بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى>>قوعام

زامانا جاڭالىعىنىڭ پاسىعىن ەمەس، دانالىعىن...

ديداربەك زاكىرجان ۇلى

2015.11.06 16:32     كەلۋ قاينارى : شينجياڭ گازەتى

  قازىرگى باي - باقىتتى تۇرمىس ءار ادامعا شاتتىق سيلادى. تۇرمىستىڭ ىرعىن بايلىعىن بەلشەمىزدەن باسقاننان كەيىن دە جوعىمىزدى جوقتاۋعا، قولىمىزدا بار اسىلدى ارداقتاۋعا قۇلشىندىق. الايدا، قاتارىمىزدا باسىمىزدىڭ قانشالىقتى ەكەنىنە وي جۇگىرتپەستەن، اباجاداي قالپاق كيۋگە قۇلشىناتىندارىمىز دا جوق ەمەس. ولشەۋسىز دۇنيەنىڭ كوزسىزدىككە جەتەلەيتىنىن كەنجەلەپ بىلدىك تە ءداتىمىزدى كىمگە ايتۋعا قۇلاق تاپپاي سانىمىزدى سوقتىق. مۇنى توي جاساۋداعى «قاراتالاسۋ» دەدىك. قارا تالاسقاننان كەيىن دە «كورپەگە قاراي كوسىلۋدى ۇمىتتىق». قالا ورتالىعىنداعى باعاسى اسپانداپ تۇرعان رەستورانعا قاراي توي وتكىزۋگە دۇرمەكپەن ىلەسە كوزسىز ساندىككە، ابىرويعا، اتاق - داڭققا بوي ۇرعان ەكى جاس اتا - اناسىنىڭ تاپقان - تايانعانىن سۋشا شاشتى. وعان توقتاۋ ايتقاندارعا: «زامانىڭ قالاي بولسا بوركىڭ سولاي» دەپ سول ءبىر دۇرمەكپەن ىلەسە كەمدىگىن تولىقتاپ، باعىن، بايلىعىن سىنادى. ومىردە بار ادامنىڭ اسىعى الشىسىنان تۇسە بەرۋى مۇمكىن ەمەس قوي. بۇل دا دۇرمەك، قىزىقشىل توپتىڭ ايعايىنا ەلىتكەن جاستاردىڭ تىزگىن تارتار كۇنى بولار دەپ ءبار - بارىنە سابىرلى نيەتپەن، سىندارلى كوزبەن، كەشىرىمشىل كوڭىلمەن حالقىمىز قاراپ كەلگەن ەدى.

  مىنە بۇگىن سول ءبىر سابىرلىلىقتىڭ كوڭىلىنە قۋانىش قۇسى ۇيالادى. جاستاردىڭ ورىنسىز شىعىندالاتىن ۇيلەنۋ توي جورالعىلارىنىڭ جولىن كەسىپ تىڭ سۇرەن سالعانى بارشا حالىقتى قۋانىتتى.

  قۋانعانىنان اۋىل قارتتارى كونە كوز سارىندى دوستارىن قىرىق جىل جوعالتىپ تاپقانداي كوزدەرىنە جاس الىپ، جاستاردىڭ پەيىلىنە، اراق - شاراپسىز تويدىڭ مەرەيىن اسىرعان شىنايى كوڭىلدەرىنە، قونىشى قىستاۋ، كەۋدەسى كەنىش ۇلتتىڭ ەرتەڭىنە اق تىلەكتەرىن جاۋدىردى. اق سامايلى انالار شاشۋىن شاشىپ اقجولتاي تىلەدى.

  كوپ كوڭىلىنە قۋانىش سيلاعان بۇل توي 18 - قازان جەكسەنبى كۇنى التاي قالالىق 2 - مال فەرماسى اقتاس قىستاعىندا وتكەن ەدى. بۇل توي اتا ءداستۇرىمىزدى ۇلىقتاپ، پارتيا - ۇكىمەتتىڭ

  ورىنىسىز شىعىننىڭ الدىن الۋ، ىسىراپشىلدىققا قارسى تۇرۋ ۇندەۋىنە ءۇن قوسۋدىڭ ايقىن باستاماسى دەۋگە بولادى. مۇندا اۋىل ازاماتتارى ءوز اتتارىن ساندەپ عانا ءمىنىپ كەلىپ، جاس كەلىندى اتا

  ءداستۇر بويىنشا اتپەن ۇزاتقانى جاڭالىق دەپ بىلدىك. جاڭالىق بولاتىنى ورىمدەي جاستار ات ۇستىندە ويناپ، ازىلدەرى جاراسسا، اراق - شاراپتان اۋلاق بولىپ، اتا - انالارىنىڭ «بالام بۇگىنگى تويدان امان كەلسە ەكەن، اراق ءىشىپ، پالەگە جولىقپاسا يگى ەدى» دەپ الا كوڭىلمەن ساعاتتىڭ تىقىلىن سابىرمەن سانايتىن الاڭداۋشىلىقتىڭ جوقتىعى ءارى جول ورتادا «كۇيەۋ جىگىتتى سىلكىندىرەمىز» دەپ اسحانا مەن شاراپحانالاردا ورىنىسىز اقشا جۇمسايتىن، وتاۋ كوتەرگەلى وتىرعان جىگىتتىڭ باعىن شاراپ تولى رۋمكامەن ولشەيتىن دۇرمەك توپتىڭ جوقتىعى. ءان سالىپ تويدىڭ مەرەيىن اسىرعان سول اۋىلدىڭ ونەرپاز ازاماتتارى تويعا جينالعان كوپتىڭ القاۋىن الىپ جاتتى. مىنە بۇل اۋىل ازاماتتارىنىڭ ءسان - سالتاناتىن، بەرەكە - بىرلىگىن ارداقتاعاندىقتىڭ بەلگىسى ەدى.

  وسى جولعى اتا ءداستۇرىمىزدى ۇلىقتاپ كەلىن تۇسىرگەن قارت جارقىنبەك قاميت ۇلىمەن اڭگىمەلەسكەنىمدە: بۇل وي ەكى بالامنىڭ ءوز جوباسى. ەگەر اۆتوكولكپەن كەلىندى اكەلەتىن بولساق، ونىڭ شىعىنى مالشى بولعان ماعان وڭاي ەمەس. اۆتوكولىكتى جۇرگىزۋدىڭ اقىسى مەن جاستاردىڭ كوڭىلىن تابۋ اقشاسى ءوز قالتامىزدا قالدى. بۇل دا بولسا زامانىمىزدىڭ جاقسارىپ، جاستاردىڭ ەتەك - جەڭىن جيىپ، ءار نارسەگە ويلامدى وي كەرەك ەكەنىن بىلگەنى. توي قانشالىق قاراپايىم وتسە، ونىڭ ءمان - ماعىناسى سونشالىقتى جوعارى بولاتىنىن وسىندا جينالعان قاۋىمنىڭ ىستىق ىقىلاسىنان ءبىلدىم، - دەپ قۋانىشىن كوككە اۋەلەتسە، وسى رەتكى تويدىڭ باسى - قاسىندا بولعان 2 - مال فەرماسى اقتاس قىستاعىنىڭ پارتيا ياچەيكا شۋجيى العابەك باعدوللا ۇلى: بۇگىنگى تويىمىز ۇلتىمىزدىڭ اتا ءداستۇرىن ارداقتاعان، ۇلىقتاعان توي بولعانىمەن، شىن مانىندە ەگىنشى - مالشى قاۋىمنىڭ ۇرپاقتارىن ۇيلەندىرۋدەگى قاراپايىمدىلىقتى، ۇنەمشىلدىكتى، بەرەكە - بىرلىكتى ۇلگى - ونەگە ەتكەن. مۇنداي تويدىڭ ءوتۋىن بۇدان كەيىن قىستاق بويىنشا جالپىلاستىرۋعا كۇش سالامىز. ويتكەنى، بۇگىنگى قىز ۇزاتۋ تويىنا جينالعان اۋىل ازاماتتارى اتتارىن وزدەرى اكەلىپ وتىر. ەگەر وسىنىڭ ورنىنا اۆتوكولىك كىرەلەگەن بولسا، ونىڭ شىعىنىن مولشەرلەۋ قيىن ەمەس. سوندىقتان دا ءبىز وسى وتباسىن تويدى قاراپايىم وتكىزۋ، قارا تالاسپاۋدىڭ جارقىن ۇلگىسى بولار دەگەن سەنىمدەمىز. بولماسا ەكونوميكالىق ءال - اۋقاتىنا قاراماي اۋىل ورتالىعىن، اۋەل دەسەڭ، قالا ورتالىعىن جاعالاپ، اقشاسىن سۋشا شاشقاندار دا بولعان. بۇدان كەيىن جاستارىمىز وزدەرى باستاما بولىپ، ۇيلەنۋ تويىنىڭ ورىنىسىز شىعىنىن ازايتۋعا كۇش سالسا ەكەن، - دەدى.

  ءيا، اتا ءداستۇرىمىزدى ارداقتاپ، جاستاردىڭ زامانا جاڭالىعىنىڭ پاسىعىن ەمەس، دانالىعىن، دۇرمەگىن ەمەس، قاراپايىمدىلىعىن، ونەگەلىگىن ەرتەڭگى بولاشاعىنا ۇلگى ەتسە، باسەكەلى قوعامنان ءوز ەنشىسىن مولىنان الاتىنىنا سەنىمىمىز كامىل.
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.