شي جينپيڭ برۋنەي سۇلتانى حاسانالمەن جۇڭگو مەن برۋنەيدىڭ ديپلوماتيالىق قاتىناس ورناتقاندىعىنىڭ 35 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگىنىڭ 9 - ايدىڭ 30 - كۇنى بەيجيڭنەن بەرگەن حابارى. 9 - ايدىڭ 30 - كۇنى مەملەكەت ءتوراعاسى شي جينپيڭ برۋنەي سۇلتانى حاسانالمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قاتىناس ورناتقاندىعىنىڭ 35 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: جۇڭگو مەن برۋنەيدىڭ ءداستۇرلى دوستىعى ارىدان جالعاسىپ، ۋاقىت وتكەن سايىن بەكەمدەلە ءتۇستى، ەكى ەل قول ۇستاسا وتىرىپ وسىزامانداندىرۋ ۇردىسىندە ۇلكەن - كىشى ەلدەردىڭ ءوزارا قۇرمەت ەتۋىنىڭ، تەڭ تۇرعىدا مامىلە جاساۋىنىڭ، بىرگە دامۋىنىڭ تيپتىك ۇلگىسىن ورناتتى. ديپلوماتيالىق قاتىناس ورناتقان 35 جىلدان بەرى، جۇڭگو مەن برۋنەيدىڭ ساياسي ءوزارا سەنىمدىلىگى ۇزدىكسىز تەرەڭدەدى، ءار سالاداعى سەلبەستىك جەتىستىگى سۇبەلى بولدى، گۋمانيتارلىق اۋىس - كۇيىسى ونان ارى جيىلەدى. بىلتىر حاسانال سۇلتان جۇڭگودا مەملەكەتتىك ساپاردا بولىپ، ەكى جاق جۇڭگو − برۋنەي تاعدىرلاس ورتاق تۇلعاسىن بىرگە قۇرۋ جونىندە ماڭىزدى ورتاق تانىمعا كەلىپ، ەكى ەل قارىم - قاتىناسىنىڭ جاڭا تاريحي دامۋ كەزەڭىنە وتۋىنە جەتەكشىلىك ەتتى.

شي جينپيڭ بىلاي دەپ باسا دارىپتەدى: مەن جۇڭگو − برۋنەي قاتىناسىنىڭ دامۋىنا ايرىقشا ءمان بەرەمىن، حاسانال سۇلتانمەن بىرگە قۇلشىنىپ، ەكى ەلدىڭ ديپلوماتيالىق قاتىناس ورناتقاندىعىنىڭ 35 جىلدىعىن وراي ەتىپ، ءداستۇرلى دوستىقتى جالعاستىرىپ، دامۋ ستراتەگياسىن ءتۇيىلىستىرۋدى كۇشەيتىپ، ءوزارا پايدا جەتكىزۋ سەلبەستىگىن ۇزدىكسىز تەرەڭدەتىپ، جۇڭگو − برۋنەي تاعدىرلاس ورتاق تۇلعاسى قۇرىلىسىنىڭ ۇزدىكسىز تەرەڭدەۋىن، ناقتىلانۋىن ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتىپ، ءوڭىردىڭ گۇلدەنۋى مەن ورنىقتىلىعىنا اناعۇرلىم زور ۇلەس قوسۋدى قالايمىن.

حاسانال مىنالاردى ءبىلدىردى: ديپلوماتيالىق قاتىناس ورناتقان 35 جىلدان بەرى، برۋنەي مەن جۇڭگو ەكى ەل باستان - اياق ءوزارا سەنىم ارتىپ، ءوزارا قۇرمەت ەتىپ، ءوزارا ءتۇسىنىسىپ كەلەدى. 2025 - جىلى ەكى ەل تاعدىرلاس ورتاق تۇلعا قۇرۋ جونىندە ماڭىزدى ورتاق تانىمعا كەلدى. مەن برۋنەي مەن جۇڭگونىڭ ديپلوماتيالىق قاتىناس ورناتقاندىعىنىڭ 35 جىلدىعىن وراي ەتىپ، ەكى ەل قاتىناسىنىڭ دانەكەرىن ونان ارى نىعايتىپ، ەكونوميكا - ساۋدا، قارجى قوسۋ، مەملەكەت قورعانىسى، گۋمانيتارلىق ىستەر سياقتى سالالارداعى اۋىس - كۇيىستى، سەلبەستىكتى تەرەڭدەتىپ، ەكى ەلدىڭ گۇلدەنۋىن، العا باسۋىن قول ۇستاسا جۇزەگە اسىرىپ، ەكى ەل حالقىن اناعۇرلىم ويداعىداي يگىلىككە كەنەلتۋدى ءۇمىت ەتەمىن.