قازاقتىڭ ۇلتتىق سپورت تۇرلەرى تۋرالى حالىقارلىق عىلمي كونفەرەنسيا موڭعۇلكۇرە اۋدانىندا وتكىزىلدى

2016.09.26 15:07   كەلۋ قاينارى : حالىق تورابى

　　حالىق تورابى، 22 – قىركۇيەك، موڭعۇلكۇرە. (نۇرعيسا قۇرمانجان ۇلى) ۇلتتىق سپورت تۇرلەرى قازاق ۇلتىنىڭ قىمباتتى ۇلتتىق قازىناسى، قازاق مادەنيەتىنىڭ مايەكتى بولەگى. ۇلتتىق سپورت تۇرلەرىن زەرتتەپ زەردەلەۋ مەن ونى ناسيحاتتاۋ ەشقاشان دا توقىراۋعا ۇشىرامانى ابزال، وسى يگى ماقسات جولىندا جارعاق قۇلاعى جاستىققا تيمەي ەل يگىلىگىنە ەڭبەك ەتىپ جۇرگەن ازاماتتاردىڭ ءبىر جاعادان باس، ءبىر جەڭنەن قول شىعارۋىمەن، قازاقتىڭ ۇلتتىق سپورت تۇرلەرى تۋرالى ورەلى وي ورتاقتاسۋ ماقساتىمەن ۇيىمداستىرىلعان قازاقتىڭ ۇلتتىق سپورت تۇرلەرى تۋرالى عىلمي كونفەرەنسيا 22 – قىركۇيەكتە موڭعۇلكۇرە اۋداندىق ورمانشىلىق مەكەمەسىنىڭ جيىن زالىندا وتكىزىلدى.

　　كوتەرگەن وي – مۇراتى بيىك وسى كونفەرەنسياعا ەلىمىز كولەمىنەن جانە قازاق ەلىنەن قاتىستى قوعامدىق ۇيىمداردىڭ باسشىلارى، قازاق سپورتىن زەردەلەپ جۇرگەن مايتالمان ماماندار، مارتەبەلى جەڭىستەرمەن ەلىن قۋانتقان تانىمالى بالۋاندار جانە اقپارات قۇرالدارىنىڭ تىلشىلەرى قاتىناستى. ايىرىقشا اتاپ وتۋگە تاتيتىنى كۇرەستەن وليمپيادا چەمپيونى جاقسىلىق ۇشكەمپىروۆ پەن تالاي مارتە مەملەكەتتىك دودالاردا جۇلدەنىڭ تورىنەن كورىنگەن سوم بىلەكتى سولتىكەن كوكىش ۇلى قاتارلى بالۋانداردىڭ قاتارعا جايعاسۋى جيلىس مەرەيىن اسىردى.

　　عىلمي كونفەرەنسيا ەكى كەزەڭ بويىنشا وتكىزىلدى، ءبىرىنشى كەزەڭىن ىلە قازاق اۆتونوميالى وبلىستىق قازاق كۇرەسى قوعامدىق بىرلەستىگىنىڭ ءتوراعاسى تۇرعان نۇراسىل ۇلى جۇرگىزىپ، الىس – جاقىننان كەلگەن مارتەبەلى مەيمانداردى تانىستىرىپ، كونفەرەنسيانىڭ ءمان – ماڭىزى تۋرالى توقتالدى، كونفەرەنسيانىڭ بەتاشار ءسوزىن اۆتونوميالى رايوندىق قازاق مادەنيەت قوعامىنىڭ ءتوراعاسى ارىپ زۇرعانبەك ۇلى سويلەپ، قازاقتىڭ ۇلتتىق سپورت تۇرلەرى تۋرالى ورەلى ويلارىن ايتىپ، ەلىمىز قازاقتارىنان شىققان ارقالى بالۋانداردىڭ ەسىمدەرىن تىلگە تيەك ەتتى، قازاق كۇرەسى تاريحىنا التىن ارىپپەن جازىلعان وسى ەسىمدەردىڭ بولاشاق ۇرپاقتارعا بەرەتىن ونەگەسى تۋرالى توقتالىپ، سپورتتىڭ جاستاردى جارقىن ومىرگە جەتەلەيتىنىن باسا اتاپ ءوتتى، ىلە – شالا، موڭعۇلكۇرە اۋدانى اكىمىنىڭ ورىنباسارى جانبولات باتەن ۇلى ءسوز سويلەپ، قۇرمەتتى قوناقتاردى مەيماندوس موڭعۇلكۇرە اتىنان شىن جۇرەكتەن قارسى الاتىنىن ءبىلدىردى.

　　كونفەرەنسيانىڭ ەكىنشى كەزەڭىندە ماماندار بۇراۋى جەتكەن دومبىراداي ءبىر – بىردەن ءسوز كەزەگىن الىپ، ۇلتتىق سپورت تۇرلەرى تۋرالى ۇلاعاتتى ۇندەرىن ورتاعا تاستاپ، قازاق كۇرەسىنىڭ تاريح قاتپارىنداعى ىزدەرىن قازبالاپ، قازاق كۇرەسىنىڭ ەرەجەلەرىن ءبىر ارناعا ءتۇسىرۋ، كۇرەسكە قاتىستى اتاۋلاردى بىركەلكىلەندىرىپ، ونى حالىقارالىق ورەدەگى جارىستاردا دا قازاق ءتىلى بويىنشا الۋ، توعىز قۇمالاق ويىنىنىڭ ەرجەلەرى مەن ونى قالاي جالپىلاستىرۋ، قازاق كۇرەسى مەن توعىز قۇمالاق ويىنى قاتارلى ۇلتتىق سپورت تۇرلەرىن مەكتەپتەردىڭ وقىتۋ باعدارلامالارىنا ەنگىزۋ قاتارلى شىنايى مانگە يە، مايەكتى تاقىرىپتاردا ورەلى ويلارىن جەتكىزدى. ءسوز كەزەگىن العان ماماندار دۇنيە جۇزىلىك قازاق كۇرەسى قاۋىمداستىعىنىڭ ءتوراعاسى سەرىك ادام ۇلى تۇكەيەۆ، ازيا قازاق كۇرەسى قاۋىمداستىعىنىڭ باس حاتشىسى سەرىك كەنەنباي ۇلى قاتارلى قازاق كۇرەسىن ۇلىقتاپ، قازاق كۇرەسىن دارىپتەۋ جولىندا ەلەۋلى ەڭبەك ەتىپ جۇرگەن ازاماتتارعا راحىمەت العىستارىن جاۋدىردى.

　　ىلە قازاق كۇرەسى قوعامدىق بىرلەستىگى وسى رەتكى كونفەرەنسياعا وراي جيناقتاعان عىلمي ماقالالاردى ارنايى كىتاپ ەتىپ قۇراستىرىپ شىققان، كونفەرەنسيا بارىسىندا وسى رەت جيناققا عىلمي ماقالاسى ەنگىزىلگەن اۆتورلاردىڭ ۇزدىك ماقالالارىنا سيلىق بەرىلدى. ماقالا اۆتورلارى قازاقتىڭ ۇلتتىق سپورت تۇرلەرىنىڭ نەگىزى، ۇلتتىق سپورت تۇرلەرىنەن جوعارى مەكتەپتەردە ءىس – شارا ۇيىمداستىرۋدىڭ ءمانى مەن ماڭىزى، توعىز قۇمالاق ويىنىنىڭ كاسىپتىك اتاۋلارى، اسىق ويىنى، قارا جورعا گيمناستيكاسىنىڭ سپورت جانە دەنساۋلىق ساباعى جۇيەسىندەگى رولى مەن ىقپالى قاتارلى كوپتەگەن جاقتاردا وي تولعاپ، قالام تەربەگەن.

　　كونفەرەنسياعا قاتىناسقان مامانداردىڭ كەلتىرگەن دەرەگىنە سۇيەنسەك، قازىر دۇنيە جۇزىندە كۇرەستىڭ 300دەن استام ءتۇرى بار، ونىڭ ىشىندە گرەك – ريم كۇرەسى، دزيۋدو قاتارلى كۇرەس تۇرلەرى الەمنىڭ بەس ءىرى قۇرلىعىنا تانىمالى بولىپ، وليمپيادا ويىندارىنىڭ قۇرامىنا ەنگىزىلگەن. قازاق كۇرەسىن دە وسىنداي دەڭگەيگە جەتكىزىپ، عالامشاردىڭ باسىم كوپ ەلدەرىندە تانىمالى سپورت تۇرىنە كوتەرۋ ءۇشىن ءالى دە زور جۇمىستار ىستەلۋى كەرەك. وسى تۇرعىدا قازىر شينجياڭدا ءىشىنارا ورىنداردا قازاق كۇرەسى ساباقحانا سىرتىنداعى دەنە تاربيە ءتۇرى رەتىندە ەنگىزىلىپ، «تۇيە بالۋانعا» سايكەس، «بوتا بالۋان» جارىستارى وتكىزىلە باستاعان، ءسوز كەزەگىندە قاتىستى ماماندار «بوتا بالۋان» جارىسىن جالپىلاستىرۋ جونىندە ۇسىنىستى ورتاعا قويدى، بۇل ۇسىنىس حالىقارالىق قازاق كۇرەسى قاۋىمداستىعىنىڭ قولداۋىنا يە بولدى.

　　كونفەرەنسيادا ءسوز كەزەگىن العان ايگىلى بالۋان سولتىكەن كوكىش ۇلى ءسوز سوڭىن:

　　بەل بۋىپ، بەلدەسكەندە تۋادى ايبىن،

　　تۇيەدەن جولىن تاپپاي قۇلامايمىن.

　　كوتەرىپ جاۋىرىنىنان جاتقىزباسام،

　　قازاقپىن ءيتجىعسقا ۇنامايمىن.

　　ەل دەگەندە ار قانداي، نامىس قانداي،

　　تاۋ مەن تاسقا سوعىلعان قارىس ماڭداي.

　　ەل دەگەندە جىعىلعان جالىڭ تۇرىپ،

　　ايباتتانىپ كەتۋشى ەڭ ارىستانداي، - دەگەن وتتى ولەڭ جولدارىمەن تۇيىندەدى.

　　ءماندى كەڭەس، مايەكتى تالقى وتكىزگەن ماماندار كونفەرەنسيانىڭ ءساتتى تامامدالعانىنا ريزاشىلىقپەن تاراستى.

　　كەلۋ قاينارى: حالىق تورابى