شانشي ولكەسى باستىعىنىڭ بۇرىنعى ورىنباسارى فىڭ شينجۋ العاشقى تەرگەۋدە 70 ميلليون 470 مىڭ يۋاننان استام پارا الدى دەگەن ايىپتاۋعا الىندى

2019.01.18 14:06   كەلۋ قاينارى : حالىق تورابى

　　حالىق تورابى، 1 – ايدىڭ 17 – كۇنى، بەيجيڭ. جىجياڭ ولكەلىك ەڭ جوعارى حالىق سوتى رەسمي ميكروبلوگىنىڭ حابارلاۋىنشا، 2019 – جىلى 1 – ايدىڭ 17 – كۇنى، جىجياڭ ولكەسى حاڭجوۋ قالالىق حالىق سوتى شانشي ولكەلىك حالىق ۇكىمەتى ولكە باستىعىنىڭ بۇرىنعى ورىنباسارى فىڭ شينجۋدىڭ پارا الۋ دەلوسىنا ءبىرىنشى سوت اشىپ، اشىق تەرگەۋ جۇرگىزگەن.


　　جىجياڭ ولكەسى حاڭجوۋ قالالىق حالىق پروكۋراتۋراسى ونىڭ ۇستىنەن مىناداي ايىپتاۋ كوتەردى: 1999 – جىلدان 2017 – جىلعا دەيىن، ايىپكەر فىڭ شينجۋ شانشي ولكەسى بادا ەلەكتر قۋاتى شەكتى جارنا سەرىكتەستىگىنىڭ القالار باستىعى؛ تۇڭچۋان قالالىق حالىق ۇكىمەتى قالا باستىعىنىڭ ورىنباسارى، ۋاقىتتىق قالا باستىعى، قالا باستىعى؛ ج ك پ تۇڭچۋان قالالىق پارتكومىنىڭ شۋجيى، سونداي – اق، شانشي ولكەلىك حالىق ۇكىمەتى ولكە باستىعىنىڭ ورىنباسارى ءارى ياڭليڭ اۋىل شارۋاشىلىعى جوعارى – جاڭا تەحنيكالى وندىرىستەن ۇلگى كورسەتۋ رايونىن باسقارۋ كوميتەتىنىڭ مەڭگەرۋشىسى قاتارلى مىندەتتەردى اتقارعان كەزدە، قىزمەت قولايلىلىعىنان جانە قىزمەت ۇقىعى مەن بەدەلىنەن قالىپتاسقان قولايلى شارت – جاعدايدان پايدالانىپ، قاتىستى ورىندار مەن جەكەلەرگە نىساندى قارجىلاندىرۋ، كەن اشۋ، قارىزعا قاراجات الۋ، ينجەنەريانى كوتەرەگە بەرۋ جانە قىزمەتىن اۋىستىرۋ قاتارلى ىستەردە كومەكتەسىپ، جوعارىدا اتالعان ورىندار مەن جەكەلەر بەرگەن 70 ميلليون 470 مىڭ يۋاننان استام مال - مۇلىكتى تىكەلەي نەمەسە باسقالار ارقىلى قابىلداعان.


　　تەرگەۋ بارىسىندا الەۋمەتتىك ايىپتاۋ كوتەرۋ ورگاندارى قاتىستى سىپاتتاردى كورسەتتى، فىڭ شينجۋ مەن ونىڭ اقتاۋشىسى دالەلدەرىن كورسەتتى، ايىپتاۋشى جاق پەن اقتالۋشى جاق سۋديانىڭ باسقارۋىندا ءوز پىكىرلەرىن تولىق ءبىلدىردى، فىڭ شينجۋ ەڭ سوڭعى بايانداۋ جاسادى ءارى سوت ۇستىندە قىلمىسىن مويىنداپ، وكىنەتىنىن ءبىلدىردى. مەملەكەتتىك، جىجياڭ ولكەلىك، حاڭجوۋ قالالىق ءۇش دارەجەلى حالىق قۇرىلتايى ۋاكىلدەرى، ساياسي كەڭەس مۇشەلەرى، اقپارات قۇرالدارىنىڭ تىلشىلەرى جانە ءار سالاداعى جۇرتشىلىق بولىپ، 50 نەشە ادام سوت تەرگەۋىن تىڭدادى.


　　سوت تەرگەۋى اياقتاعان سوڭ، سوت ءۇزىلىس جاسايتىنىن جاريالادى، سوت ۇكىمى ۇيلەسىمدى كەزدە جاريالانادى.


　　كەلۋ قاينارى: حالىق تورابى