بەتتى ساقتاۋ |باس بەت قىلۋ |حات ساندىعى |حابارلاسىڭىز|ءبىز تۋرالى
ازامات، ۋاقىتىڭدى قادىرلە
ىسپانديار سولتاش ۇلى 
2013.09.25 15:38     كەلۋ قاينارى : حالىق تورابى
{ ءارىپتىڭ ۇلكەن-كىشىلىگى كىشى ورتا ۇلكەن} باسىپ شىعارۋ  
      
  بىزگە بەلگىلى، ماتەريانىڭ ءومىر ءسۇرۋ فورماسى بولعان كەڭىستىك پەن ۋاقىت شەكسىز بولادى. الايدا، ءاربىر ناقتى زاتتىڭ، ايتالىق، ادام مەن جان-جانۋاردىڭ ءومىر سۇرەتىن كەڭىستىگى مەن ۋاقىتى شەكتى بولادى. ۋاقىت ــ تەك وتكەننەن، قازىرگىدەن بولاشاققا قاراي ءبىر باعىتتا جىلجيتىن وتكىنشى قۇبىلىس. ەشقانداي كۇش ونىڭ وبيەكتيۆتىك باعىتىن وزگەرتە المايدى. ءبىر ادامنىڭ عۇمىرى ءۇشىن ۋاقىت قاشاندا قىمبات ءارى شەكتى. ويتكەنى، ادام ءمالىم شەكتى مەزگىلدە عانا جاسايدى. ۋاقىت ادامعا ەمەس، ادام ۋاقىتقا تاۋەلدى ءومىر سۇرەدى. مىنە، وسىلايشا ماتەرياليستىك تۇرعىدا ۋاقىت ۇعىمىنا نازار سالاتىن بولساق، ادامداردا ۋاقىتتىڭ قادىرىنە جەتۋ تانىمى كۇشتى بولۋعا ءتيىس. سەبەبى ادام بالاسىنىڭ عالامشارعا ءبىر-اق رەت كەلەتىن قوناق ەكەنى بارلىق پەندەگە بەلگىلى. بۇنى الەمدىك زاڭعار جازۋشى شىڭعىس ايتماتوۆ: «ءومىر ــ بار تابيعاتىمەن تراگەديا، ادام بالاسى كوزىن اشىپ پانيگە كەلگەن ساتتەن باستاپ ولىمگە بىرتىندەپ تاياي بەرەدى» دەپ قورتىندىلاعان. ۇلى جاراتىلىستىڭ شەتسىز دە شەكسىز ۋاقىت ولشەمى بويىنشا قاراعاندا، ءبىر ادامنىڭ بۇل دۇنيەدە ۇزاق عۇمىر كەشىرۋىنىڭ ءوزى قاس قاعىم ساتتەي عانا ءىس. تىرشىلىكتىڭ باسى مەن اياعىنا باعامداي قاراساڭىز ادام ءومىرىنىڭ التىن ءداۋىرى، ناتيجەلى، ماعىنالى، سانالى عۇمىرى ءتىپتى قىسقا. جەر بەتىندە سۋ ىشەرى كوپ بولىپ، ءجۇز جاساعان ادامنىڭ بالالىق شاعىنداعى 20 جىلىمەن قارتايعان تۇسىنداعى 40 جىلىن شىعارىپ تاستاساڭىز، ونىڭ ماعىنالى، ءماندى عۇمىرى، التىن ءداۋىرى تەك 40 جىل عانا بولماق. بۇل دۇنيەدە ءوز ءومىرىن التىنداي ارداقتاپ، ونى لايىعىندا وڭدى پايدالانا العان زەردەلى جاندار ارتىنا ماڭگىلىك وشپەستەي ءىز قالدىرىپ كەتەدى دە، ال ءومىرىن ساناسىز ماقۇلىقتاي سەندەلىپ وتكىزەتىن زەردەسىز جاندار ءوزىنىڭ ادامدىق، ازاماتتىق بورىشىن دا وتەي الماي، ارتىنا ەشبىر بەلگى قالدىرا الماي كەتەدى.

  رەال ومىردە ۋاقىتتى قادىرلەيتىندەر ۋاقىتپەن جارىسادى. ولاردا مەيلى قانداي ىسكە بولماسىن الدىن الا دايىنداعان ايقىن ماقساتى مەن نىساناسى، سوعان جەتۋ ءۇشىن بەلگىلەگەن جوبا-جوسپارى، سوعان ساي وزىنە قويعان قاتاڭ تالابى، بەرىك يراداسى بولادى. ولار كۇن مەن ساعاتتى بىلاي قويىپ، مينۋت نە سەكۋندتى ساناپ، سوعان ساي ءىس تىندىرۋعا قۇلشىنادى. ولار، ءتىپتى جاتقان، تۇرعان، جۇرگەن، وتىرعان كەزدەرىندە ءوزىنىڭ كوزدەگەن نىساناسىنا تەز جەتۋگە اسىعادى، سوعان باس قاتىرىپ، امال قاراستىرادى. ۋاقىتتى قادىرلەيتىندەردىڭ بارلىق ءىسى الدىن الا بەلگىلەنگەن جوسپار بويىنشا ءوز ۋاقىتىندا ورىندالىپ جاتادى. ولار كۇندەلىكتى ومىردە قاجىرلى، قاراپايىم، ۇنەمشىل بولىپ، از بوداۋ بەرىپ كوپ ءىس تىندىرادى. ولار ءوزىن الدايتىن، ۋاقىتتى بوسقا ولتىرەتىن بايانسىز، ءمان-ماعىناسىز ىسپەن اينالىسپايدى. تۇرمىسى ءارقاشان رەتتى، جيناقى بولادى. كەي كەزدەرى ۋاقىتتى قادىرلەيتىندەر ۋاقىتتى قادىرلەمەيتىندەر جاعىنان ءتۇرلى جازعىرۋلار مەن داتتاۋلارعا ۇشىراپ جاتادى. ۋاقىتتى قادىرلەيتىندەردىڭ تىنباي قۇلشىنۋىنان كۇندەر وتە كەلە تاۋداي تابىس، مول ناتيجە تۋىندايدى. ۋاقىتتى قادىرلەيتىندەر ءارقانداي ىسكە بىرتىندەپ دامۋ زاڭدىلىعى بويىنشا تالداۋ جاساپ، كوزدەگەن شىڭىنا باعىتتالعان العاشقى قادامىنىڭ ءوزىن زور سەنىممەن، ۇمىتكەرلىكپەن باستاپ، كوڭىلگە العان بيىگىنە ءبىر قادام، ءبىر باسقىشتان ورلەپ شىعۋعا، وندا جولىعاتىن قيىندىققا باس يمەۋگە بەلىن بەكەم بۋادى. ول استە ۋاقىتتى قادىرلەمەيتىندەر سياقتى بەتكە العان ءىسىنىڭ قيىندىعىنا توزىمسىزدىك ىستەپ، باستاعان ءىسىن جول ورتادا قالدىراتىن تۇرلاۋسىز قىلىقتاردى ىستەمەيدى. سوڭعى ناتيجەدە ۋاقىتتى قادىرلەمەيتىندەر ۇتىلىپ، بۇل ومىردەن ءىز-دەرەكسىز كەتسە، ال ۋاقىتتى قادىرلەيتىندەر ۇتىپ، ارتىنا ماڭگى وشپەستەي بەلگى، ءىز قالدىرىپ كەتەدى. ۋاقىتتى قادىرلەيتىندەر ءوزىنىڭ شەكتى ومىرىندە، ارتىنا شەكسىز بايلىق، سوڭعىلار القاپ، اۋزىنان تاستامايتىن، ۇلگى-ونەگە ەتەرلىكتەي ادامي قۇندىلىق، ۇلاعاتتى ۇستازدىق وبىراز جاراتىپ كەتەدى.

  ال، بۇل ومىردە ۋاقىتتى قادىرلەمەيتىندەر ءوز ءومىر كەشىرمەسىنە قاراتا الدىن الا ايقىن ماقسات-نىسانا، جوبا-جوسپار، تالاپ-تىلەك قويا بىلمەيدى. بۇلاردىڭ كوبى دۇرمەككە ىلەسكىش بولىپ، ارتىق ۇيقى ياكي ورىنسىز كۇلكىمەن توزادى، نە بولماسا ەكى قولىن الدىنا سيعىزا الماي ءومىرىن جالىعۋمەن، زەرىگۋمەن، ءوزىن الداۋمەن وتكىزەدى. ولار كوبىنەسە، سويلەسە ءسوزدىڭ مايىن تامىزاتىن، زىرىلداۋىق، قۇبىلمالى قۋ؛ وزگەلەردىڭ كوركەيگەنىن كورگىسى كەلمەيتىن ءىشى تار؛ وسەك-وتىرىكپەن جاقسىلاردى داتتاي جۇرەتىن زيانكەس؛ ەڭبەك ەتىپ تەر توگۋدى، باس قاتىرىپ عىلىم-ءبىلىم ۇيرەنۋدى قالامايتىن كەراناۋ، جالقاۋ بولادى. ۋاقىتتى قادىرلەمەيتىندەردىڭ ءوز باسىن دۇرىس الىپ ءجۇرۋىنىڭ ءوزى مۇڭ بولادى. ولاردىڭ كەيى كەزەگەن اياق، قاڭعىباس، ىشىمدىك (اراق) قۇمار، سودىر بولىپ، جامان ادەتتەردى وزىنە تەز جۇقتىرعىش كەلەدى. قوعامدىق ومىردە سول جاعىمسىز ادەتتەرىنەن ءتيىستى جازالارىن دا تارتادى، ءبىراق ودان ساباق قابىلداۋلارى از ۇشىرايدى. ولاردىڭ كوبى وزىندەگى ولقىلىقتى ءوز باسىنان ەمەس، وزگەدەن ىزدەيدى. باسقالارعا بۇلدانا، مىندەتسي جۇرەدى. اۋەلى كەيدە ولار جاساندى سەرىلىككە بوي الدىرىپ، ءوزىن سىرتتاي قاراماققا پاراساتتى، اقىلدى، قولى ۇزىن، مولقور-جومارت، مىرزا ەتىپ كورسەتۋگە تىرىسادى دا، كوپ جاعدايدا ءوزىن-ءوزى جۇباتىپ، سىرت كوزگە ءجۇنىن قامپايتىپ كورسەتىپ، رۋحاني جەڭىمپاز بولىپ قاراداي شاشىلىپ، توزىپ جۇرەدى. ولار وزگەلەر ىستەپ جۇرگەن شارۋانى مەنسىنبەگەندەي، ونداي شارۋامەن ايلانىسۋدان ارلانعان، ۇيالعان، قورلانعانداي بەينە بايقاتادى، ءىس جۇزىندە الگى شارۋانىڭ ىڭعايىن كەلتىرىپ ىستەۋ ونىڭ قولىنان كەلمەيدى. ۋاقىتتى قادىرلەمەيتىندەر قاشاندا باردى كيىپ، باقانىن قولىنا الىپ، ءوزى سياقتىلاردىڭ قاتارىنا قوسىلعىش بولادى. ولار الۋان سىلتاۋمەن وتىرىس جاساعىش، ويىن ۇيىستىرعىش، سەيىل قۇرعىش بولادى. ولار باسقالاردىڭ ەڭبەكتەنىپ تاپقان ماردىمسىز اقشاسىن امالىن تاۋىپ ىستەتۋگە ىسپار كەلەدى. ولاردىڭ اڭديتىنى ــ وزگەلەردە مايلاتاتىن، جۋعىزاتىن، قىسقاسى ءبىر سىلتاۋمەن ءوز قۇلقىنىن ءبىر رەت بولسا دا تەگىن تويعىزاتىن قانداي ورايلى ساتتەر بار، مىنە، وسى بولىپ شىعادى. بۇل توپتاعى ادامدار سانى جاعىنان ومىردە از ۇشىرايدى، وكىنىشكە وراي، ولاردىڭ سانى از بولعانىمەن قوعامدىق ومىرگە تيگىزەر كەرى ىقپالى توتەنشە زور بولادى. ۋاقىتتى قادىرلەمەيتىندەر وزدەرىنىڭ تىرشىلىك داعدىسىن ءارقاشان وڭدى ساناپ، ونى وزگەرتۋدى ويلاپ تا قويمايدى. ولاردىڭ تۇتاس عۇمىرى ءوز وتباسىنا ايىقپاس الاپات دەرت، جاساپ وتىرعان قوعامدىق ورتاسىنا اجىرعى، اۋىرتپالىق بولادى. وسىلايشا، بۇنداي ادامداردىڭ ءومىرى ءمان-ماعىناسىز تۇردە ءوزىن-ءوزى الداۋمەن ءوتىپ، ءتۇپتىڭ تۇبىندە وپىق جەۋمەن اقىرلاسادى.

  كۇندەلىكتى ومىردە ءبىر ادامنىڭ ۋاقىتتى قادرلەۋى، ءوز ءومىرىن قادىرلەۋى، ۋاقىتتىڭ قۇنىن دۇرىس ءتۇسىنىپ، ونى ارداقتاۋى بولىپ تابىلادى. ويتكەنى، ۋاقىت ــ ءومىر، ۋاقىت ــ التىن، ۋاقىت ــ تابىس، ۋاقىت ــ وراي. ۋاقىتتىڭ قۇنىن دۇرىس تۇسىنەتىن زەردەلى جاندار، انە، وسىنداي تالعامدا بولادى. ۋاقىت جونىندە كوزقاراسى ۇقسامايتىن ادامداردىڭ ومىردە جاراتقان قۇنى دا ۇقساس بولمايدى. دۇرىس باعالاي بىلگەن ادامعا، ۋاقىت ادام ومىرىنە قاراتا جارىلقاۋشى رولىن اتقارسا، ال دۇرىس باعالاي بىلمەگەن ادامعا، ۋاقىت ــ ادام ءومىرىن ۇرلاپ، توزدىرىپ جوعالتاتىن توناۋشى. ءبىر ادامنىڭ ۋاقىتىن بوسقا وتكىزۋى ءوزىن-ءوزى ولتىرگەنمەن تەڭ. جۇڭگونىڭ ويشىل جازۋشىسى ــ لۋ شۇن مىرزاعا باسقالار: «ءسىز دارىندىسىز» دەگەندە، ول: «مەندە قايداعى دارىن، مەن باسقالاردىڭ كوفە ىشەتىن ۋاقىتىن قىزمەتىمە جۇمسايمىن ەمەس پە» دەگەن ەكەن. قۇن كوزقاراسى بويىنشا قاراعاندا دا قازىرگى قوعامىمىز ۋاقىتتى قادىرلەيتىندەردى قۋاتتايدى. سوندىقتان ادام ءوز قۇلشىنىسى ارقىلى ادامدىق قۇنىن ايگىلەپ، كەيىن «قاپ !» دەپ وپىق جەپ قالماۋدىڭ قامىن الدىن الا ويلاي جۇرگەنى ءجون. ويتكەنى، ۋاقىتتى قادىرلەيتىندەر رەال ءومىردىڭ سارالاۋىندا ءوز ەڭبەككەرلىگىمەن، ىزدەنگىشتىگىمەن ىرىقتى ورىنعا شىعادى دا، ۋاقىتتى قادىرلەمەيتىن جالقاۋ، توعىشارلار رەال ءومىردىڭ سىن-تالقىسىندا ءوز كەراناۋلىعىنىڭ كەسىرىنەن وزدىگىنەن ەكشەلىپ ىرىقسىز كۇيگە تۇسەدى. اۋەلى ۋاقىتتى قادىرلەمەيتىندەر قوعامدىق ورتادا ءوز كۇن كورىستەرى ءۇشىن امالسىز ۋاقىتتى قادىرلەيتىندەرگە وزدىگىنەن باعىنىشتى بولىپ، جالدانىپ ءومىر كەشىرۋگە ءماجبۇر بولادى.

  مەيلى قانداي جاعدايدا بولسىن، ادام ۋاقىتتى قادىرلەپ، ونى ءوز لايىعىندا يكەمدى پايدالانىپ، دۇرىس باعىتتا قۇلشىنىس جاساۋى ءۇشىن ەڭ اۋەلى ءوزىن جاقسى تاني ءبىلۋى ءتيىس. ۇلى ءدانىشپان اتامىز اباي ادام ومىرىنە قاراتا: «ەگەر دە ەستى كىسىلەردىڭ قاتارىندا بولعىڭ كەلسە، كۇنىندە ءبىر مارتەبە، بولماسا جۇماسىندا ءبىر، ەڭ بولماسا ايىندا ءبىر، وزىڭنەن ءوزىڭ ەسەپ ال! سول الدىڭعى ەسەپ العاننان بەرگى ءومىرىڭدى قالاي وتكىزدىڭ ەكەن، نە بىلىمگە، نە احيرەتكە، نە دۇنيەگە جارامدى، كۇنىندە ءوزىڭ وكىنبەستەي قىلىقپەن وتكىزىپپىسىڭ؟ جوق، بولماسا، نە قىلىپ وتكىزگەنىڭدى ءوزىڭ دە بىلمەي قالىپپىسىڭ؟» دەيدى. مىنە، بۇل تاعىلىمدى سۇراۋ ءسىزدىڭ دە ءومىر ساپارىڭىزعا ۇنەمى قويىلىپ وتىرۋعا ءتيىس. ايتالىق، ءسىز وزىڭىزگە قاراتا ءوز بويىمدا، وزىمە ءتان قانداي كەمشىلىگىم مەن ارتىقشىلىعىم بار، قاي باعىتتا، نەندەي كاسىپكە ىڭعايىم كەلەدى، وعان قالاي ۇمتىلعانىم ءجون جانە وسى كاسىپتەن بىرەر ناتيجە شىعارا الامىن با جوق پا، ءومىرىمنىڭ قىمباتتى كەزەڭىن دۇرىس پايدالانا الىپ ءجۇرمىن بە، جوق پا ... دەگەن سياقتى سۇراۋلاردى ۇنەمى قويا بىلگەنىڭىز ءجون.

  ادام بالاسى ءارقاشان ۋاقىتتى بوسقا وتكىزبەي وزىنە جانە قوعامعا پايدا كەلتىرەتىن ىسپەن اينالىسۋى، ايتالىق قىزمەت ەتەتىن ساتتە قۇلشىنا قىزمەت ىستەۋى، دەمالاتىن ۋاقىتتا دەمالىپ تىنىعۋى، تاماقتاناتىن كەزدە تاماقتانۋى، مادەني تۇرمىسپەن اينالىساتىن، سەيىلدەپ بوي جازاتىن، سپورتتىق شىنعۋمەن شۇعىلداناتىن تۇستا بۇلاردى دا ءوز لايىعىندا دۇرىس پايدالانۋى قاجەت. قىسقاسى، ۋاقىتتى دۇرىس پايدالانعان ادام ءوزىنىڭ دەنە اقاۋسىزدىعىن ساقتاپ، رۋحاني جان دۇنيەسىن ونان ارى كەمەلدەندىرىپ، ومىردە كوزدەگەن ماقساتىنا تەز جەتە الاتىن بولادى. ادام ءوز تىرشىلىگىنىڭ ءار ءساتىن ۇنەمى الدىن الا جوسپارلاپ دۇرىس باعىتتا پايدالانۋى، ۋاقىتتى التىننان دا ارداقتاپ جوعارى باعالاۋى قاجەت. سەبەبى، التىندى اقشاعا ساتىپ الۋعا بولعانىمەن ۋاقىتتى ەشقانداي باعادا ساتىپ الا المايتىنىمىز، ءوتىپ بارا جاتقان ۋاقىتتى ىركىپ، ايالداتىپ، نە ءوتىپ كەتكەن ۋاقىتتى قايتا شەگىندىرە المايتىنىمىز بەلگىلى اقيقات.

  ءبىز رەال ومىردە دۇنيەدەگى قۇبىلىستاردى وزىمىزگە الدانىش ەتىپ، اعارىپ اتقان ءار تاڭ مەن بوزارىپ باتقان ءار كۇننىڭ وزىمەن بىرگە ءبىزدىڭ ەڭ قىمبات، ەڭ اسىل زاتىمىزدى، التىننان دا ارداقتى ۋاقىتىمىزدى قايتا ورالماسقا الىپ بارا جاتقانىن سەزبەي دە قالامىز. سوندىقتان ءومىرىڭدى شىنايى سۇيسەڭ ۋاقىتىڭدى، باعا جەتپەس اسىلىڭدى ايالاي، ارداقتاي ءبىل، ونى ەشۋاقىتتا توزدىرما دا ءمان-ماعىناسىز وزدىرما، تەك قانا ۇتا ءبىل. ەگەردە ۋاقىتتى قىسقارتقىڭ، تەز ارادا ونى وزدىرعىڭ دا توزدىرعىڭ كەلسە، وندا قوس قولىڭدى الدىڭا سالىپ بوس قارا دا وتىر، نە بايانى جوق ءىستى الدانىش ەت، وينعا بەرىل، مول ۇيقىنى قۋات راحات كور. بەينە اباي اتامىز ايتقانداي: «بىلمەگەن ــ سوقىر، قايعىسىز وتىر، تاماعى تويسا ــ جاتۋعا»-، دەگەندەي ءىس قىل، مىنە بۇلاي ىستەۋ وتە وڭاي.

  ۋاقىتتى قايتىپ مەڭگەرۋ، قالاي قادىرلەپ، قايتىپ تولىق پايدالانۋ، شەكتى ءومىردى قايتكەندە ناتيجەلى، ماعىنالى، ءماندى وتكىزۋ، سول ارقىلى نۇرلى بولاشاق جاراتۋ ــ مىنە، بۇل كوكىرەگىندە جىلتى، كوكەيىندە ۇجدانى بار ءاربىر سانالى، ەستى جاننىڭ ەڭ بيىك وي تالعامى بولۋعا ءتيىس. ۇيتكەنى، ءبىر ادامنىڭ ۋاقىت تالعامى سول ادامنىڭ ءوز ءومىرىن قايتىپ، قالاي وتكىزۋى جونىنەن ۇلكەن سىن ەسەپتەلەدى.

  رەال ومىردە تەك قىزىقشىلىققا بەرىلۋمەن، ويىن-تويعا سالىنۋمەن ادام بالاسىنىڭ پاراساتى بيىكتەپ، وركەندەپ، وسپەيدى. سول سەبەپتى، ادامدار جالاڭ كوڭىل ءلاززاتى ءۇشىن ۋاقىت وتكىزۋدى ماقسات ەتكەن ساۋىق-سايران، ءمان-ماعىناسىز ارزان كۇلكى مەن تياناقسىز بەيمازا دۇرمەككە كوپ سالىنباعانى ءجون. ءومىرىن تياناقتى، ماعىنالى وتكىزگىسى كەلگەن ادامنىڭ بار نازارى قايداعى قۇن جاراتپايتىن ماعىناسىز ويىن-تويدا بولماي، اڭعارلى اقىل-ويدا، ونەر-بىلىمدە بولۋعا ءتيىس.

  ءومىر بەينە جەل وتىندەگى شىراق ءتارىزدى. ءار ادامنىڭ جارىق كۇنى ساناۋلى عانا. ءار پەندەنىڭ تىرشىلىك كۇيى توقتاۋسىز كەتىپ بارا جاتقان ءومىر پاراۆوزىنىڭ جولىندا ءبىر بەكەتتەن شىعىپ، كەلەسى بەكەتتەن ءتۇسىپ قالا بەرەتىن جولاۋشىعا ۇقسايدى. اتامىز قازاق ادام عۇمىرىنىڭ قىسقالىعىن تەك قامشىنىڭ سابىنا تەڭەگەن جانە حالىقتىق اندەرىندە «وتكىزگەن جاقسىمەنەن جارتى ساعات، جاماننىڭ ءوتىپ كەتكەن ومىرىندەي» دەپ ۋاقىتتىڭ قۇنىن وتە جوعارى باعالاعان. سوندىقتان ءار كۇنىڭدى، ۋاقىتىڭنىڭ ءار ءساتىن سانالى مەڭگەرگەنىڭ، ماعىنالى، ءماندى ءومىر وتكىزگەنىڭ ــ تۇتاس عۇمىرىڭدى ۇزارتقانىڭ. قىسقاسى، قۇنىن دۇرىس باعالاي بىلگەن ادامعا ۋاقىت اسا قىمبات سەزىلسە، ال قۇنىن دۇرىس باعالاي بىلمەگەن ادامعا ءمان-ماعىناسىز، ارزان سەزىلەدى. اۋەلى ءىشىنارا ۋاقىت كوزقاراسى جوق ادامنىڭ ءومىر ءسۇرۋ ءتاسىلى ــ حايۋان مالدىڭ تىرشىلىك داعدىسىنان تىم پارىقتالىپ كەتپەيدى.

  ادام ءومىرىنىڭ مەزگىلمەن بايلانىستى ءۇش شاعى بولادى، ول وتكەن شاق، وسى شاق، كەلەر شاق. وتكەن شاعىمىز ەندى قايتىپ ورالماسقا كەتتى، ونان پايدالانۋ ماڭگى مۇمكىن ەمەس، ال وسى شاعىمىز قولىمىزدا دەگەنىمىزبەن بىردەمدە ول دا وتە شىعاتىن بولادى، كەلەر شاعىمىز دا ءتىرى پەندەگە تەز جەتىپ ورالادى، ورالادى دا ايالداماي ول دا وتە شىعادى. «ونى ءسوزسىز، مىناداي يگىلىكتەنەمىن» دەپ الدىن الا كەسىپ ايتۋىڭىز مۇلدە مۇمكىن ەمەس. سوندا ماسەلەنىڭ تەتىگى وسى شاقتى مىقتى يگەرە بىلۋىڭىزدە. ەڭ قىمباتتى شاعىڭىز ــ وسى شاق. ءاربىر وسى شاقتى مىقتى يگەرۋدەن تۇتاس عۇمىرىڭىزعا جەتەرلىك تاۋسىلماس بايلىق، ورتايماس ىرىس، ومىرلىك ازىق، ءتان دۇنيەڭىز بەن جان دۇنيەڭىزگە قاجەتتى كۇش-قۋات، اقىل-پاراسات تاباسىز.

  رەال ومىردە ۇيرەنۋدىڭ، ەڭبەكتەنۋدىڭ شەتى مەن شەگى بولمايدى. عالىمداردىڭ مەجەلەۋىنشە، ءبىر قاراپايىم ادام تۇتاس ومىرىندە مي قورىنىڭ تەك 1 - 2 پايىزىن عانا ىستەتە الادى ەكەن. ۇيرەنۋ قيمىلىنىڭ ءوزى ءبىر ءتۇرلى وي ەڭبەگىمەن شۇعىلدانۋ ەسەپتەلەدى. قالىپتى دەڭگەيدەگى وي ەڭبەگى بولسىن، ءالى دە دەنە ەڭبەگى بولسىن، ول ــ ادام دەنساۋلىعىن جاقسارتىپ، عۇمىر جاسىن ۇزارتاتىن پايدالى قيمىلدار ەكەندىگىن عىلىم الدە قاشان تۇراقتاندىرعان جۇمىس.

  ومىردە ءسىز ءوز قاتارىڭىزدان وزا شاۋىپ الدا ءجۇرۋدى ويلاساڭىز، وندا ءوزىڭىزدى ۇيرەنۋگە، قاجىرلىلىقپەن ەڭبەك ەتىپ ەڭسە كوتەرۋگە قامشىلاعان ۇستىنە قامشىلاي ءتۇسىڭىز. سەبەبى، ءداۋىر دوڭعالاعى ءسىزدى جەتىپ السىن دەپ توسىپ، توقىراپ توقتاپ تۇرمايدى. ءسىزدىڭ داۋىرمەن تەڭ العا ىلگەرىلەۋىڭىز ءۇشىن جالىقپاي ۇيرەنىپ، تىنباي ەڭبەكتەنىپ، قۇلشىنا العا ىلگەرىلەۋ رۋحىن جەتىلدىرۋىڭىزگە تۋرا كەلەدى. قىسقاسى، بەرىلە ۇيرەنۋ، قۇلشىنا ەڭبەكتەنۋ ءسىزدى بارلىق كەلەڭسىزدىكتەن، كەمىستىكتەن ارىلتىپ كەمەلدى كىسىلىككە جەتكىزەدى. ءار قاشان بىلگەنىڭىز مولايىپ، وي ءورىسىڭىز كەڭەيگەن سايىن ويىڭىز جەتكەن جەرگە قولىڭىز دا جەتەتىن بولادى.

  جايشىلىقتا ادامداردىڭ ءبارى بۇل دۇنيەگە ءبىر-اق رەت كەلگەن قوناق ەكەنىن ابدەن سەزىپ بىلەدى. ءبىراق، بۇل ءبىر-اق رەتتىك تاماشا ورايدى جەتكىلىكتى قادىرلەپ، ءومىرىن ءمان-ماعىنالى وتكىزۋ ادام بىتكەننىڭ ءبارىنىڭ قولىنان كەلە بەرمەيدى. اسىرەسە، جاس شاعىڭىزدا ادام ولمەيتىندەي، ءومىر تاۋسىلمايتىن كۇندەردەن قۇرالعانداي سەزىلىپ ادامدى الدايدى. بەينە ءومىر وزبايتىنداي، ءتان توزبايتىنداي سەزىلەدى دە تۇرادى. سوندىقتان ءارقانداي ادام جىگەر، قايراتىنىڭ بار كەزىندە ۇيرەنۋ، ەڭبەكتەنۋ، باسقا دا ءتۇرلى ىزدەنىس جاساپ، العا ىلگەرىلەۋگە ءتيىستى جاقتاردا بارىنشا قارمانىپ قالۋعا قۇلشىنۋى، ۋاقىتپەن، ايمەن، كۇنمەن، ءتىپتى ساعات-مينۋتپەن جارىسىپ، ونى نەعۇرلىم ءوز يگىلىگىنە جاراتىپ، ۇتا تۇسۋگە ۇمتىلىس جاساۋى قاجەت. مىنە، بۇل ءاربىر سانالى، ەستى ادامنىڭ بويىنان تابىلۋعا ءتيىستى اسىل قاسيەت. وسى تاماشا قاسيەت قانا ءسىزدى شىنايى كىسىلىككە جەتكىزەدى. ءسىزدىڭ بويىڭىزدان ادام بالاسىنا ءتان وسى قۇندى قاسيەت ءارقاشان تابىلاتىن بولسىن.

  ”سوڭى“

  اۆتوردىڭ قىزمەت ورنى: التاي ايماقتىق پارتيا مەكتەبى

  كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
حابارلار
كوپ مەديا
ۇلتتىق مانەر
تەلەفون: 67 /65368365-010 ‍حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved