شينجياڭداعى كاسىپ كوزىن اشۋشىلار: اۋىلعا قايتۋ مەن اۋىلدان اتتانۋ، ساياحات + ەلەكتروندى ساۋدا

2020.04.29 15:00   كەلۋ قاينارى : حالىق تورابى

　　سۋرەتتە: 4 – ايدىڭ 18 – كۇنى شينجياڭ ىلە قازاق اۆتونوميالى وبلىسى كۇنەس اۋداندىق ەلەكتروندى ساۋدا ىستەرىنە الەۋمەتتىك قىزمەت وتەۋ ورتالىعىندا، كاسىپ كوزىن اشقان قايشا جارقىن قىزى كومپيۋتەردىڭ الدىندا قاربالاس جۇمىس ىستەۋدە. شينحۋا اگەنتتىگىنىڭ ءتىلشىسى سۇڭ يانحۋا فوتوسى

　　شينحۋا اگەنتتىگى، 4 – ايدىڭ 28 – كۇنى، ءۇرىمجى (چىن شياۋحۋ، گۋ يۇي، جاڭ جۇڭكاي) ءتورتىنشى ايدىڭ سوڭعى جارىمىندا، بىرنەشە رەت جاۋعان كوكتەم جاڭبىرى تيانشان تاۋىنىڭ باۋرايىنداعى شينجياڭ ىلە قازاق اۆتونوميالى وبلىسى كۇنەس اۋدانىندا جەر – الەمدى قۇلپىرتتى. بىرنەشە كۇننەن بەرى، بۇل اۋدانداعى ەلەكتروندى ساۋدا ىستەرىنە الەۋمەتتىك قىزمەت وتەۋ ورتالىعىنداعىلار قاربالاس قىزمەت ىستەدى، كاسىپ كوزىن اشۋشىلار قىزمەت ورىندارىنا كەلىپ، ينتەرنەتتە زات ساتۋ، دوۋيىندا تىكە تاراتىلىمعا شىعۋ سياقتى قىزمەتتەرىن ىستەپ، جۇمىستى، ءوندىرىستى قايتا قالپىنا كەلتىرۋ ءۇشىن ينتەرنەتتەگى بوگەلىس تۇيىندەرىن تۇتاستىردى.

　　ەلەكتروندى ساۋدا ىستەرىنە الەۋمەتتىك قىزمەت وتەۋ ورتالىعىنىڭ قاقپاسىنىڭ الدىندا تۇرمىن، كوكتەم جاڭبىرى جاۋعان، كۇن سۋىق بولاتىن، قالشىلداپ توڭىپ كەتتىم. ءبىر بويجەتكەن تاكسيدەن ءتۇستى دە، ايالداۋعا مۇرشاسى كەلمەي، شامادانىن سۇيرەپ، قىزمەت وتەۋ ورتالىعىنا كىرىپ بارا جاتتى، جەر تايعاق پا، الدە قاتتى اسىققاندىكى مە، ەسىكتىڭ كوزىنە بارعاندا ءسۇرىنىپ كەتىپ، جىعىلىپ قالا جازدادى.

　　«بۇل بويجەتكەن ەكىنشى قاباتتا جۇمىس ىستەيدى، ۋنيۆەرسيتەت تاۋىسىپ كەلگەن سوڭ، كاسىپ كوزىن اشقان. جۇمىستى، ءوندىرىستى قالپىنا كەلتىرۋگە ءبىر اي بولدى، قىزمەت وتەۋ ورتالىعىنىڭ ساتىلىم سوماسى سايكەستى مەزگىلدەگىمەن سالىستىرعاندا كوپ قۇلدىراعان جوق، زات اينالىمى دا نەگىزىنەن قالىپتى»، − دەيدى ەلەكتروندىق ساۋدا ىستەرىنە الەۋمەتتىك قىزمەت وتەۋ ورتالىعىنىڭ جاۋاپتىسى ليۋ پىڭچىڭ تىلشىگە. قىزمەت وتەۋ ورتالىعى 2018 – جىلى ىسكە قوسىلعاننان بەرى، اۋىل شارۋاشىلىعى ەرەكشە ونىمدەرىن كورسەتۋ، ەلەكتروندىق ساۋدا ىستەرى تيجاراتى، ۋنيۆەرسيتەت تاۋىسقانداردىڭ كاسىپ كوزىن اشۋ ورنى قاتارلى فۋنكتسيالاردى ىسكە قوسىپ، اۋىلعا قايتىپ، كاسىپ كوزىن اشقان ءبىر توپ جاستى جانە سىرت جەردەن كەلگەن كاسىپ كوزىن اشۋشى جاستاردى باۋرادى.

　　قىزمەت وتەۋ ورتالىعىنىڭ ءبىرىنشى قاباتىنداعى زالدا، ەكى قىزمەتكەر كومپيۋتەردىڭ الدىندا قاربالاس جۇمىس ىستەپ جاتىر. ەكىنشى قاباتتاعى كاسىپ كوزىن اشۋشىلار ورتالىعىنا كەلسەم، جاڭا عانا ەكىنشى قاباتقا شىعىپ كەتكەن بويجەتكەن شامادانىن ورنىنا قويۋعا دا ۇلگىرمەستەن، كومپيۋتەردىڭ الدىندا الارماندارمەن جۇمىستى كەڭەسىپ وتىر ەكەن. «ىندەت تالاي ىسكە تۇساۋ بولدى، قازىر كاسىپ كوزىن اشۋ ءۇشىن ۋاقىتپەن تالاسا جۇمىس ىستەمەسكە بولماي قالدى. كەشە تۇندەلەتىپ ۇرىمجىدەن كەلدىم، ۇيگە قايتۋعا دا ۇلگىرمەدىم»، − دەدى ول ءتىلشىنىڭ كۇدىكتى كوزبەن قاراعانىن بايقاپ، تۇسىنىك بەرىپ جاتىپ.

　　بۇل بويجەتكەننىڭ ەسىمى قايشا جارقىن قىزى، كۇنەس اۋدانى تۇرعىن اۋىلىنداعى قازاق وتباسىندا تۋعان. 2017 – جىلى شينجياڭ ۋنيۆەرسيتەتى راديو – تەلەۆيزيا كاسىبىنەن وقۋ تاۋىسقان سوڭ، ساباقتاسىمەن بىرگە ەلەكتروندى ساۋدا ىستەۋگە بەكىنگەن.

　　«بىرنەشە جىلدان بەرى، اۋىلىمىزدا ساياحات كاسىبى بارعان سايىن جاقسارىپ كەلەدى، ساياحات + ەلەكتروندى ساۋدا جاعىندا ساۋدا ورايى مول»، − دەيدى ول، 2020 – جىلدىڭ باسىندا قايشا جارقىن قىزى اۋىلىنا قايتىپ، كاسىپ كوزىن اشۋ ويىنا كەلەدى ءارى تەز ارادا ەلەكتروندى ساۋدا سەرىكتەستىگىن تىزىمگە الدىرادى.

　　«قازىر ءبىز 5 ادامدى قىزمەتكە الدىق، كەلەسى اپتادا قالىپتى تيجارات جاساي الامىز»، − دەيدى قايشا جارقىن نىق سەنىممەن، سەرىكتەستىكتىڭ ەلەكتروندىق ساۋدا تەكشەسىن جاقسى جۇرگىزۋدەن سىرت، ول تاعى ءوزىنىڭ ۋيچات تەكشەسىن دە ويداعىداي جۇرگىزۋى قاجەت. «جەكەلىك اقپارات قۇرالى ارقىلى زات ساتۋدان سىرت، راديو – تەلەۆيزيا كاسىبىنەن ۇيرەنگەندەرىمدى دە ىستەتەتىن ورىن تاپتىم»، − دەيدى.

　　سۇحبات بارىسىندا، ءتىلشى قايشا جارقىن قىزىنىڭ اۋىلعا قايتىپ كاسىپ كوزىن اشۋعا نىق سەنىم ورناتقانىنىڭ سەبەبى جەرگىلىكتى ورىنعا ساياحاتتاپ باراتىنداردىڭ سانىنىڭ جىل سايىن ارتىپ وتىرعاندىعىنان عانا ەمەس، ودان دا ماڭىزدىسى، جەرگىلىكتى ۇكىمەتتىڭ ەلەكتروندى ساۋدا كاسىپ سالاسىن دامىتۋعا جان – جاقتىلى قولداۋ كورسەتىپ وتىرعاندىعىنان ەكەنىن بايقادى.

　　كەلۋ قاينارى: حالىق تورابى