«تەز وتەتىن ايلار» اتتى جيناقتىڭ تۇساۋ كەسەرى بەيجيڭدە وتكىزىلدى

2016.11.21 14:39   كەلۋ قاينارى : حالىق تورابى

　　

　　حالىق تورابى، 21 – قاراشا، بەيجيڭ. ءبىر ۇلتتىڭ رۋحاني بايلىعىنىڭ قاينار كوزى سول ۇلتتىڭ بولمىسى مەن ءبىتىمىن بەينەلەيتىن ادەبيەت پەن مادەنيەتتەن باستاۋ الىپ جاتادى. ٵر زاماننىڭ تىنىسىن جىرلاپ، ٵر حالىقتىڭ تاعدىرىن تاڭبالايتىن ادەبيەت اتتى قاسيەتتى ونەردىڭ بەتالىسى دا زامان اۋقىممەن ساباقتاسىپ جاتاتىندىعى بەلگىلى. بۇل كۇندەرى عىلىم مەن تەحنيكانىڭ ادەبيەتكە جاساپ وتىرعان ىقپالى دا از ەمەس. سونىڭ ءبىر اۋىز تولتىرىپ ايتارلىق جاڭالىعى ـــ توراپ ادەبيەتى. سول توراپ ادەبيەتىنىڭ وزىندىك ەرەكشەلىگىن جەتە ءتۇسىنىپ، تاماشا قولدانا بىلگەن جاس جازۋشىلاردىڭ ءبىرى ەركەبۇلان ءمۇتان ۇلى.

　　21 – قاراشا كۇنى بەيجيڭدەگى ورتالىق ۇلتتار ۋنيۆەرسيتەتىندە ەركەبۇلان ءمۇتان ۇلىنىڭ توراپتا جاريالاعان بەي اڭگىمەلەرىنىڭ توپتاماسى نەگىزىندە جيناقتالىپ باسىلعان «تەز وتەتىن ايلار» اتتى اڭگىمەلەر جيناعىنىڭ تۇساۋ كەسەرى وتكىزىلدى. تۇساۋ كەسەر سالتىنا ورتالىق ۇلتتار ۋنيۆەرسيتەتى قازاق ءتىل – ادەبيەت فاكۋلتەتىنىڭ پروفەسسورى، ادەبيەت تانۋشى مۇحتار ٵبىلقاق ۇلى، ۇلتتار باسپاسى قازاق رەداكسياسىنىڭ باستىعى باقىتبەك توقتاسىن ۇلى، قازاقستان اۆەزوۆ اتىنداعى ادەبيەت جانە ونەر ينستيتۋتىنىڭ اعا عىلمي قىزمەتكەرى، فيلولوگيا عىلمدارىنىڭ دوكتورى گۇلجاھان جۇمابەردى قىزى، اتالعان كىتاپتىڭ جاۋاپتى رەداكتورى، ۇلتتار باسپاسى قازاق رەداكسياسىنىڭ قىزمەتكەرى ٶمىرجان سەيسەنقۇل ۇلى قاتارلى قوناقتار قاتىناستى. مۇنان سىرت، بەيجيڭدە قىزمەت ىستەيتىن قازاق زيالىلارى مەن بەيجيڭدە ءبىلىم الىپ جاتقان ستۋدەنتتەردەن 200گە تارتا ادام قاتىناستى.

　　ءسوز كەزەگىن العان باسشىلار مەن قوناقتار اتالعان جيناق جونىندە ءتۇرلى باعالارىن بەرىپ، كوزقاراستارىن ءبىلدىردى. جاس بۋىن قالامگەردىڭ توراپ ادەبيەتىنىڭ ەرەكشەلىگىن ٶز بويىنا سىڭىرە جازعان اڭگىمەلەرى قوناقتاردىڭ جاقسى باعاسىنا يە بولدى. «بەرگەنىنەن بەرەرى مول بولسىن» دەگەن ادەبيەت ماماندارى جاقسى تىلەكتەرى مەن شىنايى باعالارىن بەردى.

　　قيمىل سوڭىندا «تەز وتەتىن ايلار» اتتى جيناقتىڭ اۆتورى ەركەبۇلان ءمۇتان ۇلى شىعارماسىنىڭ جازىلۋى مەن جيناقتىڭ جارىق كورۋى جونىندە ءسوز باستاپ، تەبىرەنىستى كوڭىل – كۇيىن جۇرتپەن ءبولىستى. تۇساۋ كەسەر سالتىن ورتالىق ۇلتتار ۋنيۆەرسيتەتى قازاق ءتىل – ادەبيەت فاكۋلتەتىنىڭ دوكتورانتى دارىنبەك ماعاي ۇلى باسقاردى.

　　ادەبيەت سۇيەر جاستارعا «قوش بول، بۇلاناي»، «كوكەك بۇلدىرگەنگە تويعاندا قايتادى» قاتارلى شىعارمالارىنىڭ توراپتاعى تارالىمىمەن ابدەن تانىس بولعان اۆتوردىڭ «تەز وتەتىن ايلار» اتتى جيناعىنىڭ تۇساۋ كەسەرىنە بەيجيڭدەگى ٵر قايسى ۋنيۆەرسيتەتتەن ارنايى كەلگەن جاستار قول تاڭبا الىپ قۋانا تاراسىپ جاتتى.

　　حابارىمىزدىڭ سوڭىندا اۆتوردىڭ ونەرى مەن ٶمىرى جايلى توقتالساق: ەركەبۇلان ءمۇتان ۇلى 1988 – جىلى 10 – قىركۇيەكتە كۇنەس اۋدانى كەڭسۋ اۋىلىندا دۇنيەگە كەلگەن. قازىر جۇڭگو ينتەرنەت تەلەۆيزياسىنىڭ قازاقشا ارناسىندا رەداكتور، ءتىلشى بولىپ قىزمەت اتقارادى.

　　بەي اڭگىمەلەر جيناعى 2013 – جىلدىڭ قازان، قاراشا، جەلتوقسان ايلارىندا اۆتور قالامىنان تۋىنداعان. سول سەبەپتى جيناق اتى «تەز وتەتىن ايلار» دەپ قويىلعان. جيناقتاعى اڭگىمەلەر ءداستۇرلى ادەبيەت پەن توراپ ادەبيەتىنىڭ جارقىن توعىسىندا جارىق كورگەن.

　　كەلۋ قاينارى: حالىق تورابى