شي جينپيڭ كامبودجا حالىق پارتياسىنىڭ ءتوراعاسى، كەڭەس پالاتاسىنىڭ ءتوراعاسى حۇڭسىنمەن كەڭەس وتكىزدى

12 - ايدىڭ 3 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە كامبودجا حالىق پارتياسىنىڭ ءتوراعاسى، كەڭەس پالاتاسىنىڭ ءتوراعاسى حۇڭسىنمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 12 - ايدىڭ 3 - كۇنى، بەيجيڭ (ءتىلشى لي شين - ي). 12 - ايدىڭ 3 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە كامبودجا حالىق پارتياسىنىڭ ءتوراعاسى، كەڭەس پالاتاسىنىڭ ءتوراعاسى حۇڭسىنمەن كەڭەس وتكىزدى.

شي جينپيڭ مىنالاردى ءبىلدىردى: جۇڭگو مەن كامبودجانىڭ مىزعىماس دوستىعى ەكى ەل حالىقتارىنىڭ ورتاق مۇددەسىنە بۇكىلدەي ۇيلەسەدى. جۇڭگو جاق كامبودجانى باستان - اياق توڭىرەكتىك ديپلوماتيانىڭ ءتۇيىندى بەتالىسى ەتەدى، كامبودجا جاقپەن قول ۇستاسا وتىرىپ جوعارى ساپالى، جوعارى دەڭگەيلى، جوعارى ولشەمدى جاڭا داۋىردەگى جۇڭگو - كامبودجا تاعدىرلاس ورتاق تۇلعاسىن قالىپتاستىرۋدى قالايدى. ەكى جاق بىرىنشىدەن، ءبىرىن - ءبىرى تاباندىلىقپەن قولداپ، مىزعىماس بەرىك دوستىقتى بەكەمدەۋى كەرەك. جۇڭگو جاق كامبودجانىڭ مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن باتىل قولدايدى. ەكىنشىدەن، اۋىس - كۇيىستى، ءوزارا ۇلگى الۋدى تەرەڭدەتىپ، دامۋ مەن گۇلدەنۋگە بىرگە تالپىنۋ كەرەك. جۇڭگو كوممۋنيستىك پارتياسى كامبودجا حالىق پارتياسىمەن ستراتەگيالىق قارىم - قاتىناستى جانە كادرلاردى باۋلۋ سەلبەستىگىن كۇشەيتىپ، كامبودجانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن قاراستىرۋىنا دەم بەرۋدى قالايدى. ۇشىنشىدەن، سەلبەستىك ورايىن يگەرىپ، تەڭ يگىلىككە كەنەلۋدىڭ جاڭا جاعدايىن اشۋ كەرەك. جۇڭگو جاق كامبودجا جاقپەن جاڭا ۇلگىدەگى تاعدىرلاس ورتاق تۇلعا ارەكەت جوسپارىن تياناقتاندىرۋدى نەگىزگى جەلى ەتىپ، ”گاۋھاردىڭ التى جاعى“ سەلبەستىك جۇلگەسىن ۇزدىكسىز تولىقتاپ، ”ونەركاسىپتى دامىتۋ ءدالىزى“ مەن ”بالىق پەن كۇرىش ءدالىزى“ سەلبەستىك جوباسىن جاساپ، ءتۇيىندى سەلبەستىك نىساندارىنىڭ تياناقتانىپ، ونىمدىلىك كورسەتۋىن ىلگەرىلەتىپ، ”ءبىر بەلدەۋ، ءبىر جولدى“ بىرگە قۇرۋ باستاماسى مەن كامبودجانىڭ ”بەس بۇرىش“ ستراتەگياسىنىڭ جوعارى ساپادا ۇشتاسۋىنا دەم بەرۋدى قالايدى.

شي جينپيڭ بىلاي دەپ اتاپ كورسەتتى: قازىر حالىقارالىق جاعدايدا وزگەرىس پەن بىلىقپالىق ارالاسىپ، دۇنيە جۇزىلىك سىن - سايىس تولاسسىز تۋىلىپ، ءار ەلدىڭ توتەپ بەرۋى مەن تاڭداۋىن سىناۋدا. جۇڭگو مەن كامبودجا دۇنيە ءجۇزىنىڭ بەيبىتشىلىك كۇشى، دامۋ كۇشى، العا باسۋ كۇشى بولۋعا كۇش سالادى. جۇڭگو جاق كامبودجانىڭ حالىقارالىق جانە وڭىرلىك ىستەردە اناعۇرلىم زور رول اتقارۋىن ۇزدىكسىز قولداپ، ”جەر شارىنىڭ وڭتۇستىگىندەگى“ كۇشتەردى ۇلعايتادى، شىعىس وڭتۇستىك ازيا ەلدەرى وداعىنىڭ ستراتەگيالىق دەربەستىككە تاباندى بولىپ، وزەكتى ورنىن قورعاۋىن قولدايدى، سىرتقى كۇشتەردىڭ قىرعي قاباقتىق وي جەلىسىن وسى وڭىرگە ەنگىزۋىنە باتىل قارسى تۇرىپ، شىعىس وڭتۇستىك ازيا ەلدەرى وداعىنىڭ ءبىر تۇلعالانۋى مەن ورتاق تۇلعا قۇرىلىسىن تاباندىلىقپەن ىلگەرىلەتەدى. جۇڭگو جاق كامبودجامەن جولىن وزگەرتپەۋ، مۇراتىنان اينىماۋ بەكىمىن نىعايتىپ، تومەنگى شەكتە ويلاۋدى كۇشەيتىپ، سەلبەستىك پەن سايكەسۋدى كۇشەيتىپ، ءتۇرلى حاۋىپ - قاتەرگە بىرگە توتەپ بەرۋدى قالايدى.

حۇڭسىن مىنالاردى ءبىلدىردى: كامبودجا مەن جۇڭگونىڭ دوستىعىن ەكى جاقتىڭ اعا بۋىن باسشىلارى بىرگە ورناتىپ، تاريح پەن ۋاقىتتىڭ سىنىنان ءوتتى، كامبودجا مەن جۇڭگونىڭ تاعدىرلاس ورتاق تۇلعاسى ەكى جاقتىڭ ورتاق مۇددەسىنە ۇيلەسەدى. كامبودجا جاق جۇڭگونىڭ ۇزاق ۋاقىتتان بەرى كامبودجانىڭ ساياسي، ەكونوميكالىق، قوعامدىق دامۋىنا كورسەتكەن قاستەرلى قولداۋى مەن كومەگىنە العىس ايتادى، جۇڭگو − كامبودجانىڭ ەڭ سەنىمدى دوسى. جۇڭگومەن دوستىق ورناتۋ − كامبودجا حالىق پارتياسىنىڭ بەرىك ساياسي ورتاق تانىمى، كامبودجا باسشىلارىنىڭ بۋىن جاڭالاۋىنا بولا ەشقانداي وزگەرىس تۋىلمايدى. كامبودجا جاق ءبىر جۇڭگو پرينسيبىن ۇزدىكسىز باتىل اتقارادى، جۇڭگو جاقتىڭ وزەكتى مۇددەسىن قورعاۋىن قولدايدى، جۇڭگو جاقپەن پارتيالار ارا بارىس - كەلىستى جاپپاي كۇشەيتىپ، ساياسي ءوزارا سەنىمدىلىكتى تەرەڭدەتىپ، ءار سالاداعى ناقتى ىستەر سەلبەستىگىن جەبەپ، جاستار، گۋمانيتارلىق اۋىس - كۇيىسىن جيىلەتىپ، ەكى ەل حالىقتارىن اناعۇرلىم تاماشا باقىتقا كەنەلتۋدى قالايدى. كامبودجا جاق جۇڭگو جاقپەن حالىقارالىق، وڭىرلىك ىستەردە سايكەسۋدى كۇشەيتۋدى قالايدى.

ساي چي، ۋاڭ ي كەڭەسكە قاتىناستى.

كەلۋ قاينارى: حالىق تورابى