بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى>>قوعام

كەستەشىلىك كووپەراتيۆى جۇرتتى جۇمىلدىردى

 حان چينيان

2015.10.13 10:51     كەلۋ قاينارى : ءتاڭىرتاۋ تورابى

  تۇيەشى قىستاعىنىڭ كەستەشىلىك كووپەراتيۆىنە بارعانىمىزدا، كەستەشىلەردىڭ تىگىن ماشيناسىن دۇرىلدەتىپ، ءتۇرلى تاپسىرىستاردى ۋاعىندا ورىنداۋعا بىلەك سىبانا كىرىسىپ كەتكەنىن كوردىك.

  «وتباسىندا ومالماي، ەكى قولعا ءبىر جۇمىس تاۋىپ ىستەۋىمىز قىستاقتا تۇراتىن قىزمەت گرۋپپاسىنىڭ ەڭبەگى، قىزمەت گرۋپپاسى بىزگە سەنىم بەردى»، - دەدى نيازحان كۇلىپ.

  35 جاستاعى نيازحان − كەستەشىلىك كووپەراتيۆىنىڭ جەتەكشىسى. ون ساۋساعىنان ونەر تامعان تىگىنشى كەلىنشەك بۇرىن دا كەستەشىلىكتى سەرىك ەتكەن، ءبىراق وتباسىنداعى ەڭبەكتىڭ تابىسى ماندىماعان ەدى. وتكەن جىلدىڭ اياعىندا، اۆتونوميالى رايوندىق ءتارتىپ تەكسەرۋ كوميتەتىنىڭ قىستاقتاعى قىزمەت گرۋپپاسى 150 نەشە قىز - كەلىنشەكتى كەستەشىلىك ونەرى بويىنشا ارناۋلى كۋرسقا ۇيىمداستىرادى. ىزىنشە، قىرعىزدىڭ كەستەشىلىك داستۇرىنە قانىق قىز - كەلىنشەكتەر ىركەس - تىركەس كەستەشىلىك كووپەراتيۆىنە قوسىلادى.

  «قۇربىلاستار كۇنىنە باس قوسىپ، ونەر اۋىسىپ، اقشا تابامىز، اڭگىمەنىڭ دە كورىگىن قىزدىرىپ، كوڭىلىمىز كوتەرىلىپ قالادى»، - دەدى نيازحان.

  قىستاقتاعى ايەلدەر قاۋىمىنىڭ اۋقاتتانۋعا دەگەن ىنتا - ىقىلاسىن تانىعان اۆتونوميالى رايوندىق ءتارتىپ تەكسەرۋ كوميتەتىنىڭ تۇيەشى قىستاعىندا تۇراتىن قىزمەت گرۋپپاسىنىڭ باستىعى اسيا اسەن بالاشا قۋانىپ: سىزدەر ءبىلىم الۋ مەن جۇمىس ىستەۋگە بەل بايلاساڭىزدار، قىزمەت گرۋپپاسى سىزدەر ءۇشىن دانەكەر بولۋعا دايىن، - دەيدى.

  قازىر، جەرگىلىكتى ۇكىمەت پەن قىستاقتا تۇراتىن قىزمەت گرۋپپاسىنىڭ كومەگىمەن، كووپەراتيۆتەگى كەستەشىلەردىڭ ونىمدەرى اۋدان قالاشىعىندا ساتىلۋمەن بىرگە، قاشقار ورتا - وڭتۇستىك ازيا تاۋار جارمەڭكەسىندە كورمەگە قويىلدى.

  قىرعىزدىڭ ءداستۇرلى كەستەلەرى مەن كيىمدەرىنىڭ بازارعا بەت العانىن كورگەندە، كەستەشىلەر تاڭداي قاعىپ: بۇرىن بالا باعىپ، ءۇي شارۋاسىنا قاراۋدان اسا الماعان ەكەنبىز، قازىر اقشا تاۋىپ، ءومىرىمىزدى تۇرلەندىردىك، - دەدى.

  «مەيىرىمدىلىك وتاۋىنان» جاڭا اياق كيىم الدى

  بيىل 28 - ساۋىردە اۆتونوميالى رايوندىق ءتارتىپ تەكسەرۋ كوميتەتىنىڭ تۇيەشى قىستاعىندا تۇراتىن قىزمەت گرۋپپاسىنداعىلار قىستاق كوميتەتىندە «مەيىرىمدىلىك وتاۋىن» قۇرعان ءبىرىنشى كۇنى العاشقى توپتاعى جىلۋعا اتالعان جاڭا اياق كيىمدى تاراتتى. قىزمەت گرۋپپاسى وتباسىلارىن ارالاپ، احۋال ۇعىسۋ بارىسىندا، قىستاق تۇرعىندارىنىڭ كوبىنىڭ اتىزدا ۇزاق ۋاقىت جۇمىس ىستەپ، اياق كيىمدەرىنىڭ توزىعى شىققانىن بايقايدى، سونىمەن ولار اقىلداسا كەلىپ، «جاڭا اياق كيىم ارمانى» الەۋمەتتىك يگىلىك قيمىلىن ورىستەتىپ، قىستاقتاعى بارلىق ادامدا جاڭا اياق كيىم بولۋىنا مۇمكىندىك جاساۋدى ۇيعاردى.

  قىزمەت گرۋپپاسىنداعىلار قىستاق تۇرعىندارىنىڭ تۇرمىس جاعدايىن سۋرەتكە ءتۇسىرىپ، ونى جيناقتاپ، QQ توبىنا، دوستار شەڭبەرىنە تاراتىپ، جىلۋ جيۋ قيمىلىن ۇيىمداستىرادى.

  ءبىر ايدان استام ۋاقىت قۇلشىنۋ ارقىلى، قوعامنىڭ ءار سالاسىنداعىلاردىڭ، جاقىن دوستاردىڭ ىستىق ىقىلاستى كومەگىندە، العاشقى توپتاعى 23 ءتۇرلى ۇلگىدەگى 2500 جۇپ اياق كيىم قىستاققا جولدانىپ، ءار ادامنىڭ ۇلەسىنە ءبىر جۇپ اياق كيىمنەن تيەدى.

  جارتى جىلدان استام ۋاقىتتان بەرى، «مەيىر باعىشتاۋ» اتىنداعى جىلۋ جيۋ قيمىلى ۇزبەي ورىستەتىلىپ، قوعامنىڭ ءار سالاسىنداعىلار جان - جاقتان اتاعان كيىم - كەشەك، كىتاپ، ويىنشىق سىندى زاتتار ىركەس - تىركەس كەلىپ تۇردى. اسيا: بارلىق جىلۋعا اتاعان زاتتاردى «مەيىرىمدىلىك وتاۋى» تاراتادى، مەيىرىمدىلىكتى «حالىقتىڭ جاعدايىن ۇعىسۋ، حالىق تۇرمىسىنا تيىمدىلىك جاساۋ، حالىقتىڭ تىلەگىن توعىستىرۋ» قيمىلىنىڭ جالپى بارىسىنا سىڭىرەمىز، - دەدى.

  بارلىق وتباسىنا جاڭعاق قالامشاسى تاراتىلدى

  ءوسىپ كەلە جاتقان جاڭعاق قالامشاسىنا قاراپ تۇرعان قىستاق تۇرعىنى ما مۋشي: جاڭعاق اعاشى جەمىس بەرسە، ءبىزدىڭ تابىس كوزىمىزگە اينالادى، - دەدى جۇزىنە كۇلكى ۇيىرىلە.

  تۇيەشى قىستاعىنداعىلار 1999 - جىلى تاۋدان ەتەككە كوشىپ تۇسكەن، قىستاقتاعىلاردىڭ كوپ ساندىسى بۇرىندارى مالشى ەدى. تاياۋ جىلدان بەرى، ۇكىمەتتىڭ قامقورلىعى مەن كومەگىندە، ولار ءبيداي، جۇگەرى، كۇرىش ەگۋمەن شۇعىلدانا باستادى، سونداي - اق باعىمشىلىق كاسىبىن دامىتتى، قىستاق تۇرعىندارىنىڭ %80ى كەدەي وتباسى بولاتىن. قىستاق تۇرعىندارىنىڭ كەدەيلىكتەن تەز ارادا ارىلۋىنا كومەكتەسۋ ءۇشىن، قىزمەت گرۋپپاسىنداعىلار كوپشىلىكتى جاڭعاق ەگۋگە شابىتتاندىردى، ولار امالىن تاۋىپ سىرت جەرلەردەن 5000 ءتۇپ جاڭعاق قالامشاسىن ساتىپ اكەلىپ، تۇرعىندارعا تەگىن تاراتىپ بەردى.

  قىستاققا اسفالت جول تارتتى، سۋ سىڭبەيتىن توعان سالدى، قىستاق تۇرعىندار كوميتەتى جانە «بالالار باقشاسى» جاڭادان قۇرىلدى، تەحنيكاعا، ونەرگە باۋلۋ كۋرسى اشىلدى، كەستەشىلىك سەلبەستىك كووپەراتيۆى قۇرىلدى، «مەيىرىمدىلىك وتاۋى» سالىندى... مىنە وسىنداي ناقتى ىستەردى قىستاق تۇرعىندارى ماڭگى ۇمىتپاق ەمەس. قىستاقتا تۇراتىن قىزمەت گرۋپپاسىنا العىس ايتۋ ءۇشىن، قىستاق تۇرعىندارى قىزمەت گرۋپپاسىنا «بار ىنتا - پەيىلىمەن حالىقتىڭ جاعدايىن ۇعىسىپ، حالىق تۇرمىسىنا تيىمدىلىك جاساپ، حالىقتىڭ تىلەگىن توعىستىرىپ، حالىق ءۇشىن ناقتى ءىس ىستەدى» دەگەن جازۋ جازىلعان قۇرمەت جالاۋىن سيلادى.

  تۇيەشى قىستاعىندا اق تۇيەنىڭ قارنى جارىلدى

  اقتاۋ اۋدانى پىلال اۋىلىنىڭ تۇيەشى قىستاعىنداعى نيازحان ابدىقادىردىڭ تۇرمىسى وتە توق وتۋدە، ول قۇربىلارىمەن قاتار ءبىلىم الىپ، كۋرستى تامامداعاننان كەيىن، اپەكە - سىڭلىلەرىمەن بىرگە كەستەشىلىك كووپەراتيۆىن اشتى. «بۇرىنعىمەن سالىستىرعاندا جاعدايىم وتە جاقسى، قازىر مۇلدە باسقاشا اداممىن»، - دەدى نيازحان ءماز بولىپ.

  «حالىقتىڭ جاعدايىن ۇعىسۋ، حالىق تۇرمىسىنا تيىمدىلىك جاساۋ، حالىقتىڭ تىلەگىن توعىستىرۋ» قيمىلى بويىنشا اۆتونوميالى رايوندىق ءتارتىپ تەكسەرۋ كوميتەتىنەن اقتاۋ اۋدانى پىلال اۋىلىنىڭ تۇيەشى قىستاعىنا بارعان قىزمەت گرۋپپاسى ونەرگە باۋلۋ، نىسان ەنگىزۋ، قايىرىمدىلىق جاساۋ سەكىلدى قيمىلدار ورىستەتىپ، قىستاقتىڭ بەت - بەينەسىن جاڭعىرتتى، قىستاق تۇرعىندارىنىڭ رۋحاني بەينەسىندە دە كىسى سۇيىنەتىندەي وزگەرىستەر تۋدى. «شينجياڭ گازەتى»
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.