بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى

اقارال بوپ شالقىدى، كۇمبىرلەدى، قازاقتىڭ قاسيەتتى ــ قازىناسى

2014.01.02 14:41   كەلۋ قاينارى : حالىق تورابى



  قايروللا كومانتاي ۇلى حابارلايدى. التاي قالالىق پارتكوم مەن ۇكىمەت باس بولىپ ۇيىمداستىرعان «اقارال» سازى اتىنداعى اۆتونوميالى رايون كولەمىندەگى ۇزدىك كۇيشىلەردىڭ كۇي جارىسى 29 ـ جەلتوقسان تۇستەن كەيىن التاي قالاسىنداعى التاي ۇلتتار مادەنيەت ورتالىعىندا وتكىزىلدى. جارىم كۇن ۋاقىتپەن وتكىزىلگەن بۇل رەتكى كۇمبىرلى كۇي باسەكەسىنە ايماعىمىزدىڭ ءٴارقايسى اۋداندارى (قالا)، ىلە قازاق اۆتونوميالى وبلىسىنا توتە قاراستى ورىندار، تارباعاتاي ايماعى، كۇيتۇن قالاسى، ءٴۇرىمجى قالاسى قاتارلى جەرلەردەن 20 كۇيشى قاتىناسىپ، ورگە سالعان سايىن ورشەلەنگەن ونەرپازداردىڭ قازاقى قارا دومبىراسىنىڭ شاناعىنان شىعانداعان كۇي ءٴۇنى كلوب تولى كورەرمەننىڭ كوڭىلىنەن شىعىپ، ءٴادىل باعاسىن تاۋىپ وتىردى. كۇمبىرلى كۇيگە قۇلاق قۇرىشى قانىپ، كۇي باسەكەسىنىڭ قىزىعىنا قارىق بولعان حالىق ونەرپازدارىنا دەگەن ىستىق ىقىلاسىن دۇركىرەگەن شاپالاق ۇنىمەن جەتكىزىپ وتىردى مايدان سايىن.

  باسەكەنىڭ بەتاشارىن التاي قالالىق كوركەمونەر ۇيىرمەسىنىڭ كۇيشىلەرى تايىر بەلگىباي ۇلىنىڭ ۋاكىلدىك شىعارمالارىنىڭ ٴءبىرى «اقارال» كۇيىمەن اشتى دا، قاز داۋىسىمەن قازاقتىڭ قارا سوزىنە قانات بىترگەن اعا ديكتور مۇراتبەك تەسەباي ۇلى، ماقسات كادىرقان ۇلى جانە قانات ەرەجەپ ۇلى قاتارلى اعالارىمىز اسقار تاتاناي ۇلى، ماعاز رازدان ۇلى، قۇرمانبەك زەيتىنعازى ۇلى سىندى اقيىق اقىندارىمىزدىڭ تايىر اتامىزعا ارناعان ارناۋ ولەڭدەرىن وقىدى. سوسىن، بەبەۋلەتكەن كۇي باسەكەسى رەسمي باستالىپ كەتتى.

  التاي توپىراعىندا تۋىلىپ، ەلدىڭ بىرلىگىن، قازاقتىڭ تۇرمىس، تىرلىگىن كۇيمەن كەستەلەگەن تانىمالى كۇيشى، تالانتتى كۇيشى تايىر بەلگىباي ۇلىن ەسكە الۋ قيمىلىن وتكىزۋدە پارتيا 18 - قۇرىلتايى ءٴۇشىنشى جالپى ٴءماجىلىسىنىڭ رۋحىن ىشكەرىلەي دايەكتىلەندىرىپ، حالىقتىق مادەنيەتتى بايىتۋ ماقسات ەتىلگەن.

  بۇل رەتكى كۇي باسەكەسىنىڭ ەرەكشە دارەجەلى سيلىعىنا تىگىلگەن «التىن ساۋساق» لوڭقاسىن التاي قالاسىنىڭ كۇيشىسى قادىل بەيىسقان ۇلى ەنشىلەسە، ٴءۇرىمجى قالاسىنان كەلگەن كۇيشى ارۋ ٴدينارا مۇراتبەك قىزى 1 - دارەجەلى؛ تارباعاتايدىڭ تۇلەگى تاڭات ءٴماۋلىتقان ۇلى مەن ىلە قازاق اۆتونوميالى وبلىسىنا توتە قاراستى ورىنداردان كەلگەن نارتاي ساۋلەبەك ۇلى 2 ـ دارەجەلى؛ التىناي تۇرسىنبەك قىزى، عانيبات سارقىت ۇلى قاتارلى 5 كۇيشى 3 ـ دارەجەلى؛ ەرلان ىسقاق ۇلى، قامبار ءٴماجيت ۇلى قاتارلى 9 ادام شابىتتاندىرۋ سيلىعىن ەنشىلەپ، اعا كۇيشىلەردەن عالىم سىدىق ۇلى مەن ءٴومىرۇزاق ءٴتۇسىپقان ۇلىنا حالىق كۇيىن مۇراعاتتاۋشى دەگەن قۇرمەتتى اتاق بەرىلىپ، قۇرمەت كورسەتىلدى.

  جارىستان تىس، تايىر بەلگىباي ۇلىنىڭ ۇرپاقتارى شاعىن وركەستىردە كۇيشى اتامىزدىڭ اۋىل ءٴومىرىنىڭ ٴارياسىنا قۇرىلعان «ەڭبەك دۋمانىن» ورىنداعاندا، كلوب تولى كورەرمەن كۇي قۇدىرەتىنە قۇرمەت قىلىپ، ٴشاراپاتتى شاپالاقتارىن ۇزاق سوقتى. سوڭىندا، التاي قالالىق 3 - ورتا مەكتەپتىڭ كۇيشىلەرى تايىر بەلگىباي ۇلىنىڭ شاكىرتى، داڭسالى كۇيشى داۋلەت حالىق ۇلىنىڭ كۇيى «اۋىلىمدى» ورىنداپ، قازاقتىڭ قارا دومبىراسىنىڭ شاناعىنان شالقىعان كۇي ونەرىنىڭ ولمەيتىنىن، قايتا ۇرپاقتان ۇرپاققا جالعاساتىنىن ايگىلەدى.

  ەستەرىڭىزگە سالا كەتسەك، بۇرىن ەلىمىز قازاقتارى كولەمىندە بىرەر مايدان شاعىن كۇي باسەكەسى وتكىزىلگەنىمەن، ءٴدال وسىنداي «التى الاشقا ساۋىن ايتىلعان» مازمۇنى باي، كولەمى كەڭ كۇي باسەكەسى بولعان ەمەس. وسىنداي ۇلى ءٴدۇبىردىڭ تۇڭعىش كەزەگىنىڭ التاي قالاسىندا وتكىزىلۋى اعاجاي التاي ــ ٴءان مەن كۇيدىڭ مەكەمەنى دەيتىن كيەلى ايتىلىمدى تاعى ءٴبىر قىرىنان دالەلدەدى. سۋرەتتە: كۇي باسەكەسىنەن كورىنىستەر. سۋرەتتەردى قايروللا كومانتاي ۇلى تۇسىرگەن

  كەلۋ قاينارى: حالىق تورابى

【1】 【2】 【3】 【4】 【5】 【6】 【7】 【8】 【9】 
جاۋاپتى رەداكتورى : نۇرعيسا قۇرمانجان ۇلى

 سۋرەت

  • كۇن نۇرى ءىش كيىمىمەن ەنەرگيا قابىلدايتىن MP3