گەنارال تاۋى قار شاڭعى الاڭى تۇنگى قار شاڭعى الاڭىن ىسكە قوستى

2013.12.27 17:11   كەلۋ قاينارى : حالىق تورابى

　　قايروللا كومانتاي ۇلى حابارلايدى. 24 ـ جەلتوقسان كەشكى ساعات شينجياڭ ۋاقىتى 5تەن 30 مينۋت وتكەندە التاي قالاسى گەنارال تاۋى قار شاڭعى الاڭى تۇنگى قار شاڭعى الاڭىن رەسمي ىسكە قوسىپ، قالا حالقى مەن ساياحاتشىلار تۇندە قار شاڭعى تەبۋدىڭ قىزىعىنا قارىق بولدى. كاسىپتىك قار شاڭعى كيىمىن كيگەن قار شاڭعى اۋەسكەرلەرى تاۋ بەتىندەگى شاڭعى جولىندا زاقپىداي زىمىراپ، ورەلى ونەرلەرىن كورسەتۋگە تىرىستى. قار شاڭعى الاڭىنىڭ ءار تۇسىنا ورناتىلعان دىبىس زورايتقىشتان شىققان جاعىمدى دا ويناقى مۋزىكا ءۇنى شاڭعىشىلاردىڭ شابىسىنا شابىت بەرسە، تۇنگى قار شاڭعى الاڭىن جارىقتاندىرۋ ءۇشىن ورناتىلعان شىراقتاردىڭ جارىعى اپپاق قارعا شاعىلىسىپ كۇمىستەي كوركەم كورىنىس قالىپتاستىرادى.

　　«تۇنگى قار شاڭعى الاڭىنىڭ اشىلۋى جاستاردىڭ قىزۋ قارسى الۋىنا يە بولدى. كەشتە شاڭعى تەبۋ جاستار قاۋىمىنىڭ كۇندەلىكتى قىزمەتتەن تۇسكەننەن كەيىنگى دەنە شىنىقتىرىپ، كوڭىل كوتەرەتىن تاماشا تالعامىنا اينالاتىنى داۋسىز. تۇنگى قار شاڭعى الاڭىندا شاڭعى تەبۋ جاستار جونىنەن العاندا رومانتيكالى دا، قىزىقتى. كەشكى استى ءىشىپ بولعاننان كەيىن بۇل اراعا كەلىپ شاڭعى تەپسەڭىز كوڭىل كۇيىڭىز جادىراپ، كۇندىزگى قىزمەت باسىمدىلىعى باسەڭدەيدى. سەرگىپ قالاسىز. قار شاڭعى الاڭىنىڭ جابدىقتالۋى ايتارلىقتاي ەكەن» ، - دەيدى التاي قالاسىنداعى ءمالىم ءبىر شاڭعىشلار كلۋبىنىڭ مۇشەسى چىن رۇي تىلشىگە.

　　ۇعىسۋعا قاراعاندا، بيىل گەنارال تاۋى قار شاڭعى الاڭى ساياحاتشىلار مەن قار شاڭعى اۋەسكەرلەرىنىڭ ءتۇرلى قاجەتىن قاناعاتتاندىرۋ ءۇشىن، قار شاڭعى الاڭنىڭ اشىلۋ ۋاقىتىن ۇزارتىپ، تۇنگى شاڭعى تەبۋ الاڭىن ىسكە قوسقان. تۇنگى قار شاڭعى الاڭىن جارىقتاندىرۋ ءۇشىن 270 دانادان استام شىراق ورناتىپ، جارىقتاندىرۋ ورەسى حالىقارالىق ساياحات قار شاڭعى الاڭىن جارىقتاندىرۋ ولشەمىنە جەتكەن ءارى تۇنگى قار شاڭعى الاڭىندا جوعارى دارەجەلى سىرعاناۋ جولىنان بىرەۋ، ورتا دارەجەلى سىرعانۋ جولىنان ەكەۋ، ادەتتەگى سىرعاناۋ جولىنان ەكەۋىن ىسكە قوسىپ، ۇقساماعان ورەدەگى قار شاڭعى اۋەسكەرلەرىنىڭ قاجەتىن قاناعاتتاندىرۋعا قۇلشىنعان. سونىمەن بىرگە، تۇنگى قار شاڭعى الاڭىنا شاڭعى تەبۋگە بارعان قار شاڭعى اۋەسكەرلەرى مەن ساياحاتشىلار اۆتوكولىك، كوفەحانا، تەز تاعامجاي جانە ەرەن بازار قاتارلى قىزمەت وتەۋ قولايلىلىقتارىنان يگىلىكتەنە الادى. گەنارال تاۋى قار شاڭعى الاڭى ەلىمىز ءىشى ـ سىرتىنداعى قالا ماڭىنا ەڭ جاقىن ورنالاسقان بيىك تاۋدان سىرعانايتىن ساناۋلى قار شاڭعى الاڭدارىنىڭ ءبىرى. بۇل قار شاڭعى الاڭىنىڭ تاۋ ءتۇزىلىسى جاقسى، قار جاۋۋ ۋاقىتى ۇزاق، قارى ساپالى، ەلدەن ەرەك تۇنگى قار شاڭعى الاڭىن اشۋ ابزالدىلىعىنا يە. گەنارال تاۋى قار شاڭعى الاڭىنىڭ جاۋاپتىلارى بۇدان كەيىن، قار شاڭعى اۋەسكەرلەرى مەن ساياحاتشىلارعا قاراتا ءتۇرلى قولايلىلىقتار جاراتىپ، اقى الۋ جاعىندا ۇقساماعان دارەجەدە تيىمدىلىكتەر جاساپ، قىسقى ساياحاتتىڭ مازمۇنىن بايىتىپ، قالا حالقى مەن ساياحاتشىلاردى مولىنان باۋراۋ جولىندا قۇلشىناتىندىقتارىن ءبىلدىردى.

　　التاي قالالىق ساياحات مەكەمەسىنىڭ باستىعى شى جىچياڭ تىلشىگە بىلاي دەدى: «ءبىز گەنارال تاۋى قار شاڭعى تەبۋ تەحنيكاسىنا تاربيەلەۋ مەكتەبىن قۇرىپ، شاڭعى تەبۋ تەحنيكاسى جوعارى، كاسىپتىك سپورتشىلاردان 20 ادامدى باپكەرلىككە قابىلداپ، باپكەرلەر قوسىنىن كەمەلدەندىردىك. باپكەرلەرىمىز نەگىزىنەن شاڭعى تەبۋشىلەردىڭ شاڭعى تەبۋ بارىسىنداعى اماندىعىنا جانە ولارعا شاڭعى تەبۋدى ۇيرەتۋ قاتارلىلارعا جاۋاپتى بولادى. باپكەلەرىمىزدىڭ جەتەكشىلىگىندە شاڭعى تەبۋدى جاڭادان ۇيرەنىپ جۇرگەن قار شاڭعى اۋەسكەرلەرى شاڭعى تەبۋ تەحنيكاسىن حاۋىپسىز ءارى تەز ۇيرەنە الادى. ۇقساماعان ورەدەگى شاڭعى تەبۋشىلەرگە قاراتا ۇقساماعان دارەجەدەگى تەحنيكالىق بىلىمدەر ۇيرەتىلىپ، جۇيەلى ساباق وتىلەدى. سونىمەن بىرگە، باپكەرلەرىمىز مەكتەپتەرگە بارىپ، قار شاڭعى تەبۋدىڭ نەگىزدىك بىلىمدەرىن ۇگىتتەپ، وقۋشىلاردىڭ قار شاڭعى تەبۋىنە جەتەكشىلىك ەتەدى ءارى قار شاڭعى سپورتىن كەڭىنەن جالپىلاستىرۋ ءۇشىن، وقۋشىلاردىڭ قىسقى دەمالىسى كەزىندە تۇتاس ايماعىمىز كولەمىندەگى ورتا، باستاۋىش مەكتەپتەرگە قاراتا ‹قار شاڭعى تەبۋ كۇنى› قيمىلىن ورىستەتىپ، ءار اپتانىڭ دۇيسەنبىسىنەن جۇماسىنا دەيىن ءار كۇنى قار شاڭعى تەبۋگە كەلگەن 100 وقۋشىعا تيىمدىلىك جاسالىپ، الدىنعى 100 ادامعا ىلىنگەن وقۋشىلاردىڭ ءبىر كۇندىك قار شاڭعى تەبۋ اقىسى ءۇشىن 15 يۋان عانا الىنادى. قورتىپ ايتقاندا، ءبىز قىسقى ساياحاتتى جانداندىرۋمەن قاتار، قار شاڭعى تەبۋ تەحنيكاسى جوعارى جاس دارىندىلاردى تاربيەلەۋگە باسا ءمان بەرىپ، قار شاڭعى الاڭى بازارىن قالىپتاستىرىپ، قالا حالقى مەن ساياحاتشىلاردىڭ قار شاڭعى سپورتىمەن شۇعىلدانىپ، دەنە شىنىقتىرۋىن جەبەيمىز».

　　كەلۋ قاينارى: حالىق تورابى