«جۇڭگو شينجياڭنىڭ كىسىلىك ۇقىق ىستەرىنىڭ دامۋى مەن العا باسۋى» اتتى سۋرەت كورمەسى جەنەۆادا اشىلدى

2019.03.10 14:03   كەلۋ قاينارى : حالىق تورابى

　　شينحۋا اگەنتتىگى، 3 – ايدىڭ 8 – كۇنى، جەنەۆا (ءتىلشى: شى جيانگو، ليۋ چۇي) ب م ۇ كىسىلىك ۇقىق القالار كەڭەسىنىڭ 40 – رەتكى ءماجىلىسى مەزگىلىندە، جۇڭگونىڭ ب م ۇ - نىڭ جەنەۆاداعى ءىس باسقارماسىنداعى جانە شۆەتسارياداعى باسقا حالىقارالىق ۇيىمدارداعى تۇراقتى ۋاكىلدەر ۇيىرمەسى جۇڭگونىڭ كىسىلىك ۇقىق ىستەرىن زەرتتەۋ قوعامىمەن بىرگە 3 – ايدىڭ 4 – كۇنىنەن 3 – ايدىڭ 8 – كۇنىنە دەيىن جەنەۆاداعى حالىقارالىق سارايدا «جۇڭگو شينجياڭنىڭ كىسىلىك ۇقىق ىستەرىنىڭ دامۋى مەن العا باسۋى» اتتى سۋرەت كورمەسىن اشتى. ءتۇرلى مازمۇنداعى سۋرەتتى ماتەريالدار ەكسكۋرسيالاۋشىلاردى باۋراپ، كوپتەگەن شەتەلدىك قوناقتاردىڭ القاۋىنا يە بولدى.


　　جۇڭگونىڭ ب م ۇ – نىڭ جەنەۆاداعى ءىس باسقارماسى مەن شۆەتسارياداعى باسقا حالىقارالىق ۇيىمدارداعى تۇراقتى ۋاكىلى يۇي جيانحۋا مىنانى ءبىلدىردى: بۇل رەتكى سۋرەت كورمەسىن ۇيىمداستىرۋداعى ماقسات كورىكتى، ومىرشەڭدىك قۋاتقا تولى جانە ءار ۇلت حالقى الاڭسىز ءومىر كەشىرىپ جاتقان شينجياڭنىڭ ناقتى جاعدايىن حالىقارالىق قوعامعا تانىستىرۋ بولىپ تابىلادى. شينجياڭداعى ءار ۇلت حالقىنىڭ كىسىلىك ۇقىق جاعدايىنىڭ قالاي ەكەنىن وسى سۋرەتتەردىڭ ءوزى - اق بايانداپ بەرە الادى.


　　يۇي جيانحۋا مىنانى ءبىلدىردى: ءىشىنارا بوتەن نيەتتى ادامدار شينجياڭعا قاتىستى ىستەردە شىندىقتى بۇرمالاپ، كىنالاۋدا، الايدا، شىندىققا تالاس جۇرمەيدى، كوپشىلىك وسى سۋرەت كورمەسى ارقىلى شىندىقتى تانىپ، اق – قاراسىن ايىرادى، الدانبايدى جانە ولاردىڭ پايدالانىپ كەتۋىنە جول بەرمەيدى دەپ سەنەمىز. ول مىنانى ءبىلدىردى: جۇڭگو كىسىلىك ۇقىقتى قورعاۋعا وسكەلەڭ دارەجەدە ءمان بەرەدى، مۇندا از ۇلت باۋىرلاستاردىڭ ۇقىق – مۇددەلەرى دە قامتىلادى. الايدا، كىسىلىك ۇقىقتى قورعاۋدا شىندىقتى بۇرمالاۋعا، قوس ولشەم قويۋعا بولمايدى، وزگە مەملەكەتتەردىڭ يەلىك ۇقىعىنا، تەرريتوريا تۇتاستىعى مەن وزەكتى مۇددەلەرىنە زيان جەتكىزۋگە بولمايدى.


　　بۇل رەتكى كورمەدە 80 نەشە پارشا سۋرەت تاڭدالىپ، شينجياڭنىڭ ۇلتتىق اۆتونوميالى تەرريتوريا ءتۇزىمى، نەگىزگى ساتىداعى دەموكراتيالىق سايلاۋ، ءدىني سەنىم ەركىندىگى جانە از ۇلتتاردىڭ مادەنيەتى قاتارلى كوپتەگەن جاقتارداعى جاعدايىن تانىستىرىپ، ەكسكۋرسيالاۋشىلاردىڭ جۇڭگونىڭ شينجياڭداعى ءار ۇلت حالقىنىڭ ۇقىق – مۇددەسىن قامتاماسىزداندىرۋ جاعىندا قاجىماي – تالماي ىستەگەن قۇلشىنىستارىن اناعۇرلىم ويداعىداي تۇسىنۋىنە وراي جاراتىپ بەردى.


　　كەلۋ قاينارى: حالىق تورابى