- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
ايەلدەرگە ارنالعان قازاقى جۇلدىزناما
2013.07.26 14:12
جۇلدىزناماعا بىرەۋ سەنەدى، بىرەۋ سەنبەيدى. الايدا، اتا-بابالارىمىزدىڭ عاسىرلار بويعى تاجىريبەسىنەن بايىتىلعان جۇلدىزنامانى نازارلارىڭىزعا ۇسىنىپ وتىرمىز.
1. توقتى: 21-ناۋرىز 20-ءساۋىر ارالىعى. جەبەۋشى جۇلدىزى ــ مارس. بەلگىسى ــ وت. تاستارى ــ الماس، رۋبين، امەتيست، اي تاسى، اقىق. مەتالى ــ تەمىر، بولات. ءساتتى كۇندەرى ــ سەيسەنبى، جەكسەنبى. ءساتسىز كۇندەرى ــ سەنبى. تۇستەرى ــ سارى، جاسىل، اشىق قىزىل، قىزىل قوڭىر. قاراما-قارسى بەلگىسى ــ تارازى .
جالپى سيپاتتاما: بۇل بەلگىدەگىلەر اسقاق، بيلىك قۇمار، شىنشىل، ماحابباتقا بەرىك، ەركىن ءجۇرىپ تۇرعاندى ۇناتاتىن، ەرىك-جىگەرى مىقتى ادامدار بولىپ كەلەدى. توقتى بەلگىسىندەگىلەردەن تالانتتى باسشىلار، ۇيىمداستىرۋشىلار، كينو اكتەرلەرى، ماتەماتيكتەر، فيزيكتەر جانە الەمگە ايگىلى سپورتشىلار شىعادى. توقتىلار دوستىققا ادال جانە ەشقاشان قيىن جاعدايدا ساتىپ كەتپەيدى. تىك، قاتال مىنەزدەرىنىڭ ولاردى كەي جاعدايدا قيىندىققا تاپ قىلاتىن كەزدەرى ءجيى. بۇل بەلگىدەگىلەر بىرەۋدىڭ وزدەرىنە اقىل ايتقانىن ۇناتپايدى.
ايەل توقتىلار: ماحاببات ماسەلەسىندە ەركەكتىڭ ورنىن الۋعا بەيىم، سوندىقتان ولار ءىس جۇزىندە كەيدە ەركەكتىڭ رولىندە دە ويناي بەرەدى. ءارى بۇل ءرولدى ولار وتە جاقسى سومدايدى. توقتىلار ەركەك بەلگىسىندە بولعاندىقتان، ايەلدەرىنىڭ بويلارىندا دا ەر ادامدارعا ءتان قاسيەتتەر كوپ بولادى. بوستاندىق سۇيگىش ولار بىرەۋدىڭ ايتقانىمەن جۇرگەندى ۇناتپايدى. نەكەدە دە كوپ جاعدايدا باقىتتى بولا بەرمەيدى، سەبەبى ولاردىڭ شىن مانىندەگى كۇيەۋلەرى ايەل توقتىلاردىڭ تىم بەلسەندىلىگىنە كونە بەرمەيدى. سوندىقتان توقتى ايەلدەردىڭ ءيى جۇمساق جەر بەلگىسىندەگىلەرمەن وتاسقاندارى ءجون.
اۋرۋعا بەيىم جەرلەرى: باسى، بۇيرەگى، اياق-قولى، سونداي-اق توقتىلار تەرى اۋرۋلارىمەن دە ءجيى اۋىرادى. بۇل اۋرۋلاردىڭ ءبارى نەگىزىنەن ونىڭ شاتاقتاۋ مىنەزىنە بايلانىستى جۇيكە جۇيەلەرىنىڭ قىزمەتىنىڭ السىرەۋىنەن بولادى.
توقتىنىڭ كۇش-قۋات الاتىن تۇزى ــ كاليي فوسفاتى. ول ميدىڭ، ومىرتقانىڭ، سونداي-اق جۇيكە جۇيەسى جۇمىسىنىڭ جاقسارۋىنا سەپتىگىن تيگىزەدى. سوندىقتان فوسفورلى تاعامداردى، اسىرەسە بويىندا تەمىرى بار تاعامداردى كوپ جەگەنى ءجون. مۇنداي تاعامداردىڭ قاتارىنا الما، المۇرت، قارا بيداي نانى، قاراقۇمىق، بۇرشاق، قىزاناق، جاڭعاق جاتادى .قانت پەن تۇزدى جانە مال مايىن از پايدالانىپ، نەگىزىنەن بال، بالىق مايىن مولىنان پايدالانۋعا تىرىسىڭىز.
توقتىلار بويىنداعى مول قاجىر-قايراتى مەن كۇش-قۋاتىن قيمىل-قوزعالىسقا، جۇگىرۋگە ارناپ، تازا اۋادا سەرۋەندەپ، باۋ-باقشا جۇمىسىمەن كوبىرەك اينالىسسا، دەنساۋلىعى قالىپتى بولادى.
2. تورپاق
21-ءساۋىر 20-مامىر ارالىعى.
جەبەۋشى جۇلدىزى ــ شولپان. بەلگىسى ــ جەر. تاستارى ــ بيريۋزا، ساپفير، اقىق، يزۋمرۋد، نەفريت، وپال. تەمىرى ــ لاتۋن، مىس.
ءساتتى كۇندەرى ــ دۇيسەنبى، جۇما. ءساتسىز كۇنى ــ سەيسەنبى. تۇستەرى ــ سارى، قوڭىر، كوك، سۇر. قاراما-قارسى بەلگىسى ــ سارىشايان.
جالپى سيپاتتاما: جەبەۋشى جۇلدىزى شولپان بولعاندىقتان، تورپاقتار نەگىزىنەن جانى دا ءتانى دە سۇلۋ، سابىرلى، وزىنە-ءوزى سەنىمدى، كوزقاراسىن ءجيى وزگەرتىپ، قاتەلىكتەرگە كوپ ۇرىنبايتىن جاندار بولىپ كەلەدى. ولار ۋادەگە بەرىك، كەلەم دەگەن جەرىنە كەلەتىن، سوزىنە تۇراقتى، دوستىققا ادال جاندار. بۇلاردىڭ اراسىنان العا قويعان ماقساتىنا جەتپەي قويمايتىن ادامدار كوپ كەزدەسەدى. مىنەزدەرى ءبىرقالىپتى جۇمساق جانە قىزمەتكە كوپ ۇمتىلمايتىن جانى تازا بولىپ كەلەتىندىكتەن، ولاردىڭ سەنىمدى دوستارى دا كوپ. تورپاقتاردىڭ اراسىنان ساياباق ارحيتەكتورلارى، گەولوگيا قىزمەتكەرلەرى، ارحەولوگتار مەن قارجى سالاسىنىڭ مىقتى ماماندارى شىعادى .
ايەل تورپاقتار: وتباسىنىڭ ۇيىتقىسى، بالا-شاعانىڭ قامقور اناسى. ءارقاشاندا جۇبايىنىڭ قامىن جەۋگە دايىن تۇراتىن بۇل بەلگىدەگى بويجەتكەندەرمەن وتباسىن قۇرعاندار كوپ جاعدايدا جەڭىسكە جەتىپ، ونەگەلى وتباسىنىڭ ەگەسى اتالا الادى.
اۋرۋعا بەيىم جەرلەرى: تاماعى، بۇيرەك، قۋىق جانە قالقانشا بەزدەرى. تاماقتى تالعاپ جەۋگە اسا بەيىم ەمەس بولعاندىقتان، تورپاقتىڭ دەنەسىنە ءتۇرلى جارالار دا شىعۋى مۇمكىن. سوندىقتان تورپاقتىڭ تاماعىندا نەگىزىنەن يودى بار جەمىس-جيدەكتەر ــ قارا ورىك، ابريكوس، ايۆا، سارى ورىك، شابدالى، اپەلسين بولۋى قاجەت. سونىمەن قاتار داستارقانىنان پياز، سارىمساق، قارا ورىك پەن سارى ورىكتىڭ ءدانى ۇزىلمەگەنى ءجون
3.ەگىزدەر.
21-مامىر-21 ماۋسىم ارالىعى. جەبەۋشى جۇلدىزى ــ مەركۋري. بەلگىسى ــ اۋا. تاستارى ــ الماس، بەريلل، بيريۋزا. تەمىرى ــ التىن، كۇمىس.
ءساتتى كۇندەرى ــ سارسەنبى، جەكسەنبى. ءساتسىز كۇنى ــ بەيسەنبى. تۇستەرى ــ كۇلگىن، سۇر، اشىق سارى، كوك جاسىل. قاراما-قارسى بەلگىسى ــ مەرگەن.
جالپى سيپاتتاما: ەگىزدەر نەگىزىنەن اقىلدى، سەزىمتال، رۋحاني بايلىققا قۇشتار، كەكشىل ەمەس بولىپ كەلەدى. سونداي-اق 11-21-ماۋسىم ارالىعىنداعى ەگىزدەر كۇننىڭ ىقپالىندا بولىپ كەلەتىندىكتەن، ولاردىڭ اراسىندا وزىنىكىن ءارقاشان دۇرىس دەپ ەسەپتەيتىن بيلىك قۇمارلارى، ءجوندى-ءجونسىز اشۋلانىپ، قىڭىر مىنەز كورسەتەتىندەرى دە كەزدەسەدى. ەگىزدەردىڭ اراسىنان تۋريستىك سالا، كىتاپ ساۋداسى، باسپاحانا، عارىش جانە اۆياتسيا سالاسىنىڭ قىزمەتكەرلەرى كوپ شىعادى. قولى اشىق ەگىزدەر سىيلىق بەرگەندى ۇناتادى. ءوزىنىڭ بىرەۋ ءۇشىن قىمباتتى ەكەنىن ءبىلۋ ەگىزدەردى شاتتىققا بولەيدى. اندا-ساندا بۇلقان-تالقان بولاتىن تەرىس مىنەزى كوپتەگەن دوستارىنىڭ ولاردان سىرت اينالۋىنا اكەلىپ سوعادى.
ايەل ەگىزدەر: كوپ جاعدايدا بىلۋگە وتە قۇشتار جانە بىلگەنىن ايتىپ، باسقا بىرەۋمەن سىر بولىسۋگە قۇمار جاندار. بۇل قۇمارلىق ولاردىڭ كوپ ۋاقىتىن الاتىندىقتان، ولار كوپ جاعدايدا باستاعان ءىسىن اياعىنا جەتكىزبەي تاستاپ كەتەتىن جايلارى ءجيى كەزدەسەدى. وتباسىندا ولار جاقسى ءۇي يەسى. ءدامدى تاماق ءپىسىرۋدىڭ شەبەرى بولعاندىقتان قوناقجاي، ۇيىنە قوناق كەلگەندى ۇناتاتىن جان. شىدامدىلىعى مەن ۇستامدىلىعى جەتپەيتىن بولعاندىقتان، بالالارىنىڭ ءۇستى-باسىنا، ساباعىنا قاراۋ ماسەلەسىندە كەمشىن تۇستارى دا بار.
اۋرۋعا بەيىم جەرلەرى: وكپەسى، كەڭىردەك قولقاسى جانە جۇيكە جۇيەسى. ەگىزدەرگە بۇرشاق، اسقاباق، اراحيس، باكلاجان، ءجۇزىم، المۇرت، الما، ءىنجىل، كارتوپ اسا پايدالى. سونىمەن قاتار مايى از ەتتى تاعامداردى كوپ تۇتىنعانى ءجون. قۇرامىندا وكپەگە اسا پايدالى كرەمنيي بولعاندىقتان، ەتىن مول قوسىپ جاس قالاقايدان سورپا جاساپ ىشكەن پايدالى. اششىنى كوپ پايدالانۋعا، ال ىشىمدىكتى تاتىپ الۋعا مۇلدە بولمايدى. اۋرۋىنىڭ نەگىزى تىنىس الۋ مۇشەلەرىمەن بايلانىستى بولعاندىقتان، تازا اۋادا كوپ جۇرۋگە تىرىسۋ كەرەك. جۇگىرۋمەن، ءبىر ورىندا جىپپەن تۇرىپ سەكىرۋمەن اينالىسقانى ءجون.
4.شايان:
22-ماۋسىم-22 شىلدە ارالىعى. جەبەۋشى جۇلدىزى ــ اي. بەلگىسى ــ سۋ. تاستارى ــ اي تاسى، رۋبين، ءزۇبارجات. تەمىرى ــ كۇمىس. ءساتتى كۇندەرى ــ دۇيسەنبى، بەيسەنبى. ءساتسىز كۇنى ــ سەيسەنبى. تۇستەرى ــ اق، اشىق-جاسىل، كوك، كۇمىس جانە التىن ءتۇستى. قاراما-قارسى بەلگىسى ــ تاۋەشكى.
جالپى سيپاتتاما: شاياندار نەگىزىنەن سەزىمتال، ونەرلى، ءوزىن ورتاسىنا سيلاتا الاتىن، قىزۋ قاندى، ويىنداعىسىن ىرىكپەي تۋرا ايتاتىن، ارمانشىل جاندار بولىپ كەلەدى. ولار جۇلدىزدار بەلگىسىنىڭ ىشىندەگى ەڭ جۇمباعى بولىپ سانالادى. بۇعان سەبەپ بۇل بەلگىدەگىلەردىڭ بىردە تولىپ نەمەسە جاڭادان تۋىپ، ءارتۇرلى قۇبىلىسقا ەنىپ تۇراتىن ايدىڭ ىقپالىندا بولۋىنان بولسا كەرەك. سەزىمتالدىعى جوعارى بولعاندىقتان شايان بەلگىسىندەگىلەردەن مەملەكەت قايراتكەرلەرى، داڭقتى قولباسشىلار، جۇلدىز جورامالداۋشىلار، سونداي-اق بال اشۋشىلار مەن مەديتسينا سالاسىنىڭ قىزمەتكەرلەرى كوپ شىعادى.
ايەل شاياندار: ۇيىندە سالتانات پەن جايلىلىقتىڭ بولعانىن قالايدى. ولار كوپ جاعدايدا ۇرىس-كەرىستەن اۋلاق، «كەلىسىپ پىشكەن تون كەلتە بولماس» دەگەن قاعيدانى ۇستانادى. ءبىراق، كەيبىر جاعدايدا كەلىسىمپاز شايانداردىڭ قالىپتان شىعىپ، تيرانعا اينالىپ كەتۋى مۇمكىن.
اۋرۋعا بەيىم جەرلەرى: وكپەسى، بۇيرەگى، اسقازانى جانە اششى ىشەگى مەن جۇيكە جۇيەسى. بويىندا تەمىر جەتىسپەۋشىلىكتەن قان ازدىق بولاتىندىقتان شايانداردىڭ نەگىزىنەن ەت ونىمدەرىنەن-مالدىڭ باۋىرىن، جىلىك مايىن سونداي-اق بالىقتى مولىنان پايدالانىپ، ايران، قۇرت، ءسۇت ونىمدەرىن كوپ تۇتىنۋى قاجەت. ءسابىز جانە اپەلسين شىرىنىن، سونداي-اق شايدى ءجيى ىشكەن پايدالى. ىشىمدىككە جولاماعانى ءجون. دەنساۋلىعىن قالىپتا ۇستاۋ ءۇشىن كۇندەلىكتى دۋش قابىلداۋ، سالقىن سۋعا ءتۇسۋ، ءجۇزۋ وتە پايدالى.
5.ارىستان:
23-شىلدە 23-تامىز ارالىعى .جەبەۋشى جۇلدىزى ــ كۇن. بەلگىسى ــ وت. تاستارى ــ الماس، رۋبين، توپاز، حريزوليت، يانتار، تۋرمالين،تەمىرى ــ التىن. ءساتتى كۇندەرى ــ جەكسەنبى. ءساتسىز كۇنى ــ سەنبى. تۇستەرى ــ قوڭىر، سۇر، قىزىل قوڭىر، كوك، كوگىلدىر. قاراما-قارسى بەلگىسى ــ سۋقۇيعىش.
جالپى سيپاتتاما: تۋمىسىنان دەنساۋلىعى مىقتى، قىزبا مىنەزدى، ارمانشىل، جالعىزدىقتى جانى سۇيمەيتىن، وزىنە بىرەۋدىڭ باسقىنشى بولۋىن قالامايتىن، اقىلدىلىعى كۇشپەن استاسىپ جاتاتىن ارىستانداردىڭ ءومىرى ءبىرىڭعاي تەك جاقسىلىقتاردان تۇرادى دەۋگە بولمايدى. سونىمەن قاتار 4-تامىز 12-تامىز ارالىعىندا تۋىلعان ارىستاندارعا يۋپيتەردىڭ ىقپالى بولاتىندىقتان، ۇساق-تۇيەكتەردى ەسكەرە بەرمەيتىن اڭ پاتشاسىنىڭ كەيدە كىنامشىل، قازىمىر، ءمىنشىل بوپ كەتەتىن كەزدەرى بار. ولار دوستىققا ادال، قولى اشىق، مىنەزى كەڭ پەيىل، بارىن اينالاسىنداعىلارمەن بولىسكىسى كەپ تۇراتىن جاندار بولىپ كەلەدى.
ايەل ارىستاندار: جانى جومارت، دوستىققا ادال بولىپ كەلەدى. بۇل بەلگىدەگىلەر دوستارىنىڭ ءوزىن ساتىپ كەتكەندىگىن ەشقاشان كەشىرمەيدى جانە ولاردىڭ وزدەرى سياقتى قىزۋ قاندى، اسەرشىل بولعانىن قالايدى. ارىستاندار وزدەرىنە باسقالار تاراپىنان ايتىلعان سىندى ۇناتپايدى. سوندىقتان ولارعا اقىل ايتقاندا جەل جاعىنان ەمەس، ىق جاعىنان كەلىپ، سىلاپ-سيپاپ تۇسىندىرگەن دۇرىس. ارىستانشالار باسقا جانداردىڭ وزىنە كوڭىل اۋدارعانىن ءارقاشان قالاپ تۇرادى. ءبىراق تۋعان بالالارىمەن قارىم-قاتىناستا بەلگىلى ءبىر ارا قاتىناستى ۇستاپ، ولاردىڭ جاي-كۇيىنە كوپ الاڭداي بەرمەيدى. تۋمىسىنان كوپشىل ارىستاندار ۇيلەرىنە قوناق شاقىرىپ، وزدەرى دە قوناققا بارىپ، توي-دۋمانداتىپ جۇرگەندى ۇناتادى.
اۋرۋعا بەيىم جەرلەرى: جۇرەگى، قان تامىرلارى مەن بۋىن اۋرۋلارى، ارقاسى، جۇيكە جۇيەسى، قالقانشا بەزى. سوندىقتان تاماعىندا مىندەتتى تۇردە ءسۇت، ايران ونىمدەرى، جۇمىرتقا، ەت، بۇرشاق، پياز، ۋ پياز، سارىمساق، سارى ورىك پەن قارا ورىك، اپەلسين بولۋى قاجەت. تاعامداردان قاراقۇمىق، ماكارون ونىمدەرى پايدالى. كۇش-قۋات بەرەتىن تۇزى ــ ماگنيي فوسفاتى. بۇل تۇزدىڭ جۇيكە جۇيەسىن جاقسارتىپ، ادام دەنساۋلىعىن قالىپتى جاعدايدا ۇستاۋ ءۇشىن ماڭىزى زور. دەنساۋلىعىن ساقتاۋ ءۇشىن كۇندەلىكتى ەرتەمەن جۇگىرۋ، تازا اۋادا كوپ ءجۇرۋ جانە جۇيكە جۇيەسىنە وڭدى اسەر ەتەتىن ومىرتقا جانە ارقانى ۋقالاتۋ اسا پايدالى.
6.بيكەش:
24-تامىز-23-قىركۇيەك ارالىعى. جەبەۋشى جۇلدىزى ــ مەركۋري. بەلگىسى ــ جەر. تاستارى ــ نەفريت، سەردوليك، توپاز، اقىق. تەمىرى ــ كۇمىس. ءساتتى كۇنى ــ سارسەنبى. ءساتسىز كۇنى ــ بەيسەنبى. تۇستەرى ــ اق، كوكشىل، جاسىل، كۇلگىن، اشىق كوك. قاراما-قارسى بەلگىسى ــ بالىقتار.
جالپى سيپاتتاما: بيكەشتەر تۋمىسىنان كەز كەلگەن اداممەن ءتىل تابىسا الاتىن اقىلدى، بايسالدى، قيىندىقتان جول تابا بىلەتىن تاپقىر بولىپ كەلەدى. ءبىراق، كەيدە جالقاۋ تارتىپ ۇيلەنىپ، ءۇي بولۋ ماسەلەسىن كەيىنگە قالدىرىپ، كەش ۇيلەنىپ جاتاتىن كەزدەرى بار. مىنەزى ءبىرتوعا تۇيىق، ۇياڭ بولىپ كەلەتىن بيكەشتەر جاعىمسىز ءجايتتارعا توزە المايدى. اشۋىن سىرتقا شىعارىپ ايقاي-شۋ شىعارماعانىمەن ءوزىن توماعا-تۇيىق ۇستاپ، وڭاشا كۇي كەشەتىن كەزدەرى بولىپ تۇرادى. بيكەشتەر ءسوزدىڭ ەمەس، ءىستىڭ ادامدارى. سوندىقتان ولار كوپ جاعدايدا العا قويعان ماقساتتارىنا جەتەدى. قاي سالادا ءوزىن كورسەتە الادى دەگەنگە كەلسەك، ولار ەلەكترونيكا، ەكونوميكا، پەداگوگيكا، تۋريزم، مەديتسينا، بيزنەس سالالارىنىڭ مىقتى ماماندارى بولا الادى.
ايەل بيكەشتەر: ادال دوس، سەنىمدى جار بولۋمەن بىرگە، كەزى كەلسە مىقتى قارسىلاس دۇشپانعا دا اينالىپ كەتە الادى. قيىندىقتان شىعۋ ءۇشىن ەڭ الدىمەن سول قيىندىقتى تۋدىرعان جايتتاردىڭ تامىرىنا بالتا شابۋ كەرەك ەكەنىن بىلەتىن بيكەشتەر اقىل سۇراعان جاندارعا تاپتىرمايتىن جول سىلتەۋشى. ولار دوستارىنىڭ كوپ بولعانىن قالايدى جانە قاي كەزدە قانداي جاعدايدا بولماسىن ولارعا كومەك بەرۋگە ءازىر. سالقىنقاندى بيكەشتەر ماحاببات ماسەلەسىندە دە سابىرلى بولىپ كەلەدى. بولاشاق جارىنا قاراپ، تاڭداپ ءجۇرىپ جاقىندايتىندىقتان، ولار وتباسىندا جاقسى جار بولا الادى. اۋرۋعا بەيىم جەرلەرى: باۋىرى مەن اسقازانى جانە ىشەگى. بيكەشتىڭ كۇش-قۋات بەرەتىن تۇزى ــ كاليي جانە تەمىر فوسفاتى. كوز قۋاتىن ارتتىرۋ ءۇشىن تمين وتە قاجەت. تاماققا المانى، قاراقۇمىقتى، قارا بيداي ۇنىن ءجيى پايدالانۋ قاجەت. قۋىرىلعان ەت جەمەگەنى ءجون. دەنساۋلىعىن ساقتاۋ ءۇشىن دۋش قابىلداۋ، سۋىق سۋعا ءتۇسۋ جانە ەرتەڭگىسىن ءارتۇرلى دەنە جاتتىعۋلارىن جاساۋ، سونداي-اق ارقا مەن بەل ومىرتقاعا نۇكتەلى ماسساج جاساۋ اسا پايدالى.
7.تارازى:.
24-قىركۇيەك 23-قازان ارالىعى. جەبەۋشى جۇلدىزى ــ شولپان. بەلگىسى ــ سۋ. تاستارى ــ بريلليانت، نەفريت، مالاحيت، رودونيت، رودوحروزيت. تەمىرى ــ پلاتينا. ءساتتى كۇندەرى ــ جۇما، سەنبى. ءساتسىز كۇنى ــ سەيسەنبى. تۇستەرى ــ كوك، قوڭىر، سۇر، جاسىل، قارا كوك. قاراما-قارسى بەلگىسى ــ توقتى.
جالپى سيپاتتاما: ماحاببات پلانەتاسى بولىپ ەسەپتەلىنەتىن شولپاننىڭ ىقپالىندا بولعاندىقتان، بۇل ايدا تۋىلعانداردىڭ جانى ىزگى، قايىرىمدى، ارمانشىل، مىنەزى جۇمساق، ءوز ىسىنە مىعىم، ۇقىپتى، ءجوندى-ءجونسىز شاشىلۋدى ءجون كورمەيتىن وزىمشىلدەۋ، ءبىراق ەشكىممەن بايلانىسۋدى قالامايتىن جاندار بولىپ كەلەدى. توي-تومالاققا قۇشتار، كىتاپ وقىپ، تەاترعا بارعاندى جاقسى كورەتىن تارازىلار نەگىزىنەن كوپشىل جاندار. سوندىقتان ولار جالعىز بولعاندى ەشقاشان ۇناتپايدى. بۇلاردىڭ ورتاسىنان ەلشىلەر، ونەرگە بەيىم ادامدار، عالىمدار، تەاتر ارتىستەرى، ارلەۋشى ماماندىعىنىڭ يەلەرى كوپ شىعادى.
ايەل تارازىلار: دوستىقتى قاتتى قادىرلەيدى، دوستارىمەن قاتىناسىندا مىنەزى جۇمساق، قيىن-قىستاۋدا قالعان دوسىنا ءارقاشان كومەكتەسۋگە ءازىر. ايتقانىنان قايتپايتىن تارازىلارعا اقىل ايتىپ داۋلاسۋدىڭ قاجەتى جوق. ولار نەگىزىنەن داۋلاسقاندى ەمەس، داۋلاسقانداردىڭ ورتاسىنا دەلدال بولعاندى قالايدى. ماحاببات ماسەلەسىندە قيالشىل جانە سەزىمتال تارازىلار ەشقاشان جالعىز جۇرگەندى ءجون كورمەيدى. ءوزىن سۇيگەن ادامنىڭ ىشكى الەمىن بىلۋگە قۇمارتقىش جانە نەبىر قيالدارعا بەرىلۋدەن دە تىس قالمايدى. تارازىلار ءارقاشان وزدەرى يىعىنا باسىن قويا الاتىن مىقتى ادامداردى ىزدەيدى. وتباسىندا باقىتتى بولعان سايىن مىنەزى دە جۇمسارىپ، ادامدارمەن قارىم-قاتىناسى يگىلىكتىڭ باستاۋىنا اينالادى.
اۋرۋعا بەيىم جەرلەرى: جۇيكە جۇيەسى مەن بۇيرەگى. سونداي-اق، اياق-قولدارى، بۋىندارى مەن ءزار شىعارۋ جۇيەسىنەن قۋىعى ءارتۇرلى اۋرۋلارعا بەيىم كەلەدى. بۇيرەك نەگىزىنەن ءارتۇرلى تۇزداردى، قالدىقتاردى شىعارۋعا قىزمەت ەتەتىندىكتەن، ونىڭ دۇرىس جۇمىس ىستەمەۋى تارازىنىڭ دەنەسىنە ءارتۇرلى تەرى اۋرۋلارىن تۋىنداتۋى مۇمكىن. سوندىقتان تۇزدى، مايلى تاعامداردى از تۇتىنىپ، ايران، قاتىق، اشىمال كوجە ىشكەن ءجون. كۇندەلىكتى ءارتۇرلى نان، ماكارون ونىمدەرىن تۇتىنۋمەن بىرگە قارا ورىك، شابدالى، ورىك سىندى جەمىس تۇرلەرىن دە مولىنان پايدالانۋ كەرەك. تارازىنىڭ كۇش-قۋات بەرەتىن تۇزى ــ كاليي فوسفاتى. ولار بۇلدىرگەندە، جاڭعاقتا، قاراقۇمىقتا، بيداي ۇنىندا كوپ. سوندىقتان وسى تاعامداردى كۇندەلىكتى پايدالانىڭىز.
8.سارىشايان:
24-قازان 22-قاراشا ارالىعى. جەبەۋشى جۇلدىزى ــ پلۋتون. بەلگىسى ــ سۋ. تاستارى ــ الەكساندريت، گەماتيت، توپاز، كورالل، بەريلل، مالاحيت، رۋبين. تەمىرى ــ كۇمىس. ءساتتى كۇنى ــ سەيسەنبى. ءساتسىز كۇنى ــ دۇيسەنبى. تۇستەرى ــ سۇر، القىزىل، قىزىل قوڭىر، كوك سۇر. قاراما-قارسى بەلگىسى ــ تورپاق.
جالپى سيپاتتاما: بۇل بەلگىدەگىلەر ەرىك-جىگەرى وتە مىقتى، سەزىمگە بەرىلگىش، اسەرلەنگىش، ارتىستىك قابىلەتى بار، كەڭپەيىل جاندار بولىپ كەلەدى. جاس كەزىندە وزىنە-ءوزى سەنىمسىز بولعانىمەن، وسە كەلە كۇش-قۋاتى تولىسقان سارىشاياندار بايلىقتان دا، بيلىكتەن دە كەندە ەمەس جاندارعا اينالادى. ۇناتقان جۇمىسىن جان-تانىمەن بەرىلىپ ىستەيتىن ولاردىڭ ۇيىمداستىرۋ قابىلەتى مىقتى جانە جۇيكە جۇيەسى مىعىم بولىپ كەلەدى. تۋا بىتكەن قاسيەتى ولاردىڭ مەملەكەتتىك قىزمەتكەر، اسكەري قولباسشى، كينو، تەاتر سالاسىنىڭ اكتەرلەرى، جازۋشىلار بولۋىنا ءجون سىلتەيدى. ولار ەشقاشاندا دوستارىنىڭ كوڭىلىن قالدىرمايدى. قيىن-قىستاۋ جاعدايدا قاي جەردە، قانداي كەزدە بولماسىن دوستارىنا كومەك قولىن سوزۋعا ءازىر.
ايەل سارىشاياندار: نەگىزىنەن قالجىڭباس بولىپ كەلەدى. ولار ىستەگەن جۇمىسىنان جاقسى اسەر العاندى ۇناتادى. ءبىراق، ءىس، جۇمىس جاعدايىندا كوپ ەشكىمگە سەنە بەرمەيدى. سوندىقتان بۇل بەلگىدەگىلەر مەن دوستارىنىڭ ورتاسىندا اقشا، قارجى-قاراجات ماسەلەسىندە ارتى قارلى بورانعا اينالاتىن داۋلار دا تۋىنداپ جاتادى. دەسەك تە، كۇش-قۋاتى مول، قىزۋقاندى سارىشاياندار وتباسىندا جاقسى جار، مەيىرىمدى انا بولا الادى.
اۋرۋعا بەيىم جەرلەرى: جۇرەك قان-تامىرلار جۇيەسى مەن بەلى. سارىشايانعا نەگىزىنەن جۇقپالى اۋرۋلار بەيىم. بۇل اۋرۋلار ونىڭ القىمىنا، سونىمەن قاتار ءزار شىعارۋ ورگاندارىنا مىقتى اسەر ەتەدى. قانىنىڭ تازا بولۋى ءۇشىن سارىشاياندار تاماقتى تالعاپ جەگەنى ءجون. ولارعا ءسپيرتتى ىشىمدىكتەردى ىشۋگە، اششى، مايلى تاعامداردى جەۋگە مۇلدە بولمايدى. نەگىزىنەن ءارقاشان ءسۇت، قارقۇمىق جانە سيىردىڭ باۋىرىن جەگەن پايدالى. قان تازالايتىن قالاقاي، سارىمساق، پيازدى كوپ تۇتىنعانى ءجون. سارىشاياننىڭ كۇش-قۋات الاتىن تۇزى ــ ناتريي سۋلفاتى .
9.مەرگەن:
23-قاراشا 22-جەلتوقسان ارالىعى. جەبەۋشى جۇلدىزى ــ ەسەكقىرعان مەن نەپتۋن. بەلگىسى ــ وت. تاستارى ــ الەكساندريت، بيريۋزا، لازۋريت، تۋرمالين، حەلتسەدون، امەتيست، ساپفير. تەمىرى ــ لاتۋن. ءساتتى كۇنى ــ بەيسەنبى. ءساتسىز كۇنى ــ سارسەنبى. تۇستەرى ــ كوك، كوك جاسىل، كۇلگىن، قوڭىر. قاراما-قارسى بەلگىسى ــ ەگىزدەر .
جالپى سيپاتتاما: تۋمىسىنان باتىل، تاۋەكەلشىل، سەزىمتال، ارمانشىل، بىلۋگە قۇشتار، ايتقانىنان قايتپايتىن بىربەتكەي مەرگەندەر الىس ساپارلارعا، اڭشىلىققا شىققاندى ۇناتادى. ولار سپورتقا بەيىم، ءازىل-قالجىڭعا ۇستا جاندار بولىپ كەلەدى. قانداي قيىن تاپسىرما بولسا دا اقىلىنىڭ، سەزىمتالدىعىنىڭ ارقاسىندا ونى وڭاي ورىنداپ شىعا الادى. ارىپتەستەرى مەرگەندى ءدال وسىنداي قاسيەتتەرى ءۇشىن سىيلاپ، قۇرمەتتەيدى. مەرگەندەر نەگىزىنەن اقشا نەمەسە داڭق ءۇشىن ەمەس، ادالدىق ءۇشىن ءومىر سۇرەدى. بۇل بەلگىدەگىلەر وزدەرىن مەديتسينا، ەلەكترونيكا، ساۋدا-ساتتىق، زاڭ، ونەر سالالارىندا جارقىراتىپ كورسەتە الادى. كوپ جاعدايدا ولاردىڭ ورتاسىنان ساياحاتشىلار، تەڭىزشىلەر، ارحەولوگتار، اسكەر باسشىلارى، ساياساتشىلار، جۋرناليستەر، گەولوگتار مەن سپورتسمەندەر، سونداي-اق ات باپتاۋشىلار مەن يت ۇيرەتۋشىلەر كوپ شىعادى.
ايەل مەرگەندە:ر باسقا جۇلدىز بەلگىلەرىنەن ومىرگە دەگەن ەرەكشە قۇشتارلىعىمەن جانە اسەرلەنگىشتىگىمەن ەرەكشەلەنەدى. ءبىر مەزگىلدە بىرنەشە ءىس-شارالارعا قاتىسۋعا بەيىم ولار وزدەرىنە كوپشىلىكتىڭ نازار اۋدارعانىن ۇناتادى. بالا كەزىندەگى جولداستارىن ۇمىتپايتىن ولار دوستارىن قاتتى قۇرمەتتەپ، قارىم-قاتىناس جاعدايىندا ازىلدەسىپ، ءجيى قالجىڭداسادى. نەگىزىنەن مەرگەندەر ەكى جۇزدىلەردى، جالعان مىنەز كورسەتىپ تۇرعانداردى ۇناتپايدى. ءارى قالجىڭعا سۇيەپ، بەتىنە دە ايتادى. بۇل تىكە ايتۋدان جاپا شەگەتىن كەزدەرى ءجيى. وتباسى ماسەلەسىندە ايەل مەرگەندەر ەكى ءتۇرلى بولىپ كەلەدى. ولاردىڭ ءبىرى بالالارىن جان-تانىمەن سۇيەتىن، وتباسىنىڭ تىرلىگىنە نەمكەتتى قارامايتىن بولىپ كەلسە، ەكىنشىلەرى كەرىسىنشە بەلسەندى ءومىر ءسۇرۋدى قالايتىن، دالالىق جۇمىستارعا بەيىم، ەركەك سياقتى بولىپ كەلەدى. مۇنداي وزگەشەلىك بۇل جۇلدىز بەلگىلەرىنە ەسەكقىرعان مەن نەپتۋن سياقتى پلانەتالاردىڭ قابات اسەر ەتەتىندىگىنەن بولسا كەرەك. ال جۇمىس ىستەپ، قىزمەت قۋعاندارى كوپ جاعدايدا جەتىستىكتەرگە جەتەدى .
اۋرۋعا بەيىم جەرلەرى: باۋىرى، جۇيكە جۇيەسى، بۋىندارى، قالقانشا بەزى. مەرگەننىڭ كۇندەلىكتى تاماعىندا باۋ-باقشانىڭ جاس جەمىس-جيدەكتەرى، قاربىز، بۇرشاق، قيار جانە قالاقاي بولعانى ءجون. ونىڭ ءال-قۋات بەرەتىن تۇزى ــ كرەمنيي مەن كاليي حلوريدى. بۇل ەكى تۇز نەگىزىنەن اراسان سۋلارىندا بولاتىندىقتان مەرگەننىڭ دەمالىس، ساۋىقتىرۋ ورىندارىنا ءجيى بارىپ، ەم العاندارى ءجون.
10.تاۋەشكى :
22-جەلتوقسان 20-قاڭتار ارالىعى. جەبەۋشى جۇلدىزى ــ ساتۋرن. بەلگىسى ــ جەر. تاستارى ــ رۋبين، ونيكس، گرانات، اي تاسى، لازۋريت. تەمىرى ــ التىن. ءساتتى كۇندەرى ــ سەيسەنبى، سەنبى. ءساتسىز كۇنى ــ دۇيسەنبى. تۇستەرى ــ جاسىل، قارا، اق سۇر، كوك، قوڭىر. قاراما-قارسى بەلگىسى ــ شايان.
جالپى سيپاتتاما: تۋمىسىنان سابىرلى، اقىلدى، اينالاسىن جاقسى پايىمداپ، جەتىستىككە جەتۋدىڭ جولدارىن تابا بىلەتىن ەرىك-جىگەرى كۇشتى تاۋەشكىلەر كەيدە ءوزىنىڭ دۇرىستىعىن دالەلدەۋ جاعدايىندا داۋ، شۋ شىعارۋدان دا تايىنبايدى. وتە ەڭبەكقور، باسشىلىقتىڭ ايتقانىن تىڭعىلىقتى ورىنداۋعا بەيىم، ادەت-عۇرىپتى، سالت-ءداستۇردى ۇستانۋدا قاتەلىك جىبەرمەۋگە تىرىساتىن، دوستىققا ادال تاۋەشكىلەردى اينالاسىنداعى ارىپتەستەرى قاتتى قۇرمەتتەپ سىيلايدى. قيىن-قىستاۋ جاعدايدان شىعۋدىڭ جولىن تابا بىلەتىن تاۋەشكىلەردىڭ كەيدە ىشكى جان-دۇنيەسىنىڭ مۇڭ مەن قايعىعا بەرىلىپ، جالعىز قالاتىن كەزدەرى ءجيى. سوندىقتان وعان ومىرگە سابىرلى كوزبەن قاراپ، ومىردەگى جايلارعا فيلوسوفيالىق تۇرعىدان وي جىبەرىپ ۇيرەنۋ قاجەت. تاۋەشكىلەر كوبىنە تۇيىق، سول تۇيىقتىعىنان ونىڭ قانداي جان ەكەنىن كوپشىلىكتىڭ تۇسىنە بەرمەيتىن جايلارى دا ءجيى كەزدەسەدى.
ايەل تاۋەشكىلەر: قىزمەت ءۇشىن ەش-قاشاندا ساتقىندىققا بارمايدى. اللا بەرگەن تالانتىنىڭ ارقاسىندا ولار قيىن جاعدايدان شىعۋدىڭ جولىن تەز تابا بىلەدى. بۇل بەلگىدەگى ارۋلاردىڭ دوستارى كوپ، بوس ۋاقىت تاپسا ولارمەن تەلەفون ارقىلى سۇحباتتاسىپ قۇلاقتارىنىڭ قۇرىشتارىن قاندىرعاندى ۇناتادى. ءبىراق، تۇرمىستاعى تاۋەشكىلەر ۇيىنە جالعىزباستى قۇربىلارىن شاقىرعاندى ۇناتا بەرمەيدى. بۇل بەلگىدەگى بويجەتكەندەر ماحابباتتى قاتتى قادىرلەيدى. ولار نەگىزىنەن وزدەرىنە كوپ بويداقتاردىڭ عاشىق بولعانىن قالايدى. تۇرمىسقا ماحابباتتىڭ جەتەگىمەن ەمەس، كوپ جاعدايدا سەزىمنىڭ اسەرىنەن شىعادى. وتباسى الدىنداعى جاۋاپكەرشىلىگىن جان-تانىمەن سەزىنەتىن ولار جانى ىزگى جار جانە جاقسى ءۇي يەسى بولا الادى.
اۋرۋعا بەيىم جەرلەرى: تاۋەشكىلەردىڭ تۋا ءبىتتى اۋرۋلارى سۇيەكتەرىنىڭ بوساڭدىعىنا بايلانىستى بولىپ كەلەدى. دەنساۋلىقتارى مىقتى ولار نەگىزىنەن اياق-قول، بۋىن اۋرۋلارى جانە تەرى اۋرۋلارىنا بەيىم. ولاردىڭ تاماعىندا كۇندەلىكتى ەت ونىمدەرىمەن قاتار، قارا ورىك، جۇمىرتقا، پياز، سارىمساق جانە ءسابىز بەن المانىڭ، المۇرتتىڭ شىرىنى، سونداي-اق بال بولعانى ءجون. تاۋەشكىلەردىڭ كۇندەلىكتى ەرتەمەن ءارتۇرلى دەنە-شىنىقتىرۋ جاتتىعۋلارىن جاساۋى، جۇگىرۋى دەنساۋلىعىنا اسا پايدالى.
11. سۋقۇيعىش:
21-قاڭتار 18-اقپان ارالىعى. جەبەۋشى جۇلدىزى ــ ۋران مەن ساتۋرن. بەلگىسى ــ اۋا.
تاستارى ــ ساپفير، وبسەديان، ياشما. تەمىرى ــ مەلحيورءساتتى كۇنى ــ سارسەنبى. ءساتسىز كۇنى ــ جەكسەنبى. تۇستەرى ــ كوك سۇر، قارا سۇر، قوڭىر، اشىق كوك. قاراما-قارسى بەلگىسى ــ ارىستان. جالپى سيپاتتاما: تۋا ءبىتتى بەيىمدىلىگى ءبىر نارسەنى وزگەرتۋگە، باستاما كوتەرۋگە قۇمار، تىڭنان ءىز سالۋعا شەبەر سۋقۇيعىشتار اتقاراتىن جۇمىسىن ەشقاشان اقشا جانە اتاق-داڭققا بايلانىستىرمايدى. بۇل قاسيەتتەرى ونى جازۋشى، سۋرەتشى، عالىم، زاڭگەر، بيزنەس سالاسىنىڭ قىزمەتكەرى جولىن تاڭداسا ۇلكەن جەتىستىكتەرگە جەتكىزەتىن ەدى. سۋقۇيعىشتاردىڭ نەگىزگى كەمشىلىگى ــ ءدال ۋاقىتىندا شەشىم قابىلداي الماۋىندا. ارمانشىل، بيلىكقۇمار ولاردىڭ قىزمەتكە ۇمتىلعىشتىعىنان شاتاسىپ جاتاتىن كەزدەرى دە ءجيى. بۇل بەلگىدەگىلەر ماحاببات پەن دوستىققا ونشا ءمان بەرمەيدى. دوستارىنىڭ كوڭىلىن ءجيى قالدىراتىندىقتان ونىڭ ءومىرى ءبىرىڭعاي تەگىس بولادى دەپ ايتۋ قيىن.
سۋقۇيعىش ايەلدەردى: بولىپ جاتقان بارلىق جاڭالىقتار قىزىقتىرادى. وزدەرىنىڭ جەكە ومىرىنە ونشا ءمان بەرمەيتىن ولار ماحابباتقا سەنە بەرمەيدى. ءبىراق قىزمەت ماسەلەسىنە ءجۇردىم-باردىم قاراماي، ونى ءبىرىنشى ورىنعا قويادى. بىرەۋگە سەنگىش سۋقۇيعىشتار كوپ جاعدايدا اڭعالدىققا بەرىلىپ، ءجيى شاتاسادى. تارتىپكە باعىنۋدى قالامايتىن ولار كوپ جاعدايدا تابىسقا جەكە باسىنىڭ قاسيەتتەرىمەن عانا جەتەدى. كوڭىل كوتەرۋدى شەت كورمەيتىن سۋقۇيعىشتار ساۋىق كەشتەرى مەن وتىرىستارعا دوستارىمەن بىرگە بارعاندى ۇناتادى. كيىمنىڭ، شاش قويۋدىڭ جاڭا ۇلگىسىن ءوز بويىنان كورسەتكىسى كەلەتىن بويجەتكەن سۋقۇيعىشتار ۇلكەندەردى عانا ەمەس، ءوز قاتارلارىن دا تاڭعالدىرادى. وتباسىندا ولار وزدەرىن ەركىن، ەشكىمگە تاۋەلسىز ۇستاعىسى كەلەتىندىكتەن باقىتتارى باياندى بولادى دەپ ايتۋ قيىن.
اۋرۋعا بەيىم جەرلەرى: اسقازانى، اياق ــ قولى، ارقاسى مەن بۋىندارى، سونداي-اق قانتامىر اۋرۋلارى. دەنساۋلىعىن ساقتاۋ ءۇشىن سۋقۇيعىشتاردىڭ تازا اۋادا كوپ ءجۇرىپ، جۇگىرۋمەن، ءارتۇرلى دەنە جاتتىعۋلارىن جاساۋمەن اينالىسقانى، سونداي-اق، ءارقاشاندا سابىرلى بولعانى اسا قاجەت. دەنەسىنە نەگىزىنەن يود، قورعاسىن، كالتسيي، فتور، ماگنيي جەتىسپەيتىندىكتەن كۇندەلىكتى تاماعىندا بال، پياز، سارىمساق، ورىكتىڭ ءدانى، جۇمىرتقا بولعانى ءجون.
12.بالىقتار:
19-اقپان 20-ناۋرىز ارالىعى. جەبەۋشى جۇلدىزى ــ نەپتۋن. بەلگىسى ــ سۋ. تاستارى ــ يزۋمرۋد، الەكساندريت، ساپفير، اكۆامارين، كورالل، اۆانتيۋرينتەمىرى ــ پلاتينا.
ءساتتى كۇندەرى ــ دۇيسەنبى، بەيسەنبى. ءساتسىز كۇنى ــ سارسەنبى. تۇستەرى ــ اسپان كوك، كۇلگىن، كوگىلدىر، كۇڭگىرت قوڭىر. قاراما-قارسى بەلگىسى ــ بيكەش.
جالپى سيپاتتاما: ءوز بىلگەنىمەن ەمەس، جۇرەگىنىڭ ايتقانىمەن جۇرەتىن، نەگىزىنەن ءادىل، دوستىققا ادال بالىقتاردى اينالاسىنداعىلار قۇرمەتتەپ، سىيلايدى. جۇرەكتەرى نازىك سەزىمتال بولعاندىقتان ولاردىڭ كوڭىلى تەز قالعىش، وكپەلەگىش. داۋ-دامايدى ۇناتپايتىن ولار ماحاببات ماسەلەسىنە بايىپپەن قارايدى. اقىلدى، ەستە ساقتاۋ قابىلەتى جوعارى بالىقتاردىڭ ورتاسىنان مىقتى عالىمدار مەن تالانتتى اكتەرلەر كوپ شىعادى. باۋىرماشىلدىق قاسيەتتەرى مىقتى بالىقتار جاقىن-جۋىقتارى مەن تۋىستارىن قيىن جاعدايدا ەشقاشاندا تاستاپ كەتپەيدى. وسى قاسيەتتەرىنە وراي، ولار وتباسىندا بالا-شاعانىڭ قامىن ويلايتىن ونەگەلى ءۇي ەگەسى نەمەسە وشاق يەسى، جاقسى جار بولا الادى.
ايەل بالىقتار :باسقا جۇلدىز بەلگىلەرىنەن سىر ساقتاي الۋشىلىعىمەن جانە ءوزىنىڭ جاي-كۇيىن ەشكىمگە بىلدىرە بەرمەيتىندىگىمەن ەرەكشەلەنەدى. باسقالاردى وزىندەي كورەتىن ادالدىعىنان ومىردەن وپىق جەپ، بارماق تىستەيتىن كەزدەرى ءجيى. سوندىقتان ولاردىڭ جول ۇستىندە، سونىمەن قاتار تىم تانىس ەمەس ورتادا ادامدارمەن قارىم-قاتىناس جاعدايىندا اباي بولعانى ابزال. ومىرگە ادال، ىزگى كوزقاراسپەن قارايتىندىقتان بالىق بويجەتكەندەردىڭ كوپ جاعدايدا جولى بولعىش، ولار ادال جار، ونەگەلى انا بولا الادى.
اۋرۋعا بەيىم جەرلەرى: اياق ــ قولى، اسقازانى، قان اينالۋ جۇيەسى مەن بەزدەرى. سونداي-اق، بالىقتاردىڭ اراسىندا قۋىق ــ نەسەپ جولدارى مەن تەرى اۋرۋلارىمەن اۋىراتىندار ءجيى كەزدەسەدى. اۋا رايىنىڭ جانە جۇلدىزدىق وزگەرىستەرگە (اۋىسۋىنا) وتە سەزىمتال بولىپ كەلەتىندىكتەن ولاردىڭ كۇننىڭ، ايدىڭ تۇتىلۋىن الدىن الا ءبىلىپ، ساقتانعانى دۇرىس.
تۋمىسىنان دەنساۋلىقتارى سىر بەرگىش بالىقتاردىڭ تاماق ونىمدەرىندە ءسۇت، ايران، ىرىمشىك، قۇرت، سونىمەن قاتار جەمىس-جيدەك، باۋ-باقشا داقىلدارى مول بولعانى ءجون. سونداي-اق، ولاردىڭ تازا اۋادا، اسىرەسە ورمان ىشىندە كوپ سەرۋەندەپ، تابيعي وزەن-كولدەردە ءجيى شومىلعانى لازىم.
«زامان» سايتىنان توتەشەگە دايىنداعان: جۇلدىز اقباي قىزى (پراكتيكانت)
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
