جۇڭگو قازاقتارىنىڭ 2 - كەزەكتى «اقساي ادەبيەت سيلىعىن» تاراتۋ سالتى اقساي اۋدانىندا وتكىزىلدى

2016.08.22 14:59   كەلۋ قاينارى : حالىق تورابى

　　اقساي اۋدانىنان مارالبەك ابدىكارىم ۇلى حابارلايدى. 2016 - جىلى تامىزدىڭ 20 - جۇلدىزى جۇڭگو از ۇلت جازۋشىلار قوعامى مەن اقساي قازاق اۆتونوميالى اۋداندىق ۇكىمەت باس بولىپ، «ۇلتتار ادەبيەتى» جۋرنالى سەلبەسىپ وتكىزگەن جۇڭگو قازاقتارىنىڭ 2 - كەزەكتى «اقساي ادەبيەت سيلىعىن» تاراتۋ سالتى التىن تاۋ باۋرايىنداعى باق مەكەن ــ گانسۋ ولكەسى اقساي قازاق اۆتونوميالى اۋدانىندا سالتاناتپەن وتكىزىلدى. سالت اۋداندىق ويىن - ساۋىق ۇيىرمەسىندەگى بيشىلەردىڭ ورىنداۋىنداعى «شاشۋ» بيىمەن شىمىلدىعىن اشتى. سيلىق تاراتۋ سالتىندا اقساي قازاق اۆتونوميالى اۋداندىق پارتكومنىڭ ورىنباسار شۋجيى، اۋداندىق ۇكىمەتتىڭ اكىمى باعدات مۇرات ۇلى ارناۋ ءسوز سويلەدى. مەملەكەتتىك ساياسي كەڭەستىڭ مۇشەسى، «جۇڭگو جازۋشىلار» جۋرنالىنىڭ بۇرىنعى باس رەداكتورى، ايگىلى جازۋشى اكبار ءماجيت ۇلى، جۇڭگو از ۇلت جازۋشىلار قوعامىنىڭ باستىعى يىن حانيىن، ىشكى موڭعۇل اۆتونوميالى رايونى جازۋشىلار بىرلەستىگى ءتوراعاسىنىڭ ورىنباسارى چيڭ شىڭ قاتارلىلار سالتتا ماڭىزدى ءسوز سويلەدى. سالتقا باعالاۋشىلار مەن الىىس - جاقىننان كەلگەن قوناقتار بولىپ، 300گە تارتا ادام قاتىناستى.

　　بۇل كەزەكتى «اقساي» ادەبيەت سيلىعىنىڭ دايىندىق جۇمىستارى بيىل ناۋرىز ايىنان باستالىپ، شىعارما جيناۋ، شىعارما باعالاۋ سياقتى جۇمىستار جۇرگىزىلگەن بولاتىن. وسى رەتكى سيلىقتى شاراعا 126 تۋىندى جيناقتالعان ەدى. باعالاۋشىلاردىڭ سارالاۋىندا 114 تۋىندى باعالاۋعا قاتىناستىرىلعان. جۇڭگو قازاقتارىنىڭ تۇڭعىش كەزەكتى «اقساي ادەبيەت سيلىعىن» باعالاۋ قاۋلىسى بويىنشا سيلىق ءتورت تۇرگە ءبولىنىپ تاراتىلدى، ياعني «ارىس» سيلىعى، «دارىن» سيلىعى، «التىن كوپىر» سيلىعى جانە «تىڭ تەبىن» سيلىعى.

　　وسى كەزەكتى «اقساي» قازاق ادەبيەت سيلىعىندا باعالاۋ بويىنشا 9 قالامگەر ماراپات تورىنەن ورىن الىپ، سيلىققا قول جەتكىزدى. ورازقان احىمەت ۇلىنىڭ «امانات» (رومان - تريلوگيا) اتتى ءۇش تومدىق رومانى «ارىس» سيلىعىنا يە بولدى. قىرباق نۇرعالي ۇلىنىڭ «اق ءبورى نەگە ۇليدى» (رومان - تريلوگيا) اتتى ءۇش تومدىق رومانى، ءانۋار نۇرعازى ۇلىنىڭ «باقىت بەسىگى» اتتى شىعارماسى، بىلىسبەك ءابدىرازاق ۇلىنىڭ «اققۋدىڭ كوزجاسى» جىر جيناعى، اسان ابەۋ ۇلىنىڭ «قازىرگى قازاق ادەبيەتىنىڭ دامۋ جاعدايى» اتتى عىلمي ماقالاسى «دارىن» سيلىعىنا يە بولدى. قانات قابىكەن ۇلىنىڭ «ءيىرىم» اتتى اڭگىمەسى مەن مۇرات اۋەستىڭ «قۇلجا دەيتىن شايىر وسەر شاھاردا» اتتى ولەڭدەر جيناعى «تىڭ تەبىن» سيلىعىن الدى. حاناليدىڭ اۋدارماسى (سالار ۇلتى) «بوز جىگىتتەر» رومانى (اۆتورى جۇماباي ءبىلال ۇلى )، قاديلا نۇرعالي قىزى اۋدارعان «ءومىر وزەن» (اۆتورى ما جيليان) پوۆەستىنە «التىن كوپىر» سيلىعى بەرىلدى.

　　سيلىق يەگەرلەرى كورەرمەندەردىڭ شاپالاق ءۇنى مەن جۇرگىزۋشىلەردىڭ مارجانداي توگىلگەن سىڭعىرلى داۋىسىمەن اقساي ساحناسىنا كوتەرىلىپ، ەڭبەكتەرى كورىنىپ، كورەرمەندەردىڭ العىس – تىلەكتەرىمەن ماراپاتتارىنا يە بولىپ جاتتى. سونىمەن قاتار اقسايداي كيەلى توپىراقتىڭ جۇڭگو قازاقتارىنىڭ ادەبيەت - كوركەمونەر ىستەرى ءۇشىن وسى ءبىر تاماشا شارانى ورتاعا قويىپ، جۇرگىزىپ، ماراپاتتاپ جاتقاندارىنا سيلىق يەگەرلەرى شەكسىز العىستارىن ءبىلدىردى. سۋرەتتەردى ماقان قاپاس ۇلى تۇسىرگەن

　　كەلۋ قاينارى: حالىق تورابى