اقساي اۋدانىنداعى ەڭدەر

2017.05.17 15:30   كەلۋ قاينارى : حالىق تورابى

　　مارالبەك ابدىكارىم ۇلى حابارلايدى. گانسۋ ولكەسى اقساي قازاق اۆتونوميالى اۋدانىنىڭ قازاق مۇراجايىنا بارا قالساڭىز، ۇزىندىعى 60 مەترلىك قازاقى ۇلگىدەگى كوزدىڭ جاۋىن الاتىن ادەمى سىرماقتى كورە الاسىز، مىنە بۇل شاڭحاي الەمدىك گەننيس رەكوردىنا ەنگىزىلگەن دۇنيەدەگى ەڭ ۇزىن سىرماق. ال وسى مۇراجايدا ساقتالعان ءمۇيىزىنىڭ ۇزىندىعى 147 سانتيمەترلىك ارقار باسى عالىمداردىڭ ساراپتاۋىمەن دۇنيە جۇزىندەگى ءمۇيىزى ەڭ ۇزىن ارقار باسى بولىپ تانىلۋدا.

　　شاڭحاي الەمدىك گەننيس رەكوردىنا ەنگەن دۇنيەدەگى ەڭ ۇلكەن كومەش اقساي اۋدانىندا. بۇل كومەش 2013 - جىلى 15 - قىركۇيەكتەن 17 - قىركۇيەككە دەيىن اقساي اۋدانىندا وتكىزىلگەن 9 - كەزەكتى قازاق كۇرەسىنىڭ ازيا جۇلدەلى جارىسىندا جۇرتقا تۇڭعىش رەت كورسەتىلگەن، كومەش اۋزىنىڭ ديامەترى 4.15 مەتر، كومەش استىنىڭ ديامەترى 3.47 مەتر، بيىكتىگى 0.365 مەتر. شاڭحاي الەمدىك گەننيس رەكوردىنا جولدانىپ، سول رەتكى جارىس كەزىندە شاڭحاي گەننيس رەكورد كۋالىگى تابىستالعان ەدى.

　　ال اقساي اۋدانىنىڭ ۇلتتىق سالت - سانا باقشاسىنا ات باسىن بۇرساڭىز، وندا ازياداعى ەڭ ۇلكەن قازاق ءۇي فورماسىنداعى قۇرىلىستى كورەسىز. بۇل قۇرىلىس زەرتتەرمەندەردىڭ ساراپتاۋىمەن قازىر ازياداعى ەڭ ۇلكەن قازاق ءۇي بولىپ مويىندالۋدا.

　　سۋرەتتەردى ماقان قاپاس ۇلى تۇسىرگەن. سۋرەتتە: 1. شاڭحاي الەمدىك گەننيس رەكوردىنا كىرگىزىلگەن قازاقى ۇلگىدەگى ەڭ ۇزىن سىرماق (سول جاقتاعى باسقى سۋرەت)؛ 2. دۇنيە جۇزىندەگى ءمۇيىزى ەڭ ۇزىن ارقار باسى (سول جاقتاعى استىڭعى سۋرەت)؛ 3. شاڭحاي گەننيس رەكوردىنا ەنگەن دۇنيە جۇزىندەگى ەڭ ۇلكەن كومەش (وڭ جاقتاعى باسقى سۋرەت)؛ 4. ازياداعى ەڭ ۇلكەن قازاق ءۇي (وڭ جاقتاعى استىڭعى سۋرەت)؛

　　كەلۋ قاينارى: حالىق تورابى