مەملەكەتتىك ءوندىرىس حاۋىپسىزدىگىن باقىلاۋ – باسقارۋ باس مەكەمەسىنىڭ بۇرىنعى باستىعى ياڭ دۇڭلياڭنىڭ پارا الۋ، قيانات جاساۋ دەلوسىنا ءبىرىنشى سوت اشىلدى

2016.11.25 13:31   كەلۋ قاينارى : حالىق تورابى

　　حالىق تورابى، 25 – قاراشا، بەيجيڭ. شينحۋا اگەنتتىگىنىڭ حابارلاۋىنشا، بەيجيڭ قالالىق 2 – ورتا دارەجەلى حالىق سوتى 24 – قاراشادا مەملەكەتتىك ءوندىرىس حاۋىپسىزدىگىن باقىلاۋ – باسقارۋ باس مەكەمەسىنىڭ بۇرىنعى باستىعى ياڭ دۇڭليانىڭ پارا الۋ، قيانات جاساۋ دەلوسىنا ءبىرىنشى رەت اشىق سوت اشتى.

　　بەيجيڭ قالالىق حالىق پروكۋراتۋراسى 2 – بولىمشەسىنىڭ ايىپتاۋى مىناداي: ايىپكەر ياڭ دۇڭلياڭ 2002 – جىلدان 2015 – جىلعا دەيىن تيانجين قالاسى باستىعىنىڭ ورىنباسارى، تيانجين قالالىق پارتكومنىڭ تۇراقتى مۇشەسى، قالا باستىعىنىڭ ۇنەمىلىك ىستەرگە جاۋاپتى ورىنباسارى، تيانجين قۇرلىق ارميا زاپاس قوسىنى زەنيتتىك زەڭبىرەك ديۆيزياسىنىڭ ءبىرىنشى ساياسي كوميسسارى، مەملەكەتتىك ءوندىرىس حاۋىپسىزدىگىن باقىلاۋ – باسقارۋ باس مەكەمەسىنىڭ باستىعى، پارتگرۋپپاسىنىڭ شۋجيى قاتارلى مىندەتتەردى وتەگەن مەزگىلدە، قىزمەتتەگى قولايلىلىقتارىنان پايدالانىپ، باسقالارعا پايدا جەتكىزۋ نەمەسە كومەكتەسۋ بارىسىندا ولاردان قۇنى 248 ميلليون 940 مىڭ 948.6 يۋان مال – مۇلىك قابىلداعان.

　　ياڭ دۇڭلياڭ 1999 – جىلى تيانجين قالالىق ەكونوميكا – ساۋدا كوميتەتىنىڭ مەڭگەرۋشىسى مىندەتىن اتقارۋ بارىسىندا، ءوزى تۇرعان ورىننىڭ اتىنان تيانجين قالالىق ونەركاسىپ – قورا جاي باس سەرىكتىگىنە قۇرىلىس قاراجاتىن ارتىق ءبولۋ ارقىلى، اتالعان سەرىكتىكتىڭ تيانجين قالاسى بەيبىتشىلىك رايونى شينجياڭ جولى باۋجياڭلي الەۋمەتتىك وڭىرىنەن 5-501 ءنومىرلى ءۇيدى ساتىپ الىپ، مەملەكەت مەنشىگىندەگى مال – مۇلىك تىزىمىنە ەنگىزبەگەن. ياڭ دۇڭلياڭ 2001 – جىلى ساۋىردە مىندەتىنەن بوساعان كەزدە اتالعان ءۇيدى جاسىرعان ءارى وزىنە تاۋەلدى ەتىپ العان. باعالاۋ ناتيجەسىنە قاراعاندا، بۇل ءۇيدىڭ قۇنى 270 مىڭ 800 يۋانعا تۋرا كەلەدى.

　　كەلۋ قاينارى: حالىق تورابى