400 جالعان ۋنيۆەرسيتەتتىڭ تىزىمدىگى

جالعان ۋنيۆەرسيتەتتەردى قالاي پارىقتاۋعا بولادى

2016.05.25 15:14   كەلۋ قاينارى : حالىق تورابى

　　حالىق تورابى، 20 – مامىر، بەيجيڭ. جۋىردا حالىق اراسىنداعى وقۋ – اعارتۋعا قىزمەت ەتۋ تورابى ــ «ۋنيۆەرسيتەتكە ءتۇسۋ تورابى» 5 – توپتاعى جۇڭگوداعى جالعان ۋنيۆەرسيتەتتەردەن ساقتاندىرۋ تىزىمدىگىن جاريالادى. تىزىمدىكتە 73 جالعان ۋنيۆەرسيتەت بار، بۇل ۋنيۆەرسيتەتتەر 16 ولكەدە بولىپ، مۇنىڭ ىشىندە بەيجيڭ 23 جالعان ۋنيۆەرسيتەتپەن تىزىمدىكتىڭ ءبىرىنشى ورنىندا تۇر. مۇنان سوڭ، شاندۇڭنان 8 جالعان ۋنيۆەرسيتەت، شاڭحاي مەن سىچۋاننىڭ اربىرىنەن 7دەن جالعان ۋنيۆەرسيتەت تىزىمدىككە ەنگىزىلگەن. 2013 – جىلى «ۋنيۆەرسيتەتكە ءتۇسۋ تورابى» تۇڭعىش رەت «جۇڭگوداعى جالعان ۋنيۆەرسيتەتتەردەن ساقتاندىرۋ تىزىمدىگىن» جاريالاعاننان بەرى، قازىرگە دەيىن بەس توپتا جيىنى 400دەن استام جالعان ۋنيۆەرسيتەتتىڭ اتى جاريالانعان.

　　جالعان ۋنيۆەرسيتەتتەردىڭ جاعدايى كۇردەلى، اتا – انالار مەن وقۋشىلار قايتكەندە مەكتەپتىڭ شىن – جالعانىنا كوز جەتكىزە الادى؟ مامانداردىڭ ەسكەرتۋىنە قاراعاندا، جالعان ۋنيۆەرسيتەتتەردى پارىقتاۋ ءۇشىن، وقۋ – اعارتۋ مينيسترلىگى مەن وقۋ – اعارتۋ مەڭگەرمەسىنىڭ توراپتارىنداعى ۋنيۆەرسيتەتتەر تىزىمدىگى ىشىنەن ىزدەستىرىپ كورۋگە بولادى. مۇنان باسقا، جالعان ۋنيۆەرسيتەتتەردى تومەندەگى ءتورت ءتۇرلى تاسىلمەن پارىقتاۋعا بولادى.

　　ۋنيۆەرسيتەت اتى قالىپتى ۋنيۆەرسيتەت اتىنا وتە ۇقسايدى

　　جالعان ۋنيۆەرسيتەتتىڭ اتى ادەتتە قالىپتى ۋنيۆەرسيتەتتىڭ اتىمەن ۇقساپ كەتەدى، تومەندەگى كەستەدەگى 7 جالعان ۋنيۆەرسيتەت قالىپتى ۋنيۆەرسيتەتتەردىڭ تاريحتا پايدالانعان اتىن نەمەسە قالىپتى ۋنيۆەرسيتەتتەردىڭ قىسقارتىلعان اتىن پايدالانعان. مىسالى، «حۋابەي گو – ي ينستيتۋتى» جاڭا جۇڭگو قۇرىلۋدان بۇرىنعى حۋابەي گو – ي ينسيتۋتىنىڭ تاريحتاعى اتىن پايدالانعان؛ «بەيجيڭ ەكونوميكا ينستيتۋتى» استانا ەكونوميكا – ساۋدا ۋنيۆەرسيتەتىنىڭ 1995 – جىلى بىرىكتىرىلگەننەن بۇرىن پايدالانعان مەكتەپ اتىن قويىپ العان؛ «بەيجيڭ قۇرىلىس ينجەنەريا ينستيتۋتى» بەيجيڭ قۇرىلىس ۋنيۆەرسيتەتىنىڭ تاريحتاعى اتىن پايدالانعان.

　　مەكتەپ تورابىنىڭ ادىرىسىنەن كورىپ الۋعا بولادى

　　وقۋ – اعارتۋ مينيسترلىگى بەكىتكەن جوعارى مەكتەپتەردىڭ رەسمي توراپتارىنىڭ ءادىرىسى ادەتتە «.edu.cn» فورماسىندا اياقتايدى، ال جالعان ۋنيۆەرسيتەتتەردىڭ توراپ ءادىرىسى كوبىنشە ساۋدا – فينانس كاسىپورىندارى پايدالاناتىن «.com» قاتارلىلارمەن اقىرلاسادى. كەيبىر جالعان ۋنيۆەرسيەتتەر «.com» بەلگىسىنىڭ الدىنا «-edu» نەمەسە «edu» قاتارلىلاردى جالعاۋ ارقىلى وقۋشىلار مەن اتا – انالاردى الجاستىرادى.

　　توراپ مازمۇنىنىڭ جاڭالانۋى باياۋ ءارى قوقسىق ينفورماتسيالار كوپ بولادى

　　كوپتەگەن جالعان ۋنيۆەرسيتەتتەردىڭ توراپتارىنىڭ جوبالانۋىندا قاتەلىكتەر كوپ بولادى، توراپتاعى «حابارلاندىرۋ»، «اقپارات» قاتارلى مازمۇندار ادەتتە جىل بويى جاڭالانبايدى، ءتىپتى مەكتەپپەن ەشقانداي قاتىسسىز قوقسىق ينفورماتسيالار شىعارىلادى.

　　بايلانىس تاسىلدەرى ادەتتە جالعان بولادى

　　توراپتىڭ استىنا قالدىرىلعان مەكتەپ ورنى، حابارلاسۋ تەلەفونى قاتارلىلار ادەتتە جالعان بولادى. توراپتىڭ ءادىرىسى، ەستەلىككە الدىرۋ ءنومىرى قاتارلىلاردى ونەركاسىپ – ينفورماتسيالاندىرۋ مينيسترلىگىنىڭ تەكسەرۋ جۇيەسىنەن تابىلمايدى.

　　كەلۋ قاينارى: حالىق تورابى