«جاڭا جۇڭگو قۇرىلعاندىعىنىڭ 70 جىلدىعىن قۇتتىقتاۋ تاقىرىپتىق سۋرەت كورمەسى» قازاقستاندا اشىلدى

2019.09.20 14:45   كەلۋ قاينارى : حالىق تورابى

　　حالىق تورابى، 9 – ايدىڭ 20 – كۇنى، بەيجيڭ. حالىق تورابىنىڭ 9 – ايدىڭ 19 – كۇنى نۇر – سۇلتاننان بەرگەن حابارى (جوۋ حانبو)، 9 – ايدىڭ 18 – كۇنى جۇڭگونىڭ قازاقستاندا تۇراتىن ەلشىحاناسى وتكىزگەن «70 جىلدىق شۇعىلالى تابىس − جاڭا جۇڭگو قۇرىلعاندىعىنىڭ 70 جىلدىعىن قۇتتىقتاۋ تاقىرىپتىق سۋرەت كورمەسى» قازاقستاننىڭ مەملەكەتتىك مۋزەيىندە اشىلدى.

　　جۇڭگونىڭ قازاقستاندا تۇراتىن باس ەلشىسى جاڭ شياۋ اشىلۋ سالتىندا ءسوز سويلەپ بىلاي دەپ اتاپ كورسەتتى: جۇڭگونىڭ قازاقستاندا تۇراتىن ەلشىحاناسىنىڭ وسى رەتكى تاقىرىپتىق سۋرەت كورمەسىن وتكىزۋ ورايى ەرەكشە، ماڭىزى زور. جاڭا جۇڭگو قۇرىلعان 70 جىلدان بەرى جۇڭگو كوممۋنيستىك پارتياسىنىڭ پارمەندى باسشىلىعىندا جۇڭگو حالقى ءبىر نيەت، ءبىر تىلەكتە بولىپ، قاجىرلىلىقپەن كۇرەس جۇرگىزىپ، دۇنيەنى جالت قاراتقان ۇلى تابىستارعا قول جەتكىزدى. جۇڭحۋا ۇلتى ەڭسە كوتەرۋدەن، بايۋدان قۇدىرەتتەنۋگە دەيىنگى تاريحي سەكىرىستى جۇزەگە اسىردى.

　　جاڭ شياۋ بىلاي دەدى: 70 جىلدان بەرگى شۇعىلالى تابىستار وڭاي قولعا كەلگەن جوق، تاجىريبە اسا باعالى. جۇڭگو كوممۋنيستىك پارتياسىنىڭ باسشىلىعىندا جۇڭگو حالقى مەملەكەتتىڭ تاۋەلسىزدىگىن، حاۋىپسىزدىگىن جانە دامۋىن قورعاۋ جولىندا زورلىق - زومبىلىقتان قورىقپاي، تار جول، تايعاق كەشۋلەردەن ءوتىپ، جەڭىستەن جەڭىسكە ۇزدىكسىز قادام تاستادى.

　　جاڭ شياۋ مىنانى باسا دارىپتەدى: جۇڭگو مەن قازاقستان تاتۋ كورشى، جاقسى سەرىك، جاقسى باۋىرلاس، ديپلوماتيالىق قاتىناس ورناتقان 27 جىلدان بەرى ەكى ەل قاتىناسى باياندى، اقاۋسىز، ورنىقتى دامىدى. تاياۋدا توقايەۆ پرەزيدەنت جۇڭگودا تۇڭعىش مەملەكەتتىك ساپاردا بولدى، ەكى ەل باسشىلارى جۇڭگو - قازاقستان قاتىناسىن ماڭگىلىك جالپى بەتتىك ستراتەگيالىق سەرىكتەستىك قاتىناستىڭ تىڭ دەڭگەيىنە كوتەرىپ، ەكى ەل قاتىناسىنىڭ دامۋىنا تىڭ بەت اشۋدى ءبىر اۋىزدان ۇيعاردى. گۋمانيتارلىق سەلبەستىكتى ونان ارى كۇشەيتۋ − جاڭا داۋىردەگى جۇڭگو - قازاقستان قاتىناسىنىڭ ماڭىزدى مازمۇنى، ەكى جاق ەكى ەل حالقىنىڭ ءوزارا ءتۇسىنىسۋىن، حالىق تىلەگىن توعىستىرۋىنا شارت ـ جاعداي ازىرلەپ، وبيەكتيۆ، ناقتى ينفورماتسيالارمەن قامداپ، ات توبەلىندەي اراعا ىرتكى سالۋشىلاردىڭ بۇلىك تۋدىرۋىنان، بۇلدىرۋىنەن قاتاڭ ساقتانۋى كەرەك.

　　قازاقستان مەملەكەتتىك مۇراجايىنىڭ باستىعى مۇحامەت ۇلى مىنانى اتاپ كورسەتتى: قازاقستان مەن جۇڭگو ەكى ەل مادەنيەت سالاسىندا بۇرىننان بەرى تىعىز قارىم – قاتىناستا. قازاقستان مەملەكەتتىك مۇراجايى ەكى ەل حالقىنىڭ تىلەگىن توعىستىرۋعا اناعۇرلىم كوپ ۇلەس قوسۋدى قالايدى. وسى رەتكى كورمە ارقىلى قازاقستان بۇقاراسىنىڭ جۇڭگونىڭ دامۋ جەتىستىكتەرى جونىندە تىڭ تانىمعا جانە تۇسىنىككە يە بولاتىنىنا سەنەمىن.

　　وسى رەتكى سۋرەت كورمەسى ءبىر ايعا جالعاسادى ، كورمە «جۇڭگو حالقىنىڭ ەڭسە كوتەرۋى»، «رەفورمانىڭ كوكتەم سامالى»، «ۇدەرە العا تارتقان جاڭا ءداۋىر» سىندى ءۇش ءبولىمدى قامتىپ، 70 جىلدان بەرى جۇڭگو حالقىنىڭ تاماشا تۇرمىس جاراتۋ جولىندا جۇرگىزگەن ورتاق كۇرەسى جانە قول جەتكىزگەن ۇلى تابىستارى ايگىلەندى.

　　كەلۋ قاينارى: حالىق تورابى