- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
«بۇقارانىڭ جۇمىسىن ءوز جۇمىسىم دەپ بىلەم»
− بۇراتالا قالاسىنىڭ قىستاقتا تۇراقتاپ تۇراتىن كادرى نۇر قازىبەك ۇلى تۋرالى
2014.03.11 16:36 كەلۋ قاينارى : ءتاڭىرتاۋ تورابى
ۇنەمى ەلدىڭ تۇرار جايىن جاقسىلاۋ ءۇشىن ارىپتالاسىپ جۇرەتىن ونىڭ ءوز باسىندا جارتىمدى باسپانا جوق؛ كۇنى كەشكە دەيىن ەلگە قارايلاسۋعا قانجىلىك بولىپ جۇرەتىن ول ءوز ۇيىندە نە بولىپ جاتقانىن سۇرامايتىن؛ وتباسىنداعى 4 جاندى جالعىز ايلىعىمەن اسىراپ وتىرعان ول باسقانى بايىتامىن دەپ باس قاتىرادى... ول بۇراتالا قالالىق قورشاعان ورتانى قورعاۋ مەكەمەسىنىڭ قىزمەتكەرى، قىستاقتا تۇراتىن كادر، توڭىرەگىنە تۇگەل تانىس − نۇر قازىبەك ۇلى.
21 - اقپان نۇر قازىبەك ۇلى سالەم - ساۋقىتقا جەمىس - جيدەك الىپ، بۇراتالا قالاسى چىندەل اۋىلى بۇنحۇنتى قىستاعىنداعى ەڭ تومەنگى تۇرمىسى قامتاماسىزداندىرىلاتىن ايگۇلدىڭ ۇيىنە بارعان كەزدە، ايگۇلدىڭ قىزىپ اۋىرعان قىزىنا سۋ بەرىپ وتىرعانىن كورىپ، بالانىڭ شيەدەي قىزارعان سۇيكىمدى بەتىن سيپاپ تۇرىپ: «شيپاگەرگە اپارساڭ بولماي ما»؟، - دەدى ايگۇلگە. «وتاعاسى سىرتقا كەتكەن، ۇيدە اقشا جوق»!، - دەپ جاۋاپ قاتتى ايگۇل. نۇر ەكى سوزگە كەلمەي بالانى كوتەرىپ ۇيدەن شىقتى.
ايگۇل وتباسىنداعى 5 جان كۇيەۋىنىڭ جالداما جۇمىستان تاپقان تاپاۋاتىمەن كۇنەلتىپ كەلەدى. 2012 - جىلى نۇر قىستاقتا تۇرعان كەزدە ولارعا اۋىق - اۋىق كۇرىش، ۇن، كيىم - كەشەك اپارىپ بەرىپ تۇراتىن. «ازدا بولسا كوڭىلدەرىن اۋلاۋعا سەبىم تيسە دەيمىن»، - دەيدى ول.
قىستاقتا 7 جىلعا جۋىق تۇرعان نۇر ءبىر كەزدەرى قايتىپ كەتپەك بولدى، ءبىراق مۇنداعى جۇرتتىڭ ايرىلىسۋعا قيمايتىن جانارى، جىعىلا جابىسقان سوزدەرى نۇردى ءجىپسىز بايلاي بەردى.
2006 - جىلى نۇر قوسىننان كاسىپ اۋىستىرىپ، بۇراتالا قالالىق قورشاعان ورتانى قورعاۋ مەكەمەسىنە جۇمىسقا تۇردى. جىبەك مىنەز جىگىتتى قىزمەتتەستەرى جۇرەگىن سۋىرىپ بەرۋگە دايىن كوپتىڭ ادامى دەپ بىلەدى. مەكەمەدە جۇمىستىڭ قيىنىنا جۇگىرەتىن ول كىمنىڭ ۇيىندە شارۋا شىقسا، سونىڭ ۇيىنەن تابىلدى. نۇردىڭ قىزمەتتەسى حاسچينگىل: «شىنىن قۋعاندا، ونىڭ ءوز وتباسىنىڭ قيىنشىلىعى دا از ەمەس، ءبىراق ول قاشاندا جايدارى جۇرەدى، - دەيدى.
2007 - جىلى بۇراتالا قالاسى باعىتتامالى كومەكتەسۋ قىزمەتىن باستاعان كەزدە، نۇر بىلەك سىبانىپ سۋىرىلىپ العا شىقتى. بۇراتالا قالالىق پارتكوم ۇيىمداستىرۋ ءبولىمى نەگىزگى ساتى كەڭسەسىنىڭ مەڭگەرۋشىسى ياڭ جيچۇن بىلاي دەيدى: «نۇردىڭ ءتىل جاعىندا ارتىقشىلىعى بار، ونىڭ ۇستىنە بۇقارا قىزمەتىندە ءتيىستى تاجىريبە توپتاعان، جۇرتشىلىق تا وعان سەنىم ارتقان، ول وسىلايشا، جۇمىس ورنىنان ارنايى قىستاققا ءتۇسىرىلدى». 7 جىلدان بەرى، نۇر بۇرىندى - سوڭدى 17 قىستاق - اترەتتە قىزمەتتە بولدى. قيىنشىلىق قىسقان بۇقاراعا كەز بولعان سايىن، ءوز وتباسىنىڭ ءال - اۋقاتى شامالى نۇر كومەگىن اياعان جوق، وزگەنىڭ جانى قىسىلسا، ءوز جانى شىعىپ كەتەردەي قينالاتىن نۇر ولار ءۇشىن قيىنشىلىقتان قۇتقارار جول ىزدەدى.
«نۇر جارالماعان جان عوي، مەنىڭ وتباسىما ۇلكەن كومەك كورسەتتى. وتاعاسىنىڭ كوزىنىڭ تىرىسىندە جارقىراعان جاڭا ۇيدە وتىرۋى سونىڭ ارقاسى!» ، - دەيدى بۇراتالا قالاسى شويىڭپان قالاشىعى جولوك قىستاعىنىڭ تۇرعىنى حى فاڭجى نۇردى اۋىز جاپپاي ماقتاپ. 2013 - جىلى نۇر جولوك قىستاعىندا تۇردى، حۋ سىچاۋدىڭ ۇيىنە بارعاندا، ۇزاق جىل سارتاپ بوپ جاتقان 25 جاستاعى حۋ سىچاۋ وتباسىنىڭ ءال - اۋقاتىنىڭ تومەن ەكەنىن، جىعىلعان ۇستىنە جۇدىرىق دەگەندەي، حۋ سىچاۋدىڭ ايەلى مەن بالاسىنىڭ كوزى ناشارلاپ كەتكەنىن كورىپ قابىرعاسى قايىستى. نۇر ولارعا شاماسىنىڭ كەلگەنشە كومەكتەسۋدى بورىشىم دەپ ءبىلدى. ازىق - تۇلىك، ۇن - ماي ساتىپ اپەردى، جان - جاققا شاپقىلاپ جىلۋ جينادى، تالاي باستىقتىڭ ەسىگىن توزدىردى، نىسان قارايلاستىرىپ ابىگەر بولدى. بىرنەشە اي بويى ارىپتالاسۋدىڭ ناتيجەسىندە، حۋ سىچاۋ وتباسى ءۇشىن 3000 يۋان جىلۋ جيناپ بەرىپ، جەر سىلكىنىسىنە ءتوزىمدى 60 شارشى مەترلىك بەيقۇت ۇيگە كوشىردى، سونداي - اق ەڭ تومەنگى تۇرمىسىن قامتاماسىز ەتتى.
مۇنداي ىستەر وتە كوپ. كوپ بولعانى سونشا، مۇنىڭ ءبارى مەن ىستەۋگە ءتيىستى ىستەر دەپ سانايتىن نۇر سانامالاپ ايتىپ جاتۋدىڭ ءوزىن ارتىق دەپ بىلەدى.
تىلشىلىك بارىسىندا مەن نۇرعا ىلەسىپ ۇيىنە بارىپ قايتتىم. ەسىكتەن كىرە بەرە، 3 جاسار كىشى قىزىن كىلەمنەن كوتەرىپ الا بەرە، بەتىنەن شوپىلداتىپ سۇيە جونەلدى، سۇيكىمدى ءسابي دە اكەسىنىڭ ەركەلەتۋىن كۇتكەندەي سىقىلىقتاپ قويا بەردى. «ۇيگە قايتپاعالى ۇزاق بولدى، بالامدى ساعىنىپ كەتىپپىن، ۇيدەگىلەردىڭ الدىندا دا قىرىمنان قىسىلامىن»، - دەدى نۇر كۇرسىنىپ.
مەن اينالاعا ءساپ سالدىم، ءۇي ءىشى تىم قاراپايىم ءبىلىندى. نۇردىڭ وتباسىنداعى 4 جان ءالى كۇنگە قايىن اپاسىنىڭ ۇيىندە تۇرادى ەكەن. «قىستاقتا تۇرعان باسقى بىرنەشە جىلدا، كەلىنشەگىم ءوز مەكەمەڭە قايتىپ كەل دەپ تالاي ايتتى. مەن ونى ءوزىم تۇرعان قىستاققا ەرتىپ بارىپ، ىستەگەن قىزمەتىمدى كورسەتتىم. قىستاقتاعىلاردىڭ ماعان دەگەن ىستىق ىقىلاسى جانە ءبىزدىڭ بۇقارا ءۇشىن ىستەگەن ىستەرىمىز ءۇشىن ول دا ماقتانىشقا بولەندى، سويتە - سويتە مەنىڭ قىزمەتىمدى كەلىنشەگىم دە قولداي باستادى».
اڭگىمە اراسىندا نۇر قىزمەت ەستەلىگىنىڭ بىرنەشە بەتىن كورسەتتى، ەستەلىك جىپىرلاتىپ قويىلعان قولدارعا تولىپتى. شاۋرتاي 2 - قىستاعىنىڭ تۇرعىندارى نۇردىڭ باسقا قىزمەت گرۋپپاسىنا اۋىستىرىلاتىنىن ەستىپ، نۇردى الىپ قالۋ تۋرالى قىزمەت گرۋپپاسىنا بىرلەسىپ حات جازىپتى. نۇر: «مەن بىردەڭە تىندىردىم دەپ ويلامايمىن، بۇقارا ءۇشىن زىر جۇگىرىپ، ۇشىراعان قيىنشىلىقتارىن شەشۋدىڭ جولدارىن قاراستىرىپ، بۇقارانىڭ جۇمىسىن ءوز جۇمىسىما بالادىم، بار بولعانى وسى. جۇرتشىلىقتىڭ ماعان سونشالىق سەنگەنىنە شۇكىر دەيمىن»، - دەدى نۇر بىلاي دەيدى: قىستاقتا تۇرعان 7 جىلدا مەن بۇقارادان قاراپايىمدىلىق پەن ىزگىلىكتى ۇيرەندىم، وسىنداي قاراپايىمدىلىق پەن ىزگىلىكتى جانە بۇقارانىڭ ماعان دەگەن سەنىمىن ايناعا بالاپ، قىزمەتتى ونان ارى جاقسى ىستەۋىمە جەبەۋشى ەتىپ وتىردىم. «شينجياڭ گازەتى»
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
