شينجياڭدىق جىگىت حىناندا زاۆود قۇردى

2016.06.21 13:41  

　　حالىق تورابى اۋداردى. ءتاڭىرتاۋ تورابى حابارى. حىنان ولكەسى حۋاشيان اۋدانىندا قاشقاردان بارعان اسقارجان مامەت ەسىمدى جىگىتتىڭ ەسىمى ەلگە تانىس. ول سول ارادا زاۆود قۇرىپ، 200دەن استام ادامدى كاسىپتەندىرۋدەن سىرت، جەرگىلىكتى ورىنداعى 130دان استام ديحاندى ەتتى تاۋىق باعۋعا جەتەلەپ، ولاردى بايۋ جولىنا باستادى.

　　شينجياڭ ۇيعۇر اۆتونوميالى رايونىنىڭ «ۇلتتارى ىنتىماقتى شاڭىراق» اتتى ۇلگىلى ىستەردى حابارلاۋ توبى 16 – ماۋسىمدا حىنان ولكەسىنىڭ حۋاشياڭ اۋدانى داجاي اۋىلىنا بارىپ، ىشكەرىلەي تىلشىلىك ىستەۋ ارقىلى، اسقارجان مامەتتىڭ حۋاشياندا قارجى قوسىپ، ءۇي قۇستارى سويىس الاڭىن، باعىمشىلىق الاڭىن سالۋىنىڭ سىرىن اشتى.

　　حۋاشياندىقتاردىڭ شىن پەيىلىنەن اسەرلەندىم

　　16 – ماۋسىم كۇنى حۋاشيان اۋدانى داجاي اۋىلى جۇڭجيە قىستاعىنىڭ ءۇي قۇستارىن سويۋ الاڭى كەڭسەسىندە سۇحباتتى قابىلداعان اسقارجان: «مەن ساۋداگەرمىن، اقشا تابۋ ءۇشىن قارجى قوسامىن، الايدا حۋاشيان اۋدانىنا كەلىپ قارجى قوسۋىم تەك اقشا تابۋ ءۇشىن عانا ەمەس، حۋاشياندىقتاردىڭ شىن پەيىلىنەن اسەرلەندىم، - دەيدى.

　　اسقارجان قاشقار قالاسىندا اتا – باباسىنان بەرى جىبەك ساۋداسىمەن شۇعىلدانىپ كەلە جاتقان ساۋداگەر وتباسىندا تۋىلعان، بالا كۇنىنەن وتباسىنداعىلارمەن بىرگە سۋجوۋعا بارىپ ساۋدا ىستەگەن.

　　2001 – جىلى وتباسىنداعىلار اسقارجاندى جەكە ەڭبەكتەنۋگە باۋلىعان ءارى قارجى جاعىنان قولداعان، ول ساۋداگەرلەردە بولاتىن قىراعىلىقپەن باعىمشىلىق كاسىبىنىڭ دامۋ بولاشاعى بار ەكەنىن بايقاعان. سونىمەن قاشقاردا باعىمشىلىق الاڭىن اشىپ، 60 مىڭ تاۋىق پەن 200 سيىر باققان.

　　كەيىن ساۋداسى بارعان سايىن ۇلعايعان سوڭ، اسقارجان شاندۇڭنىڭ حۋايفاڭ قالاسى، نيڭشيا قاتارلى جەرلەردە قارجى قوسىپ، زاۆود قۇرعان، ءۇي قۇستارى باعىمشىلىعى، قاساپشىلىق جانە مۇسىلمانشا ازىق – تۇلىكتەردى مانەرلەۋ قاتارلى سالالاردا ەڭبەكتەنىپ، كاسىپورىننىڭ ءوندىرىس جەلىسىن ونان ارى كەڭەيتكەن.

　　2008 – جىلى ويلاماعان ورايدا اسقارجان داجاي اۋىلىنداعى وزىمەن قۇرداس لي يۇڭجۇنمەن تانىسادى. لي يۇڭجۇن ونى حۋاشيان اۋدانىنا قارجى قوسۋعا شىن ىقىلاسپەن ۇسىنىس ەتەدى، سول ورىندا تەكسەرۋ جۇرگىزگەننەن كەيىن، اسقارجان حۋاشيان اۋدانىنىڭ ءۇي باعىمشىلىعىنداعى ءىرى ولكە ــ شاندۇڭ ولكەسىمەن قارايلاس جاتقانىن ءارى اۋداننىڭ كليماتى ءۇي قۇستارىن وسىرۋگە وتە ۇيلەسەتىنىن، ءۇي قۇستارى باعىمشىلىعى كاسىپتىك جەلىسى پىسىپ – جەتىلگەنىن، باعىمشىلىق قۇنى مەن جۇمىسكەر ىستەتۋ قۇنىنىڭ شاندۇڭ ولكەسىمەن سالىستىرعاندا كوپ تومەن ەكەنىن بايقايدى.

　　ەڭ ماڭىزدى ءتۇيىن: حۋاشيان اۋدانى مەن داجاي اۋىلى سىندى ەكى دارەجەلى پارتكوم مەن ۇكىمەت بۇل ىسكە شىن ىقىلاس تانىتىپ، كوپ ءتۇرلى ءتيىمدى ساياسات بەلگىلەۋدەن سىرت، ارناۋلى قىزمەت گرۋپپاسىن قۇرىپ، ونى كۇماننان ارىلتتى.

　　اسقارجان لي يۇڭجۇنمەن سەلبەسە وتىرىپ، ەكەۋى بىرگە 28 ميلليون يۋان قارجى قوسىپ، داجاي قىستاعىندا مۇسىلمانشا سويىس الاڭىن سالادى. اسقارجان جەرگىلىكتى قىزمەت گرۋپپاسىنىڭ تەز ارادا جەر الۋ جانە تولەم بەرۋ، سۋ جەتكىزۋ، ەلەكتر جەتكىزۋ، جول تارتۋ سىندى «ءۇشتى تۇتاستىرىپ، ءبىردى تەگىستەۋ» قىزمەتىن ويداعىداي اتقاراتىنىن ويلاماعان ەدى.

　　وسىدان سوڭ، ءتۇرلى رەسميەتتەرگە دە اسقارجان باسىن اۋىرتقان جوق، قىزمەت گرۋپپاسى ودان ازاماتتىق كۋالىك ءنومىرى قاتارلى ينفورماتسيالاردى سۇراپ العان سوڭ، وبيەكتىنى تىزىمگە الدىرۋ، جەردى ماقۇلداۋ، ساۋدا – ونەركاسىپ تيجارات كۋالىگىن ءبىتىرۋ، باجىعا تىزىمدەۋگە ءوتىنىش بەرۋ، ورتاعا ىقپالىن باعالاۋ قاتارلى رەسميەتتەردى تەز ارادا ءبىتىردى.

　　كەلۋ قاينارى: حالىق تورابى