شي جينپيڭ بەرلينگە جەتىپ، گەرمانيا فەدراتسيالىق رەسپۋبليكاسىنداعى مەملەكەتتىك ساپارىن باستادى

2017.07.05 16:34   كەلۋ قاينارى : حالىق تورابى

　　حالىق تورابى، 4 – شىلدە، بەرلين (تىلشىلەر دۋ شاڭزى، گۋان كىجياڭ، فىڭ شۋەجۇن). مەملەكەت ءتوراعاسى شي جينپيڭ 4 – شىلدەدە ارناۋلى ۇشاقپەن بەرلينگە جەتىپ، گەرمانيا فەدراتسيالىق رەسپۋبليكاسىنداعى مەملەكەتتىك ساپارىن باستادى.شي جينپيڭ وتىرعان ارناۋلى ۇشاق گەرمانيانىڭ اۋە كەڭىستىگىنە كىرگەندە، گەرمانيا اۋە ارمياسىنىڭ 2 سوعىس ۇشاعى اۋەگە كوتەرىلىپ قورعاي ۇشتى. سول جەر ۋاقىتى بويىنشا كەشكى ساعات 6 جارىم مولشەرىندە ارناۋلى ۇشاق بەرليننىڭ تەگەل اۋەجايىنا قوندى. شي جينپيڭ مەن حانىمى پىڭ لييۋان ۇشاقتان شىقتى. 21 رەت ساليۋت اتىلىپ، سوعىس ۇشاقتارى كەڭىستىكتە زىمىراپ قۇرمەت ءبىلدىردى. گەرمانيا ۇكىمەتىنىڭ جوعارى دارەجەلى ءمانساپتىلارى ۇشاق باسپالداعىنىڭ جانىنان قارسى الدى. قۇرمەت قاراۋىلدارى قىزىل كىلەمنىڭ ەكى جاعىندا ساپ تۇزەپ تۇردى.

　　شي جينپيڭ جۇڭگو حالقى اتىنان گەرمانيا حالقىنا ىقىلاستى سالەم جولدادى ءارى ىزگى تىلەك ءبىلدىردى. شي جينپيڭ بىلاي دەدى: جۇڭگو مەن گەرمانيا ديپلوماتيالىق قاتىناس ورناتقان 45 جىلدان بەرى ەكى ەل تەڭ تۇرعىدا قۇرمەت ەتۋ، سەلبەسىپ تەڭ يگىلىككە كەنەلۋ رۋحىنا ساي ءار سالاداعى ناقتى سەلبەستىكتى تەرەڭدەتىپ، جۇڭگو – گەرمانيا قاتىناسىنىڭ تىڭ ساتىعا كوتەرىلۋىن ىلگەرىلەتتى. قازىر جۇڭگو مەن گەرمانيانىڭ ءار سالاسىنداعى سەلبەستىگىندە قارىشتاپ دامۋ جاقسى جاعدايى جارىققا شىعىپ وتىر. جۇڭگو – گەرمانيا سەلبەستىگى ەكى ەل حالىقتارىنا ناقتى پايدا جەتكىزدى ءارى جۇڭگو – ەۆروپا، ازيا – ەۆروپا سەلبەستىگىن جەبەۋدە بەلسەندى جەتەكشىلىك جانە ۇلگىلىك رولىن ساۋلەلەندىردى. جۇڭگو مەن گەرمانيا دۇنيە جۇزىندەگى نەگىزگى ەكونوميكالىق تۇلعا رەتىندە كەڭ كولەمدى ورتاق مۇددەگە يە بولىپ قانا قويماي، دۇنيە ءجۇزىنىڭ ورنىقتىلىعى مەن گۇلدەنۋىن جەبەۋگە دە ۇلەس قوسۋ جاۋاپكەرلىكتەرى بار.

　　كەلۋ قاينارى: حالىق تورابى