بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>قوعام

بازاردا وزىندىك باسىرەمىز بار

بۋىرشىن اۋداندىق ايەلدەر بىرلەستىگىنىڭ پارتگۇرپپا شۋجيى، ءتورايىمى نازيگۇل نۇرمۇقامەت قىزىمەن سۇحبات

سۇحباتتاسقان: دۋمان سايدە ۇلى (بۋىرشىن اۋداندىق پارتكوم ۇگىت ءبولىمى)

2014.03.13 14:14   كەلۋ قاينارى : حالىق تورابى



  سۋرەتتە: التاي ايماقتىق پارتكومىنىڭ شۋجيى دىڭ جاڭ ۋ سەرىكتىك، كوپەراتيۆ جاۋاپتىلارىمەن بىرگە

  دۋمان سايدە ۇلى:

  بۋىرشىن اۋدانىنداعى جەلەكتىلەر وزدەرىنىڭ قۇلشىنىستارى ارقىلى «جارتى الەمدىك» رولدارىن ساۋلەلەندىرىپ، بيىكتەردەن بوي كورسەتۋدە. بۇعان اۋدانداعى ارت-ارتىنان قۇرىلىپ، كاسىپ جولىن اشقان قولونەر كەستەشىلىك كوپەراتيۆ، سەرىكتىكتەرى كۋا. سىزدەر جاۋاپتى تاراۋ تۇرعىسىنان ايەلدەر قاۋىمىنىڭ تىڭ كاسىپتىڭ تىزگىنىن ۇستاپ، قيانكەسكى بازار باسەكەسىندە ءوز ورىنىن تىكتەۋدە قانداي تۇرتكىلىك جۇمىستار ىستەدىڭىزدەر؟

  نازيگۇل نۇرمۇقامەت قىزى:

  بۇگىنگى كۇنى پارتيامىز دارىپتەپ وتىرعانداي، داۋىرمەن بىرگە العا باسۋ ــ زامان تالابى. ايەلدەردىڭ «وت باسى، وشاق قاسىندا» بولاتىن ءداۋىرى كەلمەسكە كەتەرى ءسوزسىز. ءبىز اۋدانىمىزداعى ايەلدەردى ءوز كۇشىنە سۇيەنىپ شارۋاشىلىق قۇرۋعا باستاۋ قىزمەتىن جۋىق جىلداردان بەرى ايەلدەر بىرلەستىگى قىزمەتىنىڭ ماڭىزدى كۇنتارتىبىنە الىپ، ءتۇرلى جولدارمەن جەلەكتىلەرىمىزدىڭ قوعامدا ءوز رولدارىن ساۋلەلەندىرۋلەرىنە وراي جاراتتىق. مۇندا اسىرەسە اۋىل-قىستاقتاعى، قالاشىقتارداعى كاسىپ ىستەۋگە قۇلىقتى ايەلدەر قاۋىمىنىڭ كاسىپ جاراتۋىن قولداۋدى ءتۇيىن ەتىپ، كورنەكتى ونىمدىلىككە قول جەتكىزدىك. ولاردىڭ شاعىن سەلبەستىك قوعامدارىن قۇرۋ، شارت-جاعدايى پىسىپ جەتىلگەندەرىن دامىتىپ قولونەر كەستەشىلىك كوپەراتيۆ، سەرىكتىكتەرىنە اينالدىرۋ، زامان دامۋىنا ساي شارۋاشىلىق تاسىلىنە وزگەرىس ەنگىزىپ، داۋىرمەن بىرگە العا باسۋعا قوزعاۋشى بولدىق. مۇنداي كوپەراتيۆ، سەلبەستىك تۇزىمىندەگى شارۋاشىلىق ءتۇرى ۇيىمدى ىستەلەتىندىكتەن، بۇرىنعى ءار كىم ءوز الدىنا ىستەيتىن، كولەمى شاعىن، بازارى بىتىراڭقى جاعدايعا قاراعاندا سەلبەستىك ۇيىم ارقىلى جۇمىس جۇرگىزۋ ونىمدەردى سانعا، ساپاعا كەپىلدىك ەتىپ بازارعا شىعارۋدا، تانىمالىلىقتى ارتتىرۋدا شىنايى قاجەتتى تالاپتان شىقتى. سەرىكتىك پايدالانىلاتىن ماتەريالدى ءبىر تۇتاس تولايىم ەنگىزەتىندىكتەن باعا ىلايىقتى بولۋمەن بىرگە ساپاعا كەپىلدىك ەتىپ،ءارى شەبەرحانادا ىستەيتىندەر بۇيىمداردى ساتىپ شىعارۋدان الاڭدامايدى. قولونەر بۇيىمدار سەلبەستىك ۇيىم ارقىلى ءبىر تۇتاس ساۋداعا ءتۇسىپ، شەبەرلەر ەڭبەگىنە قاراي اقى الادى. مۇندا ايىنا تۇراقتى اقىعا كەپىلدىك ەتىلەتىندىكتەن ەڭبەكشىلەردىڭ بەلسەندىلىگى دە ساۋلەلەندى. ءبىزدىڭ كەستەشىلىك قولونەر كوپەراتيۆ سەرىكتىكتەرىمىز مۇنداعى تۇراقتى ىستەپ كەلگەن شەبەرلەردى «ءۇش قامسىزداندىرۋعا» قاتىناستىرىپ وتىر. تەك شەبەر قوس قولىنا سۇيەنىپ، ونەرىن ساۋلەلەندىرە السا الارى دا كوپ. كوز مايىن تاۋىسىپ ەڭبەكتەنگەندەر اشتى تەرىنىڭ ءتاتتى جەمىسىن كورە الادى.

  دۋمان سايدە ۇلى:

  شيىنجاڭ ايەلدەرىنىڭ «سۇلۋلىق ينجەنەرياسى» اتقارىلعالى بۋىرشىنداعى جەلەكتىلەردىڭ دە تيىمدىلىكتەن ۇتىمدى پايدالانىپ قىسقا جىپ كۇرمەۋگە كەلمەيتىن كەزبەن سالىستىرعاندا كەڭ قامتىپ ويىنداعىسىن ورىنداۋعا قۇلشىنعاندارىنا كۋا بولدىق. «سۇلۋلىق ينجەنەرياسى» ايەلدەر قاۋىمنا قانداي تيىمدىلىكتەر الا كەلدى؟ وبيەكتى قارجىسىن قالاي پايدالاندىڭىزدار؟

  نازيگۇل نۇرمۇقامەت قىزى:

  ءبىزدىڭ قولونەر كەستەشىلىك كوپەراتيۆتەرىمىزدەگى جۇمىسكەرلەردىڭ كوبى نەگىزىنەن اۋىل-قىستاقتاعى سەميا ايەلدەرى. ياعني ارتىق ەڭبەككۇشتەر، مالشىلاردى وتىرىقتاستىرۋ ورىندارىنداعى شەبەر ايەلدەر. راسىندا وڭ قولىنان ونەر تامعان ەڭبەكشىل قازاق ايەلدەرىنىڭ بۇگىنگى بازار باسەكەسىنەن الار باسىرەسى از ەمەس. تەك قالاي ىستەپ، بازاردى قالاي باعامداۋدا جاتىر. رايونىمىزدا 2011-جىلدان باستاپ «سۇلۋلىق ينجەرياسى» اتقارىلعالى ارمانى بار دارمەنى جوق، ەكونوميكالىق جاقتان قولداۋدى قاجەت ەتەتىن تالايلاعان اپەكە-سىڭىلىلەردىڭ تىڭنان كاسىپ اشۋىنا، كاسىپ ارناسىن كەڭەتۋىنە تۇرتكى بولدى.

  اۋدانىمىز 2013-جىلى اۆتونوميالى رايون بويىنشا «سۇلۋلىق يەنجەنەرياسى» بويىنشا ايەلدەردى كاسىپتەندىرۋدىڭ ۇلگى بازاسى بولىپ قۇرىلىپ، 800 مىڭ يۋان وبيەكتى قارجىسىن قولعا كەلتىرىپ، جەلەكتىلەردىڭ تىڭنان كاسىپ جاراتۋىنا، شارۋاشىلىقتارىن كەڭەيتۋىنە كەڭ جول اشتى. سونىمەن بىرگە 2011-جىلدان بەرى ءوسىمىن ورتالىق قازىنا كوتەرەتىن تومەن ءوسىمدى شاعىن قارىز سومادان 760ميليون 55 مىڭ يۋان تاراتىلىپ، بۇدان 1084 ادام يگىلىكتەندى.. وسى كومەك سومالاردىڭ ارقاسىندا كوپتەگەن جەلەكتىلەر تىڭنان كاسىپ كوزىن اشىپ، تىڭ تىرشىلىك جولدارىن باستادى. قازىرگە دەيىن بۋىرشىن اۋدانىندا تەك كەستەشىلىك، قولونەر كاسبىمەن شۇعىلداناتىن 2 سەرىكتىك، 12 سەلبەستىك كوپەراتيۆ وسى ينجەنەريالادىڭ قولداۋىندا كاسىبىن ارناعا تۇسىردى.

  بۋىرشىن اۋدانىندا بىلتىر بۋىرشىن سۇلۋ شوقى ۇلتتىق سالت-سانا بۇيىمدار ساۋدا سەرىكتىگى، ليدا پەرۋاي قولونەر اسەمدىك بۇيىمدار شەكتى سەرىكتىگى قاتارلى ەكى سەرىكتىك زاڭدى تۇردە تىزىمگە الىنىپ رەسمي قۇرىلعان بولاتىن. مۇندا، جۇيەلى ءتۇزىم-ءتارتىپ بەلگىلەپ، باسقارۋدى كەمەلدەندىرىپ، ىشكى جاعىندا مىندەت جاۋاپكەرشىلىگىن ايقىنداعاندىقتان ونىمدەردىڭ ءىسى كوركەم، ساپاسى جاقسى، الارماننىڭ كوڭىلىنەن شىعاتىنداي بولۋىنا كەپىلدىك ەتىلدى. وسىندا سىرتتان، اۋىلداردان كەلىپ جۇمىس ىستەيتىن شەبەرلەردىڭ تۇرمىسىنا قولايلىلىق جاراتۋ ءۇشىن سۇلۋ شوقى ۇلتتىق سالت-سانالىق بۇيىمدار ساۋدا سەرىكتىگى ولاردىڭ جاتىن ورىن، تاماعىن ءبىر تۇتاس ورنالاستىرىپ، كاسىپكەرلەردىڭ الاڭسىز كاسىپپەن اينالىسۋىنا شارت-جاعداي جاراتتى. ەڭبەگىنە قاراي اقى بەرۋ شەبەرلەردى ءوز ونەرلەرىن تولىق ساۋلەلەندىرۋىپ، كىرىستەرىن مولايتۋعا شابىتتاندىردى.

  اۋداندىق پارتكوم مەن ۇكىمەت اۋدان قالاشىعى ورتالىعىنداعى كەستەشىلىك قولونەر سەرىكتىك، كوپەراتيۆتەرىنە بۋىرشىن اۋدان قالاشىعى ورتالىعىنان ءۇش قاباتتىق جۇمىس ورىن بيناسىن سايكەستىرىپ، پار اقى، توك اقى قاتارلى اقى تۇرلەرىن دە ۇكىمەتتىڭ قولداۋ كولەمىنە الىپ، تەگىن پايدالانۋعا بەرىپ، بۇل ورىندى اۋداننىڭ ارتىق ەڭبەككۇشتى باسقا سالاعا ويىستىرۋداعى ۇلگى بازا ەتىپ ۇستادى. اۆتونوميالى رايوندىق، ايماقتىق ايەلدەر بىرلەستىگىنىڭ، قاتىستى ورىن تاراۋلادىڭ قولداۋىندا بۇل بازا وتكەن جىلى اۆتونوميالى رايون بويىنشا اۋدان دارەجەلى ءتورت ۇلگى كورسەتۋ بازاسىنىڭ ءبىرى ءارى ايماق بويىنشا دا وسى وبيەكتىگە كىرگەن بىردەن-ءبىر اۋدان بولدى.

  دۋمان سايدە ۇلى:

  رايونىمىز ءىشى-سىرتىنداعى كولەمدى كورمە، ساۋدا جارمەنكەلەرىنەن بۋىرشىن اۋدانىنداعى جەلەكتىلەردىڭ توبەسىن ءجيى كورەمىز. ءسىزدەر قانداي كولەمدى ساۋدا تەكشەلەرىنەن پايدالانىپ كەلدىڭىزدەر؟ بۇل قانداي رول اتقارپ وتىر؟

  نازيگۇل نۇرمۇقامەت قىزى:

  قازاق «كوپ جاساعاننان سۇراما، كوپتى كورگەننەن سۇرا» دەيدى ەكەن. بۇل كورىپ كوز ايانى كەڭەيتۋدىڭ قانشالىقتى ماڭىز الاتىندىعىن تۇسىندىرسە كەرەك. ءبىز اۋدانىمىزداعى كاسىپ ىستەگەن جەلەكتىلەردى سىرت جەرلەردىڭ وزىق تاجىريبەسىنەن ۇيرەنۋدى كاسىپتى دامىتۋدىڭ، جاڭالىق جاراتۋدىڭ العى شارتى رەتىندە قاراپ ءار كەز وتكىزىلىپ وتىرعان ۇلكەندى-كىشىلى كورمە قيمىلدارىنا قاتىناستىرۋعا بەلسەنە ۇيىمداستىرىپ وتىردىق. ايتالىق رايونىمىز ورتالىعى ءۇرىمجى قالاسىندا وتكىزىلىپ كەلە جاتقان جۇڭگو ازيا- ەۆروپا كورمەسىنە ءار جىلى ۇيىرمە ۇيىمداستىرىپ، قاتىناستىرىپ وتىردىق. بۇدان باسقا دا كورمە، ساتۋ قيمىلدارىن بارىنشا قاعىس قالدىرماۋعا تىرىستىق. وتكەن جىلعى شينجياڭ 2-كەزەكتى كيىم-كەشەك كورمەسىنە قاتىناسقان ونەرپاز اپەكە-سىڭىلىلەردىڭ قولىنان شىققان شەبەر كيىم-كەشەكتەر كاسىپتىك مامانداردىڭ جوعارى باعاسىن الدى. ىلە وبلىستىق 17-اقىندار ايتىسىندا بۋىرشىن سۇلۋ شوقى ۇلتتىق سالت-سانالىق بۇيىمدار ساۋدا سەرىكتىگى التاي ايماعى اتىنان قاتىناسىپ ۇلتتىق كيىم-كەشەك تۇرىنەن 1-دارەجەلى سيلىق الدى. وتكەن جىلى بۋىرشىن اۋدانىنىڭ شۇڭقىر قالاشىعىندا وتكىزىلگەن التاي ايماعىنىڭ توڭعىش كەزەكتى ايگىلى ونىمدەر ساۋدا ساتتىق كورمەسىندە بۋىرشىن اۋدانىنىڭ ساياحات كەستە بۇيىمدارى كورمەنىڭ كەلبەتىن اسىرىپ، قوماقتى ساۋدا توقتامدارىن قولعا كەلتىردى. التاي ايماعىنىڭ بۋىرشىن اۋدانىنىڭ اقكۇنگەيتى ساحاراسىندا وتكەن 18-كەزەكتى اقىندار ايتسىندا بۋىرشىن اۋدانى شۇڭقىر قالاشىعىنداعى جاينا قازاق كەستەشىلىك كوپەراتيۆىنىڭ ۇلتتىق كيىم-كەشەگى وسى تۇردەگى باسەكەدە 1-دارەجەلى بولىپ، ءار ۇلت بۇقاراسىنا بۋىرشىنداعى ون ساۋساعىنان ونەر تامعان شەبەر قازاق ايەلدەرىنىڭ ونەرىن ءبىر قىرىنان جاريا ەتتى. نەشە رەت ايماق ۇيىمداستىرعان قازاقسىتان وسكەمەن قالاسىندا وتكەن دوستىق جارمەنكەگە بۋىرشىن اۋدانىنداعى شەبەرلەر ەل اتتاپ قاتىناسىپ كەلدى. بۇل ايەلدەر قاۋىمىنا ۇلكەن شابىتتاندىرۋ بولدى.

  قولونەر، كەستەشىلىك سەرىكتىگىنىڭ جاۋاپتىلارى مەن شەبەرلەرىمىز جارمەڭكە، كورمە قيمىلدارىنا قاتىناسۋ ارقىلى كوز ايالارى كەڭەيىپ، تاجىريبە قابىلداپ، بازار قاجەتىن باعامداپ، الارماننىڭ قاجەتىن تانىپ، ونىمدەرىنە ءتىپتى دە كەڭ بازار اشۋعا جول تاپتى. وي قورتىپ قايتتى. زاكاز قابىلدادى. ساۋدا سەرىك تاپتى. وسى ارقىلى وزدەرىنىڭ دە تانىمالىلىعىن ارتتىردى. ءبىز ۇلكەندى-كىشىلى كورمەلەرگە ارناۋلى ۇيىرمە ۇيىمداستىرىپ، بولماسا جەكە كاسىپكەرلەردى جىبەرىپ قاتىناستىرۋىمىزدىڭ ءوزى ءوزىمىزدى ۇگىتتەۋ ءارى توقتامعا وتىرۋ، زاكاز قابىلداۋ، مۇنىڭ ءونىمىن دە كوردىك. اۋداندا ءتۇرلى ءتيىمدى شارت-جاعداي جاراتىپ قولداپ-قۋاتتادى.

  دۋمان سايدە ۇلى:

  ماركا قازىر ءونىمىنىڭ بازاردا تابان تىرەپ تۇرۋىندا ماڭىزدى رول اتقارۋدا. سىزدەر ءونىم جاراتۋمەن بىرگە وعان ماركا الۋ، ماركانىڭ تانىمالىلىعىن ارتتىرۋدا قانداي جۇمىستار ىستەدىڭىزدەر؟

  نازيگۇل نۇرمۇقامەت قىزى:

  بۋىرشىن اۋدانى ءىرى ساياحات اۋدانى. ايگىلى قاناس كورىنىس رايونى بۋىرشىن اۋدانىندا. قاناسقا جول العان ساياحاتشىلار بۋىرشىندى اتتاپ وتە المايدى. قاناس ءبىزدىڭ باس ماركامىز. ءبىز ونىمدەرىمىزدى قاناس ماركاسىمەن بازارعا شىعارساق تانىمالىلىعى ارتىپ، بازارى دا كەڭ بولادى. قازىر قاناس ماركاسىنىڭ يگىلىگىن العاشقى ادىمدا كورە باستادىق. اسىرەسە ساياحات ەستەلىك بازارىندا قاناس ماركاسى ارقىلى ساتىلىم بازارىن كەڭەيتۋگە بولادى. وسى ارقىلى ساياحاتشىلاردىڭ جەرلىك ەرەكشە ونىمدەرگە بولعان قاجەتىن قاناعاتتاندىرۋمەن بىرگە جەلەكتىلەرىمىزدىڭ دە قالتاسىن قالىڭداتىپ قوس ونىمدىلىككە جەتكىزگە بولادى. اۋدانىمىزدا «قاناس»، «ءداستۇر» قاتارلى ۇلتتىق كەستەشىلىك، ساياحات قولونەر بۇيىمدارىنىڭ تانىمالى ماركالارى بار. الايدا، ءبىزدىڭ ءىسىمىز ءالى دە جىڭىشكە ەمەس. ساياحاتشىلاردىڭ، الارماننىڭ تالابىنان ءالى دە الشاق جاتىر. ءبىزدىڭ كەستەشىلىك قولونەر بۇيىمدارىنىڭ ءتۇرى 300دەن استام، وسىنىڭ 30 نەشەسىنە مەملەكەتتىك پاتەنت ۇقىعى الىندى. ءبىز قوراپتاپ بازارعا شىعارىلاتىن ساياحات بۇيىمدارىنىڭ سىرتقى قورابىنا ءونىمنىڭ تۇسىندىرمەسىن قوسىپ شىعارىپ، ساياحاتشىلاردىڭ الىپ جۇرۋىنە قولايلى ەتىپ جوبالاۋدى جوسپارلاپ وتىرمىز. ونىمدەردى قوراپتاپ بازارعا سالسا باعاسى، ساتىلىمى ءبار-بارى قوراپتالماي بازارلانعانعا قاراعاندا جوعارى بولىپ، الارماندى دا باۋراي الادى ەكەن. ۇلتتىق ءداستۇرلى ونىمدەرىمىزدى جاڭا زامان مادەنيەتىمەن ۇشتاستىرا دامىتا الساق ساۋداداعى تار شەڭبەردى بۇزىپ، الارمان اياسىن كەڭەيتىپ، ونىمدەرىمىزدى ەل ءىشى-سىرتى بازارىنا دا شىعارا الامىز.

  دۋمان سايدە ۇلى:

  ۇلتتىق بۇيىمدارىمىزدىڭ ۇگىتتەلۋ جاعدايى قانداي؟ مۇنىڭ بازارمەن قانداي قاتىناسى بار دەپ بىلەسىز؟

  نازيگۇل نۇرمۇقامەت قىزى:

  ونىمدەردى ۇگىتتەۋىمىز ءالى دە كەمشىل. باسقاسىن ايتپاعاندا ءبىزدىڭ جەرلىك ۇلتتىق ونىمدەر، ساياحات بۇيىمدارىمىز بۋىرشىنداعى قوم-قاناس، اقكۇنگەيتى قازاق سالت-سانا مادەنيەت باقشاسى، اقتۇبەك كەرىشتى كەمەر كورىنىس ورىنى قاتارلى بۋىرشىنداعى ساياحات تۇيىندەرىندە دە ويداعىداي ۇگىتتەلمەي، ول ورىنداردا ارناۋلى ساتۋ تەكشەسى ارقىلى ساتىلماي وتىر. وتكەندە بۋىرشىن اۋدانىنىڭ قالتون جايلاۋىنا ىرگە تەپكەن قاناس اۋەجايىندا بولعانىمدا ونداعى جولاۋشى كۇتۋ زالىنا قويىلعان ءتۇرلى ۇگىت ونىمدەرىنىڭ ىشىندە بۋىرشىنداعى جەرلىك ونىمدەر، ءتىپتى قازاقى ايگىلى ونىمدەر جوق ەكەن. قاناس اۋەجايى جاز مەزگىلىندە جوعارى ورەدەگى تۇتىنۋشىلاردى قابىلدايتىن ورىن. ىرگەمىزدەگى ۇگىت تەكشەسىنەن پايدالانا الماۋىمىز، ءمان بەرمەۋىمىز ءبىزدىڭ ونىمدەردىڭ ۇگىتىنىڭ قانشالىق دارەجەدە ەكەنىن كورسەتەدى.

  دۋمان سايدە ۇلى:

  بۋىرشىن اۋدانى شيىنجياڭداعى ءىرى مال شارۋاشىلىق اۋدانداردىڭ ءبىرى. قۇرت، ىرىمشىك، سارى ماي قاتارلى تانىمالى ونىمدەرىمىز بار. قازاق ايەلدەرىنىڭ جاسامپازدىعىنىڭ، قاجىرلى ەڭبەگىنىڭ كۋاسى بولعان مال شارۋاشىلىق ونىمدەرىنىڭ مانەرلەنۋ، بازارلانۋ جاعىندا قانداي جۇمىستار قولعا الىندى؟ وسى تۋرالى دا ايتا كەتسەڭىز؟.

  نازيگۇل نۇرمۇقامەت قىزى:

  جاقىنعى جىلداردان بەرى ءبىز ەت، ءسۇت ونىمدەرىن دە مانەرلەپ بازارعا شىعارۋعا كۇش سالىپ، قولداۋ تەبىنىن ارتتىردىق. شۇڭقىر قالاشىعى جاڭا جەر قىستاعىنداعى جاڭادان شاڭىراق كوتەرگەن «اقباستاۋ» ءسۇت ونىمدەرىن مانەرلەۋ كوپەراتيۆىنە ايەلدەر بىرلەستىگىىمىز 15 مىڭ يۋاندىق قۇنعا يە قوراپتاۋ ماشيناسىن بەرىپ، كوپەراتيۆ جۇمىسىنا قولداۋ كورسەتتىك. قازىر «اقباستاۋ» ماركاسىنداعى قۇرت، ىرىمشىك، سارى ماي قاتارلى ونىمدەر الارمان تالعامىنان شىعىپ وتىر. الدا «اقباستاۋ» كوپەراتيۆى ونىمدەردىڭ ءتۇرىن مولايتۋ، قوراپتاۋ ساپاسىن جوعارلاتۋ ءتىپتى دە كوپ الارماننىڭ قاجەتىن قاناعاتتاندىرۋعا قۇلشىنۋدا.

  ءبىز الداعى جەردە اۋدانىمىزداعى ءار ۇلت ايەلدەرىن ەڭبەكشىل قوس قولدارىمەن، اقىل-پاراساتىمەن باسەكەگە تولى بازاردا تابان تىرەپ، ءوز ورىندارى تىكتەپ، سان سالالى شارۋاشىلىقپەن شۇعىلدانۋعا باستاپ، بۋىرشىن اۋدانىنىڭ جاراسىمدى دامۋىنا ۇلەس قوسۋعا ورتاق كۇش سالامىز.

  كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

 سۋرەت