- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
شوفەر اعاي، زىمىراپ قايدا باراسىڭ
سەرجان مىناپ ۇلى
2015.12.07 16:41 كەلۋ قاينارى : شينجياڭ گازەتى
ءومىردىڭ پاتشاسى، تىرلىكتىڭ كوكتەمى بولعان جاستىق شاق، راسىندا، جازا باسقىش كىلتەڭ كەزەڭ - عوي. الىپ ۇشقان البىرت كوڭىل قايدا اپارىپ سوقپايدى دەيسىڭ؟ ءار نەنى كورىپ، ءبىلىپ كوڭىلىنە توقي ءجۇرىپ ەرجەتكەن جاقسى - اق. الايدا سول البىرت كوڭىل ەس جيۋعا ۇلگىرتپەي تاعدىردىڭ تار بەسىگىنە تاڭىپ كەتپەسە جارار ەدى. سول جەلباستاق مىنەزدى جەر قوينىنا دەيىن جەتەكتەپ كەتەتىن جەتەسىزدەر دە جوق ەمەس - تى. ايگىلى جازۋشى گەتەنىڭ «ادام ءومىرىنىڭ بيىك شىڭى جاستىق شاق. جاس كەزىمىزدە جاڭساق قادامىمىز كوپ - اق بولادى، ءبىراق سول جاڭساقتىقتاردى كۇنىمىز ەڭكەيگەنشە سۇيرەتۋدىڭ قاجەتى جوق» دەپ ايتقانىنداي، ءومىر اتتى پەندەنىڭ باسىنا كەلگەن سيدىڭ دا ءبىر - اق رەت بەرىلەتىنىن ەستە بەرىك ساقتاپ، قاستەرلەپ قادىرىنە جەتە العان جان عانا جەڭىمپاز بولماق.
تەمىر تۇلپاردىڭ تىزگىنىن قولىمىزعا العاندا ەلىرىپ كەتەتىنىمىز قانداي ءبىر ادەت؟! ات جالىنان امان - ەسەن جەتكەن قازاق بالاسى بۇگىنگى كۇنى تەمىر تۇلپاردىڭ تەبىنىنە تەڭ كەلمەي، مەزگىلسىز جانىنان جۇدا بولىپ جاتقاندىعى جانىڭدى جابىرقاتىپ، جۇرەگىڭدى جىلاتادى. سونىڭ تىزگىنىن ۇستاعان بىزدەگى كەي ەسسىزدەر قىزبالىقپەن قىمباتتىءومىرىن قۇرتىپ، جارتى مينۋتتا كەتىلىپ قالارىن ويلادى ما ەكەن دەشى؟! ولمەستەي بولىپ وڭمەڭدەگەن ءور كوكىرەكتەردىڭ وزەگىنە وشپەستەي ەتىپ وكىنىش ءورتىن قۇيىپ كەتە باردى انە...
بۇگىنگى جان بىتكەن قاربالاس، انشەيىن مۇرىندارىنا سۋ جەتپەيدى. استىمىزعا ايروپلان مىنسەك تە اسىعىپ جۇرەمىز. جول قاتىناس زاڭى كوكەيدە جوق، بىرەۋدەن وزىپ ءوتىپ مەجەلى جايعا ءبىر مينۋت بۇرىن جەتكەن جەلىگىمىزدى جەڭىس سانايمىز. اۋەلى، كەيبىرەۋلەر «اقىرىن ءجۇر» دەگەن اقىلدى العاننىڭ ورنىنا ماي تەپكىسىن جەتەسىنە جەتكىزە باسىپ، بويىڭداعى جىنىڭدى قاعىپ الادى دا سەنىڭ كوپكە دەيىن سەلكىلدەگەن حالىڭدى كورىپ كوڭىلى ءماز بولادى. قازاقتىڭ «مىڭ كۇن سىنباعان شولمەك، ءبىر كۇن سىنادى» دەگەنىندەي، سول استامسىعان كوڭىل ءبىر - اق كۇندە اسپاققا اسىپ، تاعدىرىڭدى تاقىرعا وتىرعىزىپ كەتەرىن ويلادى ما ەكەن سول مىقتىلار. كىمگە شاعىنارسىڭ؟ ءوز تاعدىرىڭدى ءوز قولىڭمەن كەسكەن تاس تاعدىرىڭا وكپە دە جوق. تاۋباڭدى ءۇيىرىپ تاعىلىمىڭدى تاعى بىرەۋگە تابىستاي بەرەسىڭ. تاعى وسى پالە كەۋدەسىن تاس باسقىردىڭ وزىمەن كەتپەي، بەيۋاز بىرەۋدىڭ بەلىن وپىرىپ كەتكەنىنە قىنجىلاسىڭ. سول بەيۋاز جانعا سۇيەنىپ تىرلىك كەشكەن كارىلەر مەن شيەتتەي سابيگە قاراپ ۇڭىلەسىڭ، ءتاڭىردى قارعاۋدان تابىس تاپپايتىندىعىڭ شىندىق. سوسىن كەشەگى توبەسى كوك تىرەگەن مىقتىنىڭ بۇگىنگى جەر سىزىپ بارا جاتقان ءمۇساپىر مۇسىنىنە قاراپ تۇڭىلەسىڭ.
كەشەگى ءتۇن ۇيقىسىن ءتورت ءبولىپ، وتقا دا، سۋعا دا تۇسىرمەي ەرجەتكىزگەن كوزىنىڭ قاراسى، جۇرەگىنىڭ پاراسى مەزگىلسىز تەمىر تۇلپاردىڭ
تىسىنەن مەرت بولىپ، ارسى جالعاننان قاراسىن
وشىرسە، بەرىسى قوس اياق قۇنىن جويىپ ماڭگىلىك مۇگەدەكتىك قامىتىن كيسە كىمنەن كورەسىڭ؟ كىم بولۋشى ەدى، وزەگىڭدى ءورت شالىپ
وزىڭنەن كورەسىڭ دە، سەبەبى سول شاقتا تەمىر تۇلپاردىڭ تىزگىنى ءوز قولىڭدا ەدى... ەندى وكىنۋدىڭ قاجەتى شامالى، سول تىرسەگىڭدى قيعان تەمىردىڭ تۇگى كەتپەيدى، يلەنىپ كەرەكتەن شىققان سول تەمىر شويىن قورىتاتىن پەشكە، ونان ارى زاۆودقا كەلىپ تاعى دا كەرەمەت ونىمگە اينالىپ جاتادى. ال تەك سەن عانا زاپىران جۇتىپ، زار جىلايسىڭ. ءارقاشان بالاسىن باقىتىم دەپ بىلەتىن قوس قورمالىڭ عانا بويىنان شىبىن جانى ۇزىلگەنشە ءۇمىتىڭدى جالعاپ ءۇنسىز قاراڭدايدى. ال قالعان تۋىسىڭنىڭ حالى دا بەلگىلى، ءوز تىرلىگىمەن ابىگەر. كوز كورگەندە مۇسىركەگەنى بولماسا، شىن جىلاپ، شىنايى باقىتىڭدى تىلەيتىن جان جانە سول قۇلىنىم دەپ قۇلدىراڭدايتىن قوس جۇرەك.
«سەمىزدىكتى قوي كوتەرەدى، قويدان باسقا نە كوتەرەدى» دەمەكشى، دۇنيەنىڭ ىلعي دا جاقسىلىعىنا تاسىپ، كوڭىلى كوك تىرەپ جۇرگەن كوك ەتىكتىنىڭ بىرەگەيى ەسقات تا تويدان سىرەپ الىپ، تورى تۇلپارىنىڭ تىزگىنىن تارتپاي جول بويىنداعى بەيۋاز بىرەۋدى قاعىپ كەتكەنى مۇڭ ەكەن، ءبىر - اق كۇندە كوكتەگى كوڭىلى جەرگە ءتۇسىپ، اۋزىنداعى ءانىن دە، قويىنىنداعى ءدانىن دە سول سۇمدىقتىڭ بوداۋىنا سالىپ، جەر ورتا جاسقا كەلگەندە جەر تىرەپ قالعانى قيىن - اق. ال ۇزاقتان بەرى اۋىلىنان ۇزاپ شىقپاعان ۇسەن دە ۇيىندەگىلەردى الىپ ءىرى قالا ۇرىمجىگە تۋىششىلاي كەلگەنى وسى ەدى. كولىكتىڭ كوپتىگىنەن ەكى اتتاپ ءبىر توقتايتىن ءۇرىمجىنىڭ قاتىناس زاڭىنا كوندىگە الماي ۇزاقتان بەرى ءتىسىن تىسىنە باسىپ جۇرگەن ۇسەن دە اۋىلعا قايتار جولىندا وسى ەسەنى ءبىر العىسى كەلدى مە - جوق، كوك جايلاۋدا كوسىلتىپ جامان ۇيرەنگەن ەسكى ادەتىنە باستى، كوك تۇلپاردىڭ تىزگىنىن تارتپاي قارسىنداعى قارنى قاباقتاي ءداۋ تۇلعانىڭ استىنا كىرىپ ەدەمدە ءبىرءۇيلى جاننىڭ جاعىن قارىستىرعانى... ءبار - ءبارى دە سول قارقىندى شەكتەن تىس اسىرىپ، قاتىناس قاعيداسىنا ەلەۋسىز قاراپ، ەركىمىزدى جەلباستاق مىنەزبەن اۋلەكىلىككە بيلەتكەننىڭ كەسەلىنەن. سوندىقتان، اسىرەسە، جاستارىمىزعا قاتىناس قاعيداسىنا بويسۇن، تىرلىكتى قادىرلە دەگەندى قايتا دارىپتەيمىز.
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
