بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى جۇڭگو كوممۋنيستىك پارتياسى اقپارات تورابى    

حالىق تورابى>>قوعام

تاباندىلىقپەن تابىسقا جەتكەن قاجىرلى انا

2017.02.22 14:58    

  «ەڭبەك ەتسەڭ ەرىنبەي، تويادى قارنىڭ تىلەنبەي» دەمەكشى، تەك ەرىنبەي ەڭبەكتەنىپ، ايانباي تەر توككەندە عانا دەربەس يگىلىك جاراتىپ، اشتى تەردىڭ ءتاتتى جەمىسىن كورە الاتىنىمىز حاق. انە، سونداي كۇن كورىستىڭ سارا جولىن جاپالى ەڭبەك ارقىلى سومداعان قاجىرلى دا قايسار انالاردىڭ ءبىرى–شاتاي مۇقامەتبەك قىزى. ول بوزا اشىتۋ سىندى حالقىمىزدىڭ ءداستۇرلى ونەرىن تىرشىلىك تىرەگى ەتىپ، ونى 24 جىل تاباندىلىقپەن جالعاستىرعان مايتالمان كاسىپكەر.

  بوزا جاساۋدىڭ شەبەرى شاتاي كۇنەس اۋدانى كەڭسۋ اۋىلى كەڭسۋ مال شارۋاشىلىق قىستاعىنىڭ تۇرعىنى. بۇرىن ونىڭ وتباسىنىڭ قيىنشىلىعى اۋىر ەدى. كۇيەۋى داۋلەت سالماقتى جۇرەك اۋرۋىنا شالدىققاندىقتان، اۋىر جۇمىس ىستەي المايتىن، ولار العاش وتاۋ بولىپ بولىنگەندە تۇراقتى ەگىستىك جەرى، بىرنەشە تۇياق مالدان باسقا تۇراقتى كىرىس قاينارى جوق بولاتىن. سول كەزدە ولار قايتىپ جان باعارىن بىلمەي داعدارىپ قالعان ەدى. سولايدا قيىننان جول تابا بىلگەن كورەگەن شاتاي جەڭگەي وتباسىندا بوسقا قاراپ وتىرعاندى ءجون كورمەي، جانباعىس ءۇشىن 1992–جىلدان باستاپ بوزا اشىتىپ ساتىپ، تىرشىلىك جولىندا تىربىندى. ول باستابىندا بوزانىڭ ءار كيلوگرامىن 80 تيىننان وتكىزدى، كەيىن ءار كيلوگرامى ەكى يۋانعا جوعارىلاعان سوڭ كۇنىنە 50 يۋاننان كىرىس كىرگىزىپ، كۇندەلىكتى شاي–تۇزىن اجىراتتى. باسقا كاسىپتىڭ ءجونى دە، ىڭعايى دا بولماعاندىقتان، شاتاي جەڭگەي كىرىسى ماردىمسىز بولسا دا بوزا اشىتۋ كاسىبىمەن ەرىنبەي ەڭبەكتەندى، ونى تۇرمىستى جاقسارتۋدىڭ تاماشا ءتاسىلى، كاسىپتەنۋدىڭ ۇتىمدى جولى ەتۋگە قۇلشىندى. العاشىندا ول وتباسىنداعىلاردى باعىپ–قاعۋ ءۇشىن، قىستا بوزا جاساپ ساتسا؛ ال جازدا سىرماق، تۇسكيىز، كەستە تىگىپ ساتتى، باسقالاردىڭ شومەسىن سالىپ، جۇگەرىن شوپتەسىپ كۇندىك ىستەگەن كەزدەرى دە بولدى. بوزا اشىتىپ ساتقان كەزدە ونىڭ ساپاسىنا، تازالىعى مەن دامدىلىگىنە بارىنشا ءمان بەردى. الارمانداردى وزىنە باۋراۋ ءۇشىن بوزاعا ىستەتىلەتىن جۇگەردى باسقالاردان مايلاپ العان ەگىستىك جەرگە مالدىڭ قيىن توگىپ ەگىپ، بوزانىڭ تابيعيلىعىن ارتتىردى. سوندىقتان دا قازىر ونىڭ اشىتقان بوزاسىن توي–تومالاق، ءتۇرلى باس قوسۋ وتكىزگەن، سوعىم شاي بەرگەندەر ارناۋلى بۇيىرتىپ ساتىپ الادى. مۇنان تىس، حانزۋ، قازاق، ۇيعۇر، حۇيزۋ ۇلتتارىنان دا ارناۋلى ىزدەپ كەلىپ كۇندەلىكتى بوزا ءىشىپ قايتاتىنداردىڭ دا اياعى ۇزىلمەيدى. كەڭسۋ مال شارۋاشىلىق قىستاعىنىڭ تۇرعىنى تۇرسىنبەك زەينەش ۇلى: «شاتاي جەڭگەيدىڭ اشىتقان بوزاسى شىنىندا كەرەمەت، بۇل كىسىلەر بوزاعا ەشقانداي قوسپا قوسپايدى، تازا دا ءدامدى. ونشاقتى جىلدان بەرى وسى ءبىر ءدامى ءتىل ۇيرەتىن تابيعي بوزادان اۋىز ءتيىپ كەلەمىن» دەيدى. بوزا اشىتۋدىڭ مايتالمانى شاتاي مۇقامەتبەك قىزى بۇل كۇندەرى بوزانىڭ ءار كيلوگرامىن 6 يۋاننان ساتىپ، ايىنا 3 مىڭ يۋاننان تازا كىرىس كىرگىزۋدە. ول بىلتىر جانە الدىڭعى جىلدارى ايلىق تازا كىرىسىن 5 مىڭ يۋاننان اينالدىرىپ كەلگەن، قازىر كەڭسۋ اۋىلىندا شاتاي سياقتى بوزا جاساپ كاسىپتەنىپ وتىرعان وتباسىنان ونشاقتىسى بار. تەك كەڭسۋ مال شارۋاشىلىق قىستاعىندا التى ديقان وتباسى بوزاحانا اشادى ەكەن.

  ءبىز وسى قايسار بوزاشى جەڭگەيدى ءۇي تولى الارماندارعا بوزا ساتىپ جىگى–جاپار بولىپ جاتقان جەرىنەن جولىقتىردىق. ول ءوزىنىڭ بوزا اشىتۋ ونەرى جونىندە توقتالعاندا: «بوزا اشىتۋدىڭ جۇمىسى كوپ، اۋىر كاسىپ، بوزانىڭ اشۋى، پىسىرۋى جاقسى بولماسا، اسىرەسە، تازالىعى جاقسى بولماسا، بوزادا وتپەيدى. ادەتتە بوزا جاقسى اشىپ، جاقسى پىسسا ءسال قىشقىل تارتادى دا، ءدامى ءتىل ۇيرەدى، الارماندار دا ۇناتىپ ىشەدى.

  ءبىز بوزانى جاسىل ءتۇستى تازا جۇگەرىنىڭ ۇنىنان جاسايمىز، مۇندا، جۇگەرىنىڭ ۇنىن اشىتقى قوسىپ يلەگەن سوڭ 5–4 ساعات اشىتادى، سوسىن قازانعا سالىپ، 3 ساعات مولشەرىندە اسىقپاي قايناتىپ پىسىرادى، بۇل بارىستا اعاش وتىن ىستەتكەن دۇرىس، سوندا بوزا كۇيمەي جاقسى پىسادى. بوزانى پىسىرىپ العان سوڭ، ءبىرازا سۋىتىپ بارىپ ۇلكەن كۇبىگە قويامىز دا، وعان ازىراق ءبيداي وندىرمەسىن قوسىپ، تاعى دا 11–12 ساعاتتاي اشىتامىز. بوزانى اشىتۋ ءۇشىن، ءسوزسىز، ءبيداي وندىرمەسىن قوسۋ كەرەك. ول ءۇشىن الدىمەن ءبيدايدى ءوندىرىپ الىپ، ونان سوڭ قايتادان كەپتىرەمىز دە زاۆودقا اپارىپ ۇن قىپ تارتقىزامىز. ادەتتە وندىرمەنى بوزانىڭ از–كوپتىگىنە قاراي لايىقتى مولشەردە تەڭشەپ قوسقان ءجون، قالىپتان تىس كوپ قوسۋعا بولمايدى. بوزانى اشىتىپ العان سوڭ قايتادان ءسۇزىپ تۇنباسىن ايىرىپ تاستايمىز دا، ءسولىن بوزا قىپ قۇيىپ الامىز. ەندىگى جەردە وسى بوزا اشىتۋ كاسىبىنىڭ كولەمىن كەڭەيتىپ، ارناۋلى ماركا شىعارۋدى كوزدەپ وتىرمىن. ويتكەنى بۇل شاعىن بوزاحانا ءبىزدىڭ كوپتەگەن قيىنشىلىعىمىزدى شەشىپ، تۇرمىس قاجەتىمىزدى قاناعاتتاندىردى. بوزا اشىتۋ ونەرىنىڭ ارقاسىندا ءبىر بالامدى ىشكى ولكەدەگى داشۋەدە، تاعى ءبىر بالامدى شينجياڭ پەداگوگيكا داشۋەسىندە وقىتىپ جاتىرمىن. كۇيەۋىمدى دە وسى بوزادان تاپقان اقشامەن ەمدەتىپ كەلەمىن، تۇرمىسىمىز بۇرىنعىدان كوپ جاقسى، ونەر ءبىزدى ورگە جەتەلەدى»،–دەدى. اقىلباي مۇقامەتالي ۇلى

  كەلۋ قاينارى: حۋيۇي تورابى
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
 
  بۇل حابارعا باعاڭىز
  • 1. جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
    2. قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
    3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
    4. ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
  • ورتالىق
  • ەل ءىشى
  • شينجياڭ
  • حالىقارا

سۋرەتتى حابار