- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
ني فاكىنىڭ وكىنىشى
2014.01.22 16:03
بىلتىر قىركۇيەكتىڭ اياعىنا قاراي پارتيادان شىعارىلىپ، قىزمەتتەن الىنعان انحۇي ولكەسىنىڭ بۇرىنعى ورىنباسار باستىعى ني فاكى قانشاما وزەگى ورتەنىپ اھ ۇرعانمەن، وتكەن كۇندەر استە ورالماق ەمەس. دەگەنمەن، قاتىستى حابارلاردا تىلگە الىنعان ونىڭ وكىنىشكە تولى ءبىر اۋىز ءسوزى ادامعا كوپ وي سالادى، ول «ۇيىم ماعان 2 جىل بۇرىن ەسكەرتۋ بەرگەندە نەمەسە جازا قولدانعاندا، مەملەكەتكە سالعان زيانىم تاپ بۇگىنگىدەي ولشەۋسىز بولماس ەدى عوي» دەپ كۇڭىرەنگەن. بۇل ءسوزدىڭ استارىندا «قاتاڭ باقىلاۋعا الىنعان جاعدايدا بۇگىنگىدەي اۋىر كۇنگە تۇسپەس ەدىم» دەگەن وي جاتقان سەكىلدى. بۇل ءسوز ەسىمە جياڭشي ولكەسىنىڭ بۇرىنعى ورىنباسار باستىعى ح−ۋ چاڭچيڭدى ءتۇسىردى. ول ءولىم جازاسى اتقارىلاردان بۇرىن «ا ق ش تىلشىلەرىنىڭ كلينتوندى پاش ەتكەنى سەكىلدى جياڭشيدىڭ اقپارات قۇرالدارى دا مەنىڭ ماسقارا حابارىمدى جايىپ جىبەرۋگە باتىلدىق ەتكەندە، بۇگىنگىدەي ءولىم جازاسىنا تارتىلماس ەدىم» دەگەن.
ادامنىڭ اقتىق ءسوزى وتىرىك بولمايدى. حۋ چاڭچيڭنىڭ بۇل وسيەتى، ءسىرا، شىن كوڭىلدەن شىققان ءسوز بولسا كەرەك. ءبىراق كلينتوندى اڭدىعان ا ق ش - تىق ارىپتەستەرى سەكىلدى جەرگىلىكتى اقپارات قۇرالدارى دا كەزىندە «سارى ىزىنە ءشوپ سالسا»، قولى ۇزىن، قۇرىعى جۋان حۋ چاڭچيڭ اشۋدان جارىلىپ، ولارعا قاھارىن توكپەس پە ەكەن؟ سول سياقتى، ني فاكى ءوزىنىڭ قاشاندا قاتاڭ باقىلاۋ استىندا ەكەنىن شىن جۇرەكتەن مويىنداپ، وعان مويىن ۇسىنسا، ول باياعىدا - اق ايىلىن جيار ەدى عوي، ۇيىمنىڭ وعان ارنايى تۇردە ەرتەرەك ەسكەرتۋ بەرۋىنىڭ، شارا قولدانۋىنىڭ قاجەتى قانشا؟
انىعىندا ۇيىم وعان ەسكەرتۋ بەرمەدى ەمەس، بەردى، ءبىراق سونى ني فاكى قۇلاعىنا ىلگەن جوق. حابارعا قاراعاندا، 2005 - جىلى انحۇي ولكەلىك پارتكومنىڭ شارلاۋ گرۋپپاسى ليۋ - ان قالاسىنا بارعاندا، الدەنەدەن سەكەم العان ني فاكى كوپەس حۋاڭ xx سيعا تارتقان بىرنەشە قىمبات سۋرەتتى يەسىنە قايتارىپ بەرگەن. ماسقارا بولعاندا، 2 جىلدان كەيىن ني فاكى بۇل سۋرەتتەردى قايتا سۇراتىپ العان. 2012 - جىلى شىلدەدە ءوزىنىڭ تەكسەرىلۋى مۇمكىن ەكەنىن سەزىپ، ءبىرقاتار قاس تاسىن تاس ساۋداگەرى جي ليچاڭعا قايتارىپ بەرگەن، 2 ايدان كەيىن تەكسەرۋ اياقتادى دەپ جورىعان ول الگى قاس تاستارىن قايتارىپ الۋمەن بىرگە، ۇستىنە قاباتتاپ تاعى 3 كەسەك تاس سۇراپ العان... مىنە وسىلاي قويان بۇلتاققا سالىپ، قاتىستى تاراۋلارمەن جاسىرىنباق ويناعانى نەسى ەكەن؟ سوندا انحۇي ولكەلىك پارتكومنىڭ شارلاۋ گرۋپپاسى وعان ەسكەرتۋ بەرمەدى مە؟ الدە قۇندى سۋرەت پەن قىمبات تاستاردى قىلعىتىپ اكەتۋدىڭ قانداي زاردابى بار ەكەنىن بىلمەي مە ەكەن؟ ول ءبارىن ءبىلىپ تۇر، ايتپەسە، بوتەن - باستاق سىبىس شىعىسىمەن سۋرەت پەن تاستى يەسىنە قايتارىپ بەرمەس ەدى عوي. دەمەك، ۇيىم وعان ساق بولۋدى ەسكەرتكەن، تەك تاۋەكەل تەڭىزىنە قايىق سالىپ، باعىن سىناپ جۇرگەنى بولماسا.
ني فاكى سوناۋ 2005 - جىلى انحۇي ولكەسى ليۋ - ان قالالىق پارتكومنىڭ شۋجيى بولىپ تۇرعان ۋاقىتتا - اق ايىلىن جيىپ، سۇعاناقتىعىن قويار بولسا، بۇگىنگىدەي كەپكە تۇسپەس ەدى. 2008 - جىلى انحۇي ولكەسىنىڭ ورىنباسار باستىعى بولىپ سايلانىپ، جەر بايلىعى قىزمەتىنە جاۋاپتى بولعان ني فاكى ۇيىمنىڭ بەكىتۋىنەن وتكىزبەي ول−كەلىك گاۋھار - جاقۇت قوعامىنىڭ قۇرمەتتى ءتوراعاسى بولادى، سونان بىلاي قاس تاسىنا قۇنىعىپ، سونىڭ دەرتىنەن، ءتىپتى، «جىندانىپ» كەتە جازدايدى. دەمەك، ني فاكى ءمانسابى وسكەننەن كەيىن، انحۇي ولكەلىك پارتكومنىڭ شارلاۋ گرۋپپاسى بەرگەن «ەسكەرتۋدى» قۇلان - تازا ۇمىتىپ، جەمقورلىقتىڭ قۇيىنا بەلۋارىنان باتا تۇسكەن.
ءوزى تۋرالى ءجۇز ويلانىپ، مىڭ تولعانعاننىڭ ورنىنا جاۋاپكەرشىلىكتى ۇيىمعا ارتا سالعىسى كەلەدى. ءناپسىسىن نەگە تيا الماعانىنا جاۋاپ بەرمەستەن، «وكىنىش وزەگىمدى ورتەپ بارادى» دەپ وكسىك اتادى. بۇنداي كوز بوياۋعا ارنالعان ارزان وكىنىشتىڭ كەلەسى ءبىر جەمقورعا ساباق بولىپ جارىتپايتىنى بەلگىلى.
ءبىراق ني فاكىنىڭ وكىنىشىنەن ۇيىم ساباق الۋى كەرەك دەپ ويلايمىن، اتاپ ايتقاندا، ەرتە قيمىلداپ، ەرتە شارا قولدانىپ، ءشۇبالى لاۋازىم يەلەرىنىڭ بيىك ءمانساپقا قونۋىنان، قۇرتاقانداي قارا شىبىننىڭ جوتالى جولبارىسقا اينالۋىنان ساقتانعان ءجون. بەدەلدى قۇرىلىمداردىڭ تەكسەرۋىنە نەگىزدەلگەندە، 1978 - جىلدان 90 - جىلداردىڭ ورتا شەنىنە دەيىن جەمقورلار ارى كەتسە 2 − 3 جىلدا سازايىن تارتادى ەكەن. وتكەن عاسىردىڭ 90 - جىلدارىنىڭ اياعىنان عاسىرىمىزدىڭ باسىنا دەيىن، جەمقورلىقتىڭ جاسىرىن مەزگىلى 5 − 6 جىلعا ۇزارىپتى. سوڭعى جىلدارى تەرگەۋگە تۇسكەن ولكە - مينيسترلىك دارەجەلى باسشى كادرلاردىڭ ورتا ەسەپپەن 31.6 جىلدان بەرى «جەپ» كەلگەنى، ولاردىڭ اراسىندا 14 جىلعا دەيىن قاقپان باسپاي جۇرگەندەردىڭ بار ەكەنى انىقتالىپ وتىر. جەمقورلىققا تيتتەي دە جول بەرىلمەگەندە، ءىرىپ - شىرۋگە قارسى جاسالعان ەرەجە - تارتىپتەردىڭ پارمەنى قازىرگىدەن دە قاتتىراق بولعاندا، جايىن اۋىزدار بۇنشا ۇزاق ۋاقىت سايرانداپ جۇرمەس ەدى.
كەلۋ قاينارى: شينجياڭ گازەتى سايتى
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
