«نۇرلى جىبەك جولىنداعى قاۋىشۋ» اتىنداعى كونسەرت وتكىزىلدى، ديماش قۇدايبەرگەن ۇلى ءان ايتتى

سۋرەتتەرىن تۇسىرگەن: زاۋرە قازىمبەك قىزى (ۇلتتار سۋرەتتى جۋرنالى)، ەركەبۇلان ءمۇتان ۇلى (ورتالىق تەلەۆيزيا تورابى)

2017.04.18 01:37   كەلۋ قاينارى : حالىق تورابى

　　كونسەرتتە جۇڭگو راديو – كينو سيمفونيالىق وركەسترى سۇيەمەل جاسادى.

　　حالىق تورابى، 18 – ءساۋىر، بەيجيڭ (نۇرعيسا قۇرمانجان ۇلى). جۇڭگو مەن قازاقستاننىڭ ديپلوماتيالىق قارىم – قاتىناس ورناتقاندىعىنىڭ 25 جىلدىعىن قۇتتىقتاۋ، جۇڭگو مەن قازاقستان اراسىنداعى مادەنيەت اۋىس – كۇيىسىن اناعۇرلىم كۇشەيتۋ، «ءبىر بەلدەۋ، ءبىر جول» اياسىندا حالىق تىلەگىن توعىستىرۋ ءۇشىن جۇڭگونىڭ مادەنيەت مينيسترلىگى مەن قازاقستاننىڭ جۇڭگوداعى باس ەلشىلىگى بىرگە ۇيىمداستىرعان «نۇرلى جىبەك جولىنداعى قاۋىشۋ» اتىنداعى كونسەرت 17 – ساۋىردە بەيجيڭ كونسەرت زالىندا وتكىزىلدى.

　　كونسەرتتە قازاقستاندىق وپەرا ءانشىسى مايرا مۇحامەت قىزى، سكريپكاشى ايمان مۇساقوجايەۆا، «ءانشىمىن» اتتى بايقاۋدا ەكىنشى ورىنعا يە بولعان ديماش قۇدايبەرگەن ۇلى، باريتون ءانشى ازات مالىك ۇلى، قازاقستاننىڭ «شات» فولكلورلىق ءانسامبىلى، سكريپاشىلار ءانسامبىلى، جۇڭگولىق دريجەر تاۋ فان، جۇڭگو راديو – كينو سيمفونيالىق وركەسترى ونەر كورسەتتى.

　　جۇڭگو مادەنيەت مينيسترلىگى شەتەلدەرمەن مادەني بايلانىس مەكەمەسىنىڭ باستىعى شيە جينيڭ: بۇل كونسەرت «جىبەك جولى» مەن «نۇرلى جولدىڭ» قاۋىشۋى، ەكى ەل مۋزيكاسىنىڭ قاۋىشۋى، مادەنيەتىنىڭ قاۋىشۋى، ەكى ەل حالقىنىڭ تىلەكتەرىنىڭ، جۇرەكتەرىنىڭ قاۋىشۋى. بۇل رەتكى قاۋىشۋ جۇڭگو مەن قازاقستاننىڭ مادەنيەت اۋىس – كۇيىسىنە اناعۇرلىم تاماشا جول اشاتىن بولادى، - دەدى.

　　قازاقستاننىڭ جۇڭگوداعى ەلشىسى شاحرات نۇرىشەۆ: بيىل قازاقستان مەن جۇڭگونىڭ ديپلوماتيالىق قارىم – قاتىناس ورناتقاندىعىنىڭ 25 جىلدىعى، وسى كەزەڭدە ەكى مەملەكەت اراسىنداعى تاريحي تامىرى تەرەڭ بايلانىستارىمىز، جان – جاقتىلى ستراتەگيالىق ارىپتەستىگىمىز، جانە ءوزارا تۇسىنىستىگىمىز جاڭا دەڭگەيگە كوتەرىلدى. قازاقستان مەن جۇڭگو ءوزارا ىنتىماقتاستىقتى، دوستىقتى ودان ارى دامىتۋعا مۇددەلى. ەكى ەل حالقى اراسىنداعى بايلانىستى نىعايتۋعا حالىقتىق ديپلوماتيانىڭ ۋاكىلدەرى سانالاتىن ايگىلى انشىلەردىڭ، مۋزيكانتتار مەن وركەسترلەردىڭ قوساتىن ۇلەسى زور، - دەدى.

　　كەلۋ قاينارى: حالىق تورابى