بەيجيڭ 2022 - جىلعى قىسقى وليمپيادا سپورت جارىسى مەن مۇگەدەكتەر وليمپياداسىنىڭ قۇت نىشانىن جاريالاۋ قيمىلى وتكىزىلدى

حان جىڭ سالتقا قاتىناستى ءارى قۇت نىشانىن جاريالادى

2019.09.18 16:40   كەلۋ قاينارى : حالىق تورابى

　　«حالىق گازەتى»، 9 - ايدىڭ 17 - كۇنى، بەيجيڭ (ءتىلشى جي فاڭ). بەيجيڭ 2022 - جىلعى قىسقى وليمپيادا سپورت جارىسى مەن مۇگەدەكتەر وليمپياداسىنىڭ قۇت نىشانىن جاريالاۋ سالتى 9 - ايدىڭ 17 - كۇنى كەشتە بەيجيڭدەگى استانا بولات - تەمىر باقشا رايونى مەملەكەتتىك قىسقى سپورت جاتتىعۋ ورتالىعىنىڭ مۇز دوپ سارايىندا سالتاناتپەن وتكىزىلدى. ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى، 24 - كەزەكتى قىسقى وليمپيادا سپورت جارىسىنا باسشىلىق ەتۋ گرۋپپاسىنىڭ باستىعى حان جىڭ سالتقا قاتىناستى، سونداي - اق بەيجيڭ قىسقى وليمپيادا سپورت جارىسىنىڭ قۇت نىشانى «بيڭدۇندۇن» (مۇز كريستالدى مىسىق ايۋ) بولعانىن جاريالادى.

　　9 – ايدىڭ 17 - كۇنى كەشتە مەملەكەتتىك قىسقى سپورت جاتتىعۋ ورتالىعىنىڭ مۇز دوپ سارايىندا شاتتىق لەبى ەستى. ساعات 19 دان 25 مينۋت وتكەندە حان جىڭ مەن حالىقارالىق وليمپيادا كوميتەتىنىڭ ءتوراعاسى توماس باح، مەملەكەتتىك دەنە تاربيە باس مەكەمەسىنىڭ باستىعى، بەيجيڭ قىسقى وليمپيادا سپورت جارىسىن ۇيىمداستىرۋ كوميتەتىنىڭ اتقارۋشى ءتوراعاسى گوۋ جۇڭۋىن، سونداي - اق سپورتشىلار مەن قار - مۇز سپورتى اۋەسكەر ورەندەرىنىڭ ۋاكىلدەرى قۇرىلعىنى بىرگە اشتى، بەيجيڭ قىسقى وليمپيادا سپورت جارىسىنىڭ قۇت نىشانى «بيڭدۇندۇن» جارق ەتىپ ورتاعا شىقتى.

　　بەيجيڭ قىسقى وليمپيادا سپورت جارىسىنىڭ قۇت نىشانى «بيڭدۇندۇندە» مىسىق ايۋ نەگىز ەتىلىپ جاسامپازدىقپەن جوبا جاسالعان. مۇز − كىرشىكسىزدىكتىڭ، قايسارلىقتىڭ سيمۆولى، قىسقى وليمپيادا سپورت جارىسىنىڭ ەرەكشەلىگى. بۇل نىشاندا اق پەيىلدىك، سالاماتتىق، وجەتتىك، سۇيكىمدىلىك بەينەلەنگەن، مىسىق ايۋدىڭ تۇلعالىق وبرازىنا ساي كەلەدى، بۇل − قىسقى وليمپيادا سپورتشىلارىنىڭ شىمىر دەنەسىنىڭ، بەرىك جىگەرىنىڭ جانە جۇرتشىلىققا شابىت بەرۋ سىندى وليمپيادا رۋحىنىڭ سيمۆولى.

　　كەلۋ قاينارى: حالىق تورابى