شي جينپيڭ كيم جوڭ – ۇنمەن كەڭەس وتكىزدى

2018.03.28 15:09   كەلۋ قاينارى : حالىق تورابى

　　ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، شي جينپيڭنىڭ شاقىرۋىمەن سولتۇستىك كورەيا ەڭبەكشىلەر پارتياسىنىڭ كوميتەت باستىعى، مەملەكەت ىستەرى كوميتەتىنىڭ باستىعى كيم جوڭ – ۇن 25 – ناۋرىزدان 28 – ناۋرىزعا دەيىن ەلىمىزدە بەيرەسمي ساپاردا بولدى. ساپار كەزىندە شي جينپيڭ كيم جوڭ – ۇنمەن كەڭەس وتكىزدى. كەڭەستىڭ الدىندا شي جينپيڭ حالىق سارايىنىڭ سولتۇستىك زالىندا كيم جوڭ – ۇندى قارسى الۋ سالتىن وتكىزدى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن.

　　شينحۋا اگەنتتىگى، 28 – ناۋرىز، بەيجيڭ. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، شي جينپيڭنىڭ شاقىرۋىمەن سولتۇستىك كورەيا ەڭبەك پارتياسىنىڭ كوميتەت باستىعى، مەملەكەت ىستەرى كوميتەتىنىڭ باستىعى كيم جوڭ – ۇن 25 – ناۋرىزدان 28 – ناۋرىزعا دەيىن ەلىمىزدە بەيرەسمي ساپاردا بولدى.

　　ساپار كەزىندە شي جينپيڭ كيم جوڭ – ۇنمەن كەڭەس وتكىزدى. باس شۋجي شي جينپيڭ مەن حانىمى پىڭ لييۋان كوميتەت باستىعى كيم جوڭ – ۇن مەن ونىڭ حانىمى لي شۋەجۋدى قارسى الۋ قوناعاسىسىن بەردى ءارى ادەبيەت – كوركەمونەر ءنومىرىن بىرگە تاماشالادى.

　　كەڭەستىڭ الدىندا شي جينپيڭ حالىق سارايىنىڭ سولتۇستىك زالىندا كيم جوڭ – ۇندى قارسى الۋ سالتىن وتكىزدى.

　　ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي كىچياڭ، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق شۋجيچۋىنىڭ شۋجيى ۋاڭ حۋنيڭ، ورىنباسار مەملەكەت ءتوراعاسى ۋاڭ چيشان قاتىستى قيمىلدارعا جەكە – جەكە قاتىناستى.

　　كەڭەس بارىسىندا شي جينپيڭ ج ك پ ورتالىق كوميتەتى اتىنان كيم جوڭ – ۇننىڭ جۇڭگوعا تۇڭعىش رەت ساپارلاي كەلۋىن قىزۋ قارسى الدى. شي جينپيڭ بىلاي دەدى: ءسىز ج ك پ – نىڭ 19 – قۇرىلتايىنان كەيىن مەن تاعى دا ج ك پ ورتالىق كوميتەتىنىڭ باس شۋجيى بولىپ سايلانعانىمدى، پارتيا ورتالىق كوميتەتى اسكەري ىستەر كوميتەتىنىڭ ءتوراعاسى بولىپ تاعايىندالعانىمدى تەلەگرامما جولداپ قۇتتىقتادىڭىز، جاقىندا تاعى دا الدىڭعى قاتاردا تەلەگرامما جولداپ مەملەكەت ءتوراعاسى، مەملەكەت ورتالىق اسكەري ىستەر كوميتەتىنىڭ ءتوراعاسى بولىپ تاعايىندالعانىمدى قۇتتىقتادىڭىز، بۇعان راقىمەت ايتامىن. وسى رەت جۇڭگوعا ساپارلاي كەلۋىڭىزدىڭ ءساتى وزگەشە، ءمانى زور، بۇل كوميتەت باستىعى جولداستىڭ جانە سولتۇستىك كورەيا پارتيا ورتالىق كوميتەتىنىڭ جۇڭگو، سولتۇستىك كورەيا پارتيالارىنىڭ، ەلدەرىنىڭ قاتىناسىنا ايرىقشا ءمان بەرەتىنىن تولىق بەينەلەدى، ءبىز مۇنى جوعارى باعالايمىز.

　　كيم جوڭ – ۇن بىلاي دەدى: تاياۋدان بەرى جۇڭگودا ءىرى ىستەر، قۋانىشتى ىستەر ۇزىلمەدى، بىلتىر جۇڭگو كوممۋنيستىك پارتياسىنىڭ 19 – قۇرىلتايى تابىسپەن اشىلدى، تاياۋدا مەملەكەتتىك ەكى ءماجىلىس تە ءساتتى اشىلدى، شي جينپيڭ جولداس بۇكىل پارتيانىڭ، بۇكىل ەل حالقىنىڭ قۇرمەتىنە بولەنىپ، باسشىلىق ۇيىتقىسىنا اينالدى ءارى تاعى دا مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى بولىپ سايلاندى، سولتۇستىك كورەيا مەن جۇڭگونىڭ دوستىق ءداستۇرى بويىنشا جۇڭگوعا كەلىپ سىزگە بەتپە – بەت قۇتتى بولسىن ايتۋىمنىڭ ءجونى بار. قازىر كورەي تۇبەگىنىڭ جاعدايى جەدەل جاقسارۋدا، كوپتەگەن ماڭىزدى وزگەرىس تۋىلدى، كوڭىل جانە قاعيدا تۇرعىسىنان باس شۋجي شي جينپيڭ جولداسقا جاعدايدى بەتپە – بەت حابارلاندىرۋعا ءتيىسپىن.

　　شي جينپيڭ بىلاي دەدى: جۇڭگو مەن سولتۇستىك كورەيانىڭ ءداستۇرلى دوستىعىن ەكى پارتيانىڭ، ەكى ەلدىڭ ساقا باسشىلارى ءوز قولدارىمەن سومداعان جانە دەن قويا بەكەمدەگەن، بۇل ــ ەكى جاقتىڭ ورتاق باعالى بايلىعى. سول جىلداردى ەسكە الساق، ساقا باسشىلارىمىز ورتاق مۇرات، سەنىم جانە تەرەڭ توڭكەرىستىك دوستىقپەن ءبىر – بىرىنە سەنىم ارتىپ، ءبىر – ءبىرىن قولداپ، حالىقارالىق قاتىناس تاريحىندا ۇلگى جاراتتى. جۇڭگو مەن سولتۇستىك كورەيانىڭ بىرنەشە ۇرپاق باسشىلارى تىعىز قاتىناستى جالعاستىرىپ، تۋىسقاندارداي بارىس – كەلىس جاساپ كەلەدى. ۇزاق ۋاقىتتىق اماليات بارىسىندا جۇڭگو مەن سولتۇستىك كورەيانىڭ پارتيالارى، ەلدەرى ءبىر – ءبىرىن قولداپ، ءبىر – بىرىمەن سەلبەسىپ، سوتسياليزم ىستەرىنىڭ دامۋىنا ماڭىزدى ۇلەس قوستى. كوميتەت باستىعى جولداس ەكەۋىمىز دە جۇڭگو مەن سولتۇستىك كورەيا قاتىناسىنىڭ باستان وتكىزۋشىسى جانە كۋاگەرىمىز. ەكى جاعىمىز تالاي رەت جۇڭگو مەن سولتۇستىك كورەيانىڭ ءداستۇرلى دوستىعىن ۇرپاقتان ۇرپاققا جالعاپ، اناعۇرلىم دامىتا تۇسەتىنىمىزدى بىلدىردىك. بۇل ــ ەكى جاق تاريح پەن امالياتتى نەگىز ەتىپ، حالىقارالىق، وڭىرلىك جاعدايدى جانە جۇڭگو مەن سولتۇستىك كورەيانىڭ قاتىناسى جالپى جاعدايىن تياناق ەتىپ شىعارعان ستراتەگيالىق تالعامى، سونداي – اق بىردەن – ءبىر دۇرىس تالعام، بۇل مەزەتتىك اۋقىمعا بولا وزگەرمەۋگە ءتيىس، وزگەرمەيدى دە.

　　كەلۋ قاينارى: حالىق تورابى