جۇڭحۋا حالىق رەسپۋبليكاسى قۇرىلعاندىعىنىڭ 77 جىلدىعىن قۇتتىقتاۋ قوناعاسى بەيجيڭدە وتكىزىلدى

جۇڭحۋا حالىق رەسپۋبليكاسى قۇرىلعاندىعىنىڭ 77 جىلدىعىن قۇتتىقتاۋ قوناعاسى 9 - ايدىڭ 30 - كۇنى كەشتە بەيجيڭ حالىق سارايىندا وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قوناعاسىعا قاتىناستى ءارى ماڭىزدى ءسوز سويلەدى.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

جۇڭحۋا حالىق رەسپۋبليكاسى قۇرىلعاندىعىنىڭ 77 جىلدىعىن قۇتتىقتاۋ قوناعاسى 9 - ايدىڭ 30 - كۇنى كەشتە بەيجيڭ حالىق سارايىندا وتكىزىلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلى پارتيا مەن مەملەكەت باسشىلارى جۇڭگولىق، شەتەلدىك قايراتكەرلەرمەن بىرگە ءبىر ارادا شاتتىقپەن باس قوسىپ، جۇڭحۋا حالىق رەسپۋبليكاسىنىڭ مەرەيتويىن بىرگە قۇتتىقتادى.

□ سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

شينحۋا اگەنتتىگىنىڭ 9 - ايدىڭ 30 - كۇنى بەيجيڭنەن بەرگەن حابارى. جۇڭحۋا حالىق رەسپۋبليكاسى قۇرىلعاندىعىنىڭ 77 جىلدىعىن قۇتتىقتاۋ قوناعاسى 9 - ايدىڭ 30 - كۇنى كەشتە حالىق سارايىندا وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قوناعاسىعا قاتىناستى ءارى ماڭىزدى ءسوز سويلەدى. ول بىلاي دەپ باسا دارىپتەدى: ۇزاق ۋاقىت ىزدەنىس جاساۋ جانە امالياتتان وتكىزۋ ارقىلى جۇڭگوشا سوتسياليستىك ءتۇزىم وراسان زور ارتىقشىلىعىن ايگىلەدى، ەلىمىزدىڭ مەملەكەتتى باسقارۋ جۇيەسى مەن باسقارۋ قابىلەتىن وسىزامانداندىرۋ دەڭگەيى ۇزدىكسىز جوعارىلادى، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ بوگەۋ بەرمەيدى. ءبىز سەنىمدى بەكەمدەپ، نىسانانى كوزدەپ، نىق قاداممەن بىرتىندەپ العا باسساق بولعانى، تابىس، ءسوز جوق، ۇلى جۇڭگو كوممۋنيستىك پارتياسىنا، ۇلى جۇڭگو حالقىنا، ۇلى جۇڭحۋا حالىق رەسپۋبليكاسىنا ءتان بولادى.

لي چياڭ قوناعاسىن باسقاردى، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قوناعاسىعا قاتىناستى. جۇڭگولىق، شەتەلدىك 800دەي قايراتكەر ءبىر ارادا شاتتىقپەن باس قوسىپ، جۇڭحۋا حالىق رەسپۋبليكاسىنىڭ مەرەيتويىن بىرگە قۇتتىقتادى.

حالىق سارايىنىڭ قوناعاسى زالىندا اشەكەيلى شامدار جارقىراپ، مەرەيلى دە دۋماندى مەرەكەلىك لەپ ەستى. ءتوراعالار مىنبەسىنىڭ جوعارعى جاعىنا ايبىندى مەملەكەت گەربى بيىك ءىلىنىپ، ”2026 − 1949“ دەگەن ۇلكەن ءارىپتى جىلناما نارت قىزىل تۋدىڭ ايشىقتاۋىندا ايرىقشا كوز تارتىپ تۇر.

ساعات 17دەن 30 مينۋت مولشەرىندە دۋماندى «قوناق قارسى الۋ مۋزيكاسى» ءۇنى ىشىندە شي جينپيڭ قاتارلى پارتيا مەن مەملەكەت باسشىلارى قوناعاسى زالىنا كىردى، بۇكىل زالدان قىزۋ شاپالاق ءۇنى كوتەرىلدى.

قوناعاسى باستالدى. بۇكىل زالداعىلار ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ءانىن اسقاقتاتا شىرقادى، ايبىندى «ەرىكتىلەر مارشى» ۇلكەن زالدى جاڭعىرتتى.

شي جينپيڭ ماڭىزدى ءسوز سويلەدى. ول الدىمەن پارتيا ورتالىق كوميتەتى مەن مەملەكەتتىك كەڭەس اتىنان بۇكىل ەلدەگى ءار ۇلت حالقىن، جۇڭگو حالىق ازاتتىق ارمياسىنىڭ كوماندير - جاۋىنگەرلەرىن جانە قارۋلى ساقشى بولىمدەرىنىڭ وفيتسەر - اسكەرلەرىن، ءارقايسى دەموكراتيالىق پارتيا - توپتارداعى جانە پارتيادا، توپتا جوق قايراتكەرلەردى مەرەكە بايلانىسىمەن قۇتتىقتادى، شياڭگاڭ ەرەكشە اكىمشىلىك رايونىنداعى باۋىرلاستارعا، اۋمىن ەرەكشە اكىمشىلىك رايونىنداعى باۋىرلاستارعا، تايۋاندىق باۋىرلاستارعا جانە شەتەلدەگى چياۋمين باۋىرلاستارعا ىقىلاستى سالەم جولدادى، ۇزاق ۋاقىتتان بەرى جۇڭگونىڭ قۇرىلىس ىستەرىنە كوڭىل بولگەن، قولداۋ كورسەتكەن دوس مەملەكەتتەرگە جانە حالىقاراداعى دوستارعا شىن جۇرەكتەن العىس ايتتى.

شي جينپيڭ بىلاي دەپ اتاپ كورسەتتى: 77 جىلدان بەرى، پارتيامىز حالىقتى ىنتىماقتاستىرىپ جانە باستاپ، قاجىماي - تالماي كۇرەس جۇرگىزىپ، ەكونوميكانىڭ تەز قارقىنمەن دامۋى مەن قوعامنىڭ ۇزاق ۋاقىت ورنىقتى بولۋى سىندى ەكى ۇلكەن كەرەمەتتى جاراتىپ، جاپپاي دوڭگەلەك داۋلەتتى قوعام قۇرۋ سىندى ءبىرىنشى 100 جىلدىق كۇرەس نىساناسىن جۇزەگە اسىرىپ، جاپپاي سوتسياليستىك وسىزاماندانعان قۇدىرەتتى ەل قۇرۋ سىندى ەكىنشى 100 جىلدىق كۇرەس نىساناسىنا قاراي ەرلىكپەن العا تارتۋدا. وسى ساتتە، ءبىز جاڭا جۇڭگونىڭ قول جەتكىزگەن دۇنيەنى جالت قاراتقان تابىستارىن شەكسىز ماقتانىش ەتەمىز، جۇڭگو ۇلگىسىندەگى وسىزامانداندىرۋدىڭ نۇرلى بولاشاعىنا كامىل سەنەمىز.

شي جينپيڭ بىلاي دەپ باسا دارىپتەدى: بيىل جىل باسىنان بەرى، بۇكىل پارتيادا، بۇكىل ەلدە جوعارىدان تومەنگە دەيىن قايراتتانا العا ۇمتىلىپ، قۇلشىنا ايانباي شايقاسىپ، ”15 - بەسجىلدىق“ جوبانى جاساپ جانە اتقارىپ، ءار جاقتاعى قىزمەتتەردى تىڭعىلىقتى ىلگەرىلەتتى، ەلىمىز ەكونوميكاسى قىسىمعا توتەپ بەرىپ العا ىلگەرىلەپ، جاڭالانۋعا، ساپالىلانۋعا قاراي بەت الىپ، قۋاتتى سەرپىمدىلىك پەن ومىرشەڭ كۇشىن ايگىلەدى، پارتيا مەن مەملەكەت ىستەرىندە تىڭ ىلگەرىلەۋشىلىكتەرگە، تىڭ تابىستارعا قول جەتتى. ءبىز ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، رەفورما جاساۋدى، ەسىك اشۋدى ونان ارى تەرەڭدەتىپ، دامۋ مەن حاۋىپسىزدىكتى اناعۇرلىم ويداعىداي ءبىر تۇتاس جوسپارلاپ، ەكونوميكانىڭ ۇزدىكسىز جاڭالانۋعا، ساپالىلانۋعا، جاقسارۋعا قاراي بەت الۋىن ىلگەرىلەتىپ، حالىق تۇرمىسىن شىن مانىندە قامتاماسىز ەتىپ جانە جاقسارتىپ، تۇتاس جىلدىق نىسانا - مىندەتتەردى قۇلشىنا ورىنداپ، ”15 - بەسجىلدىقتىڭ“ تاماشا باستاماسىن جۇزەگە اسىرۋىمىز كەرەك.

شي جينپيڭ بىلاي دەپ اتاپ كورسەتتى: ءبىز ”ءبىر ەل، ەكى ءتۇزىم“، ”شياڭگاڭدى شياڭگاڭدىقتار باسقارۋ“، ”اۋمىندى اۋمىندىقتار باسقارۋ“، وسكەلەڭ اۆتونوميا باعىتىن بۇلجىماي دايەكتىلەندىرىپ، شياڭگاڭنىڭ، اۋمىننىڭ مەملەكەتتىڭ دامۋ كەلەلى جاعدايىنا اناعۇرلىم ويداعىداي توعىسۋىن جانە قىزمەت وتەۋىن قولداپ، ۇزاق ۋاقىت گۇلدەنىپ - كوركەيۋدى، ورنىقتىلىقتى ساقتاۋىمىز كەرەك. ەكى جاعالاۋدىڭ اۋىس - كۇيىسىن، سەلبەستىگىن تەرەڭدەتىپ، ”تايۋاندى دەربەستەندىرۋدى“ كوزدەيتىن بولشەكتەۋشى كۇشتەرگە باتىل سوققى بەرىپ، سىرتقى كۇشتەردىڭ كيلىگۋىنە قارسى تۇرىپ، ەكى جاعالاۋ قاتىناسىنىڭ بەيبىت دامۋىن ىلگەرىلەتىپ، وتاندى بىرلىككە كەلتىرۋ ۇلى ءىسىن ىلگەرىلەتۋىمىز كەرەك.

شي جينپيڭ بىلاي دەپ باسا دارىپتەدى: ءبىز دەربەس، ءوز - وزىنە قوجايىن بولۋ سىندى بەيبىت ديپلوماتيالىق ساياساتقا تاباندى بولىپ، ءتورت ۇلكەن الەمدىك باستامانىڭ تياناقتانۋىن ىلگەرىلەتىپ، ادامزات تاعدىرلاس ورتاق تۇلعاسىن قۇرۋدى ىلگەرىلەتىپ، وزگەرىس پەن بىلىقپالىق قاباتتاسقان دۇنيە جۇزىنە اناعۇرلىم كوپ ايقىندىلىق جانە وڭ ەنەرگيا ۇستەۋىمىز كەرەك.

دۋماندى مۋزيكا ءۇنى ىشىندە جۇڭگولىق، شەتەلدىك قوناقتار، دوستار توست كوتەرىپ، جۇڭحۋا حالىق رەسپۋبليكاسى قۇرىلعاندىعىنىڭ 77 جىلدىعىن بىرگە قۇتتىقتادى، جۇڭگونىڭ گۇلدەنىپ - كوركەيۋىن، حالىقتىڭ باقىتتى، امان - ەسەن بولۋىن تىلەدى، جۇڭگو حالقى مەن دۇنيە جۇزىندەگى ءار ەل حالقى دوستىعىنىڭ ماڭگى جالعاسۋىنا تىلەكتەستىك ءبىلدىردى.

قوناعاسىعا قاتىناسقانداردان تاعى بەيجيڭدەگى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، ورتالىق اسكەري ىستەر كوميتەتىنىڭ ورىنباسار ءتوراعالارى، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىقتارى، مەملەكەتتىك كەڭەستىڭ ورىنباسار زۇڭليلەرى، مەملەكەتتىك كەڭەستىڭ مۇشەلەرى، مەملەكەتتىك باقىلاۋ - تەكسەرۋ كوميتەتىنىڭ مەڭگەرۋشىسى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستىڭ ورىنباسار ءتوراعالارى جانە باسشىلىق مىندەتىنەن شەگىنگەن جولداستار، سونداي - اق كەزىندە ورتالىق اسكەري ىستەر كوميتەتىنىڭ مۇشەسى مىندەتىن وتەگەن جولداستار بار.

ورتالىقتاعى پارتيا، ۇكىمەت، ارميا ورىندارىنىڭ، بۇقارالىق ۇيىمداردىڭ قاتىستى تاراۋلارىنىڭ جانە بەيجيڭ قالاسىنىڭ جاۋاپتىلارى، ءارقايسى دەموكراتيالىق پارتيا - توپتار ورتالىق كوميتەتتەرىنىڭ، مەملەكەتتىك ساۋدا - ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەر ۋاكىلدەرى، بەيجيڭدەگى ەڭبەك ءسىڭىرىپ، داڭققا يە بولىپ ماداقتالىپ - سيلانعاندار ۋاكىلدەرى، مەملەكەتتىك ەڭبەك ەرلەرى مەن وزات تۇلعالار ۋاكىلدەرى، ۇلتتار وڭىرلەرىنىڭ ورنىقتىلىعىنا، دامۋىنا، ىنتىماعىنا ماڭىزدى ۇلەس قوسقان از ۇلت ۋاكىل قايراتكەرلەرى، بەيجيڭدەگى ءبىر ءبولىم شياڭگاڭ ەرەكشە اكىمشىلىك رايونى قايراتكەرلەرى، اۋمىن ەرەكشە اكىمشىلىك رايونى قايراتكەرلەرى، تايۋاندىق باۋىرلاستار جانە حۋاچياۋ، حۋارىندار ۋاكىلدەرى، ءار ەلدىڭ جۇڭگودا تۇراتىن ەلشىلەرى، حالىقارالىق ۇيىمداردىڭ جۇڭگودا تۇراتىن ۋاكىلدەرى، ءبىر ءبولىم شەتەلدىك ماماندار قاتارلىلار دا قوناعاسىعا قاتىناستى.