيىرمەسى 6 – تامىز كۇنى تۇستەن بۇرىن ءۇرىمجى قالاسى ديۋوپۋ حالىقارالىق اۋەجايىنان جولعا شىقتى، العاشقى ساياحات ۇيىرمەسىندە 300 ساياحاتشى بار، بۇل ساياحاتشىلار الداعى 8 كۇندە قازاقستاندا ساياحاتتا بولادى.

　　زەينەتكە شىققان 15 جىلدان بەرى تىنباي ساياحاتتاپ كەلە جاتقان دان ۋىنتاۋ ەسىمدى ايەل دە 6 – تامىز كۇنى كورشى قازاقستان ەلىنە ساپارعا اتتاندى.

　　وسى رەتكى ساياحات ۇيىرمەسىن جۇڭگو ساياحات قىزمەتى (شياڭگاڭ) توپ سەرىكتىگىنىڭ شينجياڭ حالىقارالىق ساياحات سەرىكتىگى، شينجياڭ بايتاق باتىس ءوڭىر حالىقارالىق ساياحات سەرىكتىگى، جۇڭگو جاستار ساياحات سەرىكتىگى قاتارلى 6 ساياحات سەرىكتىگى ۇيىمداستىرعان، 6 – تامىزدان 4 – قىركۇيەككە دەيىن بىرنەشە توپتا جولعا شىعادى. استانا مەن الماتىعا ساياحاتتايتىن گرۋپپا ۇشاقپەن 3 رەت ۇشادى؛ استانا، الماتى، وسكەمەن قاتارلى ءۇش ورىنعا ساياحاتتايتىن گرۋپپا ۇشاقپەن 4 رەت ۇشادى؛ الماتى، استانا قالالارىنا ساياحاتتايتىن تاعى ءبىر گرۋپپا ەكى رەت ۇشاقپەن ۇشىپ، ءبىر رەت توسەكتى پويەزبەن جۇرەدى؛ جوعارىداعى 3 ساياحات گرۋپپاسى دا 8 كۇن ساياحاتتا بولادى.

　　72 جاستاعى دان ۋىنتاۋ: ساياحاتتاۋدى بۇرىننان جاقسى كورەمىن، زەينەتكە شىققان 15 جىلدان بەرى ساياحاتتاپ كەلەمىن، ون نەشە مەملەكەتكە بارىم، قازاقستانعا ءالى بارىپ كورمەپپىن. ساياحات سەرىكتىگىنىڭ ۋيچات تۇعىرىنان وسى حاباردى كورگەن سوڭ، دەرەۋ ساياحات ۇيىرمەسىنە تىزىمدەلدىم، بارماعان ەلدەرگە بارىپ كورگىم كەلەدى، - دەيدى. ول بۇل جولعى ساياحاتتا تابيعات كورىنىسى ونى باۋرايدى دەپ ۇمىتتەنەدى، كوركەم تابيعات كورىنىسىنەن ايىرىقشا ءلاززات الاتىنىن ايتادى.

　　ساياحات ۇيىرمەسى جولعا شىعاردان بۇرىن، اق سامايلى انا قازاقتىڭ سالتى بويىنشا شاشۋ شاشىپ، ساياحات ۇيىرمەسىنىڭ ساپارىنا ساتتىلىك تىلەدى. قازاق حالقى قۋانىش ۇستىندە شاشۋ شاشىپ، اق تىلەگىن بىلدىرەدى، بۇل جۇڭگو – قازاقستان ەكى ەلدىڭ ساياحات سالاسىنداعى سەلبەستىگىنە دەگەن اق تىلەكپەن شاشىلعان شاشۋ.

　　تانىستىرۋعا قاراعاندا، جۇڭگو ازاماتتارىنا قازاقستانعا توپتىق ساياحاتتاۋىنا ۆيزا بەرۋ ساياساتىنىڭ اتقارىلۋى جۇڭگو – قازاقستان ەكى ەل ساياحات سەلبەستىگىنىڭ جاڭا بەتىن اشىپ، ەكى ەلدەگى ساياحات سالاسىنداعىلاردىڭ ءوزارا سەلبەستىگىن پارمەندى تۇردە ىلگەرىلەتىپ، ساياحات نارىعىن بىرگە يگەرۋگە، سەلبەستىك ارقىلى ورتاق يگىلىككە كەنەلۋگە، وڭىرلىك ەكونوميكانىڭ دامۋىن بىرگە ىلگەرىلەتۋگە مۇمكىندىك جاراتادى.

　　ساياحات ۇيىرمەسىنىڭ مۇشەسى يان حانىم: ءبىز شەتەلگە شىققاندا تەك وزگە ەلدىڭ كوركىن تاماشالاۋشى عانا ەمەسپسىز، ءبىزدىڭ ارقالايتىن جاۋاپكەرشىلىگىمىز دە بار، شەتەلدىك دوستار ءبىز ارقىلى اسەم جۇڭگونى، كورىكتى شينجياڭدى تۇسىنەدى. ولاردى جۇڭگوعا كەلىپ، ءبىزدىڭ مادەنيەتىمىزبەن تانىسۋعا باۋراۋىمىز كەرەك، - دەيدى.

　　كەلۋ قاينارى: حالىق تورابى