بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى>>ونەگە

شينجياڭنىڭ 60 جىلدىعىنا ارنالعان فيلىمدە رولعا شىققان قازاق جىگىتپەن سۇحبات

2015.09.16 16:08   كەلۋ قاينارى : حالىق تورابى



  شينجياڭ ۇيعۇر اۆتونوميالى رايونى قۇرىلعانىنىڭ 60 جىلدىعىنا ارنالعان «ارماننىڭ باستالعان جەرى» اتتى فيلىمنىڭ بەيجيڭدەگى العاشقى قويىلىمى 15 – قىركۇيەكتە حالىق قۇرىلتايى سارايىندا وتكىزىلدى. فيلىمدە شينجياڭ حوتان ايماعىنان شاڭحايعا بارىپ ىشكى ولكەدەگى تولىق ورتا كلاسىنا وقۋعا تۇسكەن ايگۇل اتتى وقۋشىنىڭ كوز ءمۇيىز قابىعىنىڭ قابىنۋى سەبەبىنەن ەمحاناعا جاتۋى، ونىڭ ارمان قۋعان جاستىق داۋرەنى جايلى اڭگىمەلەنەدى.

  نۇرعيسا قۇرمانجان ۇلى: بۇل فيلىمگە قالاي اكتەر بولىپ تاڭدالدىڭ؟

  ەرسىن ماقسات ۇلى: «اسقاق ارماننىڭ باستالعان جەرى» اتتى بۇل فيلىم تيانشان كينو ستۋدياسىنىڭ اۆتونوميالى رايون قۇرىلعانىنىڭ 60 جىلدىعىنا ۇسىنعان فيلىمى. بۇل فيلىمگە 2014 – جىلى شىلدەدەن باستاپ مەكتەپتەرگە بارىپ، وقۋشىلار اراسىنان اكتەر تاڭداعان، باستابىندا مەن تەك وقۋشىلار عانا قاتىناسادى دەپ ونشا ەلەمەدىم، كەيىن تيانشان كينو ستۋدياسىنداعى مەملەكەتتىك ءبىرىنشى دارەجەلى اكتەر دالەلقان قادىر ۇلى دەگەن اعامىز حابارلاسىپ، كينودا وقۋشى رولىنا شىعاتىن قازاق ارتيسكە لايىقتى ادام تابىلماي جاتقانىن ايتتى. سول اعامىزدىڭ ايتۋى بويىنشا باعىمدى سىناپ كورمەككە باردىم، وسىلايشا كينو تۇسىرۋگە ءۇش كۇن عانا قالعاندا، مەن كينودا بايان اتتى قازاق وقۋشىنىڭ رولىن الاتىن بولىپ تاڭدالدىم. كەيىن رەجيسسەردەن قالايشا مەنى تاڭداعانى تۋرالى سۇراعانىمدا، ول مەنىڭ مىنەزىمنىڭ كينوداعى بايان ەسىمدى قازاق بالانىڭ مىنەزىنە ساي كەلەتىنىن جانە مەنىڭ وڭىمنەن ءبىر قاراعاندا قازاقى شىراي شىعىپ تۇراتىنىن ايتتى.

  نۇرعيسا قۇرمانجان ۇلى: بۇل سەنىڭ العاش رەت كينودا رول ويناۋىڭ با؟

  ەرسىن ماقسات ۇلى: بۇرىن قازاقستاننىڭ «ورالۋ» اتتى ۇلاسپالى تەلەفيلىمىندە وقۋشى بالانىڭ رولىن العانمىن، ءبىراق، ول فيلىمدە نەگىزگى رولدا ەمەسپىن. ال، بۇل جولى مەن تۇڭعىش رەت كينوداعى نەگىزگى رولداردىڭ بىرىنە شىعىپ وتىرمىن.

  نۇرعيسا قۇرمانجان ۇلى: فيلىمدە رول الۋ وڭاي بولماعان شىعار؟

  ەرسىن ماقسات ۇلى: مەن بۇل فيلىمدە بايان اتتى وقۋشىنىڭ رولىنا شىقتىم، كينوداعى بايان 15 جاستاعى تولىق ورتا وقۋشىسى، مىنەزى اشىق، اقكوڭىل، اشىق جارقىن بالا. مەن بولسام 20 نەشە جاستاعى جىگىتپىن، كينودا وقۋشىنىڭ رولىن جاقسى سومداۋ ءۇشىن 15 جاستاعى «جۇگىرىپ – سەكىرىپ» جۇرگەن بالا كەزگە قايتا ورالۋىم قاجەت بولدى، وسى جاعى ءبىرتالاي قيىندىق تۋدىردى، ايتسەدە، وقۋشى بالالارمەن بىرگە كينو ءتۇسىرىپ جۇرگەن ورايدان پايدالانىپ، كينوداعى وبرازعا بارىنشا بەيىمدەلدىم دەپ ويلايمىن.

  نۇرعيسا قۇرمانجان ۇلى: الدا قانداي جوسپارلارىڭ بار؟

  ەرسىن ماقسات ۇلى: مەن جاقىندا ۇرىمجىدە «تورەفيلىم» مادەنيەت تاراتۋ سەرىكتىگى دەپ سەرىكتىك اشتىم. الدا وزدەرى وسىنداي شاعىن سەرىكتىك اشقان دوستارىممەن تىزە قوسا وتىرىپ، تاماشا ءبىر جوبالاردى قولعا الىپ جاتىرمىز، الدا ونىڭ ناتيجەسىن كورە جاتارسىزدار.

  نۇرعيسا قۇرمانجان ۇلى: قازىر قانداي جۇمىسپەن اينالىسىپ ءجۇرسىڭ؟

  ەرسىن ماقسات ۇلى: قازىر شينجياڭ ءتاڭىرتاۋ تورابىنىڭ قازاق بولىمىندە ءتىلشى بولىپ ىستەيمىن، مۇنان سىرت، جاڭاعى ءوزىم اشقان سەرىكتىكتىڭ جۇمىستارىمەن ابىگەر بولامىن.

  نۇرعيسا قۇرمانجان ۇلى: كينوعا ءتۇسۋ تۋرالى بۇرىن ارمانداعان با ەدىڭ؟ بولاشاقتا وراي بولىپ جاتسا وسى جاعىندا ۇزدىكسىز تالپىنۋ ويىڭ بار ما؟

  ەرسىن ماقسات ۇلى: بالا كۇندە بارىمىزدە دە الۋان ارمان بولادى، مەن بالا كۇنىمدە كينودا، تەلەفيلدەردە رولعا شىقسام دەپ ارمانداعانمىن، مىنە بۇگىن سول ارمانىم ورىندالىپ جاتىر. الداعى جەردە وسىنداي ورايلار بولىپ جاتسا، تاعى دا ۇزبەي تالپىنىپ، ءوز ونەرىمدى جەتىلدىرسەم دەپ ويلايمىن.

  نۇرعيسا قۇرمانجان ۇلى: كينو ءتۇسىرۋ بارىسىندا قانداي قىزىقتى جاعدايلار بولدى؟

  ەرسىن ماقسات ۇلى: شاڭحايدا كينو ءتۇسىرىپ جۇرگەندە بولعان ءبىر قىزىقتى ءىستى ايتىپ بەرەيىن.

  كينوعا كورىنىس الۋ بارىسى اسا ماشاقاتتى، تاڭ بوزىنان تۇرىپ، ەل ورىنعا جاتار مەزگىلدە قايتىپ ورالامىز دا، توسەككە قۇلاي كەتەمىز. تۇسىرۋگە جاۋاپتى ادامدار ەرتەڭگى ءتۇسىرۋ جۇمىسىنا ارناپ، اشىق كۇن مەن بۇلتتى كۇنگە ەكى ءتۇرلى ءتۇسىرىلىم جوسپارىن جاسايدى. سونداي ءبىر كۇنى ءتۇس اۋا شاڭحايدىڭ اۋا رايى كەنەتتەن بۇزىلىپ، اشىق كۇنگە ارنالعان ءتۇسىرىلىم جوسپارى اياقسىز قالىپ، رەجيسسەر بىردەن قايتا جوسپارلاۋعا ۇلگىرمەدى دە، بىزگە جارىم كۇندىك دەمالىس بەردى. كەلگەلى دەمالماعان جاستار تۇگەل قۋانىپ جاتىر، مەن دە قۋانعانىمنان: «جۇرىڭدەر، مەن سەندەردى قوناق قىلايىن، ەرەن بازارعا بارىپ قالاعاندارىڭدى الىڭدار، اقشاسىن مەن تولەيىن»، - دەدىم. بۇعان ءبارى تاڭىرقاپ: «بۇگىن قانداي كۇن»، - دەپ سۇراستى. قاسىمىزدا تۇرعان ءبىر حانزۋ جىگىت: «بۇگىن باياننىڭ تۋىلعان كۇنى»، - دەمەسى بار ما. ءبارى مۇنى شىن كورىپ، ماعان ارناپ تۋعان كۇن ءانىن شىرقادى، مەن دە قىزىق بولسىن دەپ ولاردىڭ ىڭعايىنا باقتىم. كەشتە مەيمانحاناداعى بولمەدە جاتسام، بىرەۋ كەلىپ توكتى ءسوندىردى، ىلە – شالا ەسىكتەن قالىڭ ادام تۋىلعان كۇن ءانىن شىرقاپ كىرىپ كەلدى، قولدارىندا ۇلكەن بالكۇلشە!! بالكۇلشەگە مەنىڭ كينودا مىنەتىن اقبوزاتىمنىڭ نوبايىن سالىپتى. شىنىندا تۋىلعان كۇنىم بولماسا دا، مەن قاتتى اسەرلەندىم. وسى ءىس مەنىڭ ەسىمنەن كەتپەيدى.

  نۇرعيسا قۇرمانجان ۇلى: كينو ءتۇسىرۋ بارىسىندا قانداي وكىنىشتەر بولدى؟

  ەرسىن ماقسات ۇلى: بۇل كينودا مەن تۇڭعىش رەت باس رولداردىڭ ءبىرىن العاندىقتان، كەمشىلىكتەر كوپ بولدى. كەيىن وراي بولىپ جاتسا مۇنىڭ ورنىن تولتىرا جاتارمىن. كينو ءتۇسىرۋ ءۇشىن شاڭحايعا اتتاناردان ءۇش كۇن بۇرىن ناعاشى اپام قايتىس بولدى، العاش وسى رولعا تاڭدالعان كەزىمدە ناعاشى اپام قاتتى قۋانعان بولاتىن، كورشى – كولەمگە ايتىپ، «كەلەر جىلى، قۇداي بۇيىرسا، ەرسىنىم تۇسكەن كينونى كورەمىن» دەپ جۇرەتىن. امال قانشا، كورە الماي كەتتى. كوز جۇمار الدىندا تۇندەلەتىپ اۋىلعا بارىپ، اپامدى كوزى تىرىسىندە ەڭ سوڭعى رەت كوردىم، شاڭحايعا بارۋ ويىنان اينىسام دا، تۋىس – تۋعاندارىم «سەنى كينودان كورۋ ناعاشى اپاڭنىڭ ارمانى بولاتىن، ەندى سول ارمانىن اياقسىز قالدىرما» دەپ اقىل ايتتى، سونىمەن، اپاما توپىراق سالا الماي، جىلاي – جىلاي شاڭحايعا اتتانىپ كەتتىم، اپامدى سوڭعى ساپارعا اتتاندىرىپ سالا الماعانىما قاتتى وكىنەمىن.

  وسى ورايدى پايدالانا وتىرىپ، تيانشان كينو ستۋدياسىنا، وسىنداعى بارلىق رەجيسسەرلەرگە وسىنداي وراي بەرگەنى ءۇشىن كوپ راحىمەت ايتامىن. ونان سوڭ، ءوزىم قىزمەت ىستەپ جاتقان ءتاڭىرتاۋ تورابىنداعى باسشىلار مەن قىزمەتتەستەرىمە، قازاق ءبولىمىنىڭ جاۋاپتىسى بولىپ وتىرعان سايراش تۇرارجان قىزىنا راحىمەتىمدى ايتامىن، ءبىر قىزمەتكەر ءۇشىن ءۇش اي ۋاقىت بەرىپ، قولداپ – قۋاتتاۋ وڭاي ەمەس.

  قولداپ – قۋاتتاعان اتا – انام مەن دوس – جاراندارىما كوپ راحىمەت، ناعاشى اپام قايتىس بولعان سوڭ كوڭىل – كۇيىم تۇسىڭكى جۇرگەندە، ءبارى تەلەفوندا كوڭىلىمدى اۋلاپ، ماعان دەم بەرىپ ءجۇردى.

  كەلۋ قاينارى: حالىق تورابى

【1】 【2】 【3】 【4】 【5】 【6】 【7】 【8】 【9】 
جاۋاپتى رەداكتورى : نۇرعيسا قۇرمانجان ۇلى

 سۋرەت