ۇلىڭگىر اقىندارىن ۇكىلەدى

2016.04.20 15:52   كەلۋ قاينارى : حالىق تورابى

　　 ساعىنبەك رابات ۇلى مەن قابىلقان ايتقابىل ۇلى التايدان حابارلايدى. اقىندار ايتىسى ــ ۇلتىمىزدا جالپىلىق سيپات العان، باۋراۋ قۋاتى توتەنشە كۇشتى مادەنيەت جاۋھارى. ۇلتىمىزدا ونى تىڭداۋعا قىزىقپايتىن جان جوق، ەسىن جيىپ، ەتەگىن جاپقان بالادان اق ساقالدى اتا، اق سامايلى اناعا دەيىن ايتىس دەسە ىشكەن اسىن جەرگە قويادى. بۋرىلتوعاي اۋداندىق حالىق ۇكىمەتى ۇيىمداستىرعان، كوكاعاش اۋىلى مەن اۋداندىق مادەنيەت - دەنە تاربيە مەكەمەسى مىندەتىنە العان بۋرىلتوعاي اۋدانىنىڭ 26 - كەزەكتى اقىندار ايتىسى جانە مادەنيەت - دەنە تاربيە قيمىلى ءساۋىردىڭ 16 - كۇنى تۇستەن بۇرىن بۋرىلتوعاي اۋدانىنىڭ مادەنيەت قيمىل ورتالىعىندا مەملەكەت انىمەن باستالىپ، ءساۋىردىڭ 17 - كۇنى تۇستەن بۇرىن ايتىس تۋى اۋداننىڭ كەلەسى كەزەكتى اقىندار ايتىسىن وتكىزەتىن جەتارال قالاشىعىنا وتكىزىلۋىمەن تابىستى اياقتاپ، بيىل مامىر جانە ماۋسىم ايىندا وسى اۋدان وتكىزۋدى مىندەتىنە العان التاي ايماقتىق جانە ىلە قازاق اۆتونوميالى وبلىستىق اقىندار ايتىسىنا مىعىم نەگىز قالاندى.

　　ايتىستىڭ بەت اشارى اۋداندىق كوركەمونەر ۇيىرمەسىنىڭ ونەرپازدارى ورىنداعان داۋلەت حالىق ۇلىنىڭ «اۋىلىم» اتتى كۇيىمەن باستالىپ، ءوز كۇن تارتىبىمەن جالعاسىن تاۋىپ جاتتى. «ءبىر اقىننىڭ ساۋ بولسا ءتىل مەن جاعى، مىڭ ادامنىڭ ايتىلار مۇڭ مەن زارى» دەگەندەي، الامان مايدانعا اۋىزدىعىمەن الىسىپ شىققان اقىندار ەل جايى مەن حالىق تۇرمىسى، ۇلتتاردىڭ ۇلى ىنتىماعىن جىرلاسا، ءانشى-كۇيشى، تەرمەشىلەر دە تامىلجىعان ءتاتتى ءان، كۇمبىرلى كۇيلەرىمەن كورەرمەننىڭ كوڭىلىن ءبىر سەرپىلتىپ تاستادى.

　　ءبىر جارىم كۇندىك ۋاقىتپەن وتكىزىلگەن بۇل رەتكى اقىندار ايتىسى كەزىندە، دويبى، بۇقاشا تارتىس، قول باسۋ، قازاق كۇرەسى، حيسا - داستان ايتۋ، كۇي ورىنداۋ جانە تەرمە ايتۋ سەكىلدى بۇقارالىق مادەنيەت - دەنە تاربيە قيمىلى دا وتكىزىلىپ، جارىسقا قاتىناسقاندار زەيىن - زەردە، ەستە ساقتاۋ قابىلەتى جانە كۇش - قايرات جاعىنان سىنالدى. سوڭىندا، دويبى جارىسىنان ءۇش دارەجە بويىنشا قاينوللا قاتارلى 3 ادام؛ بۇقاشا تارتىستان ءۇش دارەجە، 7 سالماق پارقى بويىنشا 100 كيلوگرام سالماقتان ەركىنبەك قاتارلى 21 ادام؛ قول باسۋدان ءۇش دارەجە، 5 سالماق پارقى بويىنشا 100 كيلوگرام سالماقتان ءمامي قاتارلى 15 ادام؛ قازاق كۇرەسىنەن ءۇش دارەجە، 5 سالماق پارقى بويىنشا 100 كيلوگرام سالماقتان ەرجان قاتارلى 15 ادام؛ حيسا -داستان ايتۋدان ءۇش دارەجە بويىنشا مەيرانبەك قالياسقار ۇلى قاتارلى 3 ادام؛ كۇي ورىنداۋدان ءۇش دارەجە بويىنشا تىلەك شاكەرمۇرات ۇلى قاتارلى 3 ادام؛ تەرمە ايتۋدان ءۇش دارەجە بويىنشا شۇعىلا جالەلبەك قىزى قاتارلى 3 ادام سيلاندى.

　　ءساۋىردىڭ 16 - كۇنى ايتىسقا تۇسكەن 16 اقىننان سارالانعان 10 اقىن ايتىستىڭ ەكىنشى كۇنگى شەشۋشى جارىسىنا ءتۇسىپ، ءادىلقازىلاردىڭ ناق مايداندا ءنومىر قويىپ باعالاۋىمەن جاڭاگۇل كورىمباي قىزى قاتارلى 4 اقىن شابىتتاندىرۋ سيلىعىنا، شالقار قاۋقان ۇلى قاتارلى 3 اقىن ءۇشىنشى دارەجەلى سيلىققا، ورال ءرات ۇلى مەن سامۇرىق ەركىن قىزى ەكىنشى دارەجەلى سيلىققا يە بولسا، بۇل رەتكى ايتىستىڭ باس جۇلدەسىن جەڭىسبەك مۇقاناي ۇلى جەڭىپ الدى. جۇيرىك ونەرپاز، قارىمدى جىگىت جانە جۇلدەلى اقىندار اقشا جانە سيلىق كۋالىگىمەن ماراپاتتالدى.

　　بۇل رەتكى ايتىستىڭ باستالۋ سالتىن بۋرىلتوعاي اۋداندىق حالىق ۇكىمەتىنىڭ ورىنباسار اكىمى ورلەۋقان اسىلقان ۇلى باسقارسا، اياقتالۋ سالتىن اۋداندىق مادەنيەت - دەنە تاربيە مەكەمەسى پارتگرۋپپاسىنىڭ شۋجيى بادەك موتان ۇلى باسقارىپ، سيلىقتى اۋداندىق پارتكومنىڭ ورىنباسار شۋجيى، اۋداندىق حالىق ۇكىمەتىنىڭ اكىمى سەرىك قابىكەن ۇلى، اۋداندىق ساياسي كەڭەستىڭ ءتوراعاسى گۇلنۇر ءابىل قىزى، اۋداندىق پارتكومنىڭ تۇراقتى مۇشەسى، بىرلىكساپ ءبولىمىنىڭ باستىعى ساعىنبەك جاناتبەك ۇلى، اۋداندىق پارتكومنىڭ تۇراقتى مۇشەسى، ۇگىت ءبولىمىنىڭ باستىعى باقىتگۇل ۋاھاپ قىزى تاراتتى.

　　قۇرمەتتى توراپتاستار، ەندى وسى رەتكى قيمىلدىڭ كوز ايىم ساتتەرىن تاماشالاڭىزدار.

　　(اۆتوردىڭ ٵدىرىسى: التاي گازەتى مەكەمەسى، التاي اقپارات تورابى)

　　كەلۋ قاينارى: حالىق تورابى