شي جينپيڭ تەلەگرامما جولداپ جين جىڭىننىڭ چاۋشيان ەڭبەك پارتياسىنىڭ باس شۋجيلىگىنە سايلانعاندىعىن قۇتتىقتادى

شينحۋا اگەنتتىگى، 2 - ايدىڭ 23 - كۇنى، بەيجيڭ. 2 - ايدىڭ 23 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ جين جىڭىنعا تەلەگرامما جولداپ، ونىڭ چاۋشيان ەڭبەك پارتياسىنىڭ 9 - قۇرىلتايىندا چاۋشيان ەڭبەك پارتياسىنىڭ باس شۋجيلىگىنە سايلانعاندىعىن قۇتتىقتادى.

شي جينپيڭ قۇتتىقتاۋ تەلەگرامماسىندا بىلاي دەدى: چاۋشيان پارتياسىنىڭ 8 - قۇرىلتايىنان بەرى باس شۋجي جين جىڭىن باستاعان چاۋشيان ەڭبەك پارتياسى ورتالىق كوميتەتى چاۋشيان حالقىن ىنتىماقتاستىرا باستاپ، قۇلشىنا كۇرەس جۇرگىزىپ، چاۋشياننىڭ سوتسياليستىك قۇرىلىس ىستەرىندە ۇزدىكسىز تىڭ تابىستارعا قول جەتكىزدى. جين جىڭىن جولداستىڭ چاۋشيان ەڭبەك پارتياسىنىڭ باس شۋجيلىگىنە تاعى دا سايلانۋى چاۋشيان پارتياسىنىڭ، ۇكىمەتىنىڭ، حالقىنىڭ باس شۋجي جولداسقا دەگەن وسكەلەڭ سەنىمى مەن شىنايى قولداۋىن ايگىلەدى. چاۋشيان پارتياسىنىڭ 9 - قۇرىلتايى چاۋشياننىڭ پارتيا مەن مەملەكەت ىستەرى بۇرىنعىعا مۇراگەر بولىپ، كەيىنگىگە جول اشۋدىڭ شەشۋشى كەزەڭىنە قادام تاستاعان كەزدە جەڭىسپەن اشىلدى، ماڭىزدى مانگە يە. باس شۋجي جولداس باستاعان چاۋشيان ەڭبەك پارتياسى ورتالىق كوميتەتىنىڭ پارمەندى باسشىلىعىندا، چاۋشيان پارتياسى مەن حالقىنىڭ وسى رەتكى ءماجىلىستى وراي ەتىپ، چاۋشياننىڭ سوتسياليزم ىستەرىندە ۇزدىكسىز جاڭا جاعداي اشۋدى ىلگەرىلەتۋىن تىلەيمىن.

جۇڭگو مەن چاۋشيان _ ءبىر - بىرىنە قارايلاساتىن سوتسياليستىك دوس كورشىلەر. جۇڭگو - چاۋشيان قارىم - قاتىناسىن ويداعىداي قورعاۋ، ويداعىداي بەكەمدەۋ، ويداعىداي دامىتۋ _ باستان - اياق جۇڭگو پارتياسى مەن ۇكىمەتىنىڭ بۇلجىماس باعىتى. تاياۋ جىلداردان بەرى باس شۋجي جولداسپەن كوپ رەت ديدارلاسىپ، جۇڭگو - چاۋشيان قارىم - قاتىناسىنىڭ جاقسى بەتالىسقا قاراي دامۋىنا پارمەندى جەتەكشىلىك ەتتىك. 100 جىلدىق وزگەرىس جاعدايىنىڭ جەدەل قۇبىلۋى، حالىقارالىق جاعدايدىڭ بىلىعۋى الدىندا، مەن باس شۋجي جولداسپەن بىرگە ەكى جاقتىڭ قاتىستى تاراۋلارى مەن جەرگىلىكتى ورىندارىنىڭ ءبىز كەلىسكەن ماڭىزدى ورتاق تانىمدى ويداعىداي تياناقتاندىرۋىنا جەتەكشىلىك ەتىپ، جۇڭگو - چاۋشيان دوستىعىنىڭ شىت جاڭا داستانىن جازىپ، ەكى ەلدىڭ سوتسياليستىك قۇرىلىس ىستەرىنە قىزمەت ەتىپ، ەكى ەل حالقىنىڭ ىرىس - قۇتى مەن دوستىعىن كۇشەيتىپ، ءوڭىردىڭ، ءتىپتى، دۇنيە ءجۇزىنىڭ بەيبىتشىلىگىن، ورنىقتىلىعىن جانە دامۋىن، گۇلدەنۋىن جەبەۋگە بەلسەندى ۇلەس قوسۋدى قالايمىن.