بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار

حالىق تورابى>>قوعام

مەديتسينالىق ەمدەۋ مەن قازاق شيپاگەرلىگىنە زور ۇلەس قوسقان قاجىرلى مامان

  اقىلباي مۇقامەتالي ۇلى

2016.11.14 14:02     كەلۋ قاينارى : شينجياڭ گازەتى

  مەديتسينا سىندى مول كاسىپتىك ءبىلىم مەن نازىك تەحنيكالىق شەبەرلىكتى، حالىقپاي ىزدەنۋدى قاجەت ەتەتىن وسى ءبىر اسا كۇردەلى عىلىم سالاسىندا قۇلشىنا ەڭبەكتەنىپ، اجالعا اراشاشى بولعان، ءوزىنىڭ زەردەلى، شوگەلدىگىمەن مەديتسينا عىلىمىنىڭ سەركەسىنە اينالعان ۇلتىمىزدىڭ ناعىز دارىندى، تاجىريبەلى شيپاگەرلەرى بارشىلىق، انە سولاردىڭ ءبىرى نەرۆ اۋرۋلارىنىڭ مايتالمان مامانى، ىلە وبلىستىق جۇڭگوشا شيپاحانانىڭ ورىنباسار باستىعى، قازاق شيپاگەرلىگىن زەرتتەۋ ورنىنىڭ باستىعى ەركىن نۇردانبەك ۇلى. ءوز ورتاسىنان وزا شاۋىپ، ەمدەۋ شەبىنىڭ ناعىز سەتەرىنە اينالعان ول ىلە وبلىستىق دوستىق شيپاحاناسىندا ۇزاق جىل شيپاگەر بولىپ قىزمەت ىستەۋ بارىسىندا 25 مىڭ ادامعا ۇلكەندى - كىشىلى وپەراتسيا جاسادى، 1250 سالماقتى ناۋقاستى ءساتتى ەمدەپ اجالدان اراشالادى. ەرەكشە قيىنشىلىعى بار ناۋقاستارعا 25 مىڭ يۋان جىلۋ اتاپ، قيىنشىلىق قىسپاعىندا قالعان جاندارعا شەكسىز مەيىرىمدىلىك باعىشتادى.

  بۇل كۇندەرى مەديتسينا عىلىمىنىڭ بەلدى مامانىنا اينالىپ، ساماي شاشى اعارعانشا ەمدەۋ - دەنساۋلىق ساقتاۋ ىستەرىنە تەڭدەسسىز ۇلەس قوسىپ كەلە جاتقان ەركىن نۇردانبەك ۇلى تەكەستەي كورىكتى مەكەننەن تۇلەپ ۇشقان تاستۇلەك. 1984 - جىلى ۋنيۆەرسيتەتتەن ءبىتىرۋ ديپلومىن اسا جوعارى ناتيجەمەن قولعا كەلتىرۋمەن بىرگە، مەكتەپ بويىنشا ۇزدىك ستۋدەنت بولىپ تا باعالانعان ول سول جىلى ءبىر تۇتاس ءبولىس بويىنشا ىلە وبلىستىق دوستىق شيپاحاناسىنا قىزمەتكە ورنالاسىپ، كۇدىرگە تولى شيپاگەرلىك ساپارىن باستاپ كەتتى. ەرەكەڭ شيپاگەرلىك ءتارتىپ بويىنشا ءاربىر كاسىپتىك بولىمدەردى اينالىپ ناۋقاس كورگەن كەزدەرىندە قىزمەتتى اسا شوگەلدىكپەن ىستەپ كاسىپتىك بىلىمدەردى قۇلشىنا ۇيرەندى، ءوزىنىڭ جۇمىسقا ەلپەك، تىرىسشاڭدىعى ارقىلى ءار بولىمدەگى جەتەكشى شيپاگەرلەردىڭ بىردەن نازارىن اۋدارىپ، ولاردىڭ ىقىلاستى ءىلتيپاتىنا بولەندى. ءشۋ دەگەندە - اق وزىندىك دارىندىلىق بايقاتىپ، شيپاگەرلىكتىڭ كاسىپتىك تولىمدىلىق دارەجەسىن وپ - وڭاي الىپ ۇلگىرگەن ول ىلگەرىندى - كەيىندى سىرتقى اۋرۋلار ءبولىمى، نەسەپ سىرتقى اۋرۋلار ءبولىمى، سۇيەك سىرتقى اۋرۋلار ءبولىمى مەن نەرۆ سىرتقى اۋرۋلار بولىمدەرىندە شيپاگەر جانە ورىنباسار جاۋاپتى شيپاگەر سىندى مىندەتتەردى وتەۋ بارىسىندا جالپى سىرتقى اۋرۋلار بولىمدەگى كاسىپ تۇرلەرىنە بارىنشا توسەلىپ، پىسىپ جەتىلدى. اسىرەسە، نەرۆ سىرتقى اۋرۋلارىنا ايرىقشا جەتىك ەدى، ول نەرۆ سىرتقى اۋرۋلار بولىمىندە تۇرعاندا كۇندىز - ءتۇنى قىزمەت ىستەپ، قاشاندا سىرقاتتاردىڭ قاسىندا بولىپ، ۇزدىكسىز تاجىريبە توپتاپ، مەڭگەرۋشى شيپاگەر دارەجەسىنە دەيىن جوعارىلادى. اۋرۋلار ءۇشىن بار پەيىلىمەن قىزمەت وتەپ، ىلە وبلىسى كولەمىندەگى ەڭ تاڭداۋلى شيپاگەر دەگەن داڭققا دا يە بولدى. مىنە وسىنداي مەديتسينا سالاسىنا سىڭىرگەن مول ەڭبەگى مەن قۇندى ەمدەۋ تاجىريبەلەرىنىڭ، يگەرگەن ۇشان - تەڭىز مەديتسينالىق ءبىلىمىنىڭ ارقاسىندا 1993 - جىلى تەتە اعا شيپاگەر اتاعىن العان ەرەكەڭ 1998 - جىلى بۇكىل دۇنيە جۇزىندەگى نەرۆ اۋرۋى ماماندارى باس قوسقان يتاليانىڭ ۆەنا قالاسىنداعى نەرۆ قيروك عىلمي تالقى جيىنىنا دا داڭقپەن قاتىناسىپ،ءوزىنىڭ «شۇعىل حاراكتەرلى مي زاقىمدالۋعا 26 ءتۇرلى دياگنوز قويىپ ەمدەۋ» جونىندەگى عىلمي ماقالاسىن شەتەل ساحناسىندا وقىسا، 2004 - جىلى «ديابەت اۋرۋىن كلينيكالىق زەرتتەۋ» اتتى عىلمي ەڭبەگى ىلە وبلىستىق عىلىم - تەحنيكا كوميتەتى جاعىنان ىلە وبلىسىنىڭ عىلىم - تەحنيكا جەتىستىگى ەتىپ تۇراقتاندىرىلىپ، تىزىمگە الدىرۋعا رۇقسات ەتىلدى. نەرۆ، مي سىرتقى اۋرۋلارىنا وپەراتسيا جاساۋ بارىسىنداعى تاجىريبەلەرىن قورىتىندىلاپ جازعان 10عا جۋىق عىلمي ماقالاسى ەلىمىز ءىشى - سىرتىنداعى عىلمي جۋرنالداردا جاريالاندى. سونىمەن بىرگە، وبلىس جاعىنان تالاي رەت ۇزدىك قىزمەتكەر، ۇزدىك پارتيا مۇشەسى بولىپ ماراپاتتالىپ، داڭق تورىنەن ورىن الدى. جوعارى ورىننىڭ ۇيعارىمى بويىنشا 2005 - جىلدان بەرى ىلە وبلىستىق جۇڭگوشا شيپاحانانىڭ ورىنباسار باستىعى بولىپ مىندەت اتقارىپ كەلەدى.

  ەركىن تەك ەمدەۋ سالاسىنا عانا ەمەس، قازاق شيپاگەرلىگىن زەرتتەپ، دامىتۋعا دا ەرەكشە ەسە قوستى. مۇندا ول حالىق اراسىنداعى قازاق شيپاگەرلىگىنە قاتىستى ماتەريالداردى ىزدەپ تاۋىپ، رەتتەپ جيناقتادى، قاتىستى زەرتتەۋلەر الىپ باردى. تالاي رەتكى وبلىس كولەمىندەگى ۇلكەن جيىنداردا قازاق شيپاگەرلىگى جونىندە ارناۋلى ءسوز سويلەپ، ۇگىت جاساۋ ارقىلى جوعارى ورىن باسشىلارى دا قازاق شيپاگەرلىگىنە ايرىقشا كوڭىل ءبولىپ، ءمان بەرەتىن ەتتى. ىشكى ولكەلەردەگى عىلمي تالقى جيىندارىنا سان مارتە قاتىناسىپ، لەكسيا جاساپ، قازاق شيپاگەرلىگىن ەلىمىز ۇلتتارىنا ۇگىتتەپ، ونى مەملەكەت تانيتىن دارەجەگە جەتكىزدى، مەملەكەت جاعىنان بەرىلگەن «قازاق شيپاگەرلىگىن مەديتسينا سالاسىندا قولدانۋ» كۋالىگىن دە قولعا كەلتىردى. ءسويتىپ، قازاق ۇلتىن مەملەكەت مويىندايتىن «از ۇلتتاردىڭ شيپاگەرلىگىن مەديتسينا سالاسىنا قولدانۋ» كۋالىگىن العان ەلىمىزدەگى 7 ۇلتتىڭ قاتارىنا قوستى. ىلە وبلىسى ورتالىعىندا قازاق ءشوپ ءدارى زەرتتەۋ ورنىن قۇرىپ، قىزمەتكەرىن تولىقتاپ، زەرتتەۋ جۇمىسىن جۇرگىزدى. قازاق ەمشىلىگى شيپاحاناسىن قۇردى. قازاق ءشوپ ءدارى زەرتتەۋ ورنىنا ارناۋلى جەر الۋ ءۇشىن تىنباي شاپقىلاپ، جوعارى ورىندارمەن بايلانىس ورناتۋ ارقىلى قۇلجا قالاسىنداعى ەكونوميكالىق اشۋ رايونىنان 87 مۋ جەر شەشىم ەتكىزىپ، وعان 21 قاباتتىق ۋنيۆەرسال شيپاحانا سالدىرتتى. شيپاحانانىڭ قۇرىلىس چەرتوجى مەن قاتىستى راسمياتتارىن دا تۇگەل ءوز قولىمەن ءبىتىردى. ول 2008 - جىلدان باستاپ شينجياڭ مەديتسينا ۋنيۆەرسيتەتىنىڭ جۇڭگوشا - باتىسشا دارىگەرلىگى بىرلەستىرىلگەن كاسىبىنەن اسپيرانت تاربيەلەۋ مىندەتىن دە ۇستىنە الدى، مەملەكەتتىك دەنساۋلىق ساقتاۋ مينيسترلىگى جاعىنان قازاق شيپاگەرلەرىنىڭ تولىمدىلىعىن تەكسەرۋ گرۋپپاسىنىڭ مۇشەلىگىنە ۇسىنىس ەتىلدى ءارى وسى گرۋپپانىڭ تاقىرىپ بەلگىلەۋىنە قاتىستى. 2012 - جىلى جاپونيا، كورەيا، تۇركيا، جۇڭگو سىندى 6 ەلدەن ۋاكىل قاتىناسقان قازاقستانداعى حالىقارالىق قازاق شيپاگەرلىگى عىلمي تالقى جيىنىندا وبلىسىمىزدىڭ «قازاق شيپاگەرلىك - دارىگەرلىك قىزمەتى» جونىندە بايانداما جاساپ، كۇشتى اڭىس قوزعادى. ونىڭ جەتەكشىلىگىندە ىلە، التاي، تارباعاتاي وڭىرىندەگى قازاق شيپاگەرلىگى ماماندارى باس قوسقان عىلمي تالقى ءماجىلىسى تالاي مارتە وتكىزىلىپ،ءوزارا تاجىريبە الماستىرىلدى. ەكى مارتە قازاق شيپاگەرلىك - دارىگەرلىك عىلمي قوعامىنىڭ ءتوراعاسى بولىپ مىندەت وتەگەن ول ۇستەگى جىل ءۇش ايماقتان كەلگەن 280 نەشە قازاق شيپاگەرلىگى ماماندارى باس قوسقان عىلمي تالقى ءماجىلىسىن دە باس بولىپ ۇيىمداستىردى. قازاق شيپاگەرلىگىنە قوسقان وسىنداي زور ەڭبەگى ءۇشىن، ەرەكەڭ 2012 - جىلى شينجياڭ قازاق شيپاگەرلىگىنىڭ «ەرەكشە ۇلەس قوسۋ سيلىعىن» دا ەنشىلەگەن ەدى.
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.