بەتتى ساقتاۋ |باس بەت قىلۋ |حات ساندىعى |حابارلاسىڭىز|ءبىز تۋرالى
جەرگىلىكتى ابزالدىلىق ــ ساياحاتشىلاردى باۋرايتىن اسىل
ىسپانديار سولتاش ۇلى 
2011.01.10 13:42     كەلۋ قاينارى : حالىق تورابى
{ ءارىپتىڭ ۇلكەن-كىشىلىگى كىشى ورتا ۇلكەن} باسىپ شىعارۋ  
      
  قازىرگى جاپپاي الەميلەنۋ داۋىرىندە ساياحات كاسىبىنەن تۇسەتىن تابىس دۇنيە ءجۇزى بويىنشا مۇنايدان كەيىن ەكىنشى ورىندى يەلەپ، ءار ەل حالىقتارىنىڭ ەكونوميكالىق، قوعامدىق دامۋىنا اسەرى كۇشتى ىرعاقتى ءىرى سالاعا اينالىپ وتىر. وسى اۋقىمعا ساي، جۋىق جىلداردان بەرى رايونىمىزدا ساياحات ىستەرى وڭىرلەردىڭ جەرگىلىكتى ابزالدىلىعىنا ساي تەز قارقىنمەن دامىپ، سول وڭىرلەردىڭ ەكونوميكاسى مەن قوعامىنىڭ جالپى بەتتىك العا ىلگەرىلەۋىنە تۇرتكىلىك رول اتقاراتىن تىرەكتى ءىرى كاسىپ تۇرىنە اينالدى.

  ساياحات كاسىبى ادامدار ويلاپ تاپقان ءىس-ارەكەتتەردىڭ ىشىندەگى قورشاعان ورتاعا ەڭ زالالسىزى. ول ەل مەن ەلدى، ءوڭىر مەن ءوڭىردى ءبىر-بىرىنە جاقىنداستىرىپ، ادامداردى ءوزارا باۋىرمالدىققا، تۇسىنىستىككە، سيلاستىققا جەبەپ، الەۋمەتتىك جانە ەكونوميكالىق قاتىناستاردى جان-جاقتىلى جانداندىرادى. وزگە ۇلتتارمەن، وزگە ناسىلدەرمەن، بەيتانىس جاڭا مادەنيەتپەن، ادەت-عۇرىپتارمەن تانىسۋعا وراي جاراتىپ بەرەدى. سونداي-اق ول ادام مەن تابيعاتتىڭ ءوزارا سايكەسىمدىلىگىن، جاراسىمدىلىعىن بارىنشا جوعارى ورەگە كوتەرەتىن، وزگەنى تانۋ ارقىلى ءوزىن تاربيەلەۋگە جەبەيتىن، ادامداردىڭ جالپى دۇنيە تانىمىن كەڭەيتەتىن عىلمي قيمىل بولىپ تابىلادى. باسقارىلۋى جاقسى بولسا، ساياحات كاسىبى قورشاعان ورتانى قورعاۋعا، ورتاسى بۇزىلعان ءوڭىر بولسا، ونى قايتالاي قالپىنا كەلتىرۋگە، ادامداردىڭ تىرشىلىك ورتاسىن بارىنشا جاقسارتىپ، ارلەندىرۋگە ۇلكەن تۇرتكىلىك رول اتقارادى.

  ساياحات كاسىبى بار كۇشپەن جاندانسا، ول جەرگىلىكتى حالىقتىڭ كىرىسىن مولايتىپ، الۋان ءتۇرلى كاسىپتىڭ قاتار دامۋىنا كەڭ جول اشىپ بەرەدى؛ كۇندەلىكتى تۇتىنۋ بۇيىمدارىنىڭ دامۋىنا وڭدى اسەر ەتەدى، سەبەبى ساياحاتشىلار تولقىنى تاۋاردىڭ كوپتەگەن تۇرلەرىنە بولعان سۇرانىستى ارتتىرادى؛ تانىم مەن ساۋىققا قۇرىلعان قارجىنىڭ مولايۋىنا، ۇلتتاردىڭ ءارالۋان مادەنيەتىنىڭ وركەندەۋىنە، ءوزارا اسەر ەتىپ دامۋىنا، ەسكەرتكىش، مۇراجاي، جەرگىلىكتى ەرەكشەلىككە يە انسامبىلدەردىڭ ساقتالۋىنا، قۇرۋعا بەت العان ءارالۋان بەيزاتتىق مادەنيەت ۇلگىلەرىنىڭ قورعالىپ قالۋىنا جانە ءارتۇرلى ساۋىق قيمىلدارىنىڭ ومىرگە كەلىپ، جالعاستى دامۋىنا سەبەپكەر بولادى؛ قاتىناس-تاسىمال مەن باسقا دا نەگىزدىك قۇرىلعى قۇرىلىستارىنىڭ وركەندەۋىنە يگى اسەر ەتەدى؛ حابار بايلانىسى قىزمەتىنىڭ دامۋىن تەزدەتەدى، ويتكەنى ساياحاتشىلار تۇرعىلىقتى ورىندارىمەن حابارلاسۋ ءۇشىن پوچتا، تەلەگراف جانە تەلەفوندى ۇيتقى ەتكەن كوپ مەديالى حابار تورابىنىڭ كەمەلدى بولۋىن تالاپ ەتەدى؛ جەرگىلىكتى ونەركاسىپ بۇيىمدارىنا، وڭىرلىك ءتۇس العان ۇلتتىق قولونەر اشەكەي بۇيىمدارىنا دەگەن سۇرانىستى كۇشەيتەدى؛ جەرگىلىكتى ونىمدەردىڭ كوپتەپ ساتىلۋى ساياحات ورىندارى ءۇشىن جارناما رولىن اتقاراتىن بولادى؛ ەلگە كوپ مولشەردەگى شەتەل اقشاسىنىڭ كەلۋىنە جول اشادى؛ قارجىنى مولىنان تارتىپ، دارىندىلاردى باۋراۋعا تۇرتكىلىك رول اتقارادى.

  ساياحاتشى جولعا شىققاندا بەلگىلى ماقساتپەن شىعادى. بىرەۋلەرى بەيتانىس جەرلەردىڭ قىزىقتى وبيەكتىلەرىمەن تانىسقىسى كەلسە، ەندى بىرەۋلەرى سۇلۋ تابيعات اياسىندا سەرۋەندەپ، ورماننىڭ ياكي تاۋدىڭ شيپالى تازا اۋاسىمەن تىنىس العىسى كەلەدى، تاعى بىرەۋلەر ءۇشىن ساياحات سپورتتىق شارالارمەن ولشەنەدى. ساياحاتشىلار الگى ساياحات ورىندارىنىڭ تابيعي جاراتىلىستىق كوركەم كورىنىسىمەن تاريحي، مادەني، سالت-داستۇرلىك، شارۋاشىلىق جانە باسقا دا وبيەكتىلەرىنە دەگەن قىزىعۋشىلىعىنان وزدەرىنە تاماشا ءلاززات تابادى. بۇگىنگى ءىرى قالالاردا شۋىلدىڭ قالىپتان تىس كوبەيۋى سەبەپتى، ادامدار تىنىش تا ءجايلى ورتانى ىزدەۋگە ءماجبۇر بولۋدا. پسيحولوگيالىق جاقتان شارشاۋ كوبىنەسە قالا تۇرعىندارىنا ءتان جاعداي. جايشىلىقتا ساياحاتشى سەرۋەندەۋ بارىسىندا ويىن باسقا نارسەگە ءبولىپ، ميىن شارشاۋدان، ءتۇرلى زەرىگۋدەن ارىلتادى. ءارقاشان تاۋلى ءوڭىردىڭ حالقىنا تەڭىز، كول، كوسىلگەن جازىق دالا؛ ال جازىق ءوڭىردىڭ حالقىنا تاۋلى، نۋلى جەر قىزىقتى بولىپ سەزىلەدى. قورشعان ورتا ادامدار جاعىنان الدە قاشان اشىلىپ زەرتتەلىپ بولعان بولسا دا ۇلى تابيعاتتىڭ ءتىلسىم قۇدىرەتى ادامداردى جالعاستى قىزىقتىرا بەرەدى.

  ساياحات ىستەرى جان-جاقتى، ويداعىداي تاماشا ورنالاستىرىلسا، ول ادامداردىڭ كوڭىل-كۇيىن كوتەرىپ، دەنەسىن شىنىقتىرىپ، اۋرۋ-سىرقاۋىن ۇمىتتىرىپ، توزىمدىلىگىن ارتتىرىپ، بولاشاعىنا دەگەن سەنىمىن بەكەمدەيدى. ساياحات بارىسىندا ادامداردىڭ پسيحولوگيا جاعىنان سەرپىلىسى پايدا بولىپ، فيزيولوگيا جاعىنان جىگەر كۇشى ارتادى؛ قيمىل بارىسىندا ادامدار قۇندى ءارى پايدالى ىستەرگە داعدىلانىپ، ونى كەيىنگى جەردە قاجەتىنە جاراتادى. ساياحات قيمىلى ادامداردى ۇيىمشاڭدىققا، قيىنشىلىققا توزۋگە جەتەلەپ، باسىنا ءىس تۇسكەنگە قول ۇشىن بەرۋگە، وتانشىلدىققا باۋلىپ، وتانعا، حالقىنا، ونىڭ داستۇرلەرىنە دەگەن سۇيىسپەنشىلىك رۋحتا بولۋعا تاربيەلەيدى، تابيعاتقا جان اشىرلىقپەن قاراۋعا ۇيرەتەدى. ول جاستار مەن جاس وسپىرىمدەر تاربيەسىندە ماڭىزدى رول اتقاراتىن تاماشا قيمىل.

  ادەتتىگى جاعدايدا، ساياحات دەلىنسە، ەڭ اۋەلى، كوز الدىمىزعا تابيعات اياسىندا سەيىل-سەرۋەن قۇرعان ادامدار شوعىرى، اسقار تاۋ، الىپ وزەن، قارلى شىڭ، نۋ ورماندى الىپ اڭعار، الۋان گۇلدەرى قۇلپىرا اشىلعان بەتەگەلى بەتكەي، ماۋەلى باقتاعى جانعا ءجايلى قوڭىر سامال، عاجايىپ جاراتىلعان كەرىش قالا...تاعىسىن، تاعىلار ەلەستەيدى.

  رايونىمىزدا الەمدە وتە سيرەك كەزدەسەتىن جاراتىلىستىق ورتاسى ءالى بۇزىلماعان، كوركى كوز مەيىرىن قاندىراتىن وڭىرلەر بارشىلىق. وسى وڭىرلەردە ساياحاتتىڭ بارلىق ءتۇرىن، ياعني تانىمدىق، ساۋىقتىق، سالت-داستۇرلىك، ەكولوگيالىق، ساۋىقتىرۋ، اڭشىلىق ت، ب تۇرلەرىن ءتورت ماۋسىمعا ساي ابزالدىلىعىمەن كەڭ كولەمدە دامىتۋعا ابدەن بولادى. كوركى كوز سۇرىندىرەتىن كورىكتى مەكەنىمىزدىڭ اسپانمەن تىلدەسكەن تاكاپپار تاۋلارى، سارقىراپ اققان اساۋ تولقىندى اق جال وزەندەرى مەن ايدىندى اينا كولدەرى، الۋان گۇلدەرى قۇلپىرا اشىلعان ءجازيرالى القاپتارى، سىلدىراپ اققان سامىرسىندى، شىرشالى بۇلاقتارى، كورەر كوزدى ەرىكسىز وزىنە ءتانتى ەتپەي قويمايتىن جانعا ءجايلى تاماشا تابيعاتى، قىسقاسى، ءبارى-ءبارى جەرگىلىكتى حالىققا جاراتىلىستىڭ ءوزى اياماي سيلاعان ماڭگىگە تاۋسىلماس قازىناسى ەسەپتى.

  قىرۋار فاكتىلەر ۇگىت، جارناما ارقىلى قاراپايىم جاراتىلىستىق ورتانى قيالداعى دۇنيەگە اينالدىرىپ، ادامداردى باۋراۋعا بولاتىندىعىن دالەلدەۋدە. رايونىمىزداعى كوپتەگەن وڭىرلەردىڭ اسىلگى جاراتىلىستىق ورتاسىنىڭ ءوزى ەشبىر بوياماسىز-اق ادامدارعا قيالداعى الەمدەي اسەر بەرەرى حاق. ماسەلەنىڭ تەتىگى وسى تاماشا ورتانى بۇگىنگى دامىعان اقپارات قۇرالدارى ارقىلى ونى ونان ارى ارلەندىرىپ، باسقالارعا تانىتۋىمىزدا بولىپ وتىر.

  ادەتتە ساياحاتشىلاردىڭ نازارى كوبىنەسە وزىنە بەيتانىس ورتاعا، تابيعاتى كوركەم، اۋاسى تۇنىق، سۋى تازا، قوعامى ورنىقتى، قاتىناس-حابارلاسۋى قولايلى، ساياحاتتاپ دەمالۋعا بارلىق شارت-جاعدايى تولىق ازىرلەنگەن وڭىرلەرگە اۋادى. كولدەنەڭ كوز بارلىعىن بارلايدى. ساياحات تەرەزەسىنەن ءبارى ايپاراداي كورىنەدى. كۇندەلىكتى ومىردە مول قاتپارلى، قالتارىستى نارسەلەرگە دە ساياحاتشىلاردىڭ زەيىنى تۇسكىش كەلەدى. ەلىمىزدىڭ شىعىس تەڭىز جاعالاۋىنان كەلگەن ساياحاتشىلاردى سول وڭىرلەرگە ءتان كورىنىستىك ۇلگىلەرمەن سالت-داستۇرلەر؛ ال شەتەلدىكتەردى باتىستىق ستيلدەگى كورىنىستىك ۇلگىلەرمەن سالت-داستۇرلەر قىزىقتىرا بەرمەيدى. ولار سول ورتادا وسكەندىكتەن، ولارعا قاجەتتىسى ءوز ورتالارىنا ءتان قاسيەتتەر ەمەس، قايتا ولارعا قاجەتتىسى وزگە وڭىرلەردىڭ وزىنە ءتان وزگەشە كورىنىستىك ۇلگىلەرى، جەرگىلىكتى حالىقتىڭ سالت-ءداستۇرى مەن مادەنيەتى، قوناق قابىلداۋ داعدىلارى بولماق. ەلىمىزدىڭ شىعىس تەڭىز جاعالاۋىنان كەلگەن ساياحاتشىلارعا ايبارلى ارىستان مەن حاھارلى ايداھاردىڭ تاس ءمۇسىنىن كورۋ تاڭسىق ەمەس. ولار شالعاي، شەكارا ۇلتتىق وڭىرلەرگە كەلگەندە، وزدەرىنە مۇلدە بەيتانىس، ۇقسامايتىن وزگەشە قاسيەتتەردى، سالت-داستۇرلەردى كورىپ، تانىسۋعا كەلەدى. سوندىقتان رايونىمىزدىڭ ءارقايسى ساياحات وڭىرلەرىندە كورىنىستىك ۇلگىلەردى ارلەندىرىپ كورسەتۋدە جەرلىك ۇلت حالىقتارىنا ءتان ەرەكشەلىكتەر، سالت-داستۇرلىك قاسيەتتەر بارىنشا باسا كورسەتىلگەنى وڭ. بۇلاي دەيتىمىز، اۋەلى، كەيبىر سىرتتان كەلگەن ساياحاتشىلار الدىمەن اۋىلدى جەرلەردى ارالاپ كورگىسى، بوياماسىز، تابيعي قالپىن ساقتاعان قاراپايىم اۋىلدا تۇرعىسى كەلەدى.

  سوندىقتان اۋىلدى جەرلەردى ساياحاتشىلاردىڭ كوپتەپ كەلەتىن جەرىنە اينالدىرۋعا، ساياحاتتان تۇسەتىن كىرىستىڭ مۇلدە باسىم بولەگى قاراپايىم اۋىل ادامدارىنىڭ قالتالارىنا تۇسۋىنە، ساياحاتشىلاردى باۋراۋ ءۇشىن جەرگىلىكتى ۇلت حالىقتارىنىڭ سالت-سانا، مادەنيەت داستۇرلەرىن ايگىلەيتىن، وزىندىك دارالىققا يە ۇلتتىق ەرەكشەلىكتەرىن بار كۇشپەن جانداندىرىپ، ونى جاسامپازدىقپەن ارلەندىرىپ كورسەتۋگە شىنايى قۇلشىنىس جاساۋىمىز ءتيىس. ويتكەنى كوپ جاعدايدا قالتاسى قالىڭ ساياحاتشىلاردى بەس جۇلدىزدى قوناق ۇيلەرمەن زاۋلىم اسەم عيماراتتار تاڭعالدىرىپ باۋراي المايدى، ولاردى تارتاتىنى قاراپايىم اۋىل ادامدارىنىڭ تابيعي قارا لاشىعى. ولار سوندا كوسىلىپ جاتىپ قىمىز ءىشىپ، ەت جەپ، قۇرت مۇجىپ، باۋىرساق، ىرىمشىك جەپ، اتقا، تۇيەگە ءمىنىپ كوڭىل كوتەرۋگە قىزىعادى. قىسقاسى، ولاردى باۋرايتىنى جاساندى تۇرمىس فورماسى ەمەس، تابيعي تۇرمىس داعدىسى. ولار سونان ءلاززاتتانىپ كوڭىل كوتەرۋگە كەلەدى. ەگەر كەز كەلگەن ساياحاتشىنى اۋىل ادامدارى ءوزىنىڭ تابيعي ۇلتتىق ەرەكشەلىگىنە ساي قارسى الىپ، رازى ەتە السا، وندا ول كەلەر جىلى تاعى دا اينالىپ كەلەتىن بولادى. ماسەلەنىڭ تەتىگى ءار دارەجەلى ۇكىمەت ورىندارىنىڭ جەرگىلىكتى قاراپايىم حالىق ءۇشىن ساياحات كاسىبىن ويداعىداي جاقسى ۇيىمداستىرىپ، قولايلى ورتا، بەدەلدى بەلگىلەمە، ءتيىمدى شارت-جاعداي جاراتىپ بەرۋىندە؛ كاسىپ ابزالدىلىعى ارقىلى سول قاراپايىم حالىقتى اۋقاتتانۋ جولىنا باستاۋىندا؛ جەرگىلىكتى ساياحات ەرەكشەلىكتەرىن بار كۇشپەن كورنەكتىلەندىرىپ، ساياحاتشىلاردى قاراپايىم حالىققا تيىمدىلىك اكەلۋگە باۋراپ جەتەلەي بىلۋدە.

  سوندىقتان رايونىمىزدا ساياحات ورىندارىن بەزەندىرىپ، كورىنىستىك قۇرىلعىلاردى سالعاندا، جەرگىلىكتى ۇلت حالىقتارىنىڭ وڭىرلىك ەرەكشەلىكتەرى، سالت-داستۇرلىك قاسيەتتەرى مەن تاريحي، مادەني تۇلعالارى قايتالاي جاڭعىرتىلىپ، ەرەكشە ايشىقتالىپ كورسەتىلۋى ءتيىس. ۇيتكەنى جەرگىلىكتى ابزالدىلىقتىڭ ءوزى سول وڭىرلەر ءۇشىن جىلدار بويى سارقىلماي قۇن جاراتىپ بەرەتىن ۇلكەن بايلىقتىڭ رولىن اتقارادى. سول سەبەپتى، ساياحات تۇيىندەرىن بەزەندىرىپ كورسەتۋدە ۇلتتىق ەرەكشەلىكتى جان-جاقتىلى تانىستىراتىن تۇسىندىرۋلەر اعىلشىن، حانزۋ جانە جەرگىلىكتى ۇلت تىلدەرىندە تولىق تانىستىرىلۋى، جەرگىلىكتى ۇلت ازاماتتارىنان كوپ ءتىل بىلەتىن، ءوز تاريحى مەن مادەنيەتىنە قانىق زور توپتاعى ساياحاتقا جول باستاۋشىلار تاربيەلەنىپ جەتىلدىرىلۋى قاجەت. جول باستاۋشىلار ۇلتتىق ەرەكشەلىكتەردى پاش ەتە الاتىنداي، ءوز ۇلتتىق ويۋ-ورنەگىمەن ورنەكتەلگەن ءداستۇرلى ۇلتتىق كيىمدەردى كيسە، ساياحاتشىلاردى ءتىپتى دە جاقسى باۋراي تۇسەتىن بولادى.

  رايونىمىزدا ساياحاتتى دامىتۋدىڭ تابيعي، تاريحي، ورايلىق مۇمكىندىكتەرى جەتەرلىك. ساياحات ءىسى تابيعاتتى تاماشالاۋمەن عانا شەكتەلمەيدى. ول ءبىر ۇلتتىڭ ءوز ۇلتتىق قاسيەتىن وزگە جۇرتقا بۇكپەسىز تانىستىرۋىنا جانە ءوز ۇرپاقتارىنا ۇلتىنىڭ وتكەنى مەن بۇگىنىن تۇسىندىرۋىنە تاماشا وراي جاراتىپ بەرەتىن قيمىل. ءبىز ساياحات ارقىلى ءوز تاريحىمىزدى، مادەنيەتىمىزدى، سالت-ءداستۇرىمىزدى قايتالاي جانداندىرىپ، ونى زور كولەمدە ءناسيحاتتاۋعا كەڭ ءارى كەدەرگىسىز جول اشاتىندىعىمىزدى ۇمىتپاۋىمىز قاجەت.

  ساياحات كاسىبىندەگى باستى ماقساتتىڭ ءبىرى ــ ەكونوميكالىق قۇن جاراتۋمەن بىرگە، قوعامدىق قۇنعا دا قول جەتكىزۋ. اتاپ ايتقاندا، ۇلتتىڭ وزىندىك بولمىسىن وزگە جۇرتقا كورسەتە ءبىلۋ، ءوزىنىڭ تامىرى تەرەڭگە تارتقان باي مادەنيەتى مەن تاريحىن، ونەگەسى مەن ءتابيعي مىنەز-قۇلقىن، ونەرى مەن وركەنيەتىن تانىتۋ، ونى ەرتەڭگە، بولاشاققا ىركىلىسسىز جالعاي ءبىلۋ بولماق.

  جاراتىلىس بىزگە باي مازمۇندى ساياحات ابزالدىلىعىن سيلاعان، ايتالىق، رايونىمىزدا قارلى شىڭ، مۇزدىق، ورمان-توعاي، جايلاۋ، قۇبا ءشول، عاجايىپ كەرىش، ەسكەرتكىش مۇرا، وزەن-كول، قۇمدى دالا، نە ىزدەسەڭىز سونىڭ ءبارى تابىلادى. وندا تاڭقالارلىق ءتىلسىم ءتابيعي كورىنىستەرمەن بىرگە تاريحى ۇزاق جىبەك جولى مادەنيەتى مەن ونەرى، ۇلتتىق ەرەكشەلىككە يە تاريحي، ءدىني، مادەني مۇراعاتتار مەن ءار ۇلتتىڭ شۇعىلالى سالت-ءداستۇرى، قىسقاسى، بارلىق وركەنيەت ۇلگىلەرى بار. سوندىقتان رايونىمىز ەل ءىشى جانە شەتەل ساياحاتشىلارى اڭساي ۇمتىلاتىن ساياحات وڭىرىنە اينالىپ وتىر.

  ءبىز ساياحات قىزمەتىندە ساياحاتشىعا جاعىمدى اسەر، تاعىلىمدى تالىمدىك ماتەريال، ەستە قالارلىق قىزىق ۋاقيعا سيلاۋ ارقىلى ولاردى قاي ەلگە كەلگەنىن، قانداي حالىققا قوناق بولعانىن ەسىندە ماڭگى ساقتايتىنداي ەتۋىمىز كەرەك. جايشىلىقتا ءبىز ساياحاتشىلارعا جەرگىلىكتى حالقتىڭ ەرتەرەكتەگى تۇرمىس سالتىن كورسەتۋگە، ءار ءوڭىردىڭ وزىنە ءتان قىزىقتى دەرەكتەرىمەن تانىستىرۋعا تىرىسامىز. سول وزگەشە ەرەكشەلىكتەردى كورسەتۋ ارقىلى ولاردى حالقىمىزدىڭ سالت-داستۇرىنەن حاباردار ەتەمىز. قالاي بولعان كۇندە دە ساياحاتشىنى جەرلىك ۇلتتىڭ ۇلتتىق ەرەكشەلىكتەرى، سالت-ءداستۇرى، حالىقتىق مۋزيكاسى، ۇلتتىق سپورت تۇرلەرى، باي تاريحى ءتانتى ەتەتىنى ءسوزسىز.

  ساياحاتشىلارعا وسىنداي تۇسىنىك بەرۋ تىم وڭاي دا جۇمىس ەمەس. ويتكەنى زامان جاڭارعان سايىن، ۇلتتىڭ، حالىقتىڭ ءتابيعي تىنىس-تىرشىلىگى، ومىرلىك تۇرمىس داعدىسى ءبارى دە وزگەرەدى. قوعامنىڭ العا ىلگەرىلەۋى، تەحنيكانىڭ دامىپ جاڭالانۋى ۇلتتىڭ تۇتاس بولمىسىنا ءوز اسەرىن تيگىزبەي قويمايدى. قازىر قايماعى بۇزىلماعان تاريحي، ءتابيعي ورتانى تابۋ تىم قيىن. ادام اياعى جەتپەگەن قۇلا شول، ءيىت تۇمسىعى وتپەيتىن قالىڭ توعاي، سولتۇستىكتىڭ ماڭگىلىك مۇز قۇرسانعان ءبىربولىم وڭىرلەرىندە كەزدەسەتىن تايپالاردا بولماسا، قازىر بايىرعى قايماعى بۇزىلماعان ورتانى كەزدەستىرۋگە كەلمەيدى، ءبارىن دە قولدان جاساۋعا تۋرا كەلەدى. مىسالى، ءبىر ۇلت ۋاكىلدەرى ساياحاتقا قىزمەت وتەۋ بارىسىندا ءوز ۇلتىنىڭ رولدارىن ويناپ، كيىمىن كيىپ، بويانىپ-سىلانىپ، اندەتىپ-بيلەپ، ايتەۋىر، قالتالى ساياحاتشىلاردىڭ كوڭىلىنەن شىعۋعا تىرىسادى، مۇنىڭ ءبارى دە ساياحاتشىلاردى تارتۋ ءۇشىن بولاتىن ىستەر.

  قىسقاسى، ساياحات كاسىبىنە تۇتاس ۇلت بولىپ اتتانىسقا كەلىپ، كاسىپ سالاسىنىڭ الدىڭعى لەگىنەن ەرتەرەك ويىپ ورىن الامىز دەسەك، ساياحات ىستەرى ءۇشىن ايانباي قىزمەت وتەۋىمىزگە تۋرا كەلەدى. ۇلتىمىز ساحاراسىندا ساياحاتشىلاردى وزىنە باۋراپ قىزىقتىراتىن بارلىق مۇمكىندىكتەر جەتكىلىكتى. ايتالىق، سايىن دالامىزدىڭ كوركى كوز سۇرىندىرەتىن تاماشا تابيعاتى مەن باي مازمۇندى سالت-ءداستۇرىمىزدىڭ، دۇنيە حالىقتارىن وزىنە ءتانتى ەتكەن قوناقجاي حالىقتىق قاسيەتىمىزدىڭ ساياحاتشىلاردى جالعاستى باۋراي بەرەتىندىگىنە استە شەك كەلتىرۋگە بولمايدى.

  بىلايعى جەردە ءبىز ساياحات ىستەرىنە ايانباي ات سالىسساق، ول ۇلتىمىزعا زور ەكونوميكالىق قۇن، تىنىستى تىرشىلىك، رۋحاني ءلاززات باعىشتاۋمەن بىرگە، ۇلتتىق سالت-ءداستۇرىمىزدىڭ قايماعىن بۇزباي جالعاستىرا بەرۋىمىزگە تاماشا مۇمكىندىكتەر جاراتىپ بەرەدى. ەندىگى ماسەلەنىڭ تەتىگى تابيعات انا ءوزى جومارتتىقپەن سيلاعان تاماشا تابيعاتىمىزدىڭ، ۇلى بابالارىمىز عاسىردان-عاسىرعا قايماعىن بۇزباي جالعاستىرىپ كەلگەن بوگەنايى بولەكشە ۇلتتىق قاسيەتىمىزدىڭ قادىر-قىمباتىن اسىرىپ، كەمىستىگىن تولىقتاپ، زور ەكونوميكالىق جانە قوعامدىق قۇن جاراتۋىمىزدا. وسى تاۋسىلماس قازىنانى قايتكەندە قاراپايىم حالىقىمىزدىڭ يگىلىكتى ءىسى ءۇشىن قىزمەت ەتتىرە بىلۋىمىزدە بولىپ وتىر.

  ” سوڭى “

  اۆتوردىڭ قىزمەت ورنى: التاي ايماقتىق پارتيا مەكتەبى

  كەلۋ قاينارى: حالىق تورابى
جاۋاپتى رەداكتورى : اسقار جاڭابەك ۇلى
حابارلار
كوپ مەديا
ۇلتتىق مانەر
تەلەفون: 67 /65368365-010 ‍حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved