جۇڭگو – قازاقستان قورعاس حالىقارالىق شەكارالىق سەلبەستىك ورتالىعىنىڭ جۇڭگو جاق بولىگى جۇمىستى قالپىنا كەلتىردى

2020.03.17 13:32   كەلۋ قاينارى : حالىق تورابى

　　سۋرەتتە: 3 – ايدىڭ 16 – كۇنى ساياحاتشىلار جۇڭگو – قازاقستان قورعاس شەكارالىق سەلبەستىك ورتالىعىنداعى باجىسىز دۇكەننەن زات الۋدا. شينحۋا اگەنتتىگى (لي ميڭ فوتوسى)

　　شينحۋا اگەنتتىگى، 3 – ايدىڭ 16 – كۇنى، ءۇرىمجى (ءتىلشى: حاۋ يۇي، گۋان چياۋچياۋ) جاڭا تيپتى ايدارشا ۆيروس وكپە قابىنۋ ىندەتىنىڭ ىقپالى سەبەپتى، جۇمىستى ءبىرتالاي كۇن توقتاتقان سوڭ، جۇڭگو – قازاقستان حالىقارالىق شەكارالىق سەلبەستىك ورتالىعىنىڭ جۇڭگو جاق بولىگى 3 – ايدىڭ 15 – كۇنى جۇمىستى رەسمي قالپىنا كەلتىردى.

　　سول كۇنى تۇستەن بۇرىن، جۇڭگو – قورعاس حالىقارالىق شەكارالىق سەلبەستىك ورتالىعىنىڭ شەكارادان كىرىپ – شىعاتىن ەسىگىندە ساياحاتشىلار قىزمەتكەرلەردىڭ كومەگىندە دەنساۋلىق كارتۋچكاسىن ءوتىنىش ەتكەن سوڭ، ارالىعى 1.5 مەترلىك سارى سىزىق بويىنشا وشىرەتكە تۇرىپ، رەت بويىنشا شەكارالىق سەلبەستىك ورتالىعىنا كىردى.

　　ءبىرىنشى توپتاعى ساياحاتشىلاردى قابىلداۋ ءۇشىن، جۇيفىڭ باجىسىز دۇكەنىنىڭ باستىعى شۇي جىشيان دۇكەنىن جەدەل رەتتەپ، زات سورەسىنە ءتۇرلى تاۋارلاردى تولتىردى، ول: «دۇكەندەگى تاۋارلاردىڭ ءبارى كورەياداعى زاۆودتا وندىرىلگەن، باعاسى ورتا ەسەپپەن بازارداعى باعاسىنىڭ تەڭ جارىمىنان دا ارزان، سوندىقتان، بۇل زاتتار ساياحاتشىلاردى باۋرايدى»، _ دەدى.

　　جۇڭگو – قازاقستان قورعاس حالىقارالىق شەكارالىق سەلبەستىك ورتالىعى جۇڭگو مەن قازاقستان ەكى ەل شەكاراسىنان اتتاپ جاتادى، جالپى اۋدانى 5.6 شارشى كيلومەتر كەلەتىن بۇكىلدەي تۇيىقتالعان ساۋدا بازارىندا ەكى ەل ازاماتتارى مەن ءۇشىنشى ەل ازاماتتارى تەك پاسپورت نەمەسە شەكارادان كىرۋ رۇقسات كۋالىگى قاتارلى كۇشكە يە كۋالىكتەر ارقىلى ۆيزاسىز كىرىپ – شىعا الادى ءارى بەتپە – بەت ساۋدالىق كەڭەستەر وتكىزىپ، تاۋار ايىرباسىن جاساي الادى.

　　قورعاس ەكونوميكالىق كوركەيتۋ رايونى مەڭگەرۋشىسىنىڭ ورىنباسارى جاڭ يۇڭنيڭنىڭ تانىستىرۋىنشا، جۇمىستى تەز ارادا قالپىنا كەلتىرۋ ءۇشىن جەرگىلىكتى ۇكىمەت كەدەن، شەكارالىق تەكسەرۋ، بازاردى باقىلاۋ، شۇعىل جاعدايلارعا توتەپ بەرۋ قاتارلى تاراۋلاردى بەلسەندىلىكپەن سايكەستىرىپ، ءتۇرلى شارالار ارقىلى سەلبەستىك ورتالىعىنىڭ تەزىرەك اشىلۋىنا شارت – جاعداي جاراتىپ، ساۋداگەرلەردىڭ تارتقان زيانىن ەڭ تومەنگى شەككە دەيىن تومەندەتىپ، سەلبەستىك رايونىنىڭ ەكونوميكالىق ارىنىن جوعارىلاتتى.

　　قازىرگە دەيىن، جۇڭگو – قازاقستان قورعاس حالىقارالىق شەكارالىق سەلبەستىك ورتالىعىندا بەس جۇلدىزدى قوناق ءۇي، اس – سۋ جانە كوڭىل اشۋ ورىندارى، ساۋدالىق قۇرىلعىلار، فينانستىق قىزمەت وتەۋ قاتارلى سالالارداعى 30عا جۋىق ءتۇيىندى نىسان بار، بۇل اراعا ورنالاسقان دۇكەندەردىڭ سانى 5000نان اسادى. ەلىمىزدىڭ «ءبىر بەلدەۋ، ءبىر جول» ۇندەۋىنىڭ ۇزدىكسىز ىلگەرىلەتىلۋىنە بايلانىستى، شينجياڭنىڭ «جىبەك جولى ەكونوميكالىق بەلدەۋىنىڭ وزەكتى رايونىندىق» رولىنىڭ ءتۇيىندى تىرەگى جانە كوشباسشىسى رەتىندە قورعاس كەدەنىنىڭ رولى كۇننەن – كۇنگە كورنەكتىلەنە تۇسۋدە.

　　كەلۋ قاينارى: حالىق تورابى