تۇرعىندار سىرتقا شىعىپ زات ساتىپ الدى، دۇكەندەر ەسىك اشىپ قاريدار قابىلدادى

□ انار بۇلت \ شينجياڭ گازەتىنىڭ تىلشىلەرى

2022.12.01 16:59   كەلۋ قاينارى : شينجياڭ گازەتى

　　11 - ايدىڭ 28 - كۇنى، ءۇرىمجى قالاسى شۇيموگوۋ رايونى ەڭبەك كوشەسىنىڭ ماڭىنداعى ”باسبارماق“ پراندىك دۇكەنىنىڭ قىزمەتكەرلەرى جاڭا پىسقان پراندىكتەردى تىزۋدە.

　　 □ سۋرەتتى جاڭ شيۋكى تۇسىرگەن

　　شاعىن اۋماقتان كودتى جايمالاپ شىعۋعا بولادى، تۇرعىندار شاعىن اربالارىن سۇيرەپ سىرتقا شىعىپ تۇرمىستىق كەرەك - جاراق ساتىپ الدى؛ تازالىق ىستەپ، زارارسىزداندىرىپ، ميكروب جويىپ، زات دايىندادى، تومەن حاۋىپ - قاتەرلى اۋماقتاردىڭ كوشە بويىنداعى دۇكەندەر جابال ەسىك اشىپ ساۋدا ىستەدى... ىندەتتەن ساقتانۋ - تىزگىندەۋ شارالارىن قاتاڭ تياناقتاندىرۋ العى شارتىندا، ءۇرىمجى قالاسىنىڭ تومەن حاۋىپ - قاتەرلى اۋماقتارىندا ءوندىرىس پەن تۇرمىس تارتىپپەن قالپىنا كەلدى.

　　11 - ايدىڭ 28 - كۇنى، ءۇرىمجى قالاسى تيانشان رايونى جاستار جولى يۋەگۋاڭ شاعىن اۋماعىنىڭ تۇرعىنى مياۋ چيڭ تاڭەرتەڭگى تاماعىن ءىشىپ بولعاننان كەيىن، كەشە كەشتە جازىپ قويعان زات ساتىپ الۋ تىزىمدىگىن الىپ سىرتقا شىقتى، ”ءبىرتالاي ءدامدى جەمەكتىكتەر ساتىپ الايىن دەپ تۇرمىن“.

　　يۋەگۋاڭ شاعىن اۋماعىنىڭ ماڭىنداعى دۇكەندەر، نەگىزىنەن، تۇگەلدەي ساۋدانى قالپىنا كەلتىرىپتى، مياۋ چيڭ شياڭمايفۋ باتىسشا پراندىكتەرى دۇكەنىنىڭ قاسىنان ءوتىپ بارا جاتىپ، جاڭا عانا سورەگە شىعارىلعان حامبۋرگەرلەر مەن ەتتى بولكالاردىڭ حوش يىسىنە قىزىعىپ، ءارقايسىسىنان ەكىدەن ساتىپ الىپ، دۇكەنشىگە: تاعى باسقا زاتتار الۋشى ەدىم، سالدەن كەيىن كەلىپ الىپ كەتەيىن، - دەپ تاپسىردى.

　　كوشەنى جۇرە ارالاعان مياۋ چيڭنىڭ ەكى قولى بىردەمدە زاتقا تولدى، ”بۇگىن كوشە ارالاپ قۇماردان ءبىر شىقتىم، كوشە دۋماندى ەكەن، جولداعى كوپشىلىكتىڭ قاربالاس بەينەلەرىن كورىپ، ساۋداگەرلەردىڭ ايعايلاپ ساتقان ۇندەرىن تىڭداعان نە دەگەن جاقسى دەسەڭىزشى“.

　　سول كۇنى، ءۇرىمجى قالاسى شۇيموگوۋ رايونى ليۋداۋ - ۋان ءمالىسى ۋىنچۋان باتىس جولى سولتۇستىك 5 - كوشەسىندە دە جەمىس - كوكونىس دۇكەنى، شاعىن ەرەن بازار، شاشتارازحانا جانە كىتاپ دۇكەنى سياقتى كوشە بويىنداعى كوپتەگەن دۇكەندەر ساۋدانى قالپىنا كەلتىردى، ءىشىنارا اس - سۋ دۇكەندەرى دە تازالىق ىستەپ، ورتانى زارارسىزداندىرىپ، ميكروب جويىپ، ساۋدانى قالپىنا كەلتىرۋگە دايىندالىپ جاتتى.

　　جى - اي شاش اسەمدەۋ دۇكەنىنە كىرگەنىمىزدە، دۇكەن قوجايىنى جاۋ رۇڭ مەن جولداسى قاريدارلاردىڭ شاشىن الىپ قاربالاستاپ جاتىر ەكەن، ”ساعات 11دە ەسىكتى اشقاننان باستاپ قازىرگە دەيىن ءبىر ءسات تە تىنىم العامىز جوق“، - دەدى جاۋ رۇڭ.

　　ىرگەدەگى گوران كىتاپ دۇكەنىندە، دۇكەن قوجايىنى ليۋ جۋان دا قاربالاستاپ ءجۇر، ەسىك اشىلعاننان كەيىن قاريدارلار ىركەس - تىركەس كەلىپ مادەنيەت بۇيىمدارىن ساتىپ الىپ، ءار ءتۇرلى ماتەريالدارىن باسىپ شىعارتتى، ”الدىن الا زاكاز بەرگەن تاعى ءبىر توپ ۇيرەنۋ ماتەريالى بار، ءبىر - ەكى كۇندە كەلىپ قالار“، - دەدى ليۋ جۋان.

　　بەسىنشى حۋاڭميان، قاقتاما دۇكەنىندە، دۇكەنشىلەر تازالىق ىستەپ، زارارسىزداندىرۋ، ميكروب جويۋ جۇمىسىن ىستەۋدە، كونە قاريداردىڭ دۇكەنگە كىرىپ سۇراستىرا باستاعانىن كورگەن دۇكەنشى قولىنداعى جۇمىسىن قويا سالىپ: ”بۇگىن ەرتەلەتىپ دۇكەندى اشۋعا دايىندالعانبىز، حۋاڭميانعا، قوي ەتىنە تاپسىرىس بەرىپ قويدىق، ەرتەڭ تاڭەرتەڭ رەسمي ەسىك اشىپ ساۋدا باستايمىز، سوندىقتان تاپ - تۇيناقتاي رەتتەپ، سىزدەردىڭ الاڭسىز جەپ، رازى بولىپ قايتۋلارىڭىزعا مۇمكىندىك جاسايمىز“، - دەپ ىقىلاسپەن ءۇن قاتتى.

　　كۇن شايداي اشىق، بالون دۇكەنى دە توپ - توبىمەن جەتكەن اۆتولىك يەلەرىن قارسى الدى. ”ەسىك اشقانىمىزعا ءبىر ساعاتقا جەتپەيتىن ۋاقىتتا ون نەشە اۆتوكولىك دۇكەنىمىزگە قىستىق بالون اۋىستىرۋعا كەلدى“، - دەدى 11 - ايدىڭ 28 - كۇنى تۇستە ءۇرىمجى قالاسى نانحۋ سولتۇستىك جولىنداعى بالون دۇكەنىن اشاتىن يىن جىڭلياڭ، - ”وسى ەكى كۇندە شاعىن اۋماقتىڭ تۇرعىندارى دا ىركەس - تىركەس سىرتقا شىعادى، كۇن سۋىق، جول تايعاق، اۆتوكولىكتەرگە قىستىق بالون اۋىستىرعاندا عانا الاڭسىز جۇرۋگە بولادى“.

　　ءتىلشى وسىدان كەيىن ءۇرىمجى قالاسى نانحۋ شىعىس جولى، كۇنلۇن جولى سياقتى جەرلەردەگى بالون دۇكەندەرىنىڭ الدىندا كوپتەگەن اۆتوكولىك يەلەرىنىڭ قىستىق بالون اۋىستىرماق بولىپ كۇتىپ تۇرعاندىعىن كوردى. مۇنان سىرت، تاعى ءبىرتالاي اۆتوكولىك يەلەرى رەمونت دۇكەندەرىندە اۆتوكولىكتەرىنە كۇتىمدەۋ جانە رەمونتتاۋ جاساتىپ جاتىر ەكەن.

　　(ءتىلشى گو چيان، قاتىناسقان تىلشىلەر حۋ دامين، جاۋ يۋە، گان شيڭحۋا)