بەتتى ساقتاۋ |باس بەت قىلۋ |ءبىز تۋرالى|حابارلاسىڭىز|حات ساندىعى
مال تاۋىپ بايۋمەن بىرگە، اقىل تاۋىپ پاراساتتى بولايىق
ىسپانديار سولتاش ۇلى
2010.05.13 10:21    
{ ءارىپتىڭ ۇلكەن-كىشىلىگى كىشى ورتا ۇلكەن} باسىپ شىعارۋ  
      
  ءداۋىر وزگەرىپ، ءومىر جاڭالانعان بۇگىنگى مىناۋ باسەكەگە تولى زىمىران زاماندا، ەلىمىزدەگى قازاق ۇلتى دا باسقا تۋىسقان ۇلتتار قاتارىندا تۇرىپ، ءوزىنىڭ سان عاسىرلىق دالا مادەنيەتى قالىپتاستىرعان قاراپايىم ءوندىرىس تاسىلىنە، قاساڭ تانىم، ەسكى ساناسىنا، ەرسى قىلىقتارى مەن ادەت-داعدىلارىنا بىرتە-بىرتە وزگەرىس جاساپ، بۇرىن باسىنان كەشپەگەن ءداۋىر سىناقتارىنا توتەپ بەرىپ، تۇتاس ۇلتتىق بولمىسى مەن تۇرمىس تىرشىلىگىنە تىڭ وزگەرىستەر ەنگىزىپ، بىرتىندەپ العا ىلگەرلەپ كەلەدى. الايدا ۇلتىمىزدىڭ جالپى دامۋ جاعدايىن باسقا تۋىسقان ۇلتتارمەن سالىستىرىپ قارار بولساق، ساياسي وركەنيەت جاعىنان تەرەزەسى تەڭ بولعانىمەن، زاتتىق وركەنيەت پەن رۋحاني وركەنيەتكە كەلگەندە نەداۋىر كەنجە ەكەندىگى قاشان دا مەن مۇندالاپ ايقىن اڭعارىلىپ تۇرادى. مىنە بۇل ۇلتىمىز ومىرىندە بەلەڭ بەرىپ وتىرعان رەال ماسەلە.

  قازىرگى كەزدە ۇلتىمىز جونىنەن الىپ ايتقاندا، ەكونوميكالىق حال-جاعدايىمىز بەلگىلى دارەجەدە جاقسارعانىمەن، رۋحاني دۇنيەمىزدە ءالى دە جۇتاڭادىق باسىم. رۋحاني دەڭگەيى جوعارىلاماعان حالىقتىڭ ەكونوميكاسى ءبىر مەزگىل جاقسارىپ ىلگەرىلەگەنىمەن، ءتۇپتىڭ-تۇبىندە ونىڭ دامۋى تىم ۇزاققا بارمايدى. ءبىز كەدەيلىكتى جويۋ ءۇشىن، الدىمەن، ناداندىقتى جويۋىمىز قاجەت. نادان، قاراڭعى ادامعا قورجىنداپ اقشا بەرگەنىڭىزبەن، ول الگى اقشانى ورىندى پايدالانا بىلمەيدى. كوتەرە الماعان شوقپاردىڭ باسقا دا، ارتقا دا تيەتىنىندەي جاعداي بولادى. دانا حالقىمىز «مالدان جارلى بولساڭ دا، اقىلدان جارلى بولما» دەگەن ءسوزدى تەگىن ايتپاعان. سوندىقتان ازاماتتارىمىز مال تاۋىپ بايۋمەن بىرلىكتە، اقىل تاۋىپ پاراساتتى بولۋعا قۇلشىنىس جاساۋلارى قاجەت.

  ءاسىلى، اقىل-پاراسات، ياعني رۋحاني بايلىق، مىنە بۇل ءسىزدىڭ جانىڭىزدا ماڭگىلىك بىرگە بولاتىن، ءوز باسىڭىزعا عانا ءتان، ءوز بايلىعىڭىز ەسەپتەلەدى. ونى ەشكىم دە تارتىپ، ءيا ۇرلاپ كەتە المايدى. «بايدىڭ مالى ءبىر جۇتتىق» دەمەكشى، مال جۇتايدى، ال اقىل جۇتامايدى. ەگەردە اقىل-پاراساتىڭىز، شىنىندا، مول بولسا، وندا ول ءسىزدىڭ تۇتاس ومىرىڭىزگە تاۋسىلماس ازىق، ورتايماس ىرىس بولىپ ماڭگىلىك ەس قاتادى. ەۆرەيلەردىڭ بىردەن-ءبىر كيەلى كىتابى «تالمۇدتا»: «كەدەيدىڭ كەدەيلىگى اقشاسىنىڭ جوقتىعىندا ەمەس، قايتا سول اقشانى تاباتىن ميىنىڭ ازدىعىندا» دەلىنگەن ەكەن. اتاپ ايتقاندا، كەدەيلىك بىلىمسىزدىكتەن تۋىندايدى. ءبىلىمسىز ادامنىڭ كوزى ءبىر ءىستى كورىپ تۇرعانىمەن، ونىڭ پارىقتاۋ قۋاتى بولمايدى. پارىقتاۋ قۋاتى جوقتىڭ باتىلدىعى جويىلادى. باتىلدىق جوقتا ءورىس اشىپ العا ىلگەرىلەۋ ءتىپتى مۇمكىن ەمەس. ادام بالاسىنىڭ وزگەلەرگە تەڭەلۋى، وزگەلەردەن تەرەڭدەۋى، وزۋى، بيىكتەۋى دەگەندەردىڭ بارلىعى تەك ءبىلىم-ونەرمەن عانا جۇزەگە اسادى.

  قازىرگى تاڭدا، ۇلتىمىز ومىرىندە بەلەڭ بەرىپ وتىرعان تۇرمىستا قۇنتسىزدىق، ەڭبەككە قىرسىزدىق، ىشىمدىككە كەلگەندە تالعامسىزدىق ( اراق ىشكەندە ورىنعا، ۋاقىتقا، شاما-شارىققا قارامايتىنىمىز) قاتارلى ءبىر ءبولىم كەراناۋ نىسايلار اينالىپ كەلگەندە، ازاماتتارىمىزدىڭ ىشكى رۋحاني جۇتاڭدىعىنان، يرادالارنىڭ السىزدىگىنەن، تۇپتەپ كەلگەندە، ادامدىق ساپالارنىڭ تومەندىگىنەن، ءبىلىم-ساۋاتتارىنىڭ شاقتىلىعىنان تۋىنداپ وتىرعان ماسەلەلەر. بۇل كۇندەرى وزگە جۇرت ايتادى «قازاق كەدەي» دەپ، ەندەشە، ءبىزدىڭ كەدەيلىگىمىز قاي جەرىمىزدە ؟ شىنتۋايتىنا كەلگەندە، بىزدەگى كەدەيلىك اقشا مەن مالدا تۇرعان جوق، بىزدەگى كەدەيلىك، ەڭ باستىسى، رۋحاني الەمىمىزدەگى جۇتاڭدىقتا، ياعني ساناداعى تاپشىلىق پەن بويداعى جىگەردىڭ السىزدىگىندە تۇر.

  ءاسىلى، ادامعا ءبىر مەزەتتىك قارىننىڭ اشتىعى قاسىرەت ەمەس، بۇل كەمىستىكتى قالايدا امالىن تاۋىپ قىسقا مەرزىم ىشىندە تولىقتاپ كەتۋگە بولادى. ايتالىق، قارىننىڭ اشتىعىن، ياعني زاتتىق كەدەيلىگىڭىزدى ايانباي تەر توكسەڭىز از-اق ۋاقىتتا تولىقتاپ كەتۋىڭىزگە ابدەن بولادى. ال شىن قاسىرەت رۋحاني اشتىق پەن جۇتاڭدىقتا جاتىر. مىنە بۇل كەمىستىكتى قىسقا مەرزىم ىشىندە تولىقتاپ كەتۋگە كەلمەيدى، ونى تولىقتاۋ ءۇشىن ءبىر بارىس قاجەت. ويتكەنى ءبىر ازاماتتىڭ ورتا مەكتەپ ماعلۇماتىنا يە بولۋى ءۇشىن، 11 جىل ۋاقىت قاجەت ەكەنى بارىمىزگە بەلگىلى جاي.

  قازىرگى مىناۋ ءبىلىم ەكونوميكاسى داۋىرىندە ازاماتتارىمىزدى جاي ساۋاتسىزدىق جارلى ەتسە، تولىق ساۋاتسىزدىق وزگەلەرگە قۇلاق كەستى قۇل ەتىپ قويادى. ەگەر ءسىز جاي ساۋاتسىز بولساڭىز، تىرشىلىكتە بىردە اناۋ جوق، بىردە مىناۋ جوق بولىپ، ءومىرىڭىز تارشىلىقپەن، جوقشىلىقپەن وتەتىن بولادى. ال تولىق ساۋاتسىز بولساڭىز، بۇل ومىردە ءوز ەسەڭىزدىڭ وزگەلەرگە قالاي كەتكەنىن دە ەشبىر سەزىپ- بىلمەي وتەتىن بولاسىز. قازىر تىم از سانداعى، ءبىر اۋىل ەلدى باعاتىن اتپال ازاماتتىڭ كۇندىك ەڭبەك بوداۋى ءبىر بوتەلكە اراقپەن نەمەسە « ءۇش ۋاققى تاماعىن تاۋىپ جەۋمەن» عانا ولشەنىپ، ەسىل ءومىرى وزگەلەرگە يەك سۇيەپ، الاقان جايىپ، تىلەنشى بولۋمەن وتەتىن جاعدايلارى دا قوعامدىق ورتامىزدان تابىلادى. بۇل جەردە سونى ايتۋعا بولادى: ازاماتتارىمىزدىڭ باسقالارعا جالدانىپ ەڭبەگىن ساتۋى، ءبىرى، قولدارىنىڭ قىسقالىعىنان، شىنىندا قىسقا ءجىپ كۇرمەۋگە كەلمەيتىن جاعدايلاردان بولسا؛ ەندى ءبىرى، ساۋاتتارىنىڭ تاپشىلىعىنان بولىپ وتىر. ساۋاتسىز ادام قورقاق، جۇرەكسىز كەلەدى دە ءار قاشان باسەكە مايدانىندا تابان تىرەپ تۇرا المايدى، ءورىس اشىپ العا ىلگەرىلەي بىلمەيدى. بۇل كەمىستىكتى تولىقتاماي تۇرىپ، وزگە جۇرتقا تەڭەلۋ قۇرعاق قيال بولىپ قالا بەرمەك.

  ۇلى ءدانىشپان اتامىز اباي: «تەگىندە ادام بالاسى ادام بالاسىنان اقىل، عىلىم، ار، مىنەز دەگەن نارسەلەرمەن وزادى. ودان باسقا نارسەمەنەن وزدىم عوي دەمەكتىڭ ءبارى دە ــ اقىماقشىلىق»-،دەسە. عۇلاما عالىم مۇحتار: «ادام مەن ادامدى، ۇلت پەن ۇلتتى تەڭەستىرەتىن نارسە ــءبىلىم»،- دەيدى. قازىرگى مىناۋ بارلىق نارسە جەر شارىلانۋعا بەت العان، باسەكەگە تولى زىمىران زاماندا، تەرەزەڭ وزگە جۇرتپەن تەڭەلۋ ءۇشىن، ەڭ اۋەلى، ءبىلىمىڭ، ونەرىڭ تەڭەسۋى، ءتىپتى، وزگەلەردەن اسىپ ءتۇسۋى قاجەت، سوندا عانا باسقا جۇرت ءسىزدى مويىندايتىن بولادى. سوندىقتان بۇگىنگى اعا ۇرپاق ءبىز دە كەلەسى ۇرپاققا ۇلگى-ونەگە بولىپ، ءومىر بويى جالىقپاي ءبىلىم، ونەر ۇيرەنۋىمىز قاجەت، اسىرەسە، بالالارىمىزدى بار كۇشپەن وقىتۋىمىز كەرەك. ءاسىلى ادام بۇگىنگىسى ءۇشىن ەرتەڭىن، بولاشاعىن قۇرباندىققا شالماۋى ءتيىس. ۇرپاعىڭنىڭ بۇگىن تاپقان ازعانتاي تيىن-تەبەنىنە قىزىعىپ، ونى وقىپ جاتقان مەكتەبىنەن شىعارىپ الىپ، قايناعان قوعامدىق ورتادان، وقۋ-بىلىمنەن، عىلىم-ونەردەن وگەي قالدىرىپ نادان، بەيشارا ەتىپ قويساڭىز، وندا ول بىلايعى ومىرىندە سىزگە دە، قوعامعا دا، ءتىپتى، ءوز باسىنا دا ەش جاقسىلىق، جاراسىمدىلىق اكەلمەيدى. قىسقاسى، قازىر ۇلتىمىزعا، اسىرەسە، قالىڭ ەگىنشى-مالشىلارىمىزعا ونەر-ءبىلىم كەرەك؛ وقۋ، تاربيە كەرەك؛ ەڭبەك، ىزدەنىس، تالپىنىس كەرەك. ەندىگى زامان اۋەلگىدەي ءتورت تۇلىگىڭدى كەڭ جايىلىس، ۇزاق ورىسكە ايداپ سالىپ، قازانداعى ەتىڭىزدى اسىقپاي، جايىمەن جارىم كۇن قايناتىپ، مول ۇيقىنى قۋات، راحات كورىپ، قۇرساعىڭىزدى سيپاپ قويىپ، جايبىراقات، قامسىز، كوسىلىپ جاتاتىن زامان ەمەس. دامىعان، وزعان جۇرتتى ونەگە تۇتىپ، ۇلگى، قۋات، قاجىر-قايرات الاتىن زامان. جاڭا ءداۋىردىڭ تىڭ ساراپتاماسىنا ساي، بۇرىنعى، ۋاقىتى وتكەن، قاساڭ تانىم، ەرسى قىلىقتاردان ادا-كۇدە ارىلىپ، تىرشىلىكتەگى وزىڭىزگە تيەسەلى ارباڭىزدى ءوزىڭىز ايداپ، مىناۋ باسەكەلى قوعامعا ەش ىركىلىسسىز ارالساتىن، ودان ءوز نەسىبەڭىزدى مولىراق الىپ قالۋعا تىنباي قۇلشىنىس جاسايتىن زامان. ۇلتىمىزدى تەك وسى قاسيەت عانا وزگە جۇرتپەن تەرەزەسىن تەڭ ەتپەك.

  مىناۋ دامىعان، وركەنيەتتى قوعامىمىزدا ادامدارعا بىتكەن باق-داۋلەت ونىڭ جان دۇنيەسىمەن ۇيلەسىمدىلىك تاپقاندا عانا جاراسادى. ەگەر ورىستە قورالى قويىڭىز، بانكەدە قوماقتى قارجىڭىز بولعانىمەن ءوڭى ءتۇزۋ، سىرىپ سالار سىرماعىڭىز جوق بولسا، جاڭا داۋىرگە ساي كەلەتىن، كوڭىلدى مادەني تىرشىلىگىڭىز بولماسا، وندا ونداي باردامدىعىڭىزدىڭ ومىردە نەندەي قۇنى، نەندەي جاراسىمدىلىعى بولماق. ادام بۇل ومىردە بايلىعىمەن عانا ەمەس، ونەرىمەن، بىلىكتىلىگىمەن، مادەنيەتتىلىگىمەن قادىرلى، قىمباتتى سەزىلەدى. قازىر وتە از سانداعى ازاماتتارىمىزبەن سويلەسىپ، جان دۇنيەسىنە ۇڭىلە قالساڭىز، ونىڭ رۋحاني الەمىنىڭ سونشالىقتى كەدەي، سونشالىقتى مەشەۋ ەكەندىگىنە قاراپ قاراداي قارنىڭىز اشادى. ويلاعان ويلارىنىڭ تىم قاراپايىم، ءدام-تاتۋى جوق قايداعى بىقسىق نارسەلەر ەكەنىن بايقاپ، ونىڭ كەلەشەگىنەن، اۋەلى، تۇڭىلەسىز. ولاردىڭ ايتاتىن اڭگىمەلەرى تويا تاماقتانعانى، ىشكەن-جەگەنى، كەشە ىشكىلىكتى (اراقتى) مول ءىشىپ، بۇگىن باسىنىڭ اۋىرىپ قالعانى، كەشە ەس-ءتۇسىن بىلمەي قالىپ، بۇگىن سول كەشەگى قىلىعىن وزگەلەردەن ەستىپ، ماقتانا ەسكە العانى بولىپ شىعادى. ءدال وسىنداي قازاننىڭ قايناعانىن اڭدىپ، اقىل-ەسى قۇرساق تويعىزۋدان ارى اسا المايتىن، قۇلقىن قۇمار، تاماقساۋ جانداردا قوعام جونىندە، ءومىر جونىندە جەكە ازاماتتىق كوزقاراس، ءوز الدىنا قالىپتاسقان وي-پىكىر، مۇرات-ماقسات بولمايدى. دۇنيە قالاي ءورىس الىپ، وزگە جۇرت قايتىپ دامىپ بارادى، كەلەشەكتە ۇلت نە بولادى؟ ۇرپاق نە بولادى؟ ول جونىندە ەشقانداي تالعام جاسامايدى. ءوز تۇرعىسىنا نەمەسە وسەر ۇرپاققا اسەر ەتەرلىكتەي ءمان-ماعىنالى، ازاماتتىق ويى بار ءسوز سويلەي بىلمەيدى. «ەرتەڭ نە ىستەيمىن، قايتسەم شارۋاشىلىعىمدى شالقىتىپ، قاتاردان قالمايمىن» دەگەن سياقتى ويلار ولاردا مۇلدە بولمايدى. ولاردىڭ اڭديتىنى وزگەلەردە مايلاتاتىن، جۋعىزاتىن، قىسقاسى ءبىر سىلتاۋمەن ءوز قۇلقىنىن ءبىر رەت بولسا دا تەگىن تويعىزىپ قالاتىن قانداي جاڭالىقتار، قانداي ورايلى ساتتەر بار، مىنە وسى بولىپ شىعادى.

  بۇگىنگى مىناۋ ءبىلىم ەكونوميكاسى داۋىرىندە، زامان تالابىنا ساي كەلەتىن، قولدانىلمالى تەحنيكالىق بىلىمدەرگە يە، سول ارقىلى ءوزىن بازار ەكونوميكاسىنا سايكەستىرە العان ادام عانا ءوز ورتاسىندا ەلەۋلى ورىندى يەلەپ، بازاردا ىرىقتىلىقپەن تابان تىرەپ تۇرا الادى. قازىرگى ازاماتتارىمىزدىڭ بىلىمدىك ساپاسى جونىنەن ايتقاندا، كەمىندە ەكى شارت ازىرلەنگەن بولۋى كەرەك: ءبىرى، نەداۋىر مول جالپىلىق بىلىمگە يە بولۋى؛ ەندى ءبىرى، ارناۋلى كاسىپتىك ءبىلىمى بولۋى، اتاپ ايتقاندا بەلگىلى ءبىر كاسىپتىڭ، ونەردىڭ مامانى بولۋ كەرەك.

  بۇگىنگى اۋىل-قىستاقتارىمىزدا جەر تارايعان، ادام كوبەيگەن جاعدايعا سايكەسۋ ءۇشىن، ازاماتتارىمىزدىڭ سان الۋان تەحنيكالىق بىلىمدەر مەن ونەردى يگەرۋى بارعان سايىن كەزەك كۇتتىرمەيتىن قاجەتتىلىككە اينالۋدا. وسى ۇردىسكە ساي، اۋىل- قىستاقتارىمىزداعى ارتىق ەڭبەككۇشتەر بۇرىنعىداي ازعانتاي مالى مەن الاقانداي جەرىنە قاراپ وتىرمايتىن، ءتورت ماۋسىمدا دا ولاردىڭ قولى بوسامايتىن بولۋى، ءسويتىپ، ماۋسىم شەكتەمەسىنە ۇشىراماي، سان الۋان كاسىپتەردى ىرىقتىلىقپەن تاۋىپ ىستەپ، تىنىمسىز كىرىس كىرگىزۋدىڭ ۇتىمدى جولدارىن قۇلشىنا قاراستىراتىن بولۋلارى ءتيىس. قىسقاسى، مال بولسىن، ەگىن بولسىن، كاسىپ سالالانۋى قاجەت.

  ساياسات توتەنشە دۇرىس، ول ەلىمىزدەگى بارلىق ۇلتقا تەڭ، تەڭسىزدىك قايدا ؟ ول ءاربىر ادامنىڭ سول ساياساتتان شەبەرلىكپەن يگىلىكتەنۋ يقۋاتىدا بولىپ وتىر، ماسەلەنى وسى جاعىنان قاراستىرعانىمىز ءجون. قازىرگىدەي قارىن توق، قايعى جوق، « الدىڭىزعا اس قويىلىپ، ەكى قولىڭىز بوس قويىلعان» مىنا تاماشا، بەيبىت، تىنىش زاماندا قالاي دامۋ، قايتىپ اۋقاتتانۋ، مىنە بۇل ءوز ەركىڭىزدەگى، ءوز يقۋاتىڭىزداعى جۇمىس. ءسىزدىڭ بايىپ، اۋقاتتانۋىڭىزدى، قۇلشىنا ءبىلىم يگەرىپ، ادامدىق ساپاڭىزدى جوعارىلاتىپ، قاتارىڭىزدان وزۋىڭىزدى تەجەپ، قاقپايلاپ وتىرعان ەشكىم جوق. قايتا پارتيا مەن ۇكىمەتىمىز بارلىق جاقتان سىزگە قولداۋ كورسەتىپ، دەمەپ، جەتپەگەن جەرىڭىزدى تولىقتاپ، شابىتتاندىرىپ وتىر. ءسۇيتىپ، قازىرگى قوعامىمىزداعى ادامدار باقىتتى بولۋدىڭ، باي بولۋدىڭ، ءبىلىمدى دە ىسكەر بولۋدىڭ، قىسقاسى، سەگىز قىرلى، ءبىر سىرلى بولۋدىڭ تاماشا ورايىنا يە زاماندا جاساپ وتىر. كەزىندە بۇنداي تاماشا وراي اعا بۋىن ۇرپاققا بۇيىرماعان ەدى. سوندىقتان قازىرگى ازاماتتارىمىزدا ورايدان وڭتايلى پايدالانا الاتىن ورامدىلىق پەن ىسكەرلىك بولۋى قاجەت. ءاسىلى وراي بارلىق ادامعا بىردەي بولادى. ءبىراق ادامداردىڭ اقىل-پاراساتى مەن ىسكەرلىگى ۇقسامايتىندىقتان، ورايدى كورەگەندىكپەن بايقاپ، ونى ءوز مۇددەسى ءۇشىن يگىلىكتەنۋى ۇقساس بولمايدى. وراي مەزگىلىن مىقتى يگەرە ءبىلۋىڭىز ىستەگەن ءىسىڭىزدى وڭىنا باستىرۋدىڭ، باسەكە مايدانىندا اعالاپ العا شىعۋىڭىزدىڭ ەڭ نەگىزگى تەتىگى سانالادى.

  قوعام العا ىلگەرىلەپ، ەكونوميكا دامىعان سايىن، ونىڭ ادامدارعا بولعان تالابى ۇزدىكسىز جوعارلاپ وتىرادى. سوندىقتان ازاماتتارىمىز بۇگىنگى مىناۋ دامىعان ءداۋىرىمىزدىڭ ارتىندا شاڭ قاۋىپ قالماۋى ءۇشىن، ءارقاشان وزدەرىنىڭ جالپى تۇلعالىق ساپاسىن جوعارىلاتۋ جولىندا شىنايى قۇلشىنىس جاساۋلارى، ءومىر بويى جالىقپاي، تالىقپاي ونەر-ءبىلىم ۇيرەنۋلەرى ءتيىس. ەگەر ءسىز مالشى نەمەسە ەگىنشى بولساڭىز، ءوزىڭىز قىزىققان ونەردى يگەرۋ جونىندە شىنايى بەكىمىڭىز، ۇيرەنۋ نيەتىڭىز بولسا بولعانى، وندا ءسىز كۇندەلەكتى شارۋاڭىزدى تىندىرا ءجۇرىپ، الگى ونەردى ءوز قوعامدىق ورتاڭىزدان؛ كىتاپ، گازەت-جۋرنالدان؛ راديو-تەلەۆيزور مەن ينتەرنەتتەن؛ ءتىپتى بولماسا، سول ونەرگە ىسىلعان مامان ۇستازدىڭ قاسىنا ەرىپ، قوسىلا ىستەي ءجۇرىپ تە ۇيرەنىپ الۋىڭىزعا ابدەن بولادى. ماسەلەنىڭ تەتىگى ءوز نيەتىڭىز بەن قۇلشىنىسىڭىزدا جاتىر. ەگەر ءسىز نە ءبىلىمسىز، نە تالاپسىز، نە بوشالاڭ، نە جالقاۋ، نە سىلبىر بولساڭىز ارتتا قالعانىڭىز قالعان. وندا بىلايعى جەردە ەشكىمگە دە وكپە ارتۋىڭىزدىڭ ءجونى جوق، ونى تەك ءوز باسىڭىزدان كورگەنىڭىز وڭ.

  ويىمىزدى جيناقتاپ ايتار بولساق، تىرشىلىكتىڭ زاڭدىلىعىنا دۇرىس سايكەسە بىلگەن ادامعا، ءارقانداي ءىستىڭ ىڭعايىن، ءومىر ءوزى ۇيرەتەدى. ادامداردا تەك سوعان ساي كەلەتىن العا باسارلىق رۋح، شىنايى ۇيرەنۋ نيەتى، قاجىماس قايرات، مۇقالماس جىگەر، تىنىمسىز تالپىنىس بولسا بولعانى. ەگەر ءسىز كۇندەلىكتى قوعامدىق ومىردە، وزىڭىزگە تيەسەلى بولعان كاسىبىڭىزدە وڭدى ناتيجە شىعارا الماساڭىز، وندا ءسىز، باسەكەگە تولى قوعامدىق قىسىمنىڭ الدىندا، الگى كاسىبىڭىزدى ويداعداي ىستەي الاتىندارعا وتكەرىپ بەرۋگە ءماجبۇر بولاسىز؛ ەگەر ءسىز ديقان بولىپ، بەلگىلى ءبىر ەگىنشىلىك كاسىپپەن شۇعىلدانىپ، وزىڭىزگە تيەسەلى جەردى ويداعىداي يگەرە الماساڭىز، وندا ۋاقىت وتە كەلە الگى جەرىڭىزدى يگەرە الاتىندارعا بەرىپ، سىتىلىپ شىعۋعا ءماجبۇر بولاسىز؛ ەگەر ءسىز حالىق جانە ۇيىم جاعىنان وزىڭىزگە تاپسىرىلعان بيلىكتى قابىلەتىڭىز جەتپەگەندىگى سەبەپتى، ءوز لايىعىندا ىستەتە الماساڭىز، وندا ىستەي الاتىندارعا ورىن بوساتىپ، سىتىلىپ شىعۋعا ءماجبۇر بولاسىز. قىسقاسى، ءسىزدىڭ بەلگىلى ءبىر ءىستى ىستەۋگە عىلمي قابىلەتىڭىز بەن ىسكەرلىك قۋاتىڭىز راسىندا جەتپەسە، وندا بازار سىندى تەلەگەي تەڭىز ءسىزدى ءتابيعي تۇردە ءوز ايدىنىنان تولقىپ، ەكشەپ شىعارىپ تاستايدى. الداعى جەردە ءسىزدى بازار تولقىنىنىڭ حاۋپ-قاتەرىنەن تەك رۋحاني كەدەيشىلىكتەن شىنايى ارىلۋىڭىز عانا اراشالاپ، امان ساقتاپ قالا الادى. انە سوندىقتان دا ازاماتتارىمىز ءداۋىر سىنىنا توتەپ بەرۋ جولىندا ءارقاشان مال تاۋىپ بايۋمەن بىرلىكتە، اقىل تاۋىپ پاراساتتى بولۋعا، ﺭﯞﺣﺎﻧﻲ ﻭﺭﻛﻪﻧﻴﻪتىمىزدى ﺯﺍﺗﺘﯩﻖ ﻭﺭﻛﻪﻧﻴﻪتىمىزبەن قاتار ىلگەرىلەتۋگە شىنايى قۇلشىنىس جاساي بىلەتىن بولۋلارى ءتيىس.

  ” سوڭى “

  اۆتوردىڭ قىزمەت ورنى: التاي ايماقتىق پارتيا مەكتەبى

  كەلۋ قاينارى: حالىق گازەتىنىڭ تورابى
جاۋاپتى رەداكتورى : اسقار جاڭابەك ۇلى
حابارلار
كوپ مەديا
ۇلتتىق مانەر
تەلەفون: 67 /65368365-010 ‍حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ ىستەتۋگە بولمايدى
Copyright © 1997-2010 by www.people.com.cn. all rights reserved