جۇڭگو تانىمالى قاۋىرسىن دوپ شەبەرى حان ايپيڭ قازا بولدى

2019.10.18 14:39   كەلۋ قاينارى : حالىق تورابى

　　حالىق تورابى، 10 – ايدىڭ 18 – كۇنى، بەيجيڭ. ءتىلشىنىڭ حۋبەي ولكەلىك دەنە تاربيە مەكەمەسىنەن راستاۋىنشا، جۇڭگونىڭ تانىمالى قاۋىرسىن دوپ شەبەرى حان ايپيڭ اۋرۋ سەبەبىنەن ەمدەۋ ٶنىم بەرمەي 10 – ايدىڭ 16 – كۇنى كەشتە ۋحاندا 57 جاسىندا قازا بولدى.

　　حان ايپيڭ 10 جاسىنان باستاپ قاۋىرسىن دوپقا جاتتىققان، 16 جاسىندا مەملەكەتتىك كومانداعا كىرگەن، 17 جاسىندا 1979 – جىلى وتكىزىلگەن الەمدىك قاۋىرسىن دوپ جۇلدەلى جارىسىندا تۇڭعىش رەت حالىقارالىق جارىستىڭ اعا جۇلدەگەرلىگىن قولعا كەلتىرگەن. باسكەلىك ومىرىندە حان ايپيڭ كەمەلدى تەحنيكاسى، قايتارماسى تەز، قاتتى بولۋداي ەرەكشەلىگىمەن تور الدىنداعى دوپتى قاعۋدىڭ قاعىلەزى اتانعان، حالىقارالىق جارىستا 8 رەت جەكە ءتۇر بويىنشا اعا جۇلدەگەر، 5 رەت قوس ادامدىق ءتۇر بويىنشا اعا جۇلدەگەر بولىپ، جيىنى 13 التىن مەدال العان.

　　تۇتاس 20 – عاسىردىڭ 80 – جىلدارىندا حان ايپيڭ مەن جۇڭگونىڭ جانە ءبىر تانىمالى سپورتشىسى لي ليڭۋي ءتۇرلى دۇنيە جۇزىلىك جارىستاردىڭ اعا جۇلدەگەرلىگىن كەزەكتەسىپ الىپ وتىردى، ەكەۋى «قاۋىرسىن دوبىنىڭ قوس پاتشايىمى» اتاندى. قاۋىرسىن دوپ جارىسى 1992 - جىلى عانا وليمپيادالىق جارىس تۇرىنە رەسمي ەنگىزىلگەندىكتەن 1990 – جىلى كاسىپتەن شەگىنگەن حان ايپيڭ وليمپيالىق جارىسقا امالسىز قاتىناسا المادى.

　　كاسىپتەن شەگىنگەننەن كەيىن حان ايپيڭ شەتەلدە اتقارۋشى باپكەر ساپارىن باستادى، 2002 – جىلى، ول ەلگە قايتىپ حۋبەي ولكەلىك ايەلدەر قاۋىرسىن دوپ كومانداسىنىڭ باس تالىمگەرى جانە وقىتۋدى زەرتتەۋ گرۋپپاسىنىڭ باستىعى مىندەتىنە ۇسىنىلدى، وسىدان كەيىن جاۋ يۇنلەي، ۋاڭ شياۋلي قاتارلى كوپتەگەن جاقسى سپورتشىلاردى مەملەكەتتىك كومانداعا جىبەردى.

　　سۋرەتتە: حان ايپيڭ حاڭجوۋدا وتكىزىلگەن 2 – كەزەكتى دۇنيە جۇزىلىك قاۋىرسىن دوپ جۇلدەلى جارىسىندا ايەلدەر جەكە ادامدىق جارىسىندا اتتاپ بارىپ دوپ ۇرۋدا (سۋرەت ماتەريالدان الىندى)، ول اتالعان جارىستا اعا جۇلدەگەر بولعان. شينحۋا اگەنتتىگىنىڭ ءتىلشىسى حۋ يۋە فوتوسى

　　كەلۋ قاينارى: حالىق تورابى