بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>كوپ بەتتىك حابارلار

سامعاي بەر جاس ۇلان

جۇمىكەن مايىربەك ۇلى

2017.02.06 15:56   كەلۋ قاينارى : حالىق تورابى



  سۋرەتتە: ارداق سەرىك قىزى

  ب م ۇ - نىڭ وقۋ - اعارتۋ، عىلىم - مادەنيەت ۇيىمىنىڭ ازيا القالار كەڭەسى مەن جۇڭگو - شەتەل وقۋ - اعارتۋ، اۋىس - كۇيىس ورتالىعى بىرلىكتە وتكىزگەن، پارتيانىڭ 18 - قۇرىلتايىندا العا قويىلعان مادەنيەتتە قۋاتتى ەل بولۋ ستراتەگيالىق رۋحىن جاپپاي دايەكتى تياناقتاندىرۋ، «بارلىق گۇل شەشەك اتسىن، جالپى جارىسا ٴۇن قاتسىن» باعىتىندا تاباندى بولۋ، ادەبيەت - كوركەمونەر جاسامپازدىعى جاڭا ورلەۋىن جەبەۋ، مادەنيەت - كوركەمونەر كاسىپ قابىلەتتىلەرىن جەتىلدىرۋ قىزمەتىن تەزدەتۋ، سوتسياليستىك مادەنيەتتىڭ قاۋىرت گۇلدەنۋى مەن دامۋىنىڭ ساياساتتىق رۋحىن ايگىلەۋ، جاستار مەن جاسوسپىرىمدەردى سوتسياليستىك وزەكتى قۇن كوزقاراسىنا بالۋ ماقساتىنداعى «2017 - جىلعى جۇڭگو جاسوسپىرىمدەر جۇلدىزى (3 - توقساندىق)» مەملەكەتتىك باس جۇلدەگەرلەردى سارالاۋ جارىسى كوكتەم مەرەكەسىنىڭ 1 - كۇنى بەيجيڭ ۇلتتار مادەنيەت سارايىندا ٴوز مارەسىنە جەتكەن ەدى.

  اتالعان شاراعا 30 ۇلكە، قالادان تالدانعان 500 دان اسا جۇلدەگەرلەر ۆوكالدىق ءان ايتۋ، مۋزيكا شالۋ، ٴبي، تاقپاق ايتۋ، ونەر كورسەتۋ، كوركەم جازۋ جانە سۋرەت سىزۋ تۇرلەرى بويىنشا جارىسقا قاتىناسىپ، باق - تالەيلەرىن سىنادى. وسى ءبىر دوداعا الىستان ات ارىتىپ كەلگەن ارداق قارىنداسىمىز ورەندەر A گرۋپپا اسەمونەر ٴتۇرى بويىنشا سۋ بوياۋلى سۋرەت سىزۋدان التىن مەدالدى ەنشىلەدى.

  ارداق سەرىك قىزى 2002 - جىلى 7 - جەلتوقسان شاۋەشەك قالاسىندا دۇنيەگە كەلگەن، قازىر ٴۇرىمجى قالالىق 36 - قازاق ورتا مەكتەپتىڭ ورتالاۋ 2 - جىلدىعىنىڭ وقۋشىسى. باستاۋىشتىڭ سوڭعى جىلدىقتارىنان باستاپ سۋرەت سالۋعا قىزىعۋشىلىق تانىتقان جاس تالانت يەسى باستاۋىش 6 - جىلدىقتان باستاپ ۇستازى مۇرات مۇعالىمنىڭ جۇيەلى تاربيەسىندە تەز سىزبا، ادام پورترەتىن سىزۋ، سۋ بوياۋلى سۋرەت سىزۋدىڭ قاعيدالارىن، رەڭ بەرۋ شەبەرلىگىن تەز يگەرىپ، ٴوزىنىڭ سۋرەت سىزۋ جاعىنداعى تالانىتىن ايگىلەيدى. ەستەرىڭىزگە سالا كەتەر بولساق، ارداق وتكەن جىلى تامىزدا شينجياڭ ۇيعۇر اۆتونوميالى رايوندىق وقۋ - اعارتۋ مەڭگەرمەسى جاعىنان ۇيىمداستىرىلعان مەملەكەتتىك 14 - كەزەكتى جۇڭگو ونەرلى ورەندەردىڭ كوركەمونەر مەرەكەسى شينجياڭ جارىس رايونى بويىنشا التىن مەدالمەن ماراپاتتالىپ بەيجيڭگە جولداما العان.

  «جاقسىنى كورمەككە» دەگەندەي، ٴبىر جاعى «اۋىلعا التى جاسار بالا كەلسە، الدىنان الپىستاعى كاريا شىعىپتى» دەگەن اتالى سوزگە ءيىلىپ، ۇلتتار باسپاسى قازاق رەداكسياسىنىڭ بۇرىنعى باستىعى، پەنسيونەر اعام ٴالىمجان نۇرعازى ۇلىنا سەرىك بولىپ، ارداققا جانە ونىڭ ٴۇي ىشتەگىلەرىنە امانداسا باردىق. ءون - بويىنان اۋىل ٴيىسى اڭقىعان اڭقىلداق ارداق قارىناسىم ٴبىزدى كورگەن جەردەن كوڭىلىندەگى قۋانىشىن بەتىنىڭ شۇڭقىرىنا ۇيالاتىپ، جىميا كەلىپ امانداستى. بىز دە الاقايلاپ كەلگەن اقجولتاي بالانىڭ ماڭدايىنان سيپاپ، بارەكەلدى ايتتىق. امان - سالەمنەن سوڭ اڭگىمەمىز ارداقتىڭ جەتكەن جەتىستىكتەرى جايلى بولدى.

  مەن باستاۋىشتىڭ 6 - جىلدىعىنا شىققاننان باستاپ سۋرەت سىزۋعا اۋەستەندىم، بوس ۋاقىت بولا قالسا بولدى كەزكەلگەن كورىنىستەردى قاعاز بەتىنە شيمايلاي بەرەتىنمىن، تولىقسىز ورتا مەكتەپكە شىققان جىلى كوكتەن ىزدەگەنىم جەردەن تابىلعانداي قازىرگى ۇستازىم مۇرات مۇعالىمعا جولىعىپ، ول كىسىدەن سۋرەت سالۋدىڭ قىرى مەن سىرىن تاپتىشتەي ۇيرەندىم. وتكەن جىلى تامىزدا شينجياڭ ۇيعۇر اۆتونوميالى رايونى وقۋ - اعارتۋ مەڭگەرمەسى ۇيىمداستىرعان مەملەكەتتىك 14 - كەزەكتى جۇڭگو ونەرلى ورەندەردىڭ كوركەمونەر مەرەكەسى شينجياڭ جارىس رايونىندا التىن مەدەلمەن ماراپاتتالىپ، بەيجيڭگە جولداما السام، مىنە بۇگىن استانامىز بەيجيڭدە ۇلكەن ساحنادا بوي كورسەتىپ، باس جۇلدەنى جەڭىپ الدىم، وسى ايتاقالسىن جەتىستىكتەرىم مۇرات مۇعالىمنىڭ زەيىن قويا تاربيەلەۋى جانە شەشەم جازيرانىڭ قولداۋىنىڭ ارقاسى، ــ دەپ اڭگىمەسىن ىركە بەرگەن قارىنداسىمىزعا اڭگىمەنىڭ كورىگىن ٴتىپتى دە قىزدىرا تۇسۋ ٴۇشىن، قازىرگى كەزەڭدەگى وقۋ - اعارتۋ جوسپارى بويىنشا، اۋەستىك تانىتۋ، ونى ارى قاراي دامىتۋ سوناۋ بالالار باقشاسىنان، نەمەسە باستاۋىشتىڭ تومەن جىلدىقتارىنان باستاۋ الىپ جاتادى، ال، سەنىڭ اۋەستىگىڭ باستاۋىشتىڭ سوڭعى جىلدىقتارىنان باستالادى، ٴارى وسىنشاما قىسقا ۋاقىت ىشىندە مەملەكەتتىك سيلىقتى قانجىعاڭا بايلاپ ۇلگىرگەنىڭ تەكتەن تەك ەمەس شىعار دەگەن ويىمىزدى بۇلىك ەتكىزگەنىمىزدە ارداق قارىنداسىمىز بىلاي دەپ اڭگمەسىن ساباقتادى:

  «بالاپان ۇيادا نەنى كورسە، ۇشقاندا سونى الادى» دەگەن اتالى ٴسوز بار، دەگەنمەن دە، بالالار باقشا دا جۇرگەندە بولسىن، باستاۋىشقا تۇسكەندە بولسىن، مەندە سۋرەتكە دەگەن اۋەس مۇلدە بولعان جوق، شىندىعىن ايتقاندا، اكە – شەشەم دە، ماڭايداعى ارالاساتىن ادامدار دا سۋرەت سىزۋمەن اينالىسپايدى، اركىم ٴوز جۇمىسىمەن جۇرگەندىكتەن، مەندە بالالىق قيالمەن بەلگىلى ٴبىر نارسەگە اۋەستەنەيىن دەگەن وي مۇلدە بولعان جوق، تەك سىناۋدان وتسەك، كوڭىل قوشتىعى سول بولدى. سويتىپ، ٴاني - ٴمانيدى ساناپ جۇرىپ، باستاۋىشتىڭ سوڭعى جىلدىقتارىنا دا تاياپ قالدىق. وسى ءبىر كەزدەردە ٴبىرى ورتانىڭ اسەرى بولسا، ەندى ٴبىرى مەنىڭ كوڭىل قالاۋىم مەنى سۋرەت سىزۋعا تىنىمسىز يتەرمەلەدى، مەنىڭ كوڭىل تورىمنەن سونداي ٴبىر اۋەستىك بوي كوتەردى. جوعارىدا ايتقان ورتانىڭ اسەرى دەگەندە، سول كەزدە مەنىڭ ماڭايىمداعى حانزۋ ساباقتاستارىم الدە قاشان، سوناۋ بالالار باقشاسىنان، ياكي باستاۋىشتىڭ ٴبىرىنشى جىلدىعىنان باستاپ مەيلى اۋەستىگى بولسىن - بولماسىن ٴبىر - ٴبىر ونەردىڭ تۇتقاسىن ۇستاپ ۇلگىرىپتى. مىنە وسىلاي نەشە جىل ۇيقىدا جاتقان كوركەمونەر كلەتكالارىم مەنى بىرتىندەپ سۋرەت سىزۋعا الىپ كەلدى، كەيىنتىندە وسىنداي جاسىرىن تالانتتىڭ اشىلعانىنا ۇيدەگىلەردە الاقايلاپ، قولداۋ كورسەتتى، سونىمەن ٴار ەكى جاقتىڭ جانە ٴوزىمنىڭ تىنباي قۇلشىنىسىمنىڭ ارقاسىندا ٴبىراز جەتىستىكتەرگە قول جەتكىزگەندەي بولدىم، ــ دەپ ٴبىر تىنىستاعان ارداق ءسوزىن ونان ارى شيراتىپ، ــ مەنىڭ قاراۋىمشا سۋرەت سىزۋ ٴبىر ٴتۇرلى ٴتىلسىم ونەر، سۋرەت سىزۋ ادامنىڭ باقىلاۋ، ويلاۋ، جاسامپازدىق قابىلەتتەرىن جەتىلدىرۋدەن سىرت، سۋرەت سىزۋ ادامدى ورنىقتىلىققا، قاجىرلىلىققا، ۇقىپتىلىققا، قاراپايىمدىلىققا تاربيەلەيتىن اسا تاماشا ٴبىلىم قاينارى، ول مەنى ۇلكەن - ۇلكەن ساحنالارعا شىعارىپ قالماي، مەنى كىسىلىكتىڭ داڭعىل جولىنا باستاپ باراجاتقانداي سەزىلەدى، ــ دەپ ٴوزىنىڭ ونەر جولىندا تۇيگەنىن دە بۇكپەسىز الدىمىزعا جايىپ سالدى.

  ءيا، ارداق قارىنداسىمىز ايتقانداي تالانت تۋما قاسيەت بولسا، ال اۋەستىكتە تۋىلعاننان كەيىن ورتانىڭ ىقپالىندا قالىپتاساتىن قاسيەتتىڭ ٴبىرى. تۋما تالانتتىدا، اۋەستىكتى دە دەر كەزىندە بايقاپ، وعان دۇرىس، عىلىمي جەتەكشىلىك ەتۋ اتا - انالاردىڭ بۇلتارتپاس بورىشى بولسا كەرەك. بورىش ادا ەتىلسە ۇلتىمىزدان ارداقتاي تالاي ۇزدىكتەر شىعاتىنىنا سەنىمىمىز كامىل.

  كەلۋ قاينارى: حالىق تورابى

【1】 【2】 
جاۋاپتى رەداكتورى : نۇرعيسا قۇرمانجان ۇلى

 سۋرەت