14 – كەزەكتى «ۇشتاس» فۋتبول جارىسى وتكىزىلدى

2016.10.08 13:59   كەلۋ قاينارى : حالىق تورابى

　　ٵر جىلى مەملەكەت مەرەكەسى قارساڭىندا، ەلىمىزدىڭ جەر – جەرىندە ءبىلىم الىپ جاتقان قازاق جاستارىنىڭ ءبىر اراعا باس قوساتىن دۋماندى تويىنا اينالعان «ۇشتاس» فۋتبول جارىسىنىڭ 14 – كەزەكتى دوداسى 1 -، 2 - قازان كۇندەرى ورتالىق ۇلتتار ۋنيۆەرسيتەتىنىڭ فۋتبول الاڭىندا وتكىزىلدى. جارىسقا ەل ءىشى - سىرتىنان، بەيجيڭنەن باسقا قالالاردان، شينجياڭنان بولىپ جيىنى 30 كوماندا قاتىستى.

　　1 - قازان تاڭەرتەڭ جارىسقا قاتىناساتىن كوماندالار مەن كورەرمەندەر جاسىل الاڭعا جينالىپ، قاز - قاتار ساپقا تۇرىپ، پاراتتان ءوتتى. جارىستىڭ باستالۋ مۇراسىمىنە ورتالىق ۇلتتار ۋنيۆەرسيتەتى قازاق ءتىل - ادەبيەت فاكۋلتەتىنىڭ پارتيا ياچەيكا شۋجيى، پروفەسسور مۇحتار ءابىلقاق ۇلى، بەيجيڭ قازاق بالالار كلۋبىنىڭ باستىعى جانار، بەيجيڭ دەنە تاربيە ۋنيۆەرسيتەتىنىڭ دوكتورانتى ءالي جالەل ۇلى قاتارلى باسشىلار مەن قوناقتار قاتىسقان بولىپ، مۇحتار اعامىز سپورت پەن دەنساۋلىق تۋرالى ماڭىزدى ءسوز سويلەدى. قيمىلدىڭ قىزىعىن اسىرىپ بەيجيڭ قازاق بالالار كلۋبىنداعى سابيلەر مايداندا قارا جورعا بيىنە باسىپ، سپورتشىلاردىڭ ىستىق ىقىلاسىنا بولەندى. سوڭىندا تورەشىلەر ۋاكىلى، سپورتشىلار ۋاكىلى ءسوز سويلەپ، جارىستىڭ ءادىل دە بەرەكەلى وتۋىنە سەرت بەردى. سونىمەن جىل بۇرىن دايىندىق كورىپ، اي بۇرىن ساۋىن ايتقان ءساليقالى قيمىلدىڭ باستالار شاعى دا كەلىپ جەتىپ، ورتالىق ۇلتتار ۋنيۆەرسيتەتى قازاق ءتىل - ادەبيەت فاكۋلتەتىنىڭ «كۇلتەگىن» كومانداسى مەن بەيجيڭ جاراتىلىستىق عىلىمدار ۋنيۆەرسيتەتىنەن ۇيىمداسقان «الاش» كومانداسى جارىستى باستادى.

　　جالپى جارىس جەرەبە سۋىرۋ ءتاسىلى ارقىلى گرۋپپاعا ءبولىنىپ 8 گرۋپپا جارىس وينادى.

　　ءبىر كۇندىك قيان كەسكى جارىس ارقىلى، گرۋپپاداعى يە بولعان ورنىنا قاراي 16 ءار گرۋپپادان ەكى كوماندادان 16 كوماندا سارالانىپ ەكىنشى كۇنگى جارىسقا جولداما الدى. ءارى، شار سۋىرۋ ارقىلى ءوز قارسىلاستارىن تاڭدادى.

　　وسىلايشا ورنالاسقان 16 كوماندا قىرىق مينۋتتىق جارىس ارقىلى بىرەۋدىڭ باعى شاپسا، بىرەۋدىڭ بابى شاۋىپ الدىڭعى سەگىز كوماندادا ىرىكتەلىپ شىقتى. ءارى ناق مايداندا جەرەبە سۋىرىپ ءوز قارسىلاستارىن تاڭدادى.

　　وسىلاي جالعاسقان جارىس اقىرعى ساعاتتارىندا ءوزىنىڭ ءتورت مىقتىسىن دا سارالاپ ۇلگىردى. جانە دە جەرەبە سۋىرۋ ءتاسىلى ارقىلى اتوي كومانداسى مەن بۇركىت كومانداسى، ارلان كومانداسى مەن اق وردا كومانداسى جارتىلاي شەشۋشى جارىستىڭ شىمىلدىعىن اشتى.

　　ءبىر ساعاتقا سوزىلعان قيان كەسكى جارىس ارقىلى بۇركىت كومانداسى مەن اق وردا كومانداسى ءۇشىنشى ورىنعا تالاسۋعا، اتوي كومانداسى مەن ارلان كومانداسى شەشۋشى جارىسقا ءتۇستى.

　　سونىمەن ەكى كۇندىك الامان دودانىڭ اۋەسكەرلەرى اقىرى ءوز جەڭىمپازدارىن سارالاپ شىقتى.

　　شي - ان قالاسىنان كەلگەن بۇركىت كومانداسى 4 - ورىندى ەنشىلەپ 500 يۋان اقشالاي سيلاندى.

　　ءۇرىمجى قالاسىنان كەلگەن اق وردا كومانداسى كىشى جۇلدەگەر بولىپ كىشى جۇلدەگەر لوڭقاسى، 2000 يۋان ناق اقشا، جانە كوماندا مۇشەلەرىنە بىردەن ماراپات مەدالى تاعىلدى.

　　بەيجيڭ عىلىم - تەحنيكا ۋنيۆەرسيتەتىنەن ارلان كومانداسى جۇلدەگەر بولىپ، جۇلدەگەر لوڭقاسى، 3000 يۋان ناق اقشا، جانە كوماندا مۇشەلەرىنە بىردەن ماراپات مەدالى تاعىلدى.

　　باس جۇلدەگەر ۋحان قالاسىنان كەلگەن اتوي كومانداسى بولىپ، اعا جۇلدەگەر لوڭقاسى، 5000 يۋان ناق اقشا، جانە كوماندا مۇشەلەرىنە بىردەن ماراپات مەدالى تاعىلدى. اتوي كومانداسى الدىڭعى رەت «ۇشتاس» جارىسىنىڭ باس جۇلدەسىن الۋ تاريحىن قايتا جاڭالاپ، ۇشتاستىڭ ەكى دۇركىن چەمپيونى اتاندى.

　　مۇنان سىرت ۇزىك تورەشى، ۇزدىك قاقپاشى، ۇزدىك شابۋىلداۋشى، مادەنيەتتى سپورتشى قاتارلى جەكەلەر ماداقتالىپ سيلاندى.

　　كەلۋ قاينارى: حالىق تورابى