وتاردان قايتار كوش جولىندا

ماقالاسىن جازىپ سۋرەتتەرىن تۇسىرگەن: نۇرقىزىر ياسىن ۇلى

2015.03.03 15:59  

　　قورالى قوي قاسات قاردى بۇزىپ ساي اۋزىنا شىقتى

　　قوي جىلى كىرىپ، بايتاق وتان دالاسىندا ءدۇبىرلى كوكتەم مەرەكەسى دۋماندى تويلانىپ جاتقان ساتتەردە، «تاۋ ساعالاپ، سۋ جاعالاپ» دەگەندەي شارۋا قامىمەن قىس اياعىنداعى كۇن رايىنىڭ قاباعىن باعىپ قىستاۋدا جاتقان قارت باقتاشى مەن كوكتەۋلىككە قاراي كوشەتىن مەزگىلدى اسىعا كۇتىپ تاعاتسىزداناتىن، الىس وتارلارعا جەڭىلدەپ قانا كوشىپ بارعان اتپال ازامات قويشىلاردىڭ حال - جايى مەن تۇرمىس تىرشىلىكتەرى قالاي، بيىلعى وتارداعى مالدىڭ كۇيى قانشالىق، وتاردان قايتار جولدىڭ ازابى شى؟ بۇل جايلاردى كوپ ادام بىلە بەرمەسە كەرەك.

　　بيىلعى شاعان مەزگىلىندە مەن ىلە قازاق اۆتونوميالى وبلىسىنداعى تەكەس، نىلقى، توعىزتاراۋ قاتارلى اۋدانداردىڭ ەكى مىڭعا تارتا مالشىسى ءار جىلى وتارلاپ بارىپ، 300 مىڭ تۇياقتان ارتىق قوي، ەشكى سياقتى ۇساق مالدى قىستاتىپ قايتاتىن بوزادىر اڭعارىنا باردىم. بوزادىرعا بارۋدىڭ قانشالىق قيىندىعى مەن وعان جەتۋدەگى جول ازابى، تارعالاڭ - تايعاق جولداعى حاۋىپ - قاتەر جونىندە بۇدان بۇرىن بوزادىرعا بارعان تالاي اقپارات تىلشىلەرى جازعان ۇلكەن - ۇلكەن ەستەلىكتەردى وقىرماندار كورگەن دە بولار. سوندىقتان بوزادىردىڭ قياداعى قيامەت جولى مەن وعان جەتۋدىڭ حيكاياسى ءوز الدىنا ءبىر اڭگىمە دەپ، ونى قويا تۇرىپ، مەن وسى ساپاردا وتاردان كورگەندەرىمدى قىسقاشا ايتا كەتۋدى ءجون كورىپ وتىرمىن.

　　مەن بارعان كەز مالشىلاردىڭ وتارعا ورنىققاننان كەيىنگى قىسقى ويىن - تاماشا قىزىقتارىن اياقتاتىپ، ورىستەگى مالىنىڭ باس - اياعىن جيىستىرىپ، ات كولىكتەرىن قامداپ، الا كەتەتىن جۇكتەرىن بۋىپ - ءتۇيىپ، ويداعى مال تولدەتەتىن كوكتەۋگە قايتۋدىڭ قامىنا كىرىسكەن «وتار كوشى» كەزى ەكەن. تانىس - بىلىستەر قاۋماجالاي قارسى الىپ، ءبىرى كوشسە ءبىرى شاقىرىپ الىپ كەتىپ، سوڭعى كوشكە دەيىن جىبەرەر ەمەس. اشىق كۇندە كۇنگەيى قوڭىرسىپ جىلىپ، مالعا دا، جانعا دا جايلى بولا قالاتىن وسى جەر، قۇيقالى قۇتتى قويناۋدى اپساتتە اق تۇمان باسىپ، قاپالاقتاپ قار جاۋىپ، اينالانى قىراۋ كومكەرگەن باسقا ءبىر الەمگە وزگەرىپ قالاتىن مەزگىلدەرى ءجيى بولىپ تۇرادى ەكەن. جاعداي جار بەرسە بىرەر جەتى جاتىپ، جەر جادىسىنا قانىق مالشىلار باستاسا بوزادىردىڭ باسىنداعى تۋسىعان يەن - تەگىن قويناۋلارداعى قىستا ەتەككە تارتىپ ءۇيىر - ءۇيىر بولىپ جاتاتىن قوڭىر اڭداردى كورىپ، سۋرەتكە تۇسىرسەم بە دەگەن ءۇمىتىم دە جوق ەمەس ەدى. وعان جەتپىسكە جەتىپ ۇلگىرگەن جاس پەن دەنساۋلىق جاعدايىم جار بەرمەس، وسى ساپاردا وتارداعى مالشىلار تۇرمىسى مەن وتار كوشىنەن كورگەندەرىمدى شاما - شارقىم جەتكەنشە فوتوعا تۇسىرسەم دە «تاقياما تار كەلمەس» دەپ، بىرنەشە كۇن عانا ەرۋ بولىپ، ءبىر كوشپەن ەرىپ مەن دە قايتتىم. قالعان ايتارىمدى وسى ساپاردا تۇسىرگەن مىنا سۋرەتتەرىم سويلەسىن.

　　كەلۋ قاينارى: حالىق تورابى