- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
ەرجۇرەك شوفەر قۇرمانبەك: قولىنان كەلگەنشە باسقالارعا كومەكتەسۋ ۇلتىمىزدىڭ قانىنا سىڭگەن قاسيەت
سۇحباتتاسقان: نۇرعيسا قۇرمانجان ۇلى
2012.12.27 09:40 كەلۋ قاينارى : حالىق تورابى
 |
قۇرمانبەكتىڭ ماراپات مەدالى
|
قارامايلى قالاسىندا كوشە كولىگىن جۇرگىزەتىن قازاق ازامات مەملەكەت بويىنشا ادىلەت جولىندا ايانباعان ەرجۇرەك شوفەر بولىپ ماراپاتتالىپ، بىيجيڭدە وتكىزىلگەن سيلىق تاراتۋ سالتىنا داڭقتى تۇردە قاتىناستى. القاۋعا بولەنگەن ازاماتپەن امانداسىپ، سۇحباتىن الىپ قايتقان ەدىك، تومەندە سۇحباتتىڭ مازمۇنىن وزدەرىڭىزگە ۇسىنامىز.
ءتىلشى: اۋەلى العان ماراپاتىڭىز قۇتتى بولسىن!
قۇرمانبەك: راحمەت، ەلدىڭ قولداۋى مەن قۋاتتاۋىنىڭ ارقاسىندا ازىراق ەڭبەگىم ەلەنىپ، ماراپات تورىنەن كورىنىپ، مارسيىپ جۇرگەن جايىم بار.
ءتىلشى: لاۋلاعان ءورتتى ءسوندىرىپ، ءتىلسىز جاۋدان باسقالاردىڭ مال-مۇلكىن اراشالاعان ەرلىك ىستەگەن ەكەنسىز، سول كەزدەگى بولعان جاعدايدى بايانداساڭىز.
قۇرمانبەك: يا، ءوز جاعدايىمدى تانىستىرا كەتسەم، مەن قارامايلى قالالىق جولاۋشى تاسىمال سەرىكتىگىنىڭ 7-اترەتىندە ىستەيمىن. وقيعا تۋىلعان كۇنى مەن جايرانبۇلاق رايونىنداعى سوڭعى ايالداماعا جاڭا عانا جەتىپ، دەمالايىن دەپ وتىرعانمىن. كەنەتتەن «ءورت كەتتى، ءورت» دەپ ايعايلاعان داۋىس شىقتى، داۋىس شىققان جاققا جۇگىرىپ بارسام، بىرنەشە ادام نە ىستەرىن بىلمەي داعدارىپ تۇر ەكەن. ولارعا دەرەۋ ءورت ءوشىرۋ اترەتىنە مالىمدەۋدى تاپسىرىپ، قايتا اۆتوبۋسقا قايتىپ ورالدىم دا، اۆتوبۋستاعى قۇرعاق ۇنتاقتى ءورت وشىرگىشتەن ەكەۋىن ەكى قولتىعىما قىسا، ءورت كەتكەن ۇيگە جۇگىردىم. 3-قاباتقا شىعىپ، ءورت كەتكەن ۇيگە كىرسەم، لاۋلاعان ءورت ۇلعايىپ بارادى ەكەن، قويۋ ءتۇتىن قولقانى قابادى، سوسىن ويىما گاز وشاق ءتۇستى دە، اس ۇيگە كىرىپ الدىمەن گاز وشاقتى جاپتىم، سوسىن سۋلانعان ورامالدى اۋىز-مۇرنىما تارتىپ، ساقتىق شارالارىن ىستەدىم، جالعىز ءوزىم 20 مينۋتتاي تىپىرلاپ، ءورتتى ءوشىرىپ بولعاندا ءورت ءوشىرۋ اترەتىندەگىلەر جەتتى. سول كەزدە مەنىڭ اۆتوبۋستى جۇرگىزەتىن كەزەكشىلىك ۋاقىتىم دا بولىپ ۇلگىرگەن ەدى، ءورت ءوشىرۋ اترەتىندەگىلەر اتى-ءجونىمدى، تەلەفون ءنومىرىمدى جازىپ الدى، سوسىن جۇمىسقا شىعىپ كەتتىم.
ءتىلشى: سودان كەيىن...
قۇرمانبەك: جۇمىسقا شىققاننان كەيىن، سوڭعى بەكەتكە كەلسەم، قىزمەتتەستەرىم ءۇستى-باسىما قاراپ، نە بولعان دەپ سۇرايدى، بەتىمنىڭ ءبىراز جەرىن بىردەمە سىزىپ، جاراقاتتانىپ قالىپتى. ولارعا جاي عانا: «بىرەۋگە كومەكتەسىپ ءورت ءوشىردىم»،-دەپ قويدىم. ەكى-ءۇش كۇن وتكەن سوڭ ءورت كەتكەن ءۇيدىڭ يەسى، تۋىس-تۋعانىمەن مەنى مەكەمەگە ىزدەپ كەلىپتى، قولدارىندا ءتۇرلى جەمەك-ىشپەك، تۇرمىستىق بۇيىمدار بار، قالتاما 2000 يۋاندى تىقپالادى، ءوزىم دە قاتتى قىسىلدىم، ءورت كەتىپ جاتقانىن مەنەن باسقا ءبىر شوفەر كورسە دە كومەكتەسەتىن ەدى، بۇنى مىندەتسىنگەنىم بولماس دەگەن ويعا كەلدىم دە، ولاردىڭ اقشاسىن الۋدان باس تارتتىم.
ءتىلشى: قانشا جىلدان بەرى شوفەرسىز؟
قۇرمانبەك: ءۇش جىل بولدى، بۇرىن كاسىپورىندا الدىڭعى شەپتەگى جۇمىسكەر بولعانمىن. تولىقسىزدى عانا تاۋىسقانمىن، ءبىلىم تولىقتاۋىم قاجەت دەگەن بەكىمگە كەلدىم دە، ءوزىم سىرتتاي ۇيرەنىپ ەمتيحان بەرۋ ارقىلى، ۇرىمجىدە ەكى جىل زاڭ كاسىبىن وقىدىم، كەيىن تۇرعىندار باسقارماسىندا جۇمىسشىلار ۇيىمىنىڭ ءتوراعاسى بولىپ ىستەدىم.
ءتىلشى: جۇمىسشىلار ۇيىمىنىڭ ءتوراعاسى بولساڭىز مىندەت اۋىر بولعان شىعار؟
قۇرمانبەك: يا، ەرتەمە كەش تۇرعىندار رايونىندا وتباسىلاردى ارالاپ جاعداي سۇرايمىن، قيىنشىلىعى بارلاردىڭ قيىنشىلىعىنا كومەكتەسىپ، اراز-اشتى بولعانداردى ءوزارا جاراستىرامىز، راسىندا دا جاپالى جۇمىس، ايتپاقشى ول جۇمىستى دا جاقسى اتقاردىم دەپ ويلايمىن، العان ماراپاتتارىم دا جوق ەمەس. وسى جولى بىيجيڭگە جۇرەردە ءوزىم ىلعي قارايلاسىپ جۇرەتىن، تۇرمىسىندا قيىنشىلىعى بار لو شۋەجين ەسىمدى حانزۋ ازامات ىزدەپ كەلىپتى، مەنىڭ وعان جاساعان كومەكتەرىمدى قاعازعا ءتىزىپ جازىپ اكەلىپتى، وسىنى باعالاۋشىلارعا كورسەت دەيدى، كوڭىلىن قيماي قالتاما سالىپ قويدىم.
ءتىلشى: وتباسى جاعدايىڭىزدى تانىستىرىپ وتسەڭىز، ونەرلى وتباسى دەپ ەستىدىم.
قۇرمانبەك: كەلىنشەگىم اينۇر ءشارىپقان قىزى مۇناي سالاسىندا ىستەيدى، قارامايلىدا «مەيىربان انا» ۇيىمىنا مۇشە بولىپ، جەتىم-جەسىر، قيىنشىلىعى بارلارعا شاماسىنىڭ جەتىسىنشە كومەكتەسىپ ءجۇر. ايدانا دەگەن قىزىم، اقنار دەگەن ۇلىم بار. ەكەۋى دە ءان ايتىپ، قارا دومبىرامەن جاعالاسقاندى ۇناتادى. قىزىم ايدانا 2006-جىلى بىيجيڭگە كەلىپ، ورتالىق تەلەۆيزيا ۇيىمداستىرعان جارىسقا دا قاتىناسقان. بىلتىر حاڭجوۋدا وتكىزىلگەن قىزىل ءان جارىسىنا قاتىناسىپ، قولا مەدال الدى. ءوزىم ازداپ ءان جازامىن، كەلىنشەگىم، بالالارىم بولىپ بىرگە ايتقان اندەرىمىزدى قازاقشا تورلاردان كورۋگە بولادى.
ءتىلشى: ونەرلەرىڭىز ورگە باسا بەرسىن، ايرانداي ۇيىعان وتباسىڭىزدان باقىت كەتپەسىن دەپ تىلەيمىن، بىيجيڭگە كەلىپ سيلىق العاندا قانداي كوڭىل-كۇيدە بولدىڭىز؟
قۇرمانبەك: باعانا دا ايتتىم، ەڭبەگىمىزدىڭ ەلەنگەنى حالقىمىزدىڭ قولداۋى، دەمەۋىنىڭ ارقاسى دەپ بىلەمىن. ەل امان، جۇرت تىنىش بولسىن. قازاقتىڭ بالاسى بولعاننان كەيىن، بىيجيڭگە كەلىپ سيلىق العانىم، ءوزىم ءۇشىن عانا ەمەس، ۇلتىم ءۇشىن دە داڭق دەپ بىلەمىن. قيىنشىلىعى بارلارعا كومەكتەسۋ ۇلتىمىزدىڭ قانىنا سىڭگەن قاسيەت، مەنى جاقسى ءىس ىستەۋگە جەتەلەگەن دە وسى ۇلتتىق مىنەزدەن، ۇلتتىق سانادان تۋعان رۋحاني كۇش دەپ ويلايمىن.
قۇرمانبەك: ەندى عانا قوعامعا اياق باسقان جاستارعا نەندەي كەڭەس بەرەسىز؟
ءتىلشى: جاستارىمىز جالىندى بولسىن، الىمدى بولسىن. از قيىنشىلىققا توقىراپ قالماي ىزدەنسە، ءوز كۇشتەرىنە سۇيەنىپ تالپىنسا، قوعامنان وزدەرى كىرپىش بولىپ قالانار ورىن تابىلادى. «ەڭبەك ەتسەڭ ەرىنبەي، تويادى قارنىڭ تىلەنبەي» دەگەن ەمەس پە دانا حالقىمىز، ەڭبەكپەن عانا كوگەرەمىز، كوكتەيمىز. وزگەگە كومەك قولىن سوزۋ، ۇلتىنا، باسقا بوگەنايىنا قاراماي، ادامگەرشىلىك جاساۋ دىلىمىزگە دە دىنمىزگە دە جاقىن. جالپى، قوعامدا جاقسى ادامدار كوبەيسىن دەگىم كەلەدى.
ءتىلشى: راحمەت سىزگە، ءبىز دە ءوزىڭىز سياقتى مەيىرلى جانداردىڭ كوبەيە بەرۋىنە تىلەكتەسپىز.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
