شي جينپيڭ نەپالدىڭ زۇڭليى وليمەن كەزدەستى

12 - ايدىڭ 3 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن نەپالدىڭ زۇڭليى وليمەن كەزدەستى.

سۋرەتتى شينحۋا اگەنتتىگىنىڭ ءتىلشىسى ياۋ داۋەي تۇسىرگەن

شينحۋا اگەنتتىگى، 12 - ايدىڭ 3 - كۇنى، بەيجيڭ (ءتىلشى ما جويان). مەملەكەت ءتوراعاسى شي جينپيڭ 12 - ايدىڭ 3 - كۇنى تۇستەن كەيىن بەيجيڭدەگى دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن نەپالدىڭ زۇڭليى وليمەن كەزدەستى.

شي جينپيڭ وليدىڭ ۇزاق ۋاقىتتان بەرى جۇڭگو مەن نەپالدىڭ دوستىق ىستەرىنە باتىل كۇش سالعاندىعىن القاپ، بىلاي دەپ اتاپ كورسەتتى: جۇڭگو مەن نەپال − تاۋ - سۋى جالعاسقان جاقسى كورشىلەر، جاقسى دوستار، جاقسى سەرىكتەر، ەكى ەل باستان - اياق ءبىر - بىرىنە شىنايى مامىلە جاساپ، ءبىرىن - ءبىرى قۇرمەتتەپ، ءبىرىن - ءبىرى قولداپ، ەكى جاقتى قارىم - قاتىناستىڭ اقاۋسىز، ورنىقتى دامۋىن ساقتادى. كەلەر جىل − جۇڭگو مەن نەپالدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعى. جۇڭگو جاق جۇڭگو - نەپال قارىم - قاتىناسىن توڭىرەكتىك ديپلوماتيانىڭ ماڭىزدى ورنىنا قويادى، نەپال جاقپەن ديپلوماتيالىق قارىم - قاتىناس ورناتۋداعى اۋەلگى ماقساتتان جازباي، ءداستۇرلى دوستىقتى بەكەمدەپ، جۇڭگو مەن نەپالدىڭ دامۋعا جانە گۇلدەنۋگە بەت العان ۇرپاقتان - ۇرپاققا جالعاسقان دوستىق ستراتەگيالىق سەلبەستىك سەرىكتەستىك قارىم - قاتىناسىنىڭ جاڭا، اناعۇرلىم زور دامۋعا قول جەتكىزۋىن ىلگەرىلەتۋدى قالايدى.

شي جينپيڭ بىلاي دەپ باسا دارىپتەدى: جۇڭگو جاق نەپالدىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىن تاڭداۋىنا قۇرمەت ەتەدى، نەپالدىڭ مەملەكەتتىڭ تاۋەلسىزدىگىن، يەلىك ۇقىعىن جانە تەرريتوريا تۇتاستىعىن قورعاۋىن قولدايدى، نەپال جاقپەن ستراتەگيالىق ءوزارا سەنىمدىلىكتى ۇزدىكسىز بەكەمدەپ، ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىرىن - ءبىرى باتىل قولداۋدى قالايدى. جۇڭگو مەن نەپالدىڭ گيمالاي اتتاعان سترەولدى بايلانىس تورابى قۇرىلىسى قيالدان بىرتىندەپ رەالدىققا اينالۋدا. جۇڭگو جاق نەپال جاقپەن ناقتى سەلبەستىكتى ۇزدىكسىز تەرەڭدەتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، وتكەل، قاتىناس، ەلەكتر تورى، حابارلاسۋ سياقتى ۇلاستىرۋ - تۇتاستىرۋ سەلبەستىگىن كۇشەيتىپ، نەپالدىڭ ”قۇرلىقتىق تۇيىق ەلدەن“ ”قۇرلىقتاردى تۇتاستىراتىن ەلگە“ قاراي ويىسۋىن جەدەلدەتۋىنە كومەكتەسىپ، قولىنان كەلگەنشە نەپالدىڭ ەكونوميكالىق، قوعامدىق دامۋىنا ۇزدىكسىز قولداۋ كورسەتۋدى، جۇڭگو كاسىپورىندارىن نەپالعا بارىپ قارجى قوسىپ، شارۋاشىلىعىن گۇلدەندىرۋگە شابىتتاندىرۋدى قالايدى. جۇڭگو جاق نەپالدىڭ جۇڭگودا 2025 - جىلدى ”نەپال ساياحات جىلى“ دەپ جاريالاۋىن قولدايدى، نەپالدىق دوستاردىڭ جۇڭگوعا كەلىپ ساۋدامەن شۇعىلدانۋىن، ساياحاتتاۋىن، وقۋعا ءتۇسۋىن قارسى الادى. جۇڭگو جاق تا نەپال جاقپەن بىرلەسكەن مەملەكەتتەر ۇيىمى سياقتى كوپ جاقتى سايكەسۋدى، سەلبەسۋدى كۇشەيتىپ، قالىڭ وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.

ولي مىنالاردى ءبىلدىردى: ءتوراعا شي جينپيڭنىڭ ءدانىشپان باسشىلىعىندا، جۇڭگو وراسان زور دامۋ جەتىستىكتەرىنە قول جەتكىزدى، مۇنى ادامزاتتىڭ العا باسۋ تاريحىنداعى كەرەمەتتەر دەۋگە بولادى، جۇڭگونىڭ دوسى رەتىندە، نەپال جاق مۇنى ماقتانىش ەتىپ، بارىنشا شابىت الىپ، جۇڭگونىڭ تابىستى تاجىريبەلەرىن ۇيرەنىپ، ۇلگى الىپ، ءوزىنىڭ دامۋىن، گۇلدەنۋىن جۇزەگە اسىرۋدى ءۇمىت ەتەدى. نەپال مەن جۇڭگو اراسىندا دوستىق قانا بار، ماسەلە جوق، ەكى ەل قارىم - قاتىناسى دوستىقتى، تەڭدىكتى جانە قۇرمەتتى نەگىز ەتەدى. جۇڭگو جاقتىڭ قىسىلعاندا قول ۇشىن بەرىپ، نەپالعا ءتۇرلى جاقتان قاستەرلى قولداۋ كورسەتكەندىگىنە، نەپالدىڭ ”قۇرلىقتىق تۇيىق ەلدەن“ ”قۇرلىقتاردى تۇتاستىراتىن ەلگە“ اينالۋىنا كومەكتەسكەندىگىنە العىس ايتامىن. نەپال جاق ”ءبىر بەلدەۋ، ءبىر جولدى“ بىرگە قۇرۋعا ۇزدىكسىز بەلسەنە ات سالىسۋدى قالايدى، اناعۇرلىم كوپ جۇڭگو كاسىپورىندارىنىڭ نەپالعا بارىپ قارجى قوسىپ، ءار سالاداعى ناقتى سەلبەستىكتى تەرەڭدەتۋىن قارسى الادى. شيزاڭ مەن تايۋان − جۇڭگو تەرريتورياسىنىڭ ايرىلماس ءبىر بولەگى، نەپال ءبىر جۇڭگو پرينسيبىنە بۇلجىماي تاباندى بولادى، ءارقانداي كۇشتىڭ نەپال تەرريتورياسىنان پايدالانىپ جۇڭگوعا قارسى قيمىلمەن شۇعىلدانۋىنا، جۇڭگونىڭ مۇددەسىنە زيان جەتكىزۋىنە جول بەرمەيدى، ءارقانداي شەتەلدىڭ جۇڭگونىڭ ىشكى ىسىنە كيلىگۋىنە قارسى تۇرادى. جۇڭگو العا قويعان دۇنيە جۇزىلىك دامۋ باستاماسى سياقتى جەلىلەس ماڭىزدى باستامالار ادامزاتتىڭ قازىرگى كۇردەلى حالىقارالىق جاعداي مەن دۇنيە جۇزىلىك سىن - سايىسقا بىرگە توتەپ بەرۋىنە ءتيىمدى، نەپال جاق جۇڭگو جاقپەن كوپ جاقتى سەلبەستىكتى كۇشەيتىپ، دۇنيە ءجۇزىنىڭ وڭتۇستىگىنىڭ ورتاق مۇددەسىن قورعاۋدى قالايدى.

ەكى جاق «جۇڭحۋا حالىق رەسپۋبليكاسى مەن نەپالدىڭ بىرلەسكەن مالىمدەمەسىن» جاريالادى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى