- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
تاعى دا توي تۋرالى تولعانساق
قابدەش ءجانابىل ۇلى
2015.11.06 16:25 كەلۋ قاينارى : شينجياڭ گازەتى
حالقىمىزدىڭ «قونعانى اۋىلىمنىڭ وي بولسا ەكەن، قورادان ءورىپ شىعار قوي بولسا ەكەن. بارىندا تىرشىلىكتىڭ ويناپ - كۇلەر، اۋىلىمدا كۇندە وسىنداي توي بولسا ەكەن» دەيتىن قارا ولەڭىندە قاراپايىم دا قالتقىسىز فيلوسوفيالىق وي قامتىلىىپ جاتقانى بارشامىزعا ايان. قازاق حالقى تەگىندە زاتتىق قاجەتىن قويدان، ياعني ءتورت تۇلىك مالدان تاۋىپ كەلگەن. ساحارا تىرشىلىگى تىكەلەي مالعا بايلانىستى بولدى. ىشەر اس، كيەر كيىم، كوش كولىك، ءجۇرىس - تۇرىسى تۇگەلدەي ءتورت تۇلىك مال جانە ونىڭ شيكىزاتى ارقىلى قامدالىپ وتىردى. ال رۋحاني قاجەتىن تورقالى تويدان تاپتى. كوڭىل اشار كوركەمونەر ورنى، كورەر كينو - تەلەۆيزورى جوق كەشەگى ساحارادا حالىقتىڭ باس قوسار بازارى، كوڭىل كوتەرىپ كوسىلىپ قالار مايدانى اس پەن توي بولعان. «توي دەسە قۋ باس دومالايتىن» مۇنداي باس قوسۋدا اتى جەتكەن، ءداتى جەتكەننىڭ بارلىعى جينالىپ، ءانشى - كۇيشى، اقىن - ونەرپازدار ونەر سىناسىپ ويىن كورسەتەدى. بالۋان ءتۇسىپ، بايگە توسادى. جورعا سالىستىرىپ، تەڭگە ءىلىپ، كوكبار تارتىپ، نىسانا اتادى. وسىنداي باي مازمۇندى مادەني كوڭىل اشۋ، دەنە تاربيە قيمىلدارى حالقىمىزدىڭ رۋحاني قاجەتىن قاناعاتتاندىرۋدا ايرىقشا ماڭىزدى رول اتقارىپ كەلدى. سوندىقتان بۇرىنعىلار توي دەسە قۋانىپ، توي دەسە قۇراق ۇشاتىن. ول كەزدەگى تويلار سول ماڭداعى جۇرتتىڭ ەڭسەسىن كوتەرۋ، كوڭىل اشۋ، باس قوسىپ ونەر سىناسۋ ءۇشىن جاسالاتىن. اۋقاتى كوتەرەتىندەر الاقانىنداعىسىن اياماي، باسقالاردان ەش نارسە دامەتپەي مىرزالىق تانىتاتىن. توي جاساي الاتىندار الىس - جۋىقتى شاقىرىپ توي جاساپ، شاماسى شاقتىلار بىرەر شاۋگىم شايمەن دە توي ىرىمىن جاساپ تىندىم ەتەتىن. ال قازىر توي جاساۋ جالپىلاسىپ، تويدىڭ ءتۇرى كوبەيىپ، شاماسى بار دا، جوق تا باسەكەگە تۇسەتىن بولدى. سول قالىڭ تويدان قاجىعان ادامداردىڭ قارشا بوراعان تويعا شاقىرۋ قاعازدارىن كورگەندە قىنجىلمايتىنى كەمدە - كەم.
حالقىمىز قىز ۇزاتۋ، كەلىن ءتۇسىرۋ تويلارىن شاما - شارقىنا قاراي تۇرلىشە كولەمدە جاساپ، اعايىن - تۋىس، ەل - جۇرتتى قۋانىشىنا ورتاقتاستىرعان. ال باسقا توي ىرىمدارى اۋىل ءۇيدىڭ اۋلاسىنان اسپاعان. قازىر تويدىڭ ءتۇرى مولايىپ، مازمۇنى وزگەرىپ، قادىر - قۇرمەتى تومەندەي باستادى. قىز ۇزاتۋ، كەلىن تۇسىرۋدەن باسقا سۇندەت توي، سىرعا تاعۋ، ءتىل اشار، تۇساۋ كەسەر، بەسىك تويى، تۋعان كۇندى قۇتتىقتاۋ، وقۋشى اتتاندىرۋ، ءۇي مايلاۋ، التىن نەكە، كۇمىس نەكە، سوعىم باسىنا شاقىرۋ، قۇدا شاقىرۋ قاتارلى وتكەندە بىرەر شاۋگىم شايمەن ءبىر جايلى بولاتىن ىرىمدار ىرگەلەنىپ كولەمدى تويعا اينالىپ بارادى. ءتىپتى، بۇرىن - سوڭدى ەستىمەگەن باجالار باس قوسۋ، جەرلەستەر باس قوسۋ، ءبىر اتا، ءبىر اۋلەتتەگى تۋىستاردىڭ باس قوسۋى دەيتىن ماعىناسىز توپتاسۋلار دا تويعا اينالىپتى. مۇنداي تويلاردىڭ بارىندە كومەسكى دامەتۋ، كورنەۋ قول جايۋ تۇرعانىن مولشەرلەۋ قيىن ەمەس. ال وزگەنىڭ تويىنا بەرگەن تويلىعىن قايتارىپ الۋعا نەمەسە سول ورتاداعى ىقپالى مەن ىرىقتىلعىنان پايدالانىپ قاربىتىپ قالۋعا بولا، سىلتاۋ تاۋىپ توي جاسايتىن سوراقىلىقتى دا بايقاپ ءجۇرمىز.قازاق حالقى تاريحى ۇزاق، ۇلتتىق ەرەكشەلىگى ايقىن، وزىنە حاس باي مازمۇندى دارا مادەنيەتى بار ۇلتتاردىڭ ءبىرى. جۇڭگو قازاقتارى ازاتتىقتان كەيىن ەلىمىزدەگى تۋىسقان ۇلتتار قاتارىندا شىت جاڭا قوعامدىق
ومىرگە ارالاستى. ابزال قوعامدىق ءتۇزىم مەن پارتيانىڭ ۇلت ساياساتىنىڭ شۇعىلاسى ۇلتىمىزدىڭ زاڭ جانە ساياسي جاقتاعى تەرەزەسىن تەڭەپ، ەكونوميكا جانە مادەنيەت جاعىندا باسقالارمەن تەڭەسۋدىڭ تەگىس جولىن اشتى. جارتى عاسىردان استام جاڭا قوعامدىق ءتۇزىم، اسىرەسە، رەفورمالاۋ، ەسىك اشۋ، بازار شارۋاشىلىعى ءتۇزىلىسىن جولعا قويۋ بارىسىنداعى 30نەشە جىلدىق دامۋ قوعامدىق ومىرىمىزگە، ءوندىرىس - تۇرمىسىمىزعا وراسان زور وزگەرىستەر اكەلىپ، زاتتىق وركەنيەتتىك ورەمىزدى جوعارىلاتۋمەن بىرگە يدەولوگيا، مادەنيەت جانە رۋحاني كۇي جاعىندا العا ىلگەرىلەتىپ، رۋحاني وركەنيەتتىك دەڭگەيىمىزدى ساليقالاندىرا تۇسكەنى جۇرتقا ايان. دەگەنىمەن، تاريح تاسقىنى، قوعام دامۋىنىڭ وبيەكتيۆ وزگەرىسى ءوز ارناسىمەن، وزگەشە زاڭدىلىعىمەن ارىنداپ العا جوڭكىلەدى. مۇنداي قاتال زاڭدىلىق الدىندا قاتارعا ىلەسكەندەر عانا داميدى، وركەندەيدى. ىلەسە الماعاندار ارتتا قالادى. 21- عاسىر ادامزات قوعامى تاريحىنداعى وركەنيەتتىك ورەسى جوعارى تاريحي ساتى بولماق. وسىنداي ءبىر وركەنيەتتى عاسىرعا قادام تاستاعان ءبىز ءاردايىم ءوز ورتامىزعا كوز جىبەرىپ، ەل قالاي؟ ءبىز قانداي؟ دەگەندى بەزبەندەپ، قازىرگى حالىمىزدى شامالاپ، بولاشاعىمىزعا قاداعالاپ نازار اۋدارىپ وتىرۋعا قاقىلىمىز.
بيىلعى جىلى قازاق حالقىنىڭ دانىشپان ويشىلى، اقىلمان اقىنى ابايدىڭ دۇنيەگە كەلگەنىنە 170جىل بولادى. وسىنداي ءبىر مەجەلى مەزگىلدە اباي تاعىلىمىن اينا ەتىپ، وڭ - سولىمىزعا ويلى كوزبەن قاراۋ باس تارتپايتىن ازاماتتىق بورىشىمىز. اباي ايتادى: «ەگەر ەستى كىسىلەردىڭ قاتارىندا بولعىڭ كەلسە، كۇنىنە ءبىر مارتە، بولماسا جۇماسىندا ءبىر، ەڭ بولماسا ايىندا ءبىر وزىڭنەن -ءوزىڭ ەسەپ ال! سول الدىڭعى ەسەپ العاننان بەرگى ءومىردى قالاي وتكىزدىڭ ەكەن. نە بىلىمگە، احيرەتكە، نە دۇنيەگە جارامدى، كۇنىندە ءوزىڭ وكىنبەستەي قىلىقپەن وتكىزىپىسىڭ؟ جوق، بولماسا نە قىلىپ وتكىزگەنىڭدى وزىڭدە بىلمەي قالىپپسىڭ؟» دەپ. بۇل جەكە ادام ءۇشىن دە، تۇتاس ءبىر ۇلت ءۇشىن دە اينا ەتەر اقىليا. ەندى مىنە ابايدىڭ وسى ءبىر تاماشا تاعىلىمىن قايتالاپ وقىپ وتكەنىمىزگە كوز سالىپ، وسى كۇنىمىزگە ۇڭىلە قاراساق، قاپى كەتكەن، عاپىل قالعان ىستەرىمىزدىڭ، ءداۋىر تالابىنا، زامان اۋقىمىنا ىلەسە الماي قالعان قىرسىزدىعىمىزدىڭ سانىنا جەتە الماي ساندالامىز. زامان وڭالىپ، تۇرمىس ورەسى جوعارىلاپ، باياندى عۇمىر كەشكەن سايىن، ءومىر ءسۇرۋ جەڭىلدەپ، ساۋىق-سايران كوبەيگەن سايىن، جاقسى - جاماندى پارىقتامايتىن پارۋايسىزدىق باسا كوكتەپ بارا جاتقانداي سەزىلەدى.
ماقالامىزدىڭ تاقىرىبى توي تۋرالى بولعان سوڭ، سول توي تۋرالى تولعانىسىمىزعا ورالايىق. توي بولعانعا نە جەتسىن، توي جاساعان جاقسىلىقتىڭ، قۋانىشتىڭ بەلگسى ءارى بەيبىت ورتا، بەرەكەلى تىرلىكتىڭ بەينەسى. الايدا، توي، توي سياقتى بولسىن، حالقىمىزدا «جىلىك كوپ بولسا كادە كوپ» دەيتىن ناقىل بار. راس، قازىر حاننىڭ دا، قاراشانىڭ دا داستارقانى مولىعىپ، ىشەر اس، كيەر كيىمگە زارۋشىلىك كەلمەسكە كەتتى. بىرتىندەپ دوڭگەلەك داۋلەتتى تۇرمىس ورەسىنە قادام تاستادىق. مۇندايدا، ەڭ الدىمەن، وسىنداي وڭدى تۇرمىستىڭ قادىرىنە جەتۋىمىز كەرەك. بايىعاننىڭ ءجونى وسى دەپ وڭدى - سولدى شاشۋدان اۋلاق بولايىق. تاريح بەرگەن مۇمكىندىك پەن تابيعات سيلاعان بايلىقتى ورىندى پايدالانىپ، قوعام وركەنيەتىنىڭ دامۋ ۇردىسىنە ۇيلەسۋگە قۇلشىنايىق. قوعامدا توي تۋرالى ءسوز قوزعالسا بولعانى قازاقتىڭ تويى ەڭ الدىمەن اۋىزعا الىنادى. قايدا بارساڭ قاپتاعان قالىڭ توي، باسى ارتىق ىرىم - جىرىم، توي بارىسىنداعى قيسىنسىز قىلىقتاردى كورىپ، وزگە ۇلت تۋىسقاندارىمىزدىڭ الدىندا جەرگە قاراعانداي بولامىز. ال دامۋ، بايۋ جونىندە ءسوز بولسا باسقالاردىڭ ماڭايىنا بارا المايمىز. مىنە بۇل، اباي ايتقانداي: «ونىڭ ءبارى − ءبىرىن - ءبىرى قۋىپ قور بولماي، شارۋا قۋىپ، ونەر تاۋىپ، مال تاۋىپ زور بولعاندىق اسەرى» ەدى. ال ءبىز «كەدەي جومارت» دەيتىن كەرقايىر قىرسىزدىققا جۇگەن ۇستاتىپ قويىپ ءوزىمىزدى - ءوزىمىز جۇباتامىز.باسى ارتىق تويلاردى شەكتەۋ، تويدى ۇنەمشىلدىكپەن قاراپايىم وتكىزۋ جايلى عۇزىرلى ورىندارىمىزدىڭ ارت - ارتىنان شىعارىپ جاتقان بەلگىلەمە، شارالارى دا از ەمەس. اقىل يەسى اعالارىمىز بەن ات ۇسىتىندەگى ازاماتتارىمىز دا توي تۋرالى تولعامدى ويلارىن ورتاعا قويىپ، زامان تالابىنا، قوعامدىق ورتانىڭ ورەسىنە قاراي لايىقتى ءارى قاراپايىم بولۋدى، ۋاقىتتى ايالاپ، عىلىم - بىلىمگە ۇمتىلىپ، تاپقان - تايانعانىمىزدى يگىلىكتى ىسكە جۇمساۋدى ۇدايى دارىپتەپ كەلەدى. امال نە، ءسوز تۇزەلگەنىمەن تىڭداۋشى تۇگەل تۇزەلە بەرمەيدى ەكەن. اسىرەسە، قازاق دەگەن حالىق قايتالاپ ايتىپ قاداعالاپ وتىرماسا قالعىپ كەتەتىن قاساڭ عادەتىنەن ءالى ارىلا الماي كەلەدى.
توي تۋرالى قالىپقا تۇسكەن قاتاڭ قاعيدا جاساۋدىڭ قاجەتى شامالى. دەگەنمەن، جەر - جەر، اۋدان، اۋىلدار ءوز ورتاسىنىڭ شارت - جاعدايىنا قاراي ۇلتتىق عۇرىپ - ادەتىمىزگە، سالىت - داستۇرىمىزگە ساي جاڭا زامان، وركەنيەتتى ورتانىڭ تالابىنا ۇيلەسەتىن لايىقتى فورمانى جالپىلاستىرعانى ءجون. بۇل جاعىندا تۋىسقان ۇلتتاردىڭ وزىق ۇلگىسىن دە قابىلداۋىمىز قاجەت. تومەندە وسى جايلى ويلارىمدى ورتاعا قويامىن.ۇلتىمىز ەجەلدەن بەرى تورقالى تويدى ايرىقشا قۇرمەتتەيدى، اۋىل بەرەكەسىنىڭ بەينەسى دە كوبىنەسە ءدال وسىنداي توي تۇسىندا بايقالادى. اعايىن - تۋىس، دوس - جاران، كورشى - قولاڭ تورقالى تويعا توبىن جازباي كەلىپ، كومەك قولىن سوزىپ، توي سالماعىن ورتاق كوتەرىپ كەتەدى. مۇنداي باعالى عادەت، اسىل ءداستۇر ۇرپاقتارىمىزدىڭ كىرلەتپەي جالعاستىرۋىنا ابدەن تاتيدى. وسى تۇرعىدان العاندا، قىز ۇزاتىپ، كەلىن ءتۇسىرۋ تويلارىن شاماعا قاراي قاراپايىم ءارى كوڭىلدى وتكىزۋ زاڭعا دا، ساياساتقا دا تومپاق ەمەس. باستى ماسەلە ءبىزدىڭ اسىرا سىلتەۋىمىزدەن تۋىندايدى دا توي قۇرمەتىن تومەندەتىپ الامىز. اۋەلى، تويدى پايدا تابۋدىڭ ورايى ەتىپ المايىق. ەسەمىزدى قايتارىپ ەسەپ جابۋ ءۇشىن توي جاساۋ دا سوراقىلىق. ونان سوڭ، ۇلتىمىزدىڭ ءساليقالى سالت - ءداستۇرىن كىرلەتىپ الۋدان ساقتانايىق. جاڭا تۇسكەن كەلىننىڭ بەتىن اشۋ ىرىمى اق بوساعانى اتتاعان العاشقى قادامدا بولاتىن تاربيەلىك ماڭىزى زور ءداستۇرلى قيمىل. قازىر مۇنى توي زالىنا اپارىپ، تويعا جينالعان جۇرتتىڭ الدىندا اشاتىن ابىرويسىز ماقتانعا اينالدىرىپ الدىق، ءتىپتى، كەيبىر ۇلكەن قالالاردا كەلىننىڭ بەتىن اشقان ادام تۋىس - تۋعاندارىنان جاعالاي كورىمدىك سۇراپ الاتىن سوراقىلىقتى كورىپ ءجۇرمىز. كەزىندە حالقىمىزدىڭ اۋزى دۋالى ازاماتتارى جاس كەلىننىڭ بەتىن اشىپ، سول مايداندا كەلىنگە ايتار اقىل - كەڭەس، ۇلگى - ونەگە، تاعىلىم - تاربيەنى ولەڭ فورماسىمەن جەتكىزگەن. بەت اشقان ادام اقى تىلەپ الاقان جايماعان، تەك توبىلعى ساپتى قامشىنىڭ بۇلدىرگەسىنە بايلاعان ءبىر شارشى اقتىقپەن جولعا تۇسەتىن. ال مىناۋ نارىق زامانىندا اقى الۋعا ءتيىس بولسا ونى توي يەسى سۇراماسا دا بەرەدى. سونىمەن بىرگە، توي زالىنداعى توپ ورتادا كەلىننىڭ بەتىن اشۋ ىرىمى اياقتالعاننان كەيىن جۇرگىزۋشىنىڭ جاريالاۋىمەن تۋىس - تۋعاندارى كوپتىڭ الدىندا التىن القا، كۇمىس سىرعالارىن تاعۋدىڭ ەرسىلىگى دە ەرەكشە. بۇل بوگدە كوزگە كوپىرمە ماقتاننان باسقا تۇك ەمەس. تۋىس - تۋعان ات مىنگىزىپ، اتان جەتەكتەتسە، التىن - كۇمسىتەن ساۋعا ۇسىنسا ونى كوپكە جاريالاپ ماقتان ەتپەي - اق اعايىن اراسىنداعى الىم - بەرىم رەتىندە بىتىرگەن ءجون. تويداعى استا - توك ىسىراپشىلدىققا دا تەجەم سالاتىن كەز كەلدى. قازىر قالادا دا، دالادا دا «ءيت ماي جەمەيتىن» توقشىلىق بار. مۇندايدا تاباق - تاباق ەت تارتۋدىڭ ۇستىنە ءۇيىپ - توگىپ قۋىرماش قويۋدىڭ دا باسى ارتىق، ەتكە تويىپ العان قوناقتاردىڭ قۋىرماشتارعا قول سوزباي قوتارىلا قايتىپ جاتقاندىعىن دا كورىپ
ءجۇرمىز. قازاقتا «تويعا بارساڭ تويىپ بار» دەيتىن ءتامسىل بار، بۇرىنعىلار تويعا تاماق جەۋ ءۇشىن كۇتىم تىلەپ بارمايدى، قايتا كوڭىل كوتەرۋ، ونەر كورسەتىپ، ويىن - كۇلكىنى قىزدىرۋ ءۇشىن باراتىن. مۇنداي پاك تە باعالى سالتىمىزدى جالعاستى ساقتاي بىلگەنىمىز ءجون. سونىمەن بىرگە، توي زالىنداعى جوعارى داۋىستى ساندىقتان شىعاتىن جاڭعىرىق پەن شۋىلدىڭ ادامدار دەنساۋلىعىنا پايداسىز ەكەندىگىن دە ەسكەرمەيمىز. داۋىس جۇتاتىن كەمەلدى جابدىعى جوق قاراپايىم توي زالىنداعى جاڭعىرىق پەن دۇرسىلدەك باستاعى ميدى قويىپ، تابان استىنداعى ەدەندى سولقىلداتادى. قازىرگى ادامدار قورشاعان ورتاداعى سان ءتۇرلى بىلعانشتان مەزى بولۋدا، سولاردىڭ ىشىندە قاتتى جاڭعىرىق پەن مازاسىز شۋىل ەڭ ۇلكەن بىلعانىش ەسەپتەلەدى ءارى ونىڭ ادامداردىڭ جۇيكەسىن توزدىرىپ، دەنساۋلىعىنا اقاۋ تۇسىرەتىن زيانى دا كىشى - گىرىم ەمەس.
شاقىرعان تويعا ۋاعىندا جينالىپ، مەجەلى مەزگىلدە اياقتاتۋدى دا باسقا ۇلت اعايىندارىمىزدان ۇيرەنەيىك. ولار شاقىرىلعان ۋاقىتتىڭ جارىم ساعاتى ىشىندە جينالىپ، ويناپ - كۇلىپ 2 ساعاتتا اقىرلاستىرادى. قازاقتاردىڭ باس - اياعى 3 ساعاتتا ارەڭ جينالىپ توي باستايدى.
وسىنىڭ بارلىعى دا وزگەرتۋگە، جاڭالاۋعا ءتيىستى عادەتتەر. بۇل جاعىندا ءۇرىمجى ۇلگى كورسەتسىن. ويتكەنى ءۇرىمجى رايونىمىزدىڭ ورتالىعى، جۇڭگو قازاقتارىنىڭ ابىرويلى، اقىلگوي ازاماتتارى مەن زيالىلارى، جاڭالىققا جانى قۇشتار ستۋدەنتتەرى مەن كاسىپكەر جاستارى شوعىرلى قونىستانعان وركەنيەتتى قالا. ال باسقا ورىندار دا تورقالى تويعا قاتىستى وزىق ۇلگى، ورتاعا لايىقتى سالت - ءداستۇردى جولعا قويۋ جانە جالپىلاستىرۋعا ورتاق كۇش شىعارۋ كەرەك. قىز ۇزاتىپ، كەلىن تۇسىرگەن تويلارىمىزدى كوڭىلدى ءارى قاراپايىم وتكىزۋگە قۇلشىنايىق، ۋاقىتتى ايالايىق، استا - توك ىسىراپشىلدىقتى تەجەيىك. توي زالىنداعى مۋزيكا باسەڭ، داۋىس اقىرىن بولسىن. جاس كەلىننىڭ بەتىن اشۋ ىرىمى اق بوساعاسىن اتتاعاندا، اتا - ەنە، تۋىس - تۋعاننىڭ ورتاسىندا بولعانى ءجون. توي كەشىندە توي جاساعان جاس جۇبايلار ەسىك الدىندا تۇرىپ قوناقتاردى قارسى الاتىن بولسىن. حانزۋ ۇلتىنىڭ وسى سالتى وتە باعالى، ءبىز دە ونى جاتىرقاماي قابىلدايىق. مۇنداي بولعاندا تويعا كەلگەن ۇلكەندەر ولارعا باتاسىن بەرىپ ىزگى تىلەك بىلدىرەدى، جاستار جاعى بەتپە - بەت قۇتتىقتايدى. بۇل ءارى تويعا جينالاتىن قاۋىمعا دەگەن قۇرمەت بولادى.
قازاق حالقىنىڭ قامىن جەپ، جەتەسىزدىگىن جەرىنە جەتە اشكەرەلەپ، وزىق ۇلت، ونەگەلى حالىققا تەڭەلۋدىڭ جولىن نۇسقاعان دانىشپان اباي: «تەگىندە ادام بالاسى ادام بالاسىنان اقىل، عىلىم، ار، مىنەز دەگەن نارسەلەرمەن وزادى، ودان باسقا نارسەلەرمەن وزدىم عوي دەمەكتىڭ ءبارى دە −− اقىماقشىلىق» دەپ اتاپ، قاداپ كورسەتكەن. الەم تانىعان اباي تاعىلىمى ەڭ الدىمەن قازاق ساناسىنان ويىپ ورىن السىن. ءبىز استا - توك توي جاساپ، اشىلىپ - شاشىلىپ ءجۇرىپ باسقادان وزا المايمىز. وزگەگە تەڭەلۋ ءۇشىن دە، وزگەدەن وزۋ ءۇشىن دە ەڭ الدىمەن ءوز باسىمىزداعى قىرسىزدىقتى قيداي سىپىرىپ، ءداۋىر تالابىنا ۇيلەسۋگە ۇمتىلايىق. ەندى ويانباساق زامان كوشىنىڭ سوڭىندا قالامىز.
ويانايىق، ويلانايىق، اعايىن!
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
