مەملەكەت ءتوراعاسى شي جينپيڭ 2023 - جىلعى جاڭا جىلدى قۇتتىقتاۋ ءسوزىن جاريالادى

2023.01.01 07:59   كەلۋ قاينارى : حالىق تورابى

　　جاڭا جىل قارساڭىندا مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2023 - جىلعى جاڭا جىلدى قۇتتىقتاۋ ءسوزىن جاريالادى. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

　　شينحۋا اگەنتتىگى، 12 - ايدىڭ 31 – كۇنى، بەيجيڭ. جاڭا جىل قارساڭىندا مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2023 - جىلعى جاڭا جىلدى قۇتتىقتاۋ ءسوزىن جاريالادى. ءسوزدىڭ تولىعى تومەندەگىدەي:

　　كوپشىلىك، سالەمەتسىزدەر مە؟! 2023 - جىل كەلۋ الدىندا تۇر، مەن بەيجيڭنەن كوپشىلىككە جاڭا جىلدىق ىزگى تىلەك بىلدىرەمىن!

　　2022 - جىلى ءبىز پارتيانىڭ 20 - قۇرىلتايىن جەڭىسپەن اشىپ، جاپپاي سوتسياليستىك وسىزاماندانعان مەملەكەت قۇرۋدىڭ، جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدىڭ ۇلى جوباسىن جاساپ، ەكپىندەي ىلگەرىلەۋدىڭ جاڭا جورىعىنىڭ ءداۋىر دابىلىن قاقتى.

　　ەلىمىز دۇنيە جۇزىندەگى ەكىنشى ءىرى ەكونوميكالىق تۇلعا ورنىن ۇزدىكسىز ساقتاپ، ەكونوميكا ورنىقتى دامىدى، تۇتاس جىلدا ىشكى ءوندىرىستىڭ جالپى ءونىم قۇنى 120 تريلليون يۋاننان اساتىنى مەجەلەنۋدە. دۇنيە جۇزىلىك استىق داعدارىسى الدىندا ەلىمىز استىق وندىرىسىندە قاتارىنان 19 جىل مول ءونىم الۋدى جۇزەگە اسىردى، جۇڭگولىقتار اس كەسەسىن ءوز قولىندا مىقتاپ ۇستادى. ءبىز كەدەيلىكتەن ارىلتۋدان قامال الۋدىڭ جەتىستىكتەرىن بەكەمدەپ، اۋل - قىستاقتى گۇلدەندىرۋدى جاپپاي ىلگەرىلەتىپ، سالىقتى ازايتىپ، اقىنى تومەندەتۋ سياقتى جەلىلەس شارالاردى قولدانىپ، كاسىپورىنداردىڭ قيىنشىلىعىن شەشىپ، حالىق بۇقاراسىنىڭ شۇعىل، قيىن، ۋايىمداعان، ءزارۋ ماسەلەلەرىن كۇش سالا شەشتىك.

　　ىندەت تۋىلعاننان بەرى ءبىز باستان - اياق حالىقتى بارىنەن جوعارى قويۋدا، ءومىردى بارىنەن جوعارى قويۋدا تاباندى بولىپ، عىلمي، دالمە - ءدال ساقتانۋ - تىزگىندەۋدە تاباندى بولىپ، ساقتانۋ - تىزگىندەۋ شارالارىن ۋاقىتقا، جاعدايعا قاراي ساپالىلاندىرىپ، رەتتەپ، حالىقتىڭ ءومىرىنىڭ حاۋىپسىزدىگى مەن دەنساۋلىعىن ەڭ جوعارى شەكتە قورعادىق. قالىڭ كادر - جۇرتشىلىق، اسىرەسە، ەمدەۋ قىزمەتكەرلەرى، نەگىزگى ساتىداعى قىزمەتكەرلەر جاپا - ماشاقاتتان تايسالماي، جۇمىس ورىندارىندا قايسارلىقپەن تابانداپ ىستەدى. قاجىرلى قۇلشىنىس ارقىلى ءبىز بۇرىن بولىپ كورمەگەن قيىنشىلىقتار مەن سىن - سايىستى جەڭدىك، ءاربىر ادام جونىنەن وڭايعا سوققان جوق. قازىر ىندەتتەن ساقتانۋ - تىزگىندەۋ جاڭا كەزەڭگە ءوتتى، ءالى دە ايانباي ەڭبەكتەنۋگە ءتيىستى مەزگىلدە تۇرمىز، كوپشىلىك قايسارلىقپەن قاجىماي – تالماي قۇلشىناتىن بولسا، شۇعىلالى ساتكە دە قادام تاستايتىن بولامىز. كوپشىلىك، تاعى دا قايراتتانايىق، تاباندى بولۋدىڭ ءوزى − جەڭىس، ىنتىماقتىڭ ءوزى − جەڭىس.

　　2022 – جىلى ءبىز جياڭ زىمين جولداستان ايرىلىپ قالدىق. ءبىز ونىڭ ۇشان - تەڭىز ۇلى ەڭبەگى مەن وسكەلەڭ قاسيەتىن شىنايى ەسكە الىپ، ودان قالعان باعالى رۋحاني بايلىقتى قاستەرلەيمىز. ءبىز ونىڭ مۇراتىنا مۇراگەرلىك ەتىپ، جاڭا داۋىردەگى جۇڭگوشا سوتسياليزم ىستەرىن ۇزدىكسىز العا ىلگەرىلەتۋىمىز كەرەك.

　　تاريحتىڭ شالقار كوشى قۇلاشىن كەڭگە جايدى، ۇرپاقتان – ۇرپاققا كۇش جالعاپ كۇرەس جۇرگىزۋدىڭ ناتيجەسىندە جۇڭگونىڭ بۇگىنى جاراتىلدى.

　　بۇگىنگى جۇڭگو − ارمان ىسكە اسقان جۇڭگو. بەيجيڭ قىسقى وليمپياداسى، مۇگەدەكتەر قىسقى وليمپياداسى ءساتتى وتكىزىلدى، قار – مۇز شەبەرلەرى جارىس الاڭىندا قۇيعىتىپ، ماقتان تۇتارلىق ناتيجەگە قول جەتكىزدى. شىنجوۋ 13 – ءنومىرلى، 14 – ءنومىرلى، 15 – ءنومىرلى بىرىنەن كەيىن ءبىرى ءساتتى ۇشىرىلدى، جۇڭگونىڭ كەڭىستىك بەكەتى جاپپاي قۇرىلدى، ءبىزدىڭ «عارىش وتاۋىمىز» اسپان الەمىندە ساياحاتتاپ ءجۇر. حالىق ارمياسى 95 جىلدىق مەرەي تويىن قارسى الدى، قالىڭ كوماندير - جاۋىنگەرلەر ارميانى قۇدىرەتتەندىرۋ ءۇلى ءىسى ساپارىندا اسقاق جىگەرمەن ۇدەرە العا تارتتى. 3 - اۆياماتكا «فۋجيان» ءنومىرلى ىسكە قوسىلدى، تۇڭعىش C919 ءىرى تۇرپاتتى جولاۋشىلار ۇشاعى رەسمي پايدالانۋعا بەرىلدى، بايحىتان سۋ ەلەكتر ستانسياسى جاپپاي وندىرىسكە قوسىلدى... وسىنىڭ بارىنە سانسىز ادامنىڭ قاجىرلى ەڭبەگى مەن ماڭداي تەرى سىڭگەن، ۇشقىننان جالىن قاۋلاپ، قۇدىرەتتى كۇش – قۋات توپتالدى، مىنە، بۇل − جۇڭگو كۇشى!

　　بۇگىنگى جۇڭگو − ومىرشەڭدىك كۇشكە تولى جۇڭگو. ەركىن ساۋدا سىناق رايوندارى، حاينان ەركىن ساۋدا پورتى قارىشتاپ دامىپ، تەڭىز جاعالاۋىنداعى وڭىرلەر بەلسەنە جاڭالىق اشىپ، ورتا، باتىس بولەكتەگى رايوندار جەدەل دامىپ، شىعىس سولتۇستىكتىڭ گۇلدەنۋى باستالۋ الدىندا تۇر، شەكارا وڭىرلەر شەكارانى گۇلدەندىرىپ، حالىقتى اۋقاتتاندىردى. جۇڭگو ەكونوميكاسىنىڭ سەرپىمدىلىگى كۇشتى، كومەسكى كۇشى زور، ومىرشەڭدىك كۇشى مىعىم، ۇزاق ۋاقىت جاقسارۋ نەگىزگى جاعدايى ءالى دە وزگەرمەيدى. سەنىمدى بەكەمدەپ، ورنىقتىلىق بارىسىندا العا ۇمتىلساق بولعانى، بەلگىلەگەن نىسانالارىمىزدى، ءسوز جوق، ىسكە اسىرا الامىز. بيىل شياڭگاڭعا باردىم، شياڭگاڭنىڭ بىلىقپالىقتى جونگە سالۋدان گۇلدەنۋگە قادام تاستاعان جاعدايىن كورىپ كوڭىلىم ەرەكشە جاي تاپتى. «ءبىر ەل، ەكى ءتۇزىمدى» بۇلجىماستان ويداعىداي تياناقتاندىرساق، شياڭگاڭ، اۋمىن ۇزاق ۋاقىت گۇلدەنىپ، ورنىقتىلىققا يە بولادى.

　　بۇگىنگى جۇڭگو − ۇلتتىق رۋح جالعاستىرىلعان جۇڭگو. وسى ءبىر جىلدا تۋىلعان جەر سىلكىنىسى، تاسقىن، قۋاڭشىلىق، تاۋ ءورتى سياقتى جاراتىلىستىق اپاتتار مەن كەيبىر حاۋىپسىزدىك شىرعالاڭدارى ادامدى الاڭداتادى، ادامدى قايعىعا سالادى، ءبىراق ادىلەت جولىندا باسىن ءباي تىگىپ، ءبىر - بىرىنە قارايلاسقان كورىنىستەر ادامدى تەرەڭ اسەرلەندىرەدى، قاھارمانداردىڭ ىزگى ىستەرى ءبىزدىڭ جۇرەگىمىزدە ماڭگى ساقتالادى. ءار جولى كونە جىلدى اتتاندىرىپ، جاڭا جىلدى قارسى العاندا، جۇڭحۋا ۇلتىنىڭ مىڭ جىلدان بەرى جالعاسىپ كەلە جاتقان اسقاق جىگەرىن ەسكە الساق، العا باسۋ سەنىمىمىز ەسەلەپ ارتادى.

　　بۇگىنگى جۇڭگو − دۇنيە جۇزىمەن تىعىز بايلانىس جاساعان جۇڭگو. وسى جىلى مەن بەيجيڭدە كوپتەگەن جاڭا، كونە دوستارمەن كەزدەستىم، سونداي – اق مەملەكەت قاقپاسىنان شىعپ جۇڭگونىڭ دارىپتەمەلەرىن باياندادىم. ءجۇز جىلدىق وزگەرىس جەدەل قۇبىلۋدا، دۇنيە ءجۇزى ونشالىقتى تىنىش ەمەس. ءبىز باستان - اياق بەيبىتشىلىك پەن دامۋدى قاستەرلەيمىز، باستان - اياق دوستارىمىز بەن سەرىكتەستەرىمىزدى قاستەرلەيمىز، تاريحتىڭ دۇرىس جاعىندا، ادامزات وركەنيەتىنىڭ العا باسۋى جاعىندا باتىل تۇرىپ، ادامزاتتىڭ بەيبىتشىلىك جانە دامۋ ىستەرىنە جۇڭگونىڭ اقىل - پاراساتىن، جۇڭگو جوباسىن قۇلشىنا ارنايمىز.

　　پارتيانىڭ 20 - قۇرىلتايىنان كەيىن قىزمەتتەستەرىممەن بىرگە يان - انعا بارىپ، پارتيا ورتالىق كوميتەتىنىڭ يان - انداعى مەزگىلدە دۇنيە جۇزىندە سيرەك كەزدەسەتىن قيىنشىلىقتاردى جەڭگەن شۇعىلالى جىلدارىن قايتا ەسكە الىپ، اعا بۋىن كوممۋنيستەردىڭ رۋحاني كۇشىن سەزىندىك. مەن «جاپا - ماشاقات تابىسقا جەتكىزەدى» دەپ ۇنەمى ايتامىن. جۇڭگو كوممۋنيستىك پارتياسى 100 جىل بويى بوران - شاشىندى باستان كەشىرىپ، بوگەتتەردى بۇزىپ، تار جول، تايعاق كەشۋلەردەن ءوتتى، تاريحي اياق الىس قانشالىق جاپالى بولسا، ۇلىلىعى دا سونشاما زور بولدى. ءبىز العان بەتتەن قايتپاي، قايسارلىقپەن كۇرەس جاساپ، ەرتەڭگى جۇڭگونى ءتىپتى دە كوركەم ەتىپ قۇرىپ شىعۋىمىز كەرەك.

　　ەرتەڭگى جۇڭگودا كۇرەس كەرەمەتتەردى جاراتادى. سۋ شىنىڭ «قيىنشىلىقتان قامال الىپ، ەڭ ۇلى نىساناعا ۇمتىلۋ كەرەك» دەگەن ءسوزى بار، مۇنىڭ ماعىناسى «ەڭ قيىن وتكەلدەن قامال الىپ، ەڭ زور نىساناعا تالپىنۋ» دەگەندى بىلدىرەدى. جول الىس بولسا دا، جۇرە بەرسەك، جەتەمىز؛ ءىس قيىن بولسا دا، ىستەي بەرسەك، تىندىرامىز. يۇيگۇڭنىڭ تاۋدى كوشىرۋ جىگەرىنەن ۇيرەنىپ، تامشى سۋ تاس تەسەدى دەيتىن قايسارلىق تانىتىپ، تىڭعىلىقتى ىستەپ، قاجىرلىلىقپەن ىستەپ، تىنباي ىلگەرىلەي بەرسەك، ۇلى نىسانانى، ءسوز جوق، تاماشا رەالدىققا اينالدىرۋعا بولادى.

　　ەرتەڭگى جۇڭگودا كۇش ىنتىماقتان كەلەدى. جۇڭگو سونشالىقتى ۇلكەن، ءار ءتۇرلى ادامدا ءار ءتۇرلى تالاپ – تىلەك بولادى، ءبىر ىسكە ءار ءتۇرلى كوزقاراس ايتاتىندار دا شىعادى، بۇل − قالىپتى جاعداي، پىكىرلەسۋ، كەڭەسۋ ارقىلى ورتاق تانىم ۇيىستىرۋ كەرەك. ءبىر ميلليارد 400 ميلليوننان استام جۇڭگولىق ءبىر باعىتتا ويلاپ، ءبىر باعىتتا كۇش سالسا، ءبىر جاعادان باس، ءبىر جەڭنەن قول شىعارىپ، جۇدىرىقتاي جۇمىلسا، تىندىرمايتىن ءىسى، المايتىن قامالى بولمايدى. بۇعازدىڭ ەكى جاعالاۋى − ءبىر ءۇيلى جاندار. ەكى جاعالاۋداعى باۋىرلاستاردىڭ ءبىر جاعادان باس، ءبىر جەڭنەن قول شىعارىپ، قول ۇستاسا العا باسىپ، جۇڭحۋا ۇلتىنىڭ باياندى باقىتىن بىرگە جاراتۋىن شىن جۇرەكتەن ءۇمىت ەتەمىن.

　　ەرتەڭگى جۇڭگودا ءۇمىت جاستارعا ارتىلادى. جاستار كوركەيسە، مەملەكەت كوركەيەدى، جۇڭگونىڭ دامۋى قالىڭ جاستارعا ارقا سۇيەيدى. جاستار ومىرشەڭدىك كۇشكە تولى، جاستىق كوكتەم ءۇمىت سيلايدى. قالىڭ جاستار وتباسى، وتان سۇيىسپەنشىلىگىن نىعايتىپ، العا باسۋ قاسيەتىن جەتىلدىرىپ، كۇرەسكەرلىك بەينەمەن جاستىق كوكتەمىن اسقاقتاتىپ، ءداۋىردىڭ ءۇمىتىن، جۇڭگونىڭ ءۇمىتىن اقتاۋى كەرەك.

　　وسى ساتتە كوپتەگەن ادام ءالى دە قاجىرلىلىقپەن جۇمىس ىستەپ، قاربالاس بولۋدا، كوپشىلىك، جاپا شەكتىڭىزدەر! جاڭا جىل قوڭىراۋى سوعىلۋ الدىندا تۇر، بولاشاققا دەگەن ىزگى تالپىنىسپەن 2023 - جىلدىڭ العاشقى كۇنىنىڭ ارايلى تاڭىن قارسى الايىق.

　　وتانىمىزدىڭ گۇلدەنىپ - كوركەيۋىن، ەل امان، جۇرت تىنىش بولۋىن تىلەيمىن! دۇنيە ءجۇزىنىڭ بەيبىت، كوركەم، باقىتتى، تىنىش بولۋىن تىلەيمىن! بارشاڭىزدىڭ جاڭا جىلدارىڭىزدىڭ قۇتتى بولۋىن، تىلەكتەرىڭىزدىڭ ورىندالا بەرۋىن تىلەيمىن!

　　راقىمەت!

　　كەلۋ قاينارى: حالىق تورابى