شينجياڭ راديو – تەلەۆيزيا تورابى شەكتى جارنا سەرىكتەستىگىنىڭ «باۋىرساق» ۇجىمى ۇيىمداستىرعان، ەلجاۋ (شاڭحاي) مادەنيەت تاراتۋ شەكتى سەرىكتەستىگىنىڭ «ساق تايپاسى» ۇجىمى سەلبەسكەن «ارمان جانە تالعام» اتىنداعى «باۋىر . ساق» لەكسياسى 2017 – جىلى 3 – ماۋسىمدا بەيجيڭدە تابىسپەن اياقتادى. بۇل ءىس – شارانى ۇيىمداستىرۋداعى ماقسات: بۇگىنگى ءداۋىر اعىمى جاستارىمىزدىڭ الدىنا قويىپ وتىرعان جاڭالىق جاراتۋ مەن مۇراگەرلىك ەتۋ، اعىمعا ۇيلەسۋ مەن قادامىنان جاڭىلماۋ، اسقاق ارمان مەن رەال ءومىر اراسىنداعى قايشىلىقتاردى قالاي شەشىم ەتۋ جونىندە جاۋاپ ىزدەستىرۋ. سوندىقتان دا، بۇل جولعى ءىس – شاراعا ەرەن ەڭبەكتەرىمەن كوزگە ءتۇسىپ جۇرگەن ءوز سالاسىنىڭ جۇيرىكتەرى ۇسىنىس ەتىلىپ، ولار وزدەرىنىڭ ورەلى ويلارىن ورتاعا سالىپ، كوپشىلىكپەن تالقى كورىگىن قىزدىردى، ءىس – شاراعا قاتىناسقانداردىڭ ءبارى وزگەشە وي ءتۇيىپ قايتتى.
بۇل ءىس – شارادا اڭگىمە ارقاۋى بۇگىنگى عىلىم – تەحنيكانىڭ دامۋى جاعدايى مەن بولاشاقتاعى باعدار تۋرالى ءوربىدى. بۇگىنگى تاڭدا ايدىك مالىمەت ءار سالاعا ەندەپ كىرۋمەن قويماي، ءاربىرىمىزدىڭ كۇندەلىكتى تۇرمىسىمىزعا بۇقپانتايلاپ ەنە باستادى. عىلىم – تەحنيكا مەن ايدىك مالىمەتتىڭ بولاشاقتا ءار سالادان وزەكتى ورىندى ويىپ الاتىنى ءشۇباسىز شىندىققا اينالىپ كەلەدى. لەكسياعا شاقىرىلعان ءۇش قوناعىمىز تارتىمدى تىلمەن، تاتىمدى ويمەن، كاسىپتىك بىلىممەن جانە وزدەرىنىڭ تاجىريبەلەرىمەن بىرلەستىرە وتىرىپ، تاماشا لەكسيا جاساپ، عىلىم – تەحنيكانىڭ تۇرمىسىمىزعا اكەلگەن ەڭ جاڭا وزگەرىستەرىن كورەرمەنگە تانىستىرۋمەن قاتار، ايدىك مالىمەت ءداۋىرىنىڭ قوعام مەن جەكەلەرگە اكەلەتىن ىقپالى تۋرالى اڭگىمە كورىگىن قىزدىردى، كوكەيىندە كوپ ارمانى قانات قاققان جاستاردىڭ ايدىك مالىمەت زامانىنداعى كاسىپ كوزىن اشۋ جولىنا باعدار كورسەتىپ، الدا قوعام تابالدىرىعىن اتتاعالى تۇرعان قازاق ستۋدەنتتەرىنىڭ ساناسىنا ساۋلە شەشىپ، بەتالىستارىنا جول سىلتەدى.
ءىس – شارا اياقتاعاننان كەيىن، لەكسيا جاساعان ءۇش قوناعىمىز كورەرمەنمەن وي – پىكىر الماستىرىپ، ويلى سۇراۋلارعا تارتىمدى جاۋاپ بەردى.
شينجياڭ راديو – تەلەۆيزيا تورابى شەكتى جارنا سەرىكتەستىگىنىڭ «باۋىرساق» مەدياسى ــ باۋىرساق تاڭداپ كورۋ ارناسى، باۋىرساق قولفون دەتالى، باۋىرساق كانالى جانە باۋىرساق ۋيچات تۇعىرى سىندى ءتورت تەكشەنى قامتيدى. ميلليوننان استام قازاق وقىرماندارى بار بۇل تەكشەلەر عالامتورداعى قازاقشا بەينەجازبالاردى جولدايتىن تەكشەلەردىڭ كوشىن باستاپ كەلەدى.
ەلجاۋ (شاڭحاي) مادەنيەت تاراتۋ سەرىكتەستىگىنىڭ ساق تايپاسى ۇجىمى ىشكى ولكەلەردەگى قازاق ستۋدەنتتەرىنە بىرنەشە رەت لەكسيا ۇيىمداستىرعان، بەيجيڭ، شاڭحاي قالالارىنداعى قازاق ستۋدەنتتەر شوعىرلى جەرلەردە وتكىزگەن تارتىمدى لەكسيالارى وقۋشىلاردىڭ وي – ساناسىنا وزگەشە شابىت سيلاپ، القاۋعا بولەنگەن. ۋيچات تۇعىرى مەن ميكروبلوگىندا 100 مىڭنان استام وقىرمانى بۇل ۇجىم ۇلتتىق مادەنيەتتى ۇلىقتاۋدا وزگەشە ەڭبەك ەتىپ، جاڭاشا وي – پىكىردى قالىپتاستىرۋدا تەر توگىپ كەلەدى.
كەلۋ قاينارى: حالىق تورابى