جۇڭگو شينجياڭ 5 – كەزەكتى حالىقارالىق ۇلتتىق ءبي مەرەكەسى ءۇرىمجى قالاسىندا باستالدى

لو شۋگاڭ ءسوز سويلەدى، شوكىرات زاكىر مەرەكەنىڭ باستالعانىن جاريالادى، نايىم ياسىن باستالۋ سالتىنا قاتىناستى

2017.07.21 13:43   كەلۋ قاينارى : حالىق تورابى

　　حالىق تورابى، 21 – شىلدە، بەيجيڭ. ءتاڭىرتاۋ تورابىنىڭ حابارلاۋىنشا، مادەنيەت مينيسترلىگى، مەملەكەتتىك كەڭەستىڭ اقپارات كەڭسەسى جانە شينجياڭ ۇيعۇر اۆتونوميالى رايوندىق حالىق ۇكىمەتى بىرلىكتە ۇيىمداستىرعان جۇڭگو شينجياڭ 5 – كەزەكتى حالىقارالىق ۇلتتىق ءبي مەرەكەسى 20 – شىلدە كۇنى كەشتە شينجياڭ حالىق قۇرىلتايى سارايىندا باستالدى.

　　مادەنيەت مينيسترلىگىنىڭ مينيسترى، وسى رەتكى ءبي مەرەكەسىن ۇيىمداستىرۋ كوميسسياسىنىڭ قۇرمەتتى ءتوراعاسى لو شۋگاڭ ءسوز سويلەدى، اۆتونوميالى رايوندىق پارتكوم شۋجيىنىڭ ورىنباسارى، اۆتونوميالى رايون ءتوراعاسى، وسى رەتكى ءبي مەرەكەسىن ۇيىمداستىرۋ كوميسسياسىنىڭ قۇرمەتتى ءتوراعاسى شوكىرات زاكىر ءسوز سويلەدى ءارى مەرەكەنىڭ باستالعانىن جاريالادى. ورتالىق كوميتەت پەن مەملەكەتتىڭ قاتىستى مينيسترلىك – كوميتەتتەرىنەن، باسقا ولكە، اۆتونوميالى رايون، توتە قاراستى قالالاردىڭ جانە اۆتونوميالى رايوننىڭ باسشىلارىنان نايىم ياسىن، سۇي يۇييڭ، جاۋ سۋپيڭ، مىڭ دىلي، شۇي حايرۇڭ، ەركىن تۇنياز، مانەن زەينەل ۇلى، گۇلشات ءابدىحادىر، لي شينميڭ قاتارلىلار اشىلۋ سالتىنا قاتىناستى. اۆتونوميالى رايوندىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى تيان ۋىن باستالۋ سالتىن باسقاردى.

　　لو شۋگاڭ بىلاي دەدى: شينجياڭ ەلىمىزدىڭ باتىس تەرىستەگى شەكاراسىنا، ەۆرازيانىڭ وكپە تۇسىنا ورنالاسقان، تابيعي بايلىق قاينارى مول، جەرى ۇلان – بايتاق، تاريحتا ەجەلگى جىبەك جولىنىڭ ماڭىزدى ءدالىزى بولعان، قازىر جىبەك جولى ەكونوميكالىق بەلدەۋىندەگى وزەكتى ءوڭىر. شينجياڭداعى ءار ۇلت حالقى قاجىرلى ەڭبەكتەرى مەن اقىل – پاراساتتارى ارقىلى تاريحتىڭ ۇزاق كوشىندە وزگەشە تارتىمدى، شۇعىلالى مادەنيەت جاراتىپ، جۇڭحۋا ۇلتتارىنىڭ ەرەكشە مادەنيەتىنىڭ ماڭىزدى ءبىر بولەگىن قالىپتاستىردى.

　　قازىر «ءبىر بەلدەۋ، ءبىر جول» قۇرىلىسىن جالپى بەتتىك ىلگەرىلەتۋ سىندى جاعدايدا، مادەنيەت مينيسترلىگى شينجياڭنىڭ مادەنيەت سالاسىنداعى قۇرىلىسىنا ۇزدىكسىز قولداۋ كورسەتىپ، شينجياڭنىڭ ۇزدىك ۇلتتىق مادەنيەتىنە مۇراگەرلىك ەتۋ مەن ساۋلەلەندىرۋدى ىلگەرىلەتتى، شينجياڭنىڭ شەتەلدەرمەن مادەنيەت اۋىس – كۇيىسى مەن سەلبەستىگىن ورىستەتۋىنە قولداۋ كورسەتىپ، جىبەك جولى رۋحىنا مۇراگەرلىك ەتىپ، وركەنيەتتەردىڭ ءوزارا ۇلگى الۋىن ىلگەرىلەتتى.

　　جۇڭگو شينجياڭ حالىقارالىق ۇلتتىق ءبي مەرەكەسى «ءبىر بەلدەۋ، ءبىر جول» بويىنداعى ەلدەردىڭ شەتەلدەرمەن مادەنيەت اۋىس – كۇيىسىن جاسايتىن ماڭىزدى تەكشەسى، اتالعان مەرەكە قازىرگە دەيىن 4 رەت ءساتتى ۇيىمداستىرىلىپ، شينجياڭنىڭ كوركەم وبىرازىن،كورسەتىپ، شەتەلدەرمەن كوركەمونەر سالاسىندا اۋىس – كۇيىس جۇرگىزەتىن تاماشا ماركاسىنا اينالدى.

　　قوعامداعى ءار سالاداعىلاردىڭ بىرلىكتە قۇلشىنۋىنىڭ ارقاسىندا، ءبي مەرەكەسىنىڭ بارعان سايىن جاقسى وتكىزىلىپ، حالىقارالىق ورەدەگى، ۇلتتىق ەرەكشەلىككە يە، بۇكىل حالىق ءلاززاتتاناتىن مادەنيەت تويىنا اينالىپ، شينجياڭنىڭ قوعامىنىڭ ورنىقتىلىعى مەن باياندى تىنىشتىعىن تىڭعىلىقتى ىلگەرىلەتۋگە، «ءبىر بەلدەۋ، ءبىر جول» بويىنداعى ەلدەردىڭ تىلەگىن توعىستىرىپ، «ءبىر بەلدەۋ، ءبىر جول» قۇرىلىسىن وركەنيەت جولى ەتىپ قۇرىپ شىعۋعا بەلسەندى ۇلەس قوساتىنىنا سەنىمىمىز كامىل.

　　كەلۋ قاينارى: حالىق تورابى