ديڭ شۋەشياڭ دۇنيە جۇزىلىك ەكونوميكا تالقى مىنبەرىنىڭ 2025 - جىلعى جىلدىق ماجىلىسىنە قاتىناستى ءارى ارناۋ ءسوز سويلەدى

1 - ايدىڭ 21 - كۇنى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ داۆوستا دۇنيە جۇزىلىك ەكونوميكا تالقى مىنبەرىنىڭ 2025 - جىلعى جىلدىق ماجىلىسىنە قاتىناسىپ، ”كوپ جاقتىلىقتىڭ دۇرىس جولىنان جازباي، اشىق، سيىسىمدى دامۋدى جەبەيىك“ دەگەن تاقىرىپتا ارناۋ ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

«حالىق گازەتى»، 1 - ايدىڭ 21 – كۇنى، شۆەتساريا داۆوس (تىلشىلەر يان حۋان، شۇي شين). 1 - ايدىڭ 21 - كۇنى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ داۆوستا دۇنيە جۇزىلىك ەكونوميكا تالقى مىنبەرىنىڭ 2025 - جىلعى جىلدىق ماجىلىسىنە قاتىناسىپ، ”كوپ جاقتىلىقتىڭ دۇرىس جولىنان جازباي، اشىق، سيىسىمدى دامۋدى جەبەيىك“ دەگەن تاقىرىپتا ارناۋ ءسوز سويلەدى.

ديڭ شۋەشياڭ بىلاي دەدى: 8 جىلدىڭ الدىندا ءدال وسى ارادا، جۇڭگونىڭ مەملەكەت ءتوراعاسى شي جينپيڭ ماڭىزدى ءسوز سويلەپ، ەكونوميكانىڭ جاھاندانۋىن قولداۋ، كوپ جاقتىلىقتى قورعاۋ جانە امالياتتا ايگىلەۋ، كوركەم دۇنيە ءجۇزىن بىرگە قۇرۋ جونىندە ەڭ كۇشتى ءۇن قاتىپ، دۇنيە جۇزىلىك جونگە سالۋدى كەمەلدەندىرۋ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ جونىندە ايقىن جاۋاپ بەرىپ، حالىقارالىق قوعامعا ماڭىزدى جەتەكشىلىك ازىرلەدى. قازىر دۇنيە جۇزىندەگى 100 جىلدىق وزگەرىس جاعدايى جەدەل قۇبىلىپ، دۇنيە ءجۇزىن جونگە سالۋ جۇيەسى تەرەڭ رەتتەلىپ، ادامزات قوعامى تاعى دا شەشۋشى جول ايىرىعىنا كەلدى. ءبىز ءتوراعا شي جينپيڭنىڭ ماڭىزدى ءسوزىن قايتا ەسكە الىپ، سەنىمدى بەكەمدەپ، ىنتىماقتاسا سەلبەسىپ، بوران - شاشىندا تىزە قوسا العا باسىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، دۇنيە جۇزىنە اناعۇرلىم كوپ ورنىقتىلىق پەن تۇراقتىلىق ۇستەپ، بىرگە داميتىن ادىلەتتى دۇنيە ءجۇزىن قۇرۋىمىز كەرەك.

ديڭ شۋەشياڭ 4 ءتۇرلى ۇسىنىستى ورتاعا قويدى: ءبىرىنشى، ەكونوميكانىڭ جالپىعا ءتيىمدى، سيىسىمدى جاھاندانۋىن بىرگە ىلگەرىلەتىپ، جالپىعا ءتيىمدى جولمەن دامۋداعى قيىنشىلىقتى شەشىپ، سيىسىمدى بولۋ ارقىلى سەلبەستىكتىڭ كۇشىن توپتاپ، ءوزارا ءتيىمدى سەلبەستىكتىڭ تەڭ يگىلىككە كەنەلۋ، كوپ يگىلىككە كەنەلۋ جولىن تاۋىپ، ەكونوميكا جاھاندانۋىنىڭ ”بالكۇلشەسىن“ ءتىپتى دە ۇلكەيتىپ قانا قويماي، ءتىپتى دە جاقسى ءبولۋ كەرەك. ەكىنشى، ناعىز كوپ جاقتىلىقتى بىرگە قورعاپ جانە امالياتتا ايگىلەپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى باتىل قورعاپ، بىرگە اقىلداسۋ، بىرگە قۇرۋ، بىرگە يگىلىكتەنۋ سىندى دۇنيە جۇزىلىك جونگە سالۋ كوزقاراسىنا تاباندى بولىپ، ءار ەلدىڭ حالىقارالىق ىستەردە ۇقىق تەڭدىگىنە، وراي تەڭدىگىنە، ەرەجە تەڭدىگىنە شىنايى كەپىلدىك ەتىپ، اشىق، سيىسىمدى، كەمسىتپەيتىن حالىقارالىق ەكونوميكالىق سەلبەستىك ورتاسىن قالىپتاستىرۋ كەرەك. ءۇشىنشى، دۇنيە ءجۇزى ەكونوميكاسىنىڭ دامۋىنداعى جاڭا قوزعاۋشى كۇش، جاڭا باسىمدىقتى بىرگە سومداپ، سيفرلى داۋىردەگى ۇلاستىرۋ - تۇتاستىرۋدى ىلگەرىلەتىپ، عىلىم - تەحنيكادا جاڭالىق اشۋدىڭ حالىقارالىق سەلبەستىگىن كۇشەيتىپ، عىلىم - تەحنيكا جەتىستىكتەرىنىڭ بۇكىل ادامزاتقا باقىت جاراتۋىنا، اناعۇرلىم كوپ ەلدى سيفرلى ەكونوميكالىق دامۋدىڭ جۇردەك پويەزىنە تۇسىرۋىنە مۇمكىندىك جاساۋ كەرەك. ءتورتىنشى، كليمات وزگەرىسى، استىق حاۋىپسىزدىگى، ەنەرگيا حاۋىپسىزدىگى سياقتى كەلەلى دۇنيە جۇزىلىك سىن - سايىسقا بىرگە توتەپ بەرىپ، دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن قول ۇستاسا ىلگەرىلەتىپ، قيىنشىلىقتاردى جەڭۋدىڭ قۇدىرەتتى كۇشىن ۇيىستىرۋ كەرەك.

ديڭ شۋەشياڭ جۇڭگو ەكونوميكاسىنىڭ اۋقىمدىق ەرەكشەلىگىن تانىستىردى. ءبىرىنشى، جوعارى ساپالى دامۋ تىڭعىلىقتى ىلگەرىلەتىلدى. جۇڭگونىڭ ەكونوميكالىق اينالىمى جالپى جاقتان ورنىقتى بولدى، ورنىقتىلىق بارىسىندا ىلگەرىلەدى، ەكونوميكانىڭ جاڭا، كونە قوزعاۋشى كۇشتەرىنىڭ الماسۋ ونىمدىلىگى كورنەكتى بولدى، جاڭادان گۇلدەنگەن كاسىپ سالالارى مەن بولاشاق كاسىپ سالالارى قارىشتاپ دامىدى، جاڭاشا وندىرگىش كۇشتەر جەدەل قالىپتاسۋدا، كوپشىلىكتىڭ بارلىعى بولاشاقتاعى دامۋعا كامىل سەندى. جۇڭگو ماكرولىق ساياساتتىڭ تەبىنىن ونان ارى ارتتىرىپ، اناعۇرلىم بەلسەندى قازىنا ساياساتى مەن ۇيلەسىمدى كەڭ اقشا ساياساتىن اتقارىپ، ەكونوميكانىڭ ساپا جاعىندا ءونىمدى جوعارىلاۋى مەن مولشەر جاععىندا ۇيلەسىمدى ارتۋىن جۇزەگە اسىرۋدى ىلگەرىلەتەدى. ەكىنشى، جاسىل، تومەن كومىرتەكتى تيپكە بۇرىلىس جاساۋدى جاپپاي تەزدەتتى. جۇڭگو دۇنيە جۇزىندەگى ەڭ ۇلكەن، ەڭ كەمەلدى جاڭا ەنەرگيا كاسىپ سالاسى تىزبەگىن قۇردى. حالىقارالىق جاعداي قالاي وزگەرسە دە، جۇڭگونىڭ كليمات وزگەرىسىنە بەلسەنە توتەپ بەرۋ بەكىمى مەن ارەكەتى وزگەرمەيدى، كومىر قىشقىل گازىن تومەندەتىپ، لاستاۋدى ازايتىپ، جاسىل ارتۋدى كەڭەيتۋدى تاباندىلىقپەن سايكەستى ىلگەرىلەتەدى. ءۇشىنشى، رەفورما جاساپ، ەسىك اشۋدى ۇزدىكسىز اناعۇرلىم جوعارى دەڭگەيگە كوتەردى. جۇڭگو جوعارى دەڭگەيدەگى سوتسياليستىك بازار شارۋاشىلىعى ءتۇزىلىسىن ورناتىپ، اناعۇرلىم ءادىل، اناعۇرلىم ومىرشەڭ بازار ورتاسىن جاراتىپ، بايلىقتى جايعاستىرۋ ونىمدىلىگىن ەڭ زور دارەجەدە ساپالىلاندىرۋ جانە ونىمدىلىگىن ەڭ زور دارەجەدە ارتتىرۋ ءۇشىن قۇلشىنۋدا. جۇڭگونىڭ اشىق ەسىگى بارعان سايىن ايقارا اشىلادى، ساۋدا ورتاسى بارعان سايىن جاقسارادى. اناعۇرلىم كوپ شەتەل كاسىپورىندارىنىڭ جۇڭگوعا كەلىپ قارجى قوسىپ، شارۋاشىلىعىن شالقىتۋىن، ورايدان بىرگە يگىلىكتەنۋ بارىسىندا اناعۇرلىم جاقسى دامۋدى جۇزەگە اسىرۋىن قارسى الامىز.

ارناۋ سوزدەن كەيىن ديڭ شۋەشياڭ حالىقارالىق ءتارتىپ، جاساندى زەردە سياقتى ماسەلەلەر جونىندە دۇنيە جۇزىلىك ەكونوميكالىق تالقى مىنبەرىنىڭ قۇرۋشىسى، قوسىمشا اتقارۋشى ءتوراعاسى شۆابتىڭ سۇراۋىنا جاۋاپ بەردى.

ماجىلىسكە قاتىناسۋ كەزىندە ديڭ شۋەشياڭ سەربيانىڭ زۇڭتۇڭى ۆۋچيچ، ۆيەتنامنىڭ زۇڭليى فان ميڭجىڭ، دۇنيە جۇزىلىك ءبىلىم مەنشىك ۇقىعى ۇيىمىنىڭ باس القاسى دىڭ حۇڭسىن قاتارلىلارمەن كەزدەستى.

وسى كۇنى ديڭ شۋەشياڭ شيمىنزى سەرىكتەستىگىنىڭ، ABB توبىنىڭ، حيشى توبىنىڭ جاۋاپتىلارى قاتارلى حالىقارالىق ونەركاسىپ - ساۋدا سالاسىنداعى قايراتكەرلەرمەن ىشكەرىلەي پىكىرلەستى. ولار جۇڭگو ۇكىمەتىنىڭ جوعارى ساپالى دامۋدى جەبەۋ ءۇشىن قولدانعان ساياساتتىق شارالارىنا بەلسەندى باعا بەرىپ، جۇڭگونىڭ دامۋ بولاشاعىنا زور سەنىممەن قارايتىندىقتارىن، جۇڭگوعا ۇزدىكسىز نازار اۋدارىپ، جۇڭگوعا قارجى قوساتىندىقتارىن ءبىلدىردى.

كەلۋ قاينارى: حالىق تورابى