بەتتى ساقتاۋ | باس بەت قىلۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى

ساپالىق بايلانىس(18)

2012.05.23 11:12    


  6. ميدىڭ ويلاۋ جۇيەسى

  ادام ميى وتە كۇردەلى، ونىڭ كۇردەلىلىگى زاتتىق جانە رۋحتىق قوس ەرەكشەلىك كورسەتۋىندە. زاتتىق ەرەكشەلىك العان ميدى تىرىدەي بورشالاۋعا كەلمەيدى، ال رۋحتىق ەرەكشەلىك العان رۋحتى كوزبەن كورىپ، قولمەن ۇستايتىن ناقتىلى نارسە ەمەس. سول سەبەپتى بۇگىنگى كۇندەرى مي مەن رۋح ۇستىندەگى زەرتتەۋلەر تەك مي نەمەسە رۋحتىڭ دارالىق ەرەكشەلىگىن زەرتتەۋمەن شەكتەلىپ كەلدى. ءاسىلى ميدى زەرتتەۋ ۇلكەن جاقتان ءۇش ءتۇرلى جاعدايعا ساي كەلەدى. ولار: ميدى زەرتتەۋ، رۋحتى زەرتتەۋ، مي مەن رۋحتىڭ بايلانىسىن زەرتتەۋ. ءبىز «رۋحتىڭ ءمانى» تاقىرىبىندا ارناۋلى تۇردە رۋحتى ايىرىم سويلەپ وتكەنبىز. وسى تاقىرىپتا مي مەن رۋحتىڭ بايلانىسىن وزەك ەتىپ، ميدىڭ ويلاۋ جۇيەسىنە قاراتا ىزدەنىس جاسايمىز.

  مي مەن رۋحتىڭ بايلانىسى مي مەن رۋحتىڭ ارا قاتىناسىن جالعاپ تۇرعان ميدىڭ ويلاۋ جۇيەسىن مەڭزەيدى. ميدىڭ ويلاۋ جۇيەسى مي مەن رۋحتى دانەكەرلەيتىن ارالىق بولىك بولعانىمەن، ول اينالىپ كەلگەندە مي مەن رۋحتىڭ تىكە بايلانىسىن تياناق ەتەدى. سول ءۇشىن مي مەن رۋحتىڭ ءوزارا جىمداسۋىنا سەبەپ بولعان، ميدىڭ قىزمەت ءبولىسىن جۇرگىزەتىن، ميدىڭ وزدىك تەگىن ايقىنداۋ وتە ماڭىزدى. وسى ميدىڭ وزدىك تەگى ميدىڭ ويلاۋ جۇيەسىنىڭ نەندەي مالىمەتتەردى قابىلداپ، قالاي جازىپ ساقتاپ، قانداي بەينەلەپ، قايتىپ قاجەتىمىزگە جاراتىپ بەرۋىن اتقاراتىن فۋنكتسيالىق قۇرىلىم ەسەپتەلىنەدى. سوندا ميدىڭ وزدىك تەگى: زاتتىق تەك، الەمدىك تەك، جازمىشتىق تەك، بولمىستىق تەك بولىپ، ءتورت تەكتى بىرلىك قۇرايدى.

  ميدىڭ وزدىك زاتى – ۇيتقى بولادى. مي قاشاندا ءار قيلى ويلاردى ويلايدى، ال سول ويلارى قالايدا ءمالىم سەبەپتەردەن تۋىندايتىنى حاق. ياعىني، ميدىڭ وي تۋدىراتىن سەبەبىن ۇيتقى دەيمىز. ماسەلەن، ادامنىڭ قارنى اشقاندا، ادام تابيعي تۇردە تاماقتانۋدى ويلايدى. سول سياقتى ادامداردىڭ ءمالىم ءبىر جەرى سىرقاتتانسا، دەرەۋ دارىگەرگە جۇگىرەدى. وسى ويلاردى تۋدىراتىن سەبەپ ۇيتقى بولادى. ميدىڭ وزدىك الەمى – جۇيە بولادى. ميدىڭ قابىلداعان مالىمەتتەرى ادام ميىندا فورمالانعان جۇيە قالىپتاستىرىپ، جىككە اجىراتىلىپ ساقتالادى. ياعىني، مي جۇيەسى مالىمەت ساقتايتىن قامبا. ميدىڭ وزدىك جازمىشى – قابىلەت بولادى. ميدا ساقتالعان مالىمەتتەردى وياتۋدان ميدىڭ قابىلەتتەرى جارىققا شىعادى. ماسەلەن، ادامداردىڭ كۇزەتۋ، ويلاۋ، ەستە ساقتاۋ، بولجالداۋ، قورتىندىلاۋ، پىكىر ءجۇرگىزۋ سياقتى كوپ جاقتىلى قابىلەتتەرى بولادى. وسى قابىلەتتەر مالىمەتتەردىڭ ارجاق-بەرجاعىن قازبالاپ، وڭدى-سولدى بايلانىسىن جالعايدى. ميدىڭ وزدىك بولمىسى – قىزمەت بولادى. ميدىڭ قىزمەتى مالىمەتتەردى دەر كەزىندى جولداپ، سايكەستى قيمىل جاساۋىنا جەتەكشىلىك ىستەيدى. ماسەلەن، ادام سويلەۋ، جازۋ، ىستەۋ سياقتى جۇمىستارمەن اينالىسقاندا، مي قاجەتتى مالىمەتتەردى دەر كەزىندە جولداپ، ادامنىڭ لەك-لەگىمەن ءسوز سويلەۋىنە، ىركەس-تىركەس جازۋ جازۋىنا، كەزەكپە-كەزەك ىستەردى ءبىرجايلى ەتۋىنە سايكەسىپ، قىزمەتىن اقساتپاي ادا ەتەدى. قورتىپ كەلگەندە، مي: ۇيتقى، جۇيە، قابىلەت، قىزمەت سىندى وزدىك ءتورت تەكتىڭ بىرلىگى.

  ميدىڭ وزدىك تەگى مەن رۋح ءمانى اراسىنداعى بايلانىس كەستەسى (6.1-كەستە)

  كەستەدە كولدەنەڭ قاتار ميدىڭ وزدىك تەگى، تىك قاتار رۋح ءمانى بولىپ، ولاردىڭ ءوزارا تۇيىلىسكەن جەرىندەگى شەشىمى «ميدىڭ بىرلىكتىك ءتۇيىنى» بولادى. ميدىڭ بىرلىكتىك ءتۇيىنىنىڭ سانى 36، ولار ميدىڭ ويلاۋ جۇيەسىن جارىققا شىعارادى.

  ميدىڭ ويلاۋ جۇيەسى ميدىڭ بىرلىكتىك تۇيىندەرى ارقىلى 9 ءتۇرلى مالىمەتتەردى قابىلدايدى، ساقتايدى، بەينەلەيدى جانە قاجەتكە جاراتادى. ياعىني، تۇيسىكتىك مالىمەتتى مىسال ەتىپ الساق: تۇيسىكتىك مالىمەت سيگنال بولىپ قابىلدانادى، وبراز بولىپ جازىلىپ ساقتالادى، ەلەس بولىپ بەينەلەنەدى، نازار بولىپ قاجەتكە جارايدى. سوندا ءبىر تۇردەگى مالىمەت جونىنەن الىپ ايتقاندا، ونى قابىلدايتىن، جازىپ ساقتايتىن، بەينەلەيتىن، قاجەتكە جاراتاتىن ميدىڭ بىرلىكتىك تۇيىندەرى بولادى. ولاردىڭ اتالۋى مالىمەت فورماسىنىڭ اتالۋىمەن بىردەي بولادى. ماسەلەن، تۇيسىكتىك مالىمەت سيگنال بولىپ قابىلدانسا، ونى قابىلداعان ميدىڭ بىرلىكتىك ءتۇيىنى «سيگنالدىڭ بىرلىكتىك ءتۇيىنى» دەپ اتالادى. ميدىڭ ويلاۋ جۇيەسىندە ءبىر مالىمەت ءبىر بۇيرىق رەتىندە ميدىڭ بىرلىكتىك ءتۇيىندەرىنىڭ دارا ءبىر تۇرىنە تۋرا كەلەدى دە، ميدىڭ بىرلىكتىك ءتۇيىنى ارقىلى تىكە قابىلدانادى، سونىمەن بىرگە سايكەسىپ جۇمىسىن اتقارادى.

  تومەندە ميدىڭ بىرلىكتىك تۇيىندەرىن ءبىر-بىرلەپ ءتۇسىندىرىپ وتەيىك.

  تۇيسىكتىك مالىمەت. سيگنال: رۋح تۇيسىگى مەن مي ۇيتقىسىنىڭ بايلانىس تۋىندىسى. تۇيسىكتىك مالىمەتتەر مي ۇيتقىسىنىڭ قوزعاۋىندا ميدىڭ ويلاۋ جۇيەسىنە سيگنال بولىپ قابىلدانادى. سيگنال تۇيسىك مۇشەلەرى قابىلداعان سىرتقى ورتا اسەرلەرىنىڭ وزگەرگەن فورماسى بولىپ بەينەلەنەتىن، پسيحولوگيالىق قاسيەتكە يە تۇيسىكتىك مالىمەت. ماسەلەن، كورۋ، ەستۋ، يىسكەۋ، ءدام ايىرۋ، دەنەلىك سەزىنۋ سيگنالدارى. ميدىڭ ويلاۋ جۇيەسى تۇيسىكتىك مالىمەتتەردى تۇيسىك مۇشەلەرىنە تۇتاسقان سيگنالدىڭ بىرلىكتىك ءتۇيىنى ارقىلى قابىلدايدى. وبراز: رۋح تۇيسىگى مەن مي جۇيەسىنىڭ بايلانىس تۋىندىسى. تۇيسىكتىك مالىمەتتەر مي ۇيتقىسىنىڭ قوزعاۋىندا سيگنال بولىپ قابىلدانعاننان كەيىن، مي جۇيەسىنىڭ جايعاستىرۋىمەن ميدىڭ ويلاۋ جۇيەسىندە وبراز بولىپ جازىلىپ ساقتالادى. وبراز نارسەلەردىڭ ميدىڭ ويلاۋ جۇيەسىندەگى بەينەلەگەن كەسكىنى. ماسەلەن، ادامدار ءبىر اداممەن تانىسقاننان كەيىن، سول ادامنىڭ ناق كەسپىرىن ءوز قالپىندا وبرازدى تۇردە كوكەيگە توقيدى. ياعىني بەينەسى، مىنەزى، ءسوز-ارەكەتى جانە باسقا دا بوگەنايلارىن تۇگەلدەي جازىپ قالدىرادى. ميدىڭ ويلاۋ جۇيەسى تۇيسىكتىك مالىمەتتەردى وبرازدىڭ بىرلىكتىك ءتۇيىنى ارقىلى جازىپ ساقتايدى. ەلەس: رۋح تۇيسىگى مەن مي قابىلەتىنىڭ بايلانىس تۋىندىسى. تۇيسىكتىك مالىمەتتەر مي جۇيەسىنىڭ جايعاستىرۋىمەن وبراز بولىپ ساقتالعاننان كەيىن، مي قابىلەتىنىڭ وياتۋىمەن تۇيسىكتىك مالىمەتتەر ميدىڭ ويلاۋ جۇيەسىندە ەلەس بولىپ بەينەلەنەدى. ەلەس ميدىڭ ويلاۋ جۇيەسىندە بۇرىن ساقتالعان تۇيسىكتىك مالىمەتتەردىڭ قايتادان جاڭعىرىپ كورىنگەن بەينەسى. ماسەلەن، ادامدار بۇرىن جولىققان، تۇيگەن نارسەلەرىن جاڭىلىسسىز كوز الدىنا كەلتىرىپ، ءداپ باسىپ كەسەتۋى ەلەس بولادى. ميدىڭ ويلاۋ جۇيەسى تۇيسىكتىك مالىمەتتەردى ەلەستىڭ بىرلىكتىك ءتۇيىنى ارقىلى بەينەلەيدى. نازار: رۋح تۇيسىگى مەن مي قىزمەتىنىڭ بايلانىس تۋىندىسى. تۇيسىكتىك مالىمەتتەر مي قابىلەتىنىڭ وياتۋىمەن ەلەس بولىپ تۋىنداعاننان كەيىن، مي قىزمەتىنىڭ قاجەتىمەن ميدىڭ ويلاۋ جۇيەسىندە جان-جاعىن باقىلايتىن نازار بولىپ جۇمىس وتەيدى. نازار جول نۇسقاۋشى، دىبىس ايىرۋشى، ءدام پارىقتاۋشى، ءيىس سارالاۋشى، تىتىركەندىرۋدى سەزىنۋشى سىندى جۇمىستاردى جۇرگىزەدى. نازار قاشاندا قىلپى بىلىنگەن ءارقانداي سيگنالداردى دەر كەزىندە بايقاپ، ىلەزىمگە ميدىڭ ويلاۋ جۇيەسىنە جەتكىزىپ، ساقتىق قىزمەتىن ادالدىقپەن اتقارادى. ماسەلەن، جايشىلىقتا ادامنىڭ نازارى بارلىق نارسەنى قاداعالاپ كۇزەتۋمەن ابىگەرلەنەدى، كوزبەن كورگەن، قۇلاقپەن ەستىگەن، مۇرىنمەن يىسكەگەن، تىلمەن ءدامىن ايىرعان، دەنەمەن تىتىركەندىرۋدى سەزىنگەن تۇيسىكتىك مالىمەتتەردى قالت جىبەرمەيدى. ميدىڭ ويلاۋ جۇيەسى وسى تۇيسىكتىك مالىمەتتەردى نازاردىڭ بىرلىكتىك ءتۇيىنى ارقىلى قاجەتىمىزگە جاراتادى. قورتىپ كەلگەندە، تۇيسىكتىك مالىمەتتەر ميدىڭ ويلاۋ جۇيەسىندە سيگنال بولىپ قابىلدانادى، وبراز بولىپ جازىلىپ ساقتالادى، ەلەس بولىپ بەينەلەنەدى، نازار بولىپ قاجەتكە جارايدى.ت

  تانىمدىق مالىمەت. ءبىلىم: رۋح تانىمى مەن مي ۇيتقىسىنىڭ بايلانىس تۋىندىسى. تانىمدىق مالىمەتتەر مي ۇيتقىسىنىڭ قوزعاۋىندا ميدىڭ ويلاۋ جۇيەسىنە ءبىلىم بولىپ قابىلدانادى. ءبىلىمدى ادەتتە ءتىل، جازۋ، سىزبا، كەسكىن سياقتى ءار ءتۇرلى تاسىلدەرمەن بەينەلەۋگە، كىتاپ، جۋرنال، گازەت، دىبىس تاسپاسى، كەسكىن تاسپاسى سياقتى ۇقساماعان مالىمەت قامبالارىمەن ساقتاۋعا بولادى. ماسەلەن، ادامدار ساباق تىڭداۋ، كىتاپ وقۋ، كورسەتپە تاجىريبە كورۋ قاتارلى جولدارمەن ءبىلىم قابىلدايدى. ميدىڭ ويلاۋ جۇيەسى وسى تانىمدىق مالىمەتتەردى ءبىلىمنىڭ بىرلىكتىك ءتۇيىنى ارقىلى قابىلدايدى. تۇسىنىك: رۋح تانىمى مەن مي جۇيەسىنىڭ بايلانىس تۋىندىسى. تانىمدىق مالىمەتتەر مي ۇيتقىسىنىڭ قوزعاۋىندا ءبىلىم بولىپ قابىلدانعاننان كەيىن، مي جۇيەسىنىڭ جايعاستىرۋىندا ميدىڭ ويلاۋ جۇيەسىنە تۇسىنىك بولىپ جازىلىپ ساقتالادى. تانىمدىق مالىمەتتەردىڭ ميدىڭ ويلاۋ جۇيەسىنە قالتىرعان ءىز جولاعى تۇسىنىك بولادى. ماسەلەن، ادامداردىڭ جاڭا وتىلگەن ءدارىستى يگەرۋ جاعدايى سول ءدارىستى ءتۇسىنۋ دەڭگەيىمەن ولشەنەدى. تۇسىنىگى تەرەڭ بولسا، ءدارىس مازمۇندارىنىڭ كوكەيگە قونۋى سونشا كوپ بولادى، ءارى سونشا بەرىك نەگىز قالايدى. ميدىڭ ويلاۋ جۇيەسى تانىمدىق مالىمەتتەردى تۇسىنىكتىڭ بىرلىكتىك ءتۇيىنى ارقىلى جازىپ ساقتايدى. زەيىن: رۋح تانىمى مەن مي قابىلەتىنىڭ بايلانىس تۋىندىسى. تانىمدىق مالىمەتتەر مي جۇيەسىنىڭ جايعاستىرۋىندا تۇسىنىك بولىپ ساقتالعاننان كەيىن، مي قابىلەتىنىڭ وياتۋىندا ميدىڭ ويلاۋ جۇيەسىندە زەيىن بولىپ بەينەلەنەدى. زەيىن ادامداردىڭ ماسەلەلەردى شەشۋ، ەسەپ شىعارۋ سياقتى قابىلەتتەرىنىڭ جيىنتىعى. ادامداردىڭ زەيىنى بىركەلكى بولمايدى. ءارى بەينەلەنۋى دە بىرجاقتىلى بولمايدى. ياعىني، بىرەۋلەرى كوركەم ونەر جاعىندا زەيىنىن بايقاتسا، ەندى بىرەۋلەرى قوعامدىق ىستەر جاعىندا ەلدەن ەرەك شەبەرلىگىن تانىتادى. ماسەلەن، ادامداردىڭ پىكىر ءجۇرگىزۋ، ماسەلەلەردى شەشۋ، ەسەپ ىستەۋ، نارسەلەردى جاساۋ سياقتى قابىلەتتەرى ۇقسامايدى. ميدىڭ ويلاۋ جۇيەسى تانىمدىق مالىمەتتەردى زەيىننىڭ بىرلىكتىك ءتۇيىنى ارقىلى بەينەلەيدى. مامان: رۋح تانىمى مەن مي قىزمەتىنىڭ بايلانىس تۋىندىسى. تانىمدىق مالىمەتتەر مي قابىلەتىنىڭ وياتۋىندا زەيىن بولىپ بەينەلەنگەننەن كەيىن، مي قىزمەتىنىڭ قاجەتىمەن ميدىڭ ويلاۋ جۇيەسىندە مامان بولىپ جۇمىس وتەيدى. مامان ادامداردىڭ ماعلۇماتى، قابىلەتى، قىزىعۋى، ەرەكشەلىگى سياقتى جاقتار ارقىلى كاسىپ تۇرىنە ءبولىنۋى بولادى. ادامدار كۇندەلىك شۇعىلدانىپ كەلە جاتقان كاسىبىنىڭ مامانى بولعاندا عانا، قىزمەتتىڭ ۇددەسىنەن شىعا الادى. ماسەلەن، ادامدار ماماندىعى بويىنشا كاسىپتىك جۇمىستارىن جۇرگىزەدى. ايتالىق، دارىگەر ناۋقاس ەمدەيدى. ميدىڭ ويلاۋ جۇيەسى تانىمدىق مالىمەتتەردى ماماننىڭ بىرلىكتىك ءتۇيىنى ارقىلى قاجەتكە جاراتادى. قورتىپ كەلگەندە، تانىمدىق مالىمەتتەر ميدىڭ ويلاۋ جۇيەسىندە ءبىلىم بولىپ قابىلدانادى، تۇسىنىك بولىپ جازىلىپ ساقتالادى، زەيىن بولىپ بەينەلەنەدى، مامان بولىپ قاجەتكە جارايدى.

جاۋاپتى رەداكتورى : نۇرعيسا قۇرمانجان ۇلى
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.